| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၉. ဒုတိယဒုဋ္ဌဒောသသိက္ခာပဒံ
9. Dutiyaduṭṭhadosasikkhāpadaṃ
၃၉၁. တေန သမယေန ဗုဒ္ဓော ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန မေတ္တိယဘူမဇကာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ အဒ္ဒသံသု ဆဂလကံ 1 အဇိကာယ ဝိပ္ပဋိပဇ္ဇန္တံ။ ဒိသ္ဝာန ဧဝမာဟံသု – ‘‘ဟန္ဒ မယံ, အာဝုသော, ဣမံ ဆဂလကံ ဒဗ္ဗံ မလ္လပုတ္တံ နာမ ကရောမ။ ဣမံ အဇိကံ မေတ္တိယံ နာမ ဘိက္ခုနိံ ကရောမ။ ဧဝံ မယံ ဝောဟရိသ္သာမ။ ပုဗ္ဗေ မယံ, အာဝုသော, ဒဗ္ဗံ မလ္လပုတ္တံ သုတေန အဝောစုမ္ဟာ။ ဣဒာနိ ပန အမ္ဟေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ။ တေ တံ ဆဂလကံ ဒဗ္ဗံ မလ္လပုတ္တံ နာမ အကံသု။ တံ အဇိကံ မေတ္တိယံ နာမ ဘိက္ခုနိံ အကံသု။ တေ ဘိက္ခူနံ အာရောစေသုံ – ‘‘ပုဗ္ဗေ မယံ, အာဝုသော, ဒဗ္ဗံ မလ္လပုတ္တံ သုတေန အဝောစုမ္ဟာ။ ဣဒာနိ ပန အမ္ဟေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ။ ဘိက္ခူ ဧဝမာဟံသု – ‘‘မာဝုသော, ဧဝံ အဝစုတ္ထ။ နာယသ္မာ ဒဗ္ဗော မလ္လပုတ္တော ဧဝံ ကရိသ္သတီ’’တိ။
391. Tena samayena buddho bhagavā rājagahe viharati veḷuvane kalandakanivāpe. Tena kho pana samayena mettiyabhūmajakā bhikkhū gijjhakūṭā pabbatā orohantā addasaṃsu chagalakaṃ 2 ajikāya vippaṭipajjantaṃ. Disvāna evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karoma. Imaṃ ajikaṃ mettiyaṃ nāma bhikkhuniṃ karoma. Evaṃ mayaṃ voharissāma. Pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Te taṃ chagalakaṃ dabbaṃ mallaputtaṃ nāma akaṃsu. Taṃ ajikaṃ mettiyaṃ nāma bhikkhuniṃ akaṃsu. Te bhikkhūnaṃ ārocesuṃ – ‘‘pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Bhikkhū evamāhaṃsu – ‘‘māvuso, evaṃ avacuttha. Nāyasmā dabbo mallaputto evaṃ karissatī’’ti.
အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ အာယသ္မန္တံ ဒဗ္ဗံ မလ္လပုတ္တံ ပဋိပုစ္ဆိ – ‘‘သရသိ တ္ဝံ, ဒဗ္ဗ, ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ, ဘန္တေ, ဘဂဝာ ဇာနာတီ’’တိ။ ဒုတိယမ္ပိ ခော ဘဂဝာ။ပေ.။ တတိယမ္ပိ ခော ဘဂဝာ အာယသ္မန္တံ ဒဗ္ဗံ မလ္လပုတ္တံ ဧတဒဝောစ – ‘‘သရသိ တ္ဝံ, ဒဗ္ဗ, ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ, ဘန္တေ, ဘဂဝာ ဇာနာတီ’’တိ။ ‘‘န ခော, ဒဗ္ဗ, ဒဗ္ဗာ ဧဝံ နိဗ္ဗေဌေန္တိ။ သစေ တယာ ကတံ ကတန္တိ ဝဒေဟိ, သစေ တယာ အကတံ အကတန္တိ ဝဒေဟီ’’တိ။ ‘‘ယတော အဟံ, ဘန္တေ, ဇာတော နာဘိဇာနာမိ သုပိနန္တေနပိ မေထုနဓမ္မံ ပဋိသေဝိတာ, ပဂေဝ ဇာဂရော’’တိ! အထ ခော ဘဂဝာ ဘိက္ခူ အာမန္တေသိ – ‘‘တေန ဟိ, ဘိက္ခုဝေ, ဣမေ ဘိက္ခူ အနုယုဉ္ဇထာ’’တိ။ ဣဒံ ဝတ္ဝာ ဘဂဝာ ဥဋ္ဌာယာသနာ ဝိဟာရံ ပာဝိသိ။
Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunadhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhuve, ime bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
အထ ခော တေ ဘိက္ခူ မေတ္တိယဘူမဇကေ ဘိက္ခူ အနုယုဉ္ဇိံသု။ တေ ဘိက္ခူဟိ အနုယုဉ္ဇီယမာနာ ဘိက္ခူနံ ဧတမတ္ထံ အာရောစေသုံ – ‘‘ကိံ ပန တုမ္ဟေ, အာဝုသော, အာယသ္မန္တံ ဒဗ္ဗံ မလ္လပုတ္တံ အညဘာဂိယသ္သ အဓိကရဏသ္သ ကိဉ္စိဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေထာ’’တိ? ‘‘ဧဝမာဝုသော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယသ္သ အဓိကရဏသ္သ ကိဉ္စိ ဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေသ္သန္တီ’’တိ! အထ ခော တေ ဘိက္ခူ မေတ္တိယဘူမဇကေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ဒဗ္ဗံ မလ္လပုတ္တံ အညဘာဂိယသ္သ အဓိကရဏသ္သ ကိဉ္စိ ဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေထာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ‘‘ကထဉ္ဟိ နာမ တုမ္ဟေ, မောဃပုရိသာ, ဒဗ္ဗံ မလ္လပုတ္တံ အညဘာဂိယသ္သ အဓိကရဏသ္သ ကိဉ္စိ ဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Atha kho te bhikkhū mettiyabhūmajake bhikkhū anuyuñjiṃsu. Te bhikkhūhi anuyuñjīyamānā bhikkhūnaṃ etamatthaṃ ārocesuṃ – ‘‘kiṃ pana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၃၉၂. ‘‘ယော ပန ဘိက္ခု ဘိက္ခုံ ဒုဋ္ဌော ဒောသော အပ္ပတီတော အညဘာဂိယသ္သ အဓိကရဏသ္သ ကိဉ္စိဒေသံ လေသမတ္တံ ဥပာဒာယ ပာရာဇိကေန ဓမ္မေန အနုဒ္ဓံသေယ္ယ – ‘အပ္ပေဝ နာမ နံ ဣမမ္ဟာ ဗ္ရဟ္မစရိယာ စာဝေယ္ယ’န္တိ။ တတော အပရေန သမယေန သမနုဂ္ဂာဟီယမာနော ဝာ အသမနုဂ္ဂာဟီယမာနော ဝာ အညဘာဂိယဉ္စေဝ တံ အဓိကရဏံ ဟောတိ ကောစိဒေသော လေသမတ္တော ဥပာဒိန္နော, ဘိက္ခု စ ဒောသံ ပတိဋ္ဌာတိ, သင္ဃာဒိသေသော’’တိ။
392.‘‘Yopana bhikkhu bhikkhuṃ duṭṭho doso appatīto aññabhāgiyassaadhikaraṇassa kiñcidesaṃ lesamattaṃ upādāya pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti. Tato aparena samayena samanuggāhīyamāno vā asamanuggāhīyamāno vā aññabhāgiyañceva taṃ adhikaraṇaṃ hoti kocideso lesamatto upādinno, bhikkhu ca dosaṃ patiṭṭhāti, saṅghādiseso’’ti.
၃၉၃. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
393.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ဘိက္ခုန္တိ အညံ ဘိက္ခုံ။
Bhikkhunti aññaṃ bhikkhuṃ.
ဒုဋ္ဌော ဒောသောတိ ကုပိတော အနတ္တမနော အနဘိရဒ္ဓော အာဟတစိတ္တော ခိလဇာတော။
Duṭṭho dosoti kupito anattamano anabhiraddho āhatacitto khilajāto.
အပ္ပတီတောတိ တေန စ ကောပေန, တေန စ ဒောသေန, တာယ စ အနတ္တမနတာယ, တာယ စ အနဘိရဒ္ဓိယာ အပ္ပတီတော ဟောတိ။
Appatītoti tena ca kopena, tena ca dosena, tāya ca anattamanatāya, tāya ca anabhiraddhiyā appatīto hoti.
အညဘာဂိယသ္သ အဓိကရဏသ္သာတိ အာပတ္တညဘာဂိယံ ဝာ ဟောတိ အဓိကရဏညဘာဂိယံ ဝာ။ ကထံ အဓိကရဏံ အဓိကရဏသ္သ အညဘာဂိယံ? ဝိဝာဒာဓိကရဏံ အနုဝာဒာဓိကရဏသ္သ အာပတ္တာဓိကရဏသ္သ ကိစ္စာဓိကရဏသ္သ အညဘာဂိယံ။ အနုဝာဒာဓိကရဏံ အာပတ္တာဓိကရဏသ္သ ကိစ္စာဓိကရဏသ္သ ဝိဝာဒာဓိကရဏသ္သ အညဘာဂိယံ။ အာပတ္တာဓိကရဏံ ကိစ္စာဓိကရဏသ္သ ဝိဝာဒာဓိကရဏသ္သ အနုဝာဒာဓိကရဏသ္သ အညဘာဂိယံ။ ကိစ္စာဓိကရဏံ ဝိဝာဒာဓိကရဏသ္သ အနုဝာဒာဓိကရဏသ္သ အာပတ္တာဓိကရဏသ္သ အညဘာဂိယံ။ ဧဝံ အဓိကရဏံ အဓိကရဏသ္သ အညဘာဂိယံ။
Aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā. Kathaṃ adhikaraṇaṃ adhikaraṇassa aññabhāgiyaṃ? Vivādādhikaraṇaṃ anuvādādhikaraṇassa āpattādhikaraṇassa kiccādhikaraṇassa aññabhāgiyaṃ. Anuvādādhikaraṇaṃ āpattādhikaraṇassa kiccādhikaraṇassa vivādādhikaraṇassa aññabhāgiyaṃ. Āpattādhikaraṇaṃ kiccādhikaraṇassa vivādādhikaraṇassa anuvādādhikaraṇassa aññabhāgiyaṃ. Kiccādhikaraṇaṃ vivādādhikaraṇassa anuvādādhikaraṇassa āpattādhikaraṇassa aññabhāgiyaṃ. Evaṃ adhikaraṇaṃ adhikaraṇassa aññabhāgiyaṃ.
ကထံ အဓိကရဏံ အဓိကရဏသ္သ တဗ္ဘာဂိယံ? ဝိဝာဒာဓိကရဏံ ဝိဝာဒာဓိကရဏသ္သ တဗ္ဘာဂိယံ။ အနုဝာဒာဓိကရဏံ အနုဝာဒာဓိကရဏသ္သ တဗ္ဘာဂိယံ။ အာပတ္တာဓိကရဏံ အာပတ္တာဓိကရဏသ္သ သိယာ တဗ္ဘာဂိယံ သိယာ အညဘာဂိယံ။
Kathaṃ adhikaraṇaṃ adhikaraṇassa tabbhāgiyaṃ? Vivādādhikaraṇaṃ vivādādhikaraṇassa tabbhāgiyaṃ. Anuvādādhikaraṇaṃ anuvādādhikaraṇassa tabbhāgiyaṃ. Āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyaṃ.
ကထံ အာပတ္တာဓိကရဏံ အာပတ္တာဓိကရဏသ္သ အညဘာဂိယံ? မေထုနဓမ္မပာရာဇိကာပတ္တိ အဒိန္နာဒာနပာရာဇိကာပတ္တိယာ မနုသ္သဝိဂ္ဂဟပာရာဇိကာပတ္တိယာ ဥတ္တရိမနုသ္သဓမ္မပာရာဇိကာပတ္တိယာ အညဘာဂိယာ။ အဒိန္နာဒာနပာရာဇိကာပတ္တိ မနုသ္သဝိဂ္ဂဟပာရာဇိကာပတ္တိယာ ဥတ္တရိမနုသ္သဓမ္မပာရာဇိကာပတ္တိယာ မေထုနဓမ္မပာရာဇိကာပတ္တိယာ အညဘာဂိယာ။ မနုသ္သဝိဂ္ဂဟပာရာဇိကာပတ္တိ ဥတ္တရိမနုသ္သဓမ္မပာရာဇိကာပတ္တိယာ မေထုနဓမ္မပာရာဇိကာပတ္တိယာ အဒိန္နာဒာနပာရာဇိကာပတ္တိယာ အညဘာဂိယာ။ ဥတ္တရိမနုသ္သဓမ္မပာရာဇိကာပတ္တိ မေထုနဓမ္မပာရာဇိကာပတ္တိယာ အဒိန္နာဒာနပာရာဇိကာပတ္တိယာ မနုသ္သဝိဂ္ဂဟပာရာဇိကာပတ္တိယာ အညဘာဂိယာ။ ဧဝံ အာပတ္တာဓိကရဏံ အာပတ္တာဓိကရဏသ္သ အညဘာဂိယံ။
Kathaṃ āpattādhikaraṇaṃ āpattādhikaraṇassa aññabhāgiyaṃ? Methunadhammapārājikāpatti adinnādānapārājikāpattiyā manussaviggahapārājikāpattiyā uttarimanussadhammapārājikāpattiyā aññabhāgiyā. Adinnādānapārājikāpatti manussaviggahapārājikāpattiyā uttarimanussadhammapārājikāpattiyā methunadhammapārājikāpattiyā aññabhāgiyā. Manussaviggahapārājikāpatti uttarimanussadhammapārājikāpattiyā methunadhammapārājikāpattiyā adinnādānapārājikāpattiyā aññabhāgiyā. Uttarimanussadhammapārājikāpatti methunadhammapārājikāpattiyā adinnādānapārājikāpattiyā manussaviggahapārājikāpattiyā aññabhāgiyā. Evaṃ āpattādhikaraṇaṃ āpattādhikaraṇassa aññabhāgiyaṃ.
ကထံ အာပတ္တာဓိကရဏံ အာပတ္တာဓိကရဏသ္သ တဗ္ဘာဂိယံ? မေထုနဓမ္မပာရာဇိကာပတ္တိ မေထုနဓမ္မပာရာဇိကာပတ္တိယာ တဗ္ဘာဂိယာ။ အဒိန္နာဒာနပာရာဇိကာပတ္တိ အဒိန္နာဒာနပာရာဇိကာပတ္တိယာ တဗ္ဘာဂိယာ။ မနုသ္သဝိဂ္ဂဟပာရာဇိကာပတ္တိ မနုသ္သဝိဂ္ဂဟပာရာဇိကာပတ္တိယာ တဗ္ဘာဂိယာ။ ဥတ္တရိမနုသ္သဓမ္မပာရာဇိကာပတ္တိ ဥတ္တရိမနုသ္သဓမ္မပာရာဇိကာပတ္တိယာ တဗ္ဘာဂိယာ။ ဧဝံ အာပတ္တာဓိကရဏံ အာပတ္တာဓိကရဏသ္သ တဗ္ဘာဂိယံ။
Kathaṃ āpattādhikaraṇaṃ āpattādhikaraṇassa tabbhāgiyaṃ? Methunadhammapārājikāpatti methunadhammapārājikāpattiyā tabbhāgiyā. Adinnādānapārājikāpatti adinnādānapārājikāpattiyā tabbhāgiyā. Manussaviggahapārājikāpatti manussaviggahapārājikāpattiyā tabbhāgiyā. Uttarimanussadhammapārājikāpatti uttarimanussadhammapārājikāpattiyā tabbhāgiyā. Evaṃ āpattādhikaraṇaṃ āpattādhikaraṇassa tabbhāgiyaṃ.
ကိစ္စာဓိကရဏံ ကိစ္စာဓိကရဏသ္သ တဗ္ဘာဂိယံ။ ဧဝံ အဓိကရဏံ အဓိကရဏသ္သ တဗ္ဘာဂိယံ။
Kiccādhikaraṇaṃ kiccādhikaraṇassa tabbhāgiyaṃ. Evaṃ adhikaraṇaṃ adhikaraṇassa tabbhāgiyaṃ.
၃၉၄. ကိဉ္စိ ဒေသံ လေသမတ္တံ ဥပာဒာယာတိ လေသော နာမ ဒသ လေသာ – ဇာတိလေသော , နာမလေသော, ဂောတ္တလေသော, လိင္ဂလေသော, အာပတ္တိလေသော, ပတ္တလေသော, စီဝရလေသော, ဥပဇ္ဈာယလေသော, အာစရိယလေသော, သေနာသနလေသော။
394.Kiñci desaṃ lesamattaṃ upādāyāti leso nāma dasa lesā – jātileso , nāmaleso, gottaleso, liṅgaleso, āpattileso, pattaleso, cīvaraleso, upajjhāyaleso, ācariyaleso, senāsanaleso.
၃၉၅. ဇာတိလေသော နာမ ခတ္တိယော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ခတ္တိယံ ပသ္သိတ္ဝာ စောဒေတိ – ‘‘ခတ္တိယော မယာ ဒိဋ္ဌော 3။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ, နတ္ထိ တယာ သဒ္ဓိံ ဥပောသထော ဝာ ပဝာရဏာ ဝာ သင္ဃကမ္မံ ဝာ’’တိ, အာပတ္တိ ဝာစာယ, ဝာစာယ သင္ဃာဒိသေသသ္သ။
395.Jātileso nāma khattiyo diṭṭho hoti pārājikaṃ dhammaṃ ajjhāpajjanto. Aññaṃ khattiyaṃ passitvā codeti – ‘‘khattiyo mayā diṭṭho 4. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
ဗ္ရာဟ္မဏော ဒိဋ္ဌော ဟောတိ။ပေ.။ ဝေသ္သော ဒိဋ္ဌော ဟောတိ။ပေ.။ သုဒ္ဒော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ သုဒ္ဒံ ပသ္သိတ္ဝာ စောဒေတိ – ‘‘သုဒ္ဒော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ , အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
Brāhmaṇo diṭṭho hoti…pe… vesso diṭṭho hoti…pe… suddo diṭṭho hoti pārājikaṃ dhammaṃ ajjhāpajjanto. Aññaṃ suddaṃ passitvā codeti – ‘‘suddo mayā diṭṭho. Pārājikaṃ dhammaṃ ajjhāpannosi , assamaṇosi, asakyaputtiyosi’’…pe… āpatti vācāya, vācāya saṅghādisesassa.
၃၉၆. နာမလေသော နာမ ဗုဒ္ဓရက္ခိတော ဒိဋ္ဌော ဟောတိ။ပေ.။ ဓမ္မရက္ခိတော ဒိဋ္ဌော ဟောတိ။ပေ.။ သင္ဃရက္ခိတော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော ။ အညံ သင္ဃရက္ခိတံ ပသ္သိတ္ဝာ စောဒေတိ – ‘‘သင္ဃရက္ခိတော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
396.Nāmaleso nāma buddharakkhito diṭṭho hoti…pe… dhammarakkhito diṭṭho hoti…pe… saṅgharakkhito diṭṭho hoti pārājikaṃ dhammaṃ ajjhāpajjanto . Aññaṃ saṅgharakkhitaṃ passitvā codeti – ‘‘saṅgharakkhito mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၃၉၇. ဂောတ္တလေသော နာမ ဂောတမော ဒိဋ္ဌော ဟောတိ။ပေ.။ မောဂ္ဂလ္လာနော ဒိဋ္ဌော ဟောတိ။ပေ.။ ကစ္စာယနော ဒိဋ္ဌော ဟောတိ။ပေ.။ ဝာသိဋ္ဌော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဝာသိဋ္ဌံ ပသ္သိတ္ဝာ စောဒေတိ – ‘‘ဝာသိဋ္ဌော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
397.Gottaleso nāma gotamo diṭṭho hoti…pe… moggallāno diṭṭho hoti…pe… kaccāyano diṭṭho hoti…pe… vāsiṭṭho diṭṭho hoti pārājikaṃ dhammaṃ ajjhāpajjanto. Aññaṃ vāsiṭṭhaṃ passitvā codeti – ‘‘vāsiṭṭho mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၃၉၈. လိင္ဂလေသော နာမ ဒီဃော ဒိဋ္ဌော ဟောတိ။ပေ.။ ရသ္သော ဒိဋ္ဌော ဟောတိ။ပေ.။ ကဏ္ဟော ဒိဋ္ဌော ဟောတိ။ပေ.။ ဩဒာတော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဩဒာတံ ပသ္သိတ္ဝာ စောဒေတိ – ‘‘ဩဒာတော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
398.Liṅgaleso nāma dīgho diṭṭho hoti…pe… rasso diṭṭho hoti…pe… kaṇho diṭṭho hoti…pe… odāto diṭṭho hoti pārājikaṃ dhammaṃ ajjhāpajjanto. Aññaṃ odātaṃ passitvā codeti – ‘‘odāto mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၃၉၉. အာပတ္တိလေသော နာမ လဟုကံ အာပတ္တိံ အာပဇ္ဇန္တော ဒိဋ္ဌော ဟောတိ။ တဉ္စေ ပာရာဇိကေန စောဒေတိ – ‘‘အသ္သမဏောသိ, အသက္ယပုတ္တိယောသိ။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
399.Āpattileso nāma lahukaṃ āpattiṃ āpajjanto diṭṭho hoti. Tañce pārājikena codeti – ‘‘assamaṇosi, asakyaputtiyosi…pe… āpatti vācāya, vācāya saṅghādisesassa.
၄၀၀. ပတ္တလေသော နာမ လောဟပတ္တဓရော ဒိဋ္ဌော ဟောတိ။ပေ.။ သာဋကပတ္တဓရော ဒိဋ္ဌော ဟောတိ။ပေ.။ သုမ္ဘကပတ္တဓရော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ သုမ္ဘကပတ္တဓရံ ပသ္သိတ္ဝာ စောဒေတိ – ‘‘သုမ္ဘကပတ္တဓရော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
400.Pattaleso nāma lohapattadharo diṭṭho hoti…pe… sāṭakapattadharo diṭṭho hoti…pe… sumbhakapattadharo diṭṭho hoti pārājikaṃ dhammaṃ ajjhāpajjanto. Aññaṃ sumbhakapattadharaṃ passitvā codeti – ‘‘sumbhakapattadharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၄၀၁. စီဝရလေသော နာမ ပံသုကူလိကော ဒိဋ္ဌော ဟောတိ။ပေ.။ ဂဟပတိစီဝရဓရော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဂဟပတိစီဝရဓရံ ပသ္သိတ္ဝာ စောဒေတိ – ‘‘ဂဟပတိစီဝရဓရော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
401.Cīvaraleso nāma paṃsukūliko diṭṭho hoti…pe… gahapaticīvaradharo diṭṭho hoti pārājikaṃ dhammaṃ ajjhāpajjanto. Aññaṃ gahapaticīvaradharaṃ passitvā codeti – ‘‘gahapaticīvaradharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၄၀၂. ဥပဇ္ဈာယလေသော နာမ ဣတ္ထန္နာမသ္သ သဒ္ဓိဝိဟာရိကော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမသ္သ သဒ္ဓိဝိဟာရိကံ ပသ္သိတ္ဝာ စောဒေတိ – ‘‘ဣတ္ထန္နာမသ္သ သဒ္ဓိဝိဟာရိကော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
402.Upajjhāyaleso nāma itthannāmassa saddhivihāriko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa saddhivihārikaṃ passitvā codeti – ‘‘itthannāmassa saddhivihāriko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၄၀၃. အာစရိယလေသော နာမ ဣတ္ထန္နာမသ္သ အန္တေဝာသိကော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမသ္သ အန္တေဝာသိကံ ပသ္သိတ္ဝာ စောဒေတိ – ‘‘ဣတ္ထန္နာမသ္သ အန္တေဝာသိကော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ’’။ပေ.။ အာပတ္တိ ဝာစာယ, ဝာစာယ သင္ဃာဒိသေသသ္သ။
403.Ācariyaleso nāma itthannāmassa antevāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa antevāsikaṃ passitvā codeti – ‘‘itthannāmassa antevāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
၄၀၄. သေနာသနလေသော နာမ ဣတ္ထန္နာမသေနာသနဝာသိကော ဒိဋ္ဌော ဟောတိ ပာရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမသေနာသနဝာသိကံ ပသ္သိတ္ဝာ စောဒေတိ – ‘‘ဣတ္ထန္နာမသေနာသနဝာသိကော မယာ ဒိဋ္ဌော။ ပာရာဇိကံ ဓမ္မံ အဇ္ဈာပန္နောသိ, အသ္သမဏောသိ, အသက္ယပုတ္တိယောသိ, နတ္ထိ တယာ သဒ္ဓိံ ဥပောသထော ဝာ ပဝာရဏာ ဝာ သင္ဃကမ္မံ ဝာ’’တိ, အာပတ္တိ ဝာစာယ, ဝာစာယ သင္ဃာဒိသေသသ္သ။
404.Senāsanaleso nāma itthannāmasenāsanavāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmasenāsanavāsikaṃ passitvā codeti – ‘‘itthannāmasenāsanavāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
၄၀၅. ပာရာဇိကေန ဓမ္မေနာတိ စတုန္နံ အညတရေန။
405.Pārājikena dhammenāti catunnaṃ aññatarena.
အနုဒ္ဓံသေယ္ယာတိ စောဒေတိ ဝာ စောဒာပေတိ ဝာ။
Anuddhaṃseyyāti codeti vā codāpeti vā.
အပ္ပေဝ နာမ နံ ဣမမ္ဟာ ဗ္ရဟ္မစရိယာစာဝေယ္ယန္တိ ဘိက္ခုဘာဝာ စာဝေယ္ယံ, သမဏဓမ္မာ စာဝေယ္ယံ, သီလက္ခန္ဓာ စာဝေယ္ယံ, တပောဂုဏာ စာဝေယ္ယံ။
Appeva nāma naṃ imamhā brahmacariyācāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
တတော အပရေန သမယေနာတိ ယသ္မိံ ခဏေ အနုဒ္ဓံသိတော ဟောတိ, တံ ခဏံ တံ လယံ တံ မုဟုတ္တံ ဝီတိဝတ္တေ။
Tato aparena samayenāti yasmiṃ khaṇe anuddhaṃsito hoti, taṃ khaṇaṃ taṃ layaṃ taṃ muhuttaṃ vītivatte.
သမနုဂ္ဂာဟီယမာနောတိ ယေန ဝတ္ထုနာ အနုဒ္ဓံသိတော ဟောတိ တသ္မိံ ဝတ္ထုသ္မိံ သမနုဂ္ဂာဟီယမာနော။
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
အသမနုဂ္ဂာဟီယမာနောတိ န ကေနစိ ဝုစ္စမာနော။
Asamanuggāhīyamānoti na kenaci vuccamāno.
အဓိကရဏံ နာမ စတ္တာရိ အဓိကရဏာနိ – ဝိဝာဒာဓိကရဏံ, အနုဝာဒာဓိကရဏံ, အာပတ္တာဓိကရဏံ, ကိစ္စာဓိကရဏံ။
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
ကောစိ ဒေသော လေသမတ္တော ဥပာဒိန္နောတိ တေသံ ဒသန္နံ လေသာနံ အညတရော လေသော ဥပာဒိန္နော ဟောတိ။
Kocideso lesamatto upādinnoti tesaṃ dasannaṃ lesānaṃ aññataro leso upādinno hoti.
ဘိက္ခု စ ဒောသံ ပတိဋ္ဌာတီတိ တုစ္ဆကံ မယာ ဘဏိတံ, မုသာ မယာ ဘဏိတံ, အဘူတံ မယာ ဘဏိတံ, အဇာနန္တေန မယာ ဘဏိတံ။
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
သင္ဃာဒိသေသောတိ ။ပေ.။ တေနပိ ဝုစ္စတိ သင္ဃာဒိသေသောတိ။
Saṅghādisesoti …pe… tenapi vuccati saṅghādisesoti.
၄၀၆. ဘိက္ခု သင္ဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သင္ဃာဒိသေသေ သင္ဃာဒိသေသဒိဋ္ဌိ ဟောတိ။ တဉ္စေ ပာရာဇိကေန စောဒေတိ – ‘‘အသ္သမဏောသိ, အသက္ယပုတ္တိယောသိ, နတ္ထိ တယာ သဒ္ဓိံ ဥပောသထော ဝာ ပဝာရဏာ ဝာ သင္ဃကမ္မံ ဝာ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
406. Bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု သင္ဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သင္ဃာဒိသေသေ ထုလ္လစ္စယဒိဋ္ဌိ ဟောတိ။ပေ.။ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ တဉ္စေ ပာရာဇိကေန စောဒေတိ – ‘‘အသ္သမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ.။ ထုလ္လစ္စယေ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သင္ဃာဒိသေသဒိဋ္ဌိ ဟောတိ။ တဉ္စေ ပာရာဇိကေန စောဒေတိ – ‘‘အသ္သမဏောသိ’’ ။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codeti – ‘‘assamaṇosi’’ …pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု ပာစိတ္တိယံ။ပေ.။ ပာဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ, ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ.။ ဒုဗ္ဘာသိတေ သင္ဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ တဉ္စေ ပာရာဇိကေန စောဒေတိ – ‘‘အသ္သမဏောသိ, အသက္ယပုတ္တိယောသိ, နတ္ထိ တယာ သဒ္ဓိံ ဥပောသထော ဝာ ပဝာရဏာ ဝာ သင္ဃကမ္မံ ဝာ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti, dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဧကေကံ မူလံ ကာတုန စက္ကံ ဗန္ဓိတဗ္ဗံ။
Ekekaṃ mūlaṃ kātuna cakkaṃ bandhitabbaṃ.
၄၀၇. ဘိက္ခု သင္ဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ သင္ဃာဒိသေသေ သင္ဃာဒိသေသဒိဋ္ဌိ ဟောတိ။ တဉ္စေ ပာရာဇိကေန စောဒာပေတိ – ‘‘အသ္သမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
407. Bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု သင္ဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သင္ဃာဒိသေသေ ထုလ္လစ္စယဒိဋ္ဌိ ဟောတိ။ပေ.။ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ တဉ္စေ ပာရာဇိကေန စောဒာပေတိ – ‘‘အသ္သမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ.။ ထုလ္လစ္စယေ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သင္ဃာဒိသေသဒိဋ္ဌိ ဟောတိ။ တဉ္စေ ပာရာဇိကေန စောဒာပေတိ – ‘‘အသ္သမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ဘိက္ခု ပာစိတ္တိယံ။ပေ.။ ပာဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ.။ ဒုဗ္ဘာသိတေ သင္ဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပာစိတ္တိယဒိဋ္ဌိ ဟောတိ။ ပာဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ တဉ္စေ ပာရာဇိကေန စောဒာပေတိ – ‘‘အသ္သမဏောသိ , အသက္ယပုတ္တိယောသိ, နတ္ထိ တယာ သဒ္ဓိံ ဥပောသထော ဝာ ပဝာရဏာ ဝာ သင္ဃကမ္မံ ဝာ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပာဒိန္နော, အာပတ္တိ ဝာစာယ, ဝာစာယ သင္ဃာဒိသေသသ္သ။
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codāpeti – ‘‘assamaṇosi , asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
၄၀၈. အနာပတ္တိ တထာသညီ စောဒေတိ ဝာ စောဒာပေတိ ဝာ, ဥမ္မတ္တကသ္သ, အာဒိကမ္မိကသ္သာတိ။
408. Anāpatti tathāsaññī codeti vā codāpeti vā, ummattakassa, ādikammikassāti.
ဒုတိယဒုဋ္ဌဒောသသိက္ခာပဒံ နိဋ္ဌိတံ နဝမံ။
Dutiyaduṭṭhadosasikkhāpadaṃ niṭṭhitaṃ navamaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၉. ဒုတိယဒုဋ္ဌဒောသသိက္ခာပဒဝဏ္ဏနာ • 9. Dutiyaduṭṭhadosasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၉. ဒုတိယဒုဋ္ဌဒောသသိက္ခာပဒဝဏ္ဏနာ • 9. Dutiyaduṭṭhadosasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၉. ဒုတိယဒုဋ္ဌဒောသသိက္ခာပဒဝဏ္ဏနာ • 9. Dutiyaduṭṭhadosasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၉. ဒုတိယဒုဋ္ဌဒောသသိက္ခာပဒဝဏ္ဏနာ • 9. Dutiyaduṭṭhadosasikkhāpadavaṇṇanā
