| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ • Mahāvibhaṅga |
೯. ದುತಿಯದುಟ್ಠದೋಸಸಿಕ್ಖಾಪದಂ
9. Dutiyaduṭṭhadosasikkhāpadaṃ
೩೯೧. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ। ತೇನ ಖೋ ಪನ ಸಮಯೇನ ಮೇತ್ತಿಯಭೂಮಜಕಾ ಭಿಕ್ಖೂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತಾ ಅದ್ದಸಂಸು ಛಗಲಕಂ 1 ಅಜಿಕಾಯ ವಿಪ್ಪಟಿಪಜ್ಜನ್ತಂ। ದಿಸ್ವಾನ ಏವಮಾಹಂಸು – ‘‘ಹನ್ದ ಮಯಂ, ಆವುಸೋ, ಇಮಂ ಛಗಲಕಂ ದಬ್ಬಂ ಮಲ್ಲಪುತ್ತಂ ನಾಮ ಕರೋಮ। ಇಮಂ ಅಜಿಕಂ ಮೇತ್ತಿಯಂ ನಾಮ ಭಿಕ್ಖುನಿಂ ಕರೋಮ। ಏವಂ ಮಯಂ ವೋಹರಿಸ್ಸಾಮ। ಪುಬ್ಬೇ ಮಯಂ, ಆವುಸೋ, ದಬ್ಬಂ ಮಲ್ಲಪುತ್ತಂ ಸುತೇನ ಅವೋಚುಮ್ಹಾ। ಇದಾನಿ ಪನ ಅಮ್ಹೇಹಿ ಸಾಮಂ ದಿಟ್ಠೋ ಮೇತ್ತಿಯಾಯ ಭಿಕ್ಖುನಿಯಾ ವಿಪ್ಪಟಿಪಜ್ಜನ್ತೋ’’ತಿ। ತೇ ತಂ ಛಗಲಕಂ ದಬ್ಬಂ ಮಲ್ಲಪುತ್ತಂ ನಾಮ ಅಕಂಸು। ತಂ ಅಜಿಕಂ ಮೇತ್ತಿಯಂ ನಾಮ ಭಿಕ್ಖುನಿಂ ಅಕಂಸು। ತೇ ಭಿಕ್ಖೂನಂ ಆರೋಚೇಸುಂ – ‘‘ಪುಬ್ಬೇ ಮಯಂ, ಆವುಸೋ, ದಬ್ಬಂ ಮಲ್ಲಪುತ್ತಂ ಸುತೇನ ಅವೋಚುಮ್ಹಾ। ಇದಾನಿ ಪನ ಅಮ್ಹೇಹಿ ಸಾಮಂ ದಿಟ್ಠೋ ಮೇತ್ತಿಯಾಯ ಭಿಕ್ಖುನಿಯಾ ವಿಪ್ಪಟಿಪಜ್ಜನ್ತೋ’’ತಿ। ಭಿಕ್ಖೂ ಏವಮಾಹಂಸು – ‘‘ಮಾವುಸೋ, ಏವಂ ಅವಚುತ್ಥ। ನಾಯಸ್ಮಾ ದಬ್ಬೋ ಮಲ್ಲಪುತ್ತೋ ಏವಂ ಕರಿಸ್ಸತೀ’’ತಿ।
391. Tena samayena buddho bhagavā rājagahe viharati veḷuvane kalandakanivāpe. Tena kho pana samayena mettiyabhūmajakā bhikkhū gijjhakūṭā pabbatā orohantā addasaṃsu chagalakaṃ 2 ajikāya vippaṭipajjantaṃ. Disvāna evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karoma. Imaṃ ajikaṃ mettiyaṃ nāma bhikkhuniṃ karoma. Evaṃ mayaṃ voharissāma. Pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Te taṃ chagalakaṃ dabbaṃ mallaputtaṃ nāma akaṃsu. Taṃ ajikaṃ mettiyaṃ nāma bhikkhuniṃ akaṃsu. Te bhikkhūnaṃ ārocesuṃ – ‘‘pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Bhikkhū evamāhaṃsu – ‘‘māvuso, evaṃ avacuttha. Nāyasmā dabbo mallaputto evaṃ karissatī’’ti.
ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಪಟಿಪುಚ್ಛಿ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಯಿಮೇ ಭಿಕ್ಖೂ ಆಹಂಸೂ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ। ದುತಿಯಮ್ಪಿ ಖೋ ಭಗವಾ…ಪೇ॰… ತತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಯಿಮೇ ಭಿಕ್ಖೂ ಆಹಂಸೂ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ। ‘‘ನ ಖೋ, ದಬ್ಬ, ದಬ್ಬಾ ಏವಂ ನಿಬ್ಬೇಠೇನ್ತಿ। ಸಚೇ ತಯಾ ಕತಂ ಕತನ್ತಿ ವದೇಹಿ, ಸಚೇ ತಯಾ ಅಕತಂ ಅಕತನ್ತಿ ವದೇಹೀ’’ತಿ। ‘‘ಯತೋ ಅಹಂ, ಭನ್ತೇ, ಜಾತೋ ನಾಭಿಜಾನಾಮಿ ಸುಪಿನನ್ತೇನಪಿ ಮೇಥುನಧಮ್ಮಂ ಪಟಿಸೇವಿತಾ, ಪಗೇವ ಜಾಗರೋ’’ತಿ! ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖುವೇ, ಇಮೇ ಭಿಕ್ಖೂ ಅನುಯುಞ್ಜಥಾ’’ತಿ। ಇದಂ ವತ್ವಾ ಭಗವಾ ಉಟ್ಠಾಯಾಸನಾ ವಿಹಾರಂ ಪಾವಿಸಿ।
Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunadhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhuve, ime bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
ಅಥ ಖೋ ತೇ ಭಿಕ್ಖೂ ಮೇತ್ತಿಯಭೂಮಜಕೇ ಭಿಕ್ಖೂ ಅನುಯುಞ್ಜಿಂಸು। ತೇ ಭಿಕ್ಖೂಹಿ ಅನುಯುಞ್ಜೀಯಮಾನಾ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ – ‘‘ಕಿಂ ಪನ ತುಮ್ಹೇ, ಆವುಸೋ, ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಥಾ’’ತಿ? ‘‘ಏವಮಾವುಸೋ’’ತಿ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಮೇತ್ತಿಯಭೂಮಜಕೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ॰… ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಥಾ’’ತಿ? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ‘‘ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –
Atha kho te bhikkhū mettiyabhūmajake bhikkhū anuyuñjiṃsu. Te bhikkhūhi anuyuñjīyamānā bhikkhūnaṃ etamatthaṃ ārocesuṃ – ‘‘kiṃ pana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
೩೯೨. ‘‘ಯೋ ಪನ ಭಿಕ್ಖು ಭಿಕ್ಖುಂ ದುಟ್ಠೋ ದೋಸೋ ಅಪ್ಪತೀತೋ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಯ್ಯ – ‘ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾ ಚಾವೇಯ್ಯ’ನ್ತಿ। ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನೋ ವಾ ಅಸಮನುಗ್ಗಾಹೀಯಮಾನೋ ವಾ ಅಞ್ಞಭಾಗಿಯಞ್ಚೇವ ತಂ ಅಧಿಕರಣಂ ಹೋತಿ ಕೋಚಿದೇಸೋ ಲೇಸಮತ್ತೋ ಉಪಾದಿನ್ನೋ, ಭಿಕ್ಖು ಚ ದೋಸಂ ಪತಿಟ್ಠಾತಿ, ಸಙ್ಘಾದಿಸೇಸೋ’’ತಿ।
392.‘‘Yopana bhikkhu bhikkhuṃ duṭṭho doso appatīto aññabhāgiyassaadhikaraṇassa kiñcidesaṃ lesamattaṃ upādāya pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti. Tato aparena samayena samanuggāhīyamāno vā asamanuggāhīyamāno vā aññabhāgiyañceva taṃ adhikaraṇaṃ hoti kocideso lesamatto upādinno, bhikkhu ca dosaṃ patiṭṭhāti, saṅghādiseso’’ti.
೩೯೩. ಯೋ ಪನಾತಿ ಯೋ ಯಾದಿಸೋ…ಪೇ॰… ಭಿಕ್ಖೂತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ।
393.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ಭಿಕ್ಖುನ್ತಿ ಅಞ್ಞಂ ಭಿಕ್ಖುಂ।
Bhikkhunti aññaṃ bhikkhuṃ.
ದುಟ್ಠೋ ದೋಸೋತಿ ಕುಪಿತೋ ಅನತ್ತಮನೋ ಅನಭಿರದ್ಧೋ ಆಹತಚಿತ್ತೋ ಖಿಲಜಾತೋ।
Duṭṭho dosoti kupito anattamano anabhiraddho āhatacitto khilajāto.
ಅಪ್ಪತೀತೋತಿ ತೇನ ಚ ಕೋಪೇನ, ತೇನ ಚ ದೋಸೇನ, ತಾಯ ಚ ಅನತ್ತಮನತಾಯ, ತಾಯ ಚ ಅನಭಿರದ್ಧಿಯಾ ಅಪ್ಪತೀತೋ ಹೋತಿ।
Appatītoti tena ca kopena, tena ca dosena, tāya ca anattamanatāya, tāya ca anabhiraddhiyā appatīto hoti.
ಅಞ್ಞಭಾಗಿಯಸ್ಸ ಅಧಿಕರಣಸ್ಸಾತಿ ಆಪತ್ತಞ್ಞಭಾಗಿಯಂ ವಾ ಹೋತಿ ಅಧಿಕರಣಞ್ಞಭಾಗಿಯಂ ವಾ। ಕಥಂ ಅಧಿಕರಣಂ ಅಧಿಕರಣಸ್ಸ ಅಞ್ಞಭಾಗಿಯಂ? ವಿವಾದಾಧಿಕರಣಂ ಅನುವಾದಾಧಿಕರಣಸ್ಸ ಆಪತ್ತಾಧಿಕರಣಸ್ಸ ಕಿಚ್ಚಾಧಿಕರಣಸ್ಸ ಅಞ್ಞಭಾಗಿಯಂ। ಅನುವಾದಾಧಿಕರಣಂ ಆಪತ್ತಾಧಿಕರಣಸ್ಸ ಕಿಚ್ಚಾಧಿಕರಣಸ್ಸ ವಿವಾದಾಧಿಕರಣಸ್ಸ ಅಞ್ಞಭಾಗಿಯಂ। ಆಪತ್ತಾಧಿಕರಣಂ ಕಿಚ್ಚಾಧಿಕರಣಸ್ಸ ವಿವಾದಾಧಿಕರಣಸ್ಸ ಅನುವಾದಾಧಿಕರಣಸ್ಸ ಅಞ್ಞಭಾಗಿಯಂ। ಕಿಚ್ಚಾಧಿಕರಣಂ ವಿವಾದಾಧಿಕರಣಸ್ಸ ಅನುವಾದಾಧಿಕರಣಸ್ಸ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ। ಏವಂ ಅಧಿಕರಣಂ ಅಧಿಕರಣಸ್ಸ ಅಞ್ಞಭಾಗಿಯಂ।
Aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā. Kathaṃ adhikaraṇaṃ adhikaraṇassa aññabhāgiyaṃ? Vivādādhikaraṇaṃ anuvādādhikaraṇassa āpattādhikaraṇassa kiccādhikaraṇassa aññabhāgiyaṃ. Anuvādādhikaraṇaṃ āpattādhikaraṇassa kiccādhikaraṇassa vivādādhikaraṇassa aññabhāgiyaṃ. Āpattādhikaraṇaṃ kiccādhikaraṇassa vivādādhikaraṇassa anuvādādhikaraṇassa aññabhāgiyaṃ. Kiccādhikaraṇaṃ vivādādhikaraṇassa anuvādādhikaraṇassa āpattādhikaraṇassa aññabhāgiyaṃ. Evaṃ adhikaraṇaṃ adhikaraṇassa aññabhāgiyaṃ.
ಕಥಂ ಅಧಿಕರಣಂ ಅಧಿಕರಣಸ್ಸ ತಬ್ಭಾಗಿಯಂ? ವಿವಾದಾಧಿಕರಣಂ ವಿವಾದಾಧಿಕರಣಸ್ಸ ತಬ್ಭಾಗಿಯಂ। ಅನುವಾದಾಧಿಕರಣಂ ಅನುವಾದಾಧಿಕರಣಸ್ಸ ತಬ್ಭಾಗಿಯಂ। ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಸಿಯಾ ತಬ್ಭಾಗಿಯಂ ಸಿಯಾ ಅಞ್ಞಭಾಗಿಯಂ।
Kathaṃ adhikaraṇaṃ adhikaraṇassa tabbhāgiyaṃ? Vivādādhikaraṇaṃ vivādādhikaraṇassa tabbhāgiyaṃ. Anuvādādhikaraṇaṃ anuvādādhikaraṇassa tabbhāgiyaṃ. Āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyaṃ.
ಕಥಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ? ಮೇಥುನಧಮ್ಮಪಾರಾಜಿಕಾಪತ್ತಿ ಅದಿನ್ನಾದಾನಪಾರಾಜಿಕಾಪತ್ತಿಯಾ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ। ಅದಿನ್ನಾದಾನಪಾರಾಜಿಕಾಪತ್ತಿ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ। ಮನುಸ್ಸವಿಗ್ಗಹಪಾರಾಜಿಕಾಪತ್ತಿ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅದಿನ್ನಾದಾನಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ। ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅದಿನ್ನಾದಾನಪಾರಾಜಿಕಾಪತ್ತಿಯಾ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ। ಏವಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ।
Kathaṃ āpattādhikaraṇaṃ āpattādhikaraṇassa aññabhāgiyaṃ? Methunadhammapārājikāpatti adinnādānapārājikāpattiyā manussaviggahapārājikāpattiyā uttarimanussadhammapārājikāpattiyā aññabhāgiyā. Adinnādānapārājikāpatti manussaviggahapārājikāpattiyā uttarimanussadhammapārājikāpattiyā methunadhammapārājikāpattiyā aññabhāgiyā. Manussaviggahapārājikāpatti uttarimanussadhammapārājikāpattiyā methunadhammapārājikāpattiyā adinnādānapārājikāpattiyā aññabhāgiyā. Uttarimanussadhammapārājikāpatti methunadhammapārājikāpattiyā adinnādānapārājikāpattiyā manussaviggahapārājikāpattiyā aññabhāgiyā. Evaṃ āpattādhikaraṇaṃ āpattādhikaraṇassa aññabhāgiyaṃ.
ಕಥಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ತಬ್ಭಾಗಿಯಂ? ಮೇಥುನಧಮ್ಮಪಾರಾಜಿಕಾಪತ್ತಿ ಮೇಥುನಧಮ್ಮಪಾರಾಜಿಕಾಪತ್ತಿಯಾ ತಬ್ಭಾಗಿಯಾ। ಅದಿನ್ನಾದಾನಪಾರಾಜಿಕಾಪತ್ತಿ ಅದಿನ್ನಾದಾನಪಾರಾಜಿಕಾಪತ್ತಿಯಾ ತಬ್ಭಾಗಿಯಾ। ಮನುಸ್ಸವಿಗ್ಗಹಪಾರಾಜಿಕಾಪತ್ತಿ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ತಬ್ಭಾಗಿಯಾ। ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ತಬ್ಭಾಗಿಯಾ। ಏವಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ತಬ್ಭಾಗಿಯಂ।
Kathaṃ āpattādhikaraṇaṃ āpattādhikaraṇassa tabbhāgiyaṃ? Methunadhammapārājikāpatti methunadhammapārājikāpattiyā tabbhāgiyā. Adinnādānapārājikāpatti adinnādānapārājikāpattiyā tabbhāgiyā. Manussaviggahapārājikāpatti manussaviggahapārājikāpattiyā tabbhāgiyā. Uttarimanussadhammapārājikāpatti uttarimanussadhammapārājikāpattiyā tabbhāgiyā. Evaṃ āpattādhikaraṇaṃ āpattādhikaraṇassa tabbhāgiyaṃ.
ಕಿಚ್ಚಾಧಿಕರಣಂ ಕಿಚ್ಚಾಧಿಕರಣಸ್ಸ ತಬ್ಭಾಗಿಯಂ। ಏವಂ ಅಧಿಕರಣಂ ಅಧಿಕರಣಸ್ಸ ತಬ್ಭಾಗಿಯಂ।
Kiccādhikaraṇaṃ kiccādhikaraṇassa tabbhāgiyaṃ. Evaṃ adhikaraṇaṃ adhikaraṇassa tabbhāgiyaṃ.
೩೯೪. ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯಾತಿ ಲೇಸೋ ನಾಮ ದಸ ಲೇಸಾ – ಜಾತಿಲೇಸೋ , ನಾಮಲೇಸೋ, ಗೋತ್ತಲೇಸೋ, ಲಿಙ್ಗಲೇಸೋ, ಆಪತ್ತಿಲೇಸೋ, ಪತ್ತಲೇಸೋ, ಚೀವರಲೇಸೋ, ಉಪಜ್ಝಾಯಲೇಸೋ, ಆಚರಿಯಲೇಸೋ, ಸೇನಾಸನಲೇಸೋ।
394.Kiñci desaṃ lesamattaṃ upādāyāti leso nāma dasa lesā – jātileso , nāmaleso, gottaleso, liṅgaleso, āpattileso, pattaleso, cīvaraleso, upajjhāyaleso, ācariyaleso, senāsanaleso.
೩೯೫. ಜಾತಿಲೇಸೋ ನಾಮ ಖತ್ತಿಯೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಖತ್ತಿಯಂ ಪಸ್ಸಿತ್ವಾ ಚೋದೇತಿ – ‘‘ಖತ್ತಿಯೋ ಮಯಾ ದಿಟ್ಠೋ 3। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
395.Jātileso nāma khattiyo diṭṭho hoti pārājikaṃ dhammaṃ ajjhāpajjanto. Aññaṃ khattiyaṃ passitvā codeti – ‘‘khattiyo mayā diṭṭho 4. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
ಬ್ರಾಹ್ಮಣೋ ದಿಟ್ಠೋ ಹೋತಿ…ಪೇ॰… ವೇಸ್ಸೋ ದಿಟ್ಠೋ ಹೋತಿ…ಪೇ॰… ಸುದ್ದೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಸುದ್ದಂ ಪಸ್ಸಿತ್ವಾ ಚೋದೇತಿ – ‘‘ಸುದ್ದೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ , ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Brāhmaṇo diṭṭho hoti…pe… vesso diṭṭho hoti…pe… suddo diṭṭho hoti pārājikaṃ dhammaṃ ajjhāpajjanto. Aññaṃ suddaṃ passitvā codeti – ‘‘suddo mayā diṭṭho. Pārājikaṃ dhammaṃ ajjhāpannosi , assamaṇosi, asakyaputtiyosi’’…pe… āpatti vācāya, vācāya saṅghādisesassa.
೩೯೬. ನಾಮಲೇಸೋ ನಾಮ ಬುದ್ಧರಕ್ಖಿತೋ ದಿಟ್ಠೋ ಹೋತಿ…ಪೇ॰… ಧಮ್ಮರಕ್ಖಿತೋ ದಿಟ್ಠೋ ಹೋತಿ…ಪೇ॰… ಸಙ್ಘರಕ್ಖಿತೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ । ಅಞ್ಞಂ ಸಙ್ಘರಕ್ಖಿತಂ ಪಸ್ಸಿತ್ವಾ ಚೋದೇತಿ – ‘‘ಸಙ್ಘರಕ್ಖಿತೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
396.Nāmaleso nāma buddharakkhito diṭṭho hoti…pe… dhammarakkhito diṭṭho hoti…pe… saṅgharakkhito diṭṭho hoti pārājikaṃ dhammaṃ ajjhāpajjanto . Aññaṃ saṅgharakkhitaṃ passitvā codeti – ‘‘saṅgharakkhito mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೩೯೭. ಗೋತ್ತಲೇಸೋ ನಾಮ ಗೋತಮೋ ದಿಟ್ಠೋ ಹೋತಿ…ಪೇ॰… ಮೋಗ್ಗಲ್ಲಾನೋ ದಿಟ್ಠೋ ಹೋತಿ…ಪೇ॰… ಕಚ್ಚಾಯನೋ ದಿಟ್ಠೋ ಹೋತಿ…ಪೇ॰… ವಾಸಿಟ್ಠೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ವಾಸಿಟ್ಠಂ ಪಸ್ಸಿತ್ವಾ ಚೋದೇತಿ – ‘‘ವಾಸಿಟ್ಠೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
397.Gottaleso nāma gotamo diṭṭho hoti…pe… moggallāno diṭṭho hoti…pe… kaccāyano diṭṭho hoti…pe… vāsiṭṭho diṭṭho hoti pārājikaṃ dhammaṃ ajjhāpajjanto. Aññaṃ vāsiṭṭhaṃ passitvā codeti – ‘‘vāsiṭṭho mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೩೯೮. ಲಿಙ್ಗಲೇಸೋ ನಾಮ ದೀಘೋ ದಿಟ್ಠೋ ಹೋತಿ…ಪೇ॰… ರಸ್ಸೋ ದಿಟ್ಠೋ ಹೋತಿ…ಪೇ॰… ಕಣ್ಹೋ ದಿಟ್ಠೋ ಹೋತಿ…ಪೇ॰… ಓದಾತೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಓದಾತಂ ಪಸ್ಸಿತ್ವಾ ಚೋದೇತಿ – ‘‘ಓದಾತೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
398.Liṅgaleso nāma dīgho diṭṭho hoti…pe… rasso diṭṭho hoti…pe… kaṇho diṭṭho hoti…pe… odāto diṭṭho hoti pārājikaṃ dhammaṃ ajjhāpajjanto. Aññaṃ odātaṃ passitvā codeti – ‘‘odāto mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೩೯೯. ಆಪತ್ತಿಲೇಸೋ ನಾಮ ಲಹುಕಂ ಆಪತ್ತಿಂ ಆಪಜ್ಜನ್ತೋ ದಿಟ್ಠೋ ಹೋತಿ। ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
399.Āpattileso nāma lahukaṃ āpattiṃ āpajjanto diṭṭho hoti. Tañce pārājikena codeti – ‘‘assamaṇosi, asakyaputtiyosi…pe… āpatti vācāya, vācāya saṅghādisesassa.
೪೦೦. ಪತ್ತಲೇಸೋ ನಾಮ ಲೋಹಪತ್ತಧರೋ ದಿಟ್ಠೋ ಹೋತಿ…ಪೇ॰… ಸಾಟಕಪತ್ತಧರೋ ದಿಟ್ಠೋ ಹೋತಿ…ಪೇ॰… ಸುಮ್ಭಕಪತ್ತಧರೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಸುಮ್ಭಕಪತ್ತಧರಂ ಪಸ್ಸಿತ್ವಾ ಚೋದೇತಿ – ‘‘ಸುಮ್ಭಕಪತ್ತಧರೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
400.Pattaleso nāma lohapattadharo diṭṭho hoti…pe… sāṭakapattadharo diṭṭho hoti…pe… sumbhakapattadharo diṭṭho hoti pārājikaṃ dhammaṃ ajjhāpajjanto. Aññaṃ sumbhakapattadharaṃ passitvā codeti – ‘‘sumbhakapattadharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೪೦೧. ಚೀವರಲೇಸೋ ನಾಮ ಪಂಸುಕೂಲಿಕೋ ದಿಟ್ಠೋ ಹೋತಿ…ಪೇ॰… ಗಹಪತಿಚೀವರಧರೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಗಹಪತಿಚೀವರಧರಂ ಪಸ್ಸಿತ್ವಾ ಚೋದೇತಿ – ‘‘ಗಹಪತಿಚೀವರಧರೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
401.Cīvaraleso nāma paṃsukūliko diṭṭho hoti…pe… gahapaticīvaradharo diṭṭho hoti pārājikaṃ dhammaṃ ajjhāpajjanto. Aññaṃ gahapaticīvaradharaṃ passitvā codeti – ‘‘gahapaticīvaradharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೪೦೨. ಉಪಜ್ಝಾಯಲೇಸೋ ನಾಮ ಇತ್ಥನ್ನಾಮಸ್ಸ ಸದ್ಧಿವಿಹಾರಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಇತ್ಥನ್ನಾಮಸ್ಸ ಸದ್ಧಿವಿಹಾರಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸ್ಸ ಸದ್ಧಿವಿಹಾರಿಕೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
402.Upajjhāyaleso nāma itthannāmassa saddhivihāriko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa saddhivihārikaṃ passitvā codeti – ‘‘itthannāmassa saddhivihāriko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೪೦೩. ಆಚರಿಯಲೇಸೋ ನಾಮ ಇತ್ಥನ್ನಾಮಸ್ಸ ಅನ್ತೇವಾಸಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಇತ್ಥನ್ನಾಮಸ್ಸ ಅನ್ತೇವಾಸಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸ್ಸ ಅನ್ತೇವಾಸಿಕೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ॰… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
403.Ācariyaleso nāma itthannāmassa antevāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa antevāsikaṃ passitvā codeti – ‘‘itthannāmassa antevāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
೪೦೪. ಸೇನಾಸನಲೇಸೋ ನಾಮ ಇತ್ಥನ್ನಾಮಸೇನಾಸನವಾಸಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ। ಅಞ್ಞಂ ಇತ್ಥನ್ನಾಮಸೇನಾಸನವಾಸಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸೇನಾಸನವಾಸಿಕೋ ಮಯಾ ದಿಟ್ಠೋ। ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
404.Senāsanaleso nāma itthannāmasenāsanavāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmasenāsanavāsikaṃ passitvā codeti – ‘‘itthannāmasenāsanavāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
೪೦೫. ಪಾರಾಜಿಕೇನ ಧಮ್ಮೇನಾತಿ ಚತುನ್ನಂ ಅಞ್ಞತರೇನ।
405.Pārājikena dhammenāti catunnaṃ aññatarena.
ಅನುದ್ಧಂಸೇಯ್ಯಾತಿ ಚೋದೇತಿ ವಾ ಚೋದಾಪೇತಿ ವಾ।
Anuddhaṃseyyāti codeti vā codāpeti vā.
ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾಚಾವೇಯ್ಯನ್ತಿ ಭಿಕ್ಖುಭಾವಾ ಚಾವೇಯ್ಯಂ, ಸಮಣಧಮ್ಮಾ ಚಾವೇಯ್ಯಂ, ಸೀಲಕ್ಖನ್ಧಾ ಚಾವೇಯ್ಯಂ, ತಪೋಗುಣಾ ಚಾವೇಯ್ಯಂ।
Appeva nāma naṃ imamhā brahmacariyācāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
ತತೋ ಅಪರೇನ ಸಮಯೇನಾತಿ ಯಸ್ಮಿಂ ಖಣೇ ಅನುದ್ಧಂಸಿತೋ ಹೋತಿ, ತಂ ಖಣಂ ತಂ ಲಯಂ ತಂ ಮುಹುತ್ತಂ ವೀತಿವತ್ತೇ।
Tato aparena samayenāti yasmiṃ khaṇe anuddhaṃsito hoti, taṃ khaṇaṃ taṃ layaṃ taṃ muhuttaṃ vītivatte.
ಸಮನುಗ್ಗಾಹೀಯಮಾನೋತಿ ಯೇನ ವತ್ಥುನಾ ಅನುದ್ಧಂಸಿತೋ ಹೋತಿ ತಸ್ಮಿಂ ವತ್ಥುಸ್ಮಿಂ ಸಮನುಗ್ಗಾಹೀಯಮಾನೋ।
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
ಅಸಮನುಗ್ಗಾಹೀಯಮಾನೋತಿ ನ ಕೇನಚಿ ವುಚ್ಚಮಾನೋ।
Asamanuggāhīyamānoti na kenaci vuccamāno.
ಅಧಿಕರಣಂ ನಾಮ ಚತ್ತಾರಿ ಅಧಿಕರಣಾನಿ – ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ।
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
ಕೋಚಿ ದೇಸೋ ಲೇಸಮತ್ತೋ ಉಪಾದಿನ್ನೋತಿ ತೇಸಂ ದಸನ್ನಂ ಲೇಸಾನಂ ಅಞ್ಞತರೋ ಲೇಸೋ ಉಪಾದಿನ್ನೋ ಹೋತಿ।
Kocideso lesamatto upādinnoti tesaṃ dasannaṃ lesānaṃ aññataro leso upādinno hoti.
ಭಿಕ್ಖು ಚ ದೋಸಂ ಪತಿಟ್ಠಾತೀತಿ ತುಚ್ಛಕಂ ಮಯಾ ಭಣಿತಂ, ಮುಸಾ ಮಯಾ ಭಣಿತಂ, ಅಭೂತಂ ಮಯಾ ಭಣಿತಂ, ಅಜಾನನ್ತೇನ ಮಯಾ ಭಣಿತಂ।
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
ಸಙ್ಘಾದಿಸೇಸೋತಿ …ಪೇ॰… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ।
Saṅghādisesoti …pe… tenapi vuccati saṅghādisesoti.
೪೦೬. ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
406. Bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ॰… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ’’…ಪೇ॰… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಥುಲ್ಲಚ್ಚಯಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಥುಲ್ಲಚ್ಚಯೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ॰… ಥುಲ್ಲಚ್ಚಯೇ ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ… ಸಙ್ಘಾದಿಸೇಸದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ’’ …ಪೇ॰… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codeti – ‘‘assamaṇosi’’ …pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ದುಬ್ಭಾಸಿತೇ ದುಬ್ಭಾಸಿತದಿಟ್ಠಿ ಹೋತಿ…ಪೇ॰… ದುಬ್ಭಾಸಿತೇ ಸಙ್ಘಾದಿಸೇಸದಿಟ್ಠಿ ಹೋತಿ… ಥುಲ್ಲಚ್ಚಯದಿಟ್ಠಿ ಹೋತಿ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti, dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಏಕೇಕಂ ಮೂಲಂ ಕಾತುನ ಚಕ್ಕಂ ಬನ್ಧಿತಬ್ಬಂ।
Ekekaṃ mūlaṃ kātuna cakkaṃ bandhitabbaṃ.
೪೦೭. ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ॰… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
407. Bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ॰… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ॰… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಥುಲ್ಲಚ್ಚಯಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಥುಲ್ಲಚ್ಚಯೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ॰… ಥುಲ್ಲಚ್ಚಯೇ ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ… ಸಙ್ಘಾದಿಸೇಸದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ॰… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ಭಿಕ್ಖು ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ದುಬ್ಭಾಸಿತೇ ದುಬ್ಭಾಸಿತದಿಟ್ಠಿ ಹೋತಿ…ಪೇ॰… ದುಬ್ಭಾಸಿತೇ ಸಙ್ಘಾದಿಸೇಸದಿಟ್ಠಿ ಹೋತಿ… ಥುಲ್ಲಚ್ಚಯದಿಟ್ಠಿ ಹೋತಿ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ। ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ , ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ।
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codāpeti – ‘‘assamaṇosi , asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
೪೦೮. ಅನಾಪತ್ತಿ ತಥಾಸಞ್ಞೀ ಚೋದೇತಿ ವಾ ಚೋದಾಪೇತಿ ವಾ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ।
408. Anāpatti tathāsaññī codeti vā codāpeti vā, ummattakassa, ādikammikassāti.
ದುತಿಯದುಟ್ಠದೋಸಸಿಕ್ಖಾಪದಂ ನಿಟ್ಠಿತಂ ನವಮಂ।
Dutiyaduṭṭhadosasikkhāpadaṃ niṭṭhitaṃ navamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೯. ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ • 9. Dutiyaduṭṭhadosasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೯. ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ • 9. Dutiyaduṭṭhadosasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೯. ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ • 9. Dutiyaduṭṭhadosasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೯. ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ • 9. Dutiyaduṭṭhadosasikkhāpadavaṇṇanā
