| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༩. དུཏིཡདུཊྛདོསསིཀྑཱཔདཾ
9. Dutiyaduṭṭhadosasikkhāpadaṃ
༣༩༡. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན མེཏྟིཡབྷཱུམཛཀཱ བྷིཀྑཱུ གིཛ྄ཛྷཀཱུཊཱ པབྦཏཱ ཨོརོཧནྟཱ ཨདྡསཾསུ ཚགལཀཾ 1 ཨཛིཀཱཡ ཝིཔྤཊིཔཛྫནྟཾ། དིསྭཱན ཨེཝམཱཧཾསུ – ‘‘ཧནྡ མཡཾ, ཨཱཝུསོ, ཨིམཾ ཚགལཀཾ དབྦཾ མལླཔུཏྟཾ ནཱམ ཀརོམ། ཨིམཾ ཨཛིཀཾ མེཏྟིཡཾ ནཱམ བྷིཀྑུནིཾ ཀརོམ། ཨེཝཾ མཡཾ ཝོཧརིསྶཱམ། པུབྦེ མཡཾ, ཨཱཝུསོ, དབྦཾ མལླཔུཏྟཾ སུཏེན ཨཝོཙུམྷཱ། ཨིདཱནི པན ཨམྷེཧི སཱམཾ དིཊྛོ མེཏྟིཡཱཡ བྷིཀྑུནིཡཱ ཝིཔྤཊིཔཛྫནྟོ’’ཏི། ཏེ ཏཾ ཚགལཀཾ དབྦཾ མལླཔུཏྟཾ ནཱམ ཨཀཾསུ། ཏཾ ཨཛིཀཾ མེཏྟིཡཾ ནཱམ བྷིཀྑུནིཾ ཨཀཾསུ། ཏེ བྷིཀྑཱུནཾ ཨཱརོཙེསུཾ – ‘‘པུབྦེ མཡཾ, ཨཱཝུསོ, དབྦཾ མལླཔུཏྟཾ སུཏེན ཨཝོཙུམྷཱ། ཨིདཱནི པན ཨམྷེཧི སཱམཾ དིཊྛོ མེཏྟིཡཱཡ བྷིཀྑུནིཡཱ ཝིཔྤཊིཔཛྫནྟོ’’ཏི། བྷིཀྑཱུ ཨེཝམཱཧཾསུ – ‘‘མཱཝུསོ, ཨེཝཾ ཨཝཙུཏྠ། ནཱཡསྨཱ དབྦོ མལླཔུཏྟོ ཨེཝཾ ཀརིསྶཏཱི’’ཏི།
391. Tena samayena buddho bhagavā rājagahe viharati veḷuvane kalandakanivāpe. Tena kho pana samayena mettiyabhūmajakā bhikkhū gijjhakūṭā pabbatā orohantā addasaṃsu chagalakaṃ 2 ajikāya vippaṭipajjantaṃ. Disvāna evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karoma. Imaṃ ajikaṃ mettiyaṃ nāma bhikkhuniṃ karoma. Evaṃ mayaṃ voharissāma. Pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Te taṃ chagalakaṃ dabbaṃ mallaputtaṃ nāma akaṃsu. Taṃ ajikaṃ mettiyaṃ nāma bhikkhuniṃ akaṃsu. Te bhikkhūnaṃ ārocesuṃ – ‘‘pubbe mayaṃ, āvuso, dabbaṃ mallaputtaṃ sutena avocumhā. Idāni pana amhehi sāmaṃ diṭṭho mettiyāya bhikkhuniyā vippaṭipajjanto’’ti. Bhikkhū evamāhaṃsu – ‘‘māvuso, evaṃ avacuttha. Nāyasmā dabbo mallaputto evaṃ karissatī’’ti.
ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ ཨཱཡསྨནྟཾ དབྦཾ མལླཔུཏྟཾ པཊིཔུཙྪི – ‘‘སརསི ཏྭཾ, དབྦ, ཨེཝརཱུཔཾ ཀཏྟཱ ཡཐཡིམེ བྷིཀྑཱུ ཨཱཧཾསཱུ’’ཏི? ‘‘ཡཐཱ མཾ, བྷནྟེ, བྷགཝཱ ཛཱནཱཏཱི’’ཏི། དུཏིཡམྤི ཁོ བྷགཝཱ…པེ॰… ཏཏིཡམྤི ཁོ བྷགཝཱ ཨཱཡསྨནྟཾ དབྦཾ མལླཔུཏྟཾ ཨེཏདཝོཙ – ‘‘སརསི ཏྭཾ, དབྦ, ཨེཝརཱུཔཾ ཀཏྟཱ ཡཐཡིམེ བྷིཀྑཱུ ཨཱཧཾསཱུ’’ཏི? ‘‘ཡཐཱ མཾ, བྷནྟེ, བྷགཝཱ ཛཱནཱཏཱི’’ཏི། ‘‘ན ཁོ, དབྦ, དབྦཱ ཨེཝཾ ནིབྦེཋེནྟི། སཙེ ཏཡཱ ཀཏཾ ཀཏནྟི ཝདེཧི, སཙེ ཏཡཱ ཨཀཏཾ ཨཀཏནྟི ཝདེཧཱི’’ཏི། ‘‘ཡཏོ ཨཧཾ, བྷནྟེ, ཛཱཏོ ནཱབྷིཛཱནཱམི སུཔིནནྟེནཔི མེཐུནདྷམྨཾ པཊིསེཝིཏཱ, པགེཝ ཛཱགརོ’’ཏི! ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑུཝེ, ཨིམེ བྷིཀྑཱུ ཨནུཡུཉྫཐཱ’’ཏི། ཨིདཾ ཝཏྭཱ བྷགཝཱ ཨུཊྛཱཡཱསནཱ ཝིཧཱརཾ པཱཝིསི།
Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathayime bhikkhū āhaṃsū’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunadhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhuve, ime bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
ཨཐ ཁོ ཏེ བྷིཀྑཱུ མེཏྟིཡབྷཱུམཛཀེ བྷིཀྑཱུ ཨནུཡུཉྫིཾསུ། ཏེ བྷིཀྑཱུཧི ཨནུཡུཉྫཱིཡམཱནཱ བྷིཀྑཱུནཾ ཨེཏམཏྠཾ ཨཱརོཙེསུཾ – ‘‘ཀིཾ པན ཏུམྷེ, ཨཱཝུསོ, ཨཱཡསྨནྟཾ དབྦཾ མལླཔུཏྟཾ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཐཱ’’ཏི? ‘‘ཨེཝམཱཝུསོ’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ མེཏྟིཡབྷཱུམཛཀཱ བྷིཀྑཱུ ཨཱཡསྨནྟཾ དབྦཾ མལླཔུཏྟཾ ཨཉྙབྷཱགིཡསྶ ཨདྷིཀརཎསྶ ཀིཉྩི དེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེསྶནྟཱི’’ཏི! ཨཐ ཁོ ཏེ བྷིཀྑཱུ མེཏྟིཡབྷཱུམཛཀེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏུམྷེ, བྷིཀྑཝེ, དབྦཾ མལླཔུཏྟཾ ཨཉྙབྷཱགིཡསྶ ཨདྷིཀརཎསྶ ཀིཉྩི དེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ‘‘ཀཐཉྷི ནཱམ ཏུམྷེ, མོགྷཔུརིསཱ, དབྦཾ མལླཔུཏྟཾ ཨཉྙབྷཱགིཡསྶ ཨདྷིཀརཎསྶ ཀིཉྩི དེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho te bhikkhū mettiyabhūmajake bhikkhū anuyuñjiṃsu. Te bhikkhūhi anuyuñjīyamānā bhikkhūnaṃ etamatthaṃ ārocesuṃ – ‘‘kiṃ pana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༣༩༢. ‘‘ཡོ པན བྷིཀྑུ བྷིཀྑུཾ དུཊྛོ དོསོ ཨཔྤཏཱིཏོ ཨཉྙབྷཱགིཡསྶ ཨདྷིཀརཎསྶ ཀིཉྩིདེསཾ ལེསམཏྟཾ ཨུཔཱདཱཡ པཱརཱཛིཀེན དྷམྨེན ཨནུདྡྷཾསེཡྻ – ‘ཨཔྤེཝ ནཱམ ནཾ ཨིམམྷཱ བྲཧྨཙརིཡཱ ཙཱཝེཡྻ’ནྟི། ཏཏོ ཨཔརེན སམཡེན སམནུགྒཱཧཱིཡམཱནོ ཝཱ ཨསམནུགྒཱཧཱིཡམཱནོ ཝཱ ཨཉྙབྷཱགིཡཉྩེཝ ཏཾ ཨདྷིཀརཎཾ ཧོཏི ཀོཙིདེསོ ལེསམཏྟོ ཨུཔཱདིནྣོ, བྷིཀྑུ ཙ དོསཾ པཏིཊྛཱཏི, སངྒྷཱདིསེསོ’’ཏི།
392.‘‘Yopana bhikkhu bhikkhuṃ duṭṭho doso appatīto aññabhāgiyassaadhikaraṇassa kiñcidesaṃ lesamattaṃ upādāya pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti. Tato aparena samayena samanuggāhīyamāno vā asamanuggāhīyamāno vā aññabhāgiyañceva taṃ adhikaraṇaṃ hoti kocideso lesamatto upādinno, bhikkhu ca dosaṃ patiṭṭhāti, saṅghādiseso’’ti.
༣༩༣. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
393.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུནྟི ཨཉྙཾ བྷིཀྑུཾ།
Bhikkhunti aññaṃ bhikkhuṃ.
དུཊྛོ དོསོཏི ཀུཔིཏོ ཨནཏྟམནོ ཨནབྷིརདྡྷོ ཨཱཧཏཙིཏྟོ ཁིལཛཱཏོ།
Duṭṭho dosoti kupito anattamano anabhiraddho āhatacitto khilajāto.
ཨཔྤཏཱིཏོཏི ཏེན ཙ ཀོཔེན, ཏེན ཙ དོསེན, ཏཱཡ ཙ ཨནཏྟམནཏཱཡ, ཏཱཡ ཙ ཨནབྷིརདྡྷིཡཱ ཨཔྤཏཱིཏོ ཧོཏི།
Appatītoti tena ca kopena, tena ca dosena, tāya ca anattamanatāya, tāya ca anabhiraddhiyā appatīto hoti.
ཨཉྙབྷཱགིཡསྶ ཨདྷིཀརཎསྶཱཏི ཨཱཔཏྟཉྙབྷཱགིཡཾ ཝཱ ཧོཏི ཨདྷིཀརཎཉྙབྷཱགིཡཾ ཝཱ། ཀཐཾ ཨདྷིཀརཎཾ ཨདྷིཀརཎསྶ ཨཉྙབྷཱགིཡཾ? ཝིཝཱདཱདྷིཀརཎཾ ཨནུཝཱདཱདྷིཀརཎསྶ ཨཱཔཏྟཱདྷིཀརཎསྶ ཀིཙྩཱདྷིཀརཎསྶ ཨཉྙབྷཱགིཡཾ། ཨནུཝཱདཱདྷིཀརཎཾ ཨཱཔཏྟཱདྷིཀརཎསྶ ཀིཙྩཱདྷིཀརཎསྶ ཝིཝཱདཱདྷིཀརཎསྶ ཨཉྙབྷཱགིཡཾ། ཨཱཔཏྟཱདྷིཀརཎཾ ཀིཙྩཱདྷིཀརཎསྶ ཝིཝཱདཱདྷིཀརཎསྶ ཨནུཝཱདཱདྷིཀརཎསྶ ཨཉྙབྷཱགིཡཾ། ཀིཙྩཱདྷིཀརཎཾ ཝིཝཱདཱདྷིཀརཎསྶ ཨནུཝཱདཱདྷིཀརཎསྶ ཨཱཔཏྟཱདྷིཀརཎསྶ ཨཉྙབྷཱགིཡཾ། ཨེཝཾ ཨདྷིཀརཎཾ ཨདྷིཀརཎསྶ ཨཉྙབྷཱགིཡཾ།
Aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā. Kathaṃ adhikaraṇaṃ adhikaraṇassa aññabhāgiyaṃ? Vivādādhikaraṇaṃ anuvādādhikaraṇassa āpattādhikaraṇassa kiccādhikaraṇassa aññabhāgiyaṃ. Anuvādādhikaraṇaṃ āpattādhikaraṇassa kiccādhikaraṇassa vivādādhikaraṇassa aññabhāgiyaṃ. Āpattādhikaraṇaṃ kiccādhikaraṇassa vivādādhikaraṇassa anuvādādhikaraṇassa aññabhāgiyaṃ. Kiccādhikaraṇaṃ vivādādhikaraṇassa anuvādādhikaraṇassa āpattādhikaraṇassa aññabhāgiyaṃ. Evaṃ adhikaraṇaṃ adhikaraṇassa aññabhāgiyaṃ.
ཀཐཾ ཨདྷིཀརཎཾ ཨདྷིཀརཎསྶ ཏབྦྷཱགིཡཾ? ཝིཝཱདཱདྷིཀརཎཾ ཝིཝཱདཱདྷིཀརཎསྶ ཏབྦྷཱགིཡཾ། ཨནུཝཱདཱདྷིཀརཎཾ ཨནུཝཱདཱདྷིཀརཎསྶ ཏབྦྷཱགིཡཾ། ཨཱཔཏྟཱདྷིཀརཎཾ ཨཱཔཏྟཱདྷིཀརཎསྶ སིཡཱ ཏབྦྷཱགིཡཾ སིཡཱ ཨཉྙབྷཱགིཡཾ།
Kathaṃ adhikaraṇaṃ adhikaraṇassa tabbhāgiyaṃ? Vivādādhikaraṇaṃ vivādādhikaraṇassa tabbhāgiyaṃ. Anuvādādhikaraṇaṃ anuvādādhikaraṇassa tabbhāgiyaṃ. Āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyaṃ.
ཀཐཾ ཨཱཔཏྟཱདྷིཀརཎཾ ཨཱཔཏྟཱདྷིཀརཎསྶ ཨཉྙབྷཱགིཡཾ? མེཐུནདྷམྨཔཱརཱཛིཀཱཔཏྟི ཨདིནྣཱདཱནཔཱརཱཛིཀཱཔཏྟིཡཱ མནུསྶཝིགྒཧཔཱརཱཛིཀཱཔཏྟིཡཱ ཨུཏྟརིམནུསྶདྷམྨཔཱརཱཛིཀཱཔཏྟིཡཱ ཨཉྙབྷཱགིཡཱ། ཨདིནྣཱདཱནཔཱརཱཛིཀཱཔཏྟི མནུསྶཝིགྒཧཔཱརཱཛིཀཱཔཏྟིཡཱ ཨུཏྟརིམནུསྶདྷམྨཔཱརཱཛིཀཱཔཏྟིཡཱ མེཐུནདྷམྨཔཱརཱཛིཀཱཔཏྟིཡཱ ཨཉྙབྷཱགིཡཱ། མནུསྶཝིགྒཧཔཱརཱཛིཀཱཔཏྟི ཨུཏྟརིམནུསྶདྷམྨཔཱརཱཛིཀཱཔཏྟིཡཱ མེཐུནདྷམྨཔཱརཱཛིཀཱཔཏྟིཡཱ ཨདིནྣཱདཱནཔཱརཱཛིཀཱཔཏྟིཡཱ ཨཉྙབྷཱགིཡཱ། ཨུཏྟརིམནུསྶདྷམྨཔཱརཱཛིཀཱཔཏྟི མེཐུནདྷམྨཔཱརཱཛིཀཱཔཏྟིཡཱ ཨདིནྣཱདཱནཔཱརཱཛིཀཱཔཏྟིཡཱ མནུསྶཝིགྒཧཔཱརཱཛིཀཱཔཏྟིཡཱ ཨཉྙབྷཱགིཡཱ། ཨེཝཾ ཨཱཔཏྟཱདྷིཀརཎཾ ཨཱཔཏྟཱདྷིཀརཎསྶ ཨཉྙབྷཱགིཡཾ།
Kathaṃ āpattādhikaraṇaṃ āpattādhikaraṇassa aññabhāgiyaṃ? Methunadhammapārājikāpatti adinnādānapārājikāpattiyā manussaviggahapārājikāpattiyā uttarimanussadhammapārājikāpattiyā aññabhāgiyā. Adinnādānapārājikāpatti manussaviggahapārājikāpattiyā uttarimanussadhammapārājikāpattiyā methunadhammapārājikāpattiyā aññabhāgiyā. Manussaviggahapārājikāpatti uttarimanussadhammapārājikāpattiyā methunadhammapārājikāpattiyā adinnādānapārājikāpattiyā aññabhāgiyā. Uttarimanussadhammapārājikāpatti methunadhammapārājikāpattiyā adinnādānapārājikāpattiyā manussaviggahapārājikāpattiyā aññabhāgiyā. Evaṃ āpattādhikaraṇaṃ āpattādhikaraṇassa aññabhāgiyaṃ.
ཀཐཾ ཨཱཔཏྟཱདྷིཀརཎཾ ཨཱཔཏྟཱདྷིཀརཎསྶ ཏབྦྷཱགིཡཾ? མེཐུནདྷམྨཔཱརཱཛིཀཱཔཏྟི མེཐུནདྷམྨཔཱརཱཛིཀཱཔཏྟིཡཱ ཏབྦྷཱགིཡཱ། ཨདིནྣཱདཱནཔཱརཱཛིཀཱཔཏྟི ཨདིནྣཱདཱནཔཱརཱཛིཀཱཔཏྟིཡཱ ཏབྦྷཱགིཡཱ། མནུསྶཝིགྒཧཔཱརཱཛིཀཱཔཏྟི མནུསྶཝིགྒཧཔཱརཱཛིཀཱཔཏྟིཡཱ ཏབྦྷཱགིཡཱ། ཨུཏྟརིམནུསྶདྷམྨཔཱརཱཛིཀཱཔཏྟི ཨུཏྟརིམནུསྶདྷམྨཔཱརཱཛིཀཱཔཏྟིཡཱ ཏབྦྷཱགིཡཱ། ཨེཝཾ ཨཱཔཏྟཱདྷིཀརཎཾ ཨཱཔཏྟཱདྷིཀརཎསྶ ཏབྦྷཱགིཡཾ།
Kathaṃ āpattādhikaraṇaṃ āpattādhikaraṇassa tabbhāgiyaṃ? Methunadhammapārājikāpatti methunadhammapārājikāpattiyā tabbhāgiyā. Adinnādānapārājikāpatti adinnādānapārājikāpattiyā tabbhāgiyā. Manussaviggahapārājikāpatti manussaviggahapārājikāpattiyā tabbhāgiyā. Uttarimanussadhammapārājikāpatti uttarimanussadhammapārājikāpattiyā tabbhāgiyā. Evaṃ āpattādhikaraṇaṃ āpattādhikaraṇassa tabbhāgiyaṃ.
ཀིཙྩཱདྷིཀརཎཾ ཀིཙྩཱདྷིཀརཎསྶ ཏབྦྷཱགིཡཾ། ཨེཝཾ ཨདྷིཀརཎཾ ཨདྷིཀརཎསྶ ཏབྦྷཱགིཡཾ།
Kiccādhikaraṇaṃ kiccādhikaraṇassa tabbhāgiyaṃ. Evaṃ adhikaraṇaṃ adhikaraṇassa tabbhāgiyaṃ.
༣༩༤. ཀིཉྩི དེསཾ ལེསམཏྟཾ ཨུཔཱདཱཡཱཏི ལེསོ ནཱམ དས ལེསཱ – ཛཱཏིལེསོ , ནཱམལེསོ, གོཏྟལེསོ, ལིངྒལེསོ, ཨཱཔཏྟིལེསོ, པཏྟལེསོ, ཙཱིཝརལེསོ, ཨུཔཛ྄ཛྷཱཡལེསོ, ཨཱཙརིཡལེསོ, སེནཱསནལེསོ།
394.Kiñci desaṃ lesamattaṃ upādāyāti leso nāma dasa lesā – jātileso , nāmaleso, gottaleso, liṅgaleso, āpattileso, pattaleso, cīvaraleso, upajjhāyaleso, ācariyaleso, senāsanaleso.
༣༩༥. ཛཱཏིལེསོ ནཱམ ཁཏྟིཡོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཁཏྟིཡཾ པསྶིཏྭཱ ཙོདེཏི – ‘‘ཁཏྟིཡོ མཡཱ དིཊྛོ 3། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
395.Jātileso nāma khattiyo diṭṭho hoti pārājikaṃ dhammaṃ ajjhāpajjanto. Aññaṃ khattiyaṃ passitvā codeti – ‘‘khattiyo mayā diṭṭho 4. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
བྲཱཧྨཎོ དིཊྛོ ཧོཏི…པེ॰… ཝེསྶོ དིཊྛོ ཧོཏི…པེ॰… སུདྡོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ སུདྡཾ པསྶིཏྭཱ ཙོདེཏི – ‘‘སུདྡོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི , ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Brāhmaṇo diṭṭho hoti…pe… vesso diṭṭho hoti…pe… suddo diṭṭho hoti pārājikaṃ dhammaṃ ajjhāpajjanto. Aññaṃ suddaṃ passitvā codeti – ‘‘suddo mayā diṭṭho. Pārājikaṃ dhammaṃ ajjhāpannosi , assamaṇosi, asakyaputtiyosi’’…pe… āpatti vācāya, vācāya saṅghādisesassa.
༣༩༦. ནཱམལེསོ ནཱམ བུདྡྷརཀྑིཏོ དིཊྛོ ཧོཏི…པེ॰… དྷམྨརཀྑིཏོ དིཊྛོ ཧོཏི…པེ॰… སངྒྷརཀྑིཏོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ ། ཨཉྙཾ སངྒྷརཀྑིཏཾ པསྶིཏྭཱ ཙོདེཏི – ‘‘སངྒྷརཀྑིཏོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
396.Nāmaleso nāma buddharakkhito diṭṭho hoti…pe… dhammarakkhito diṭṭho hoti…pe… saṅgharakkhito diṭṭho hoti pārājikaṃ dhammaṃ ajjhāpajjanto . Aññaṃ saṅgharakkhitaṃ passitvā codeti – ‘‘saṅgharakkhito mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༣༩༧. གོཏྟལེསོ ནཱམ གོཏམོ དིཊྛོ ཧོཏི…པེ॰… མོགྒལླཱནོ དིཊྛོ ཧོཏི…པེ॰… ཀཙྩཱཡནོ དིཊྛོ ཧོཏི…པེ॰… ཝཱསིཊྛོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཝཱསིཊྛཾ པསྶིཏྭཱ ཙོདེཏི – ‘‘ཝཱསིཊྛོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
397.Gottaleso nāma gotamo diṭṭho hoti…pe… moggallāno diṭṭho hoti…pe… kaccāyano diṭṭho hoti…pe… vāsiṭṭho diṭṭho hoti pārājikaṃ dhammaṃ ajjhāpajjanto. Aññaṃ vāsiṭṭhaṃ passitvā codeti – ‘‘vāsiṭṭho mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༣༩༨. ལིངྒལེསོ ནཱམ དཱིགྷོ དིཊྛོ ཧོཏི…པེ॰… རསྶོ དིཊྛོ ཧོཏི…པེ॰… ཀཎྷོ དིཊྛོ ཧོཏི…པེ॰… ཨོདཱཏོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཨོདཱཏཾ པསྶིཏྭཱ ཙོདེཏི – ‘‘ཨོདཱཏོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
398.Liṅgaleso nāma dīgho diṭṭho hoti…pe… rasso diṭṭho hoti…pe… kaṇho diṭṭho hoti…pe… odāto diṭṭho hoti pārājikaṃ dhammaṃ ajjhāpajjanto. Aññaṃ odātaṃ passitvā codeti – ‘‘odāto mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༣༩༩. ཨཱཔཏྟིལེསོ ནཱམ ལཧུཀཾ ཨཱཔཏྟིཾ ཨཱཔཛྫནྟོ དིཊྛོ ཧོཏི། ཏཉྩེ པཱརཱཛིཀེན ཙོདེཏི – ‘‘ཨསྶམཎོསི, ཨསཀྱཔུཏྟིཡོསི…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
399.Āpattileso nāma lahukaṃ āpattiṃ āpajjanto diṭṭho hoti. Tañce pārājikena codeti – ‘‘assamaṇosi, asakyaputtiyosi…pe… āpatti vācāya, vācāya saṅghādisesassa.
༤༠༠. པཏྟལེསོ ནཱམ ལོཧཔཏྟདྷརོ དིཊྛོ ཧོཏི…པེ॰… སཱཊཀཔཏྟདྷརོ དིཊྛོ ཧོཏི…པེ॰… སུམྦྷཀཔཏྟདྷརོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ སུམྦྷཀཔཏྟདྷརཾ པསྶིཏྭཱ ཙོདེཏི – ‘‘སུམྦྷཀཔཏྟདྷརོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
400.Pattaleso nāma lohapattadharo diṭṭho hoti…pe… sāṭakapattadharo diṭṭho hoti…pe… sumbhakapattadharo diṭṭho hoti pārājikaṃ dhammaṃ ajjhāpajjanto. Aññaṃ sumbhakapattadharaṃ passitvā codeti – ‘‘sumbhakapattadharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༤༠༡. ཙཱིཝརལེསོ ནཱམ པཾསུཀཱུལིཀོ དིཊྛོ ཧོཏི…པེ॰… གཧཔཏིཙཱིཝརདྷརོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ གཧཔཏིཙཱིཝརདྷརཾ པསྶིཏྭཱ ཙོདེཏི – ‘‘གཧཔཏིཙཱིཝརདྷརོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
401.Cīvaraleso nāma paṃsukūliko diṭṭho hoti…pe… gahapaticīvaradharo diṭṭho hoti pārājikaṃ dhammaṃ ajjhāpajjanto. Aññaṃ gahapaticīvaradharaṃ passitvā codeti – ‘‘gahapaticīvaradharo mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༤༠༢. ཨུཔཛ྄ཛྷཱཡལེསོ ནཱམ ཨིཏྠནྣཱམསྶ སདྡྷིཝིཧཱརིཀོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཨིཏྠནྣཱམསྶ སདྡྷིཝིཧཱརིཀཾ པསྶིཏྭཱ ཙོདེཏི – ‘‘ཨིཏྠནྣཱམསྶ སདྡྷིཝིཧཱརིཀོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
402.Upajjhāyaleso nāma itthannāmassa saddhivihāriko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa saddhivihārikaṃ passitvā codeti – ‘‘itthannāmassa saddhivihāriko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༤༠༣. ཨཱཙརིཡལེསོ ནཱམ ཨིཏྠནྣཱམསྶ ཨནྟེཝཱསིཀོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཨིཏྠནྣཱམསྶ ཨནྟེཝཱསིཀཾ པསྶིཏྭཱ ཙོདེཏི – ‘‘ཨིཏྠནྣཱམསྶ ཨནྟེཝཱསིཀོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི’’…པེ॰… ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
403.Ācariyaleso nāma itthannāmassa antevāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmassa antevāsikaṃ passitvā codeti – ‘‘itthannāmassa antevāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
༤༠༤. སེནཱསནལེསོ ནཱམ ཨིཏྠནྣཱམསེནཱསནཝཱསིཀོ དིཊྛོ ཧོཏི པཱརཱཛིཀཾ དྷམྨཾ ཨཛ྄ཛྷཱཔཛྫནྟོ། ཨཉྙཾ ཨིཏྠནྣཱམསེནཱསནཝཱསིཀཾ པསྶིཏྭཱ ཙོདེཏི – ‘‘ཨིཏྠནྣཱམསེནཱསནཝཱསིཀོ མཡཱ དིཊྛོ། པཱརཱཛིཀཾ དྷམྨཾ ཨཛ྄ཛྷཱཔནྣོསི, ཨསྶམཎོསི, ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
404.Senāsanaleso nāma itthannāmasenāsanavāsiko diṭṭho hoti pārājikaṃ dhammaṃ ajjhāpajjanto. Aññaṃ itthannāmasenāsanavāsikaṃ passitvā codeti – ‘‘itthannāmasenāsanavāsiko mayā diṭṭho. Pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
༤༠༥. པཱརཱཛིཀེན དྷམྨེནཱཏི ཙཏུནྣཾ ཨཉྙཏརེན།
405.Pārājikena dhammenāti catunnaṃ aññatarena.
ཨནུདྡྷཾསེཡྻཱཏི ཙོདེཏི ཝཱ ཙོདཱཔེཏི ཝཱ།
Anuddhaṃseyyāti codeti vā codāpeti vā.
ཨཔྤེཝ ནཱམ ནཾ ཨིམམྷཱ བྲཧྨཙརིཡཱཙཱཝེཡྻནྟི བྷིཀྑུབྷཱཝཱ ཙཱཝེཡྻཾ, སམཎདྷམྨཱ ཙཱཝེཡྻཾ, སཱིལཀྑནྡྷཱ ཙཱཝེཡྻཾ, ཏཔོགུཎཱ ཙཱཝེཡྻཾ།
Appeva nāma naṃ imamhā brahmacariyācāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
ཏཏོ ཨཔརེན སམཡེནཱཏི ཡསྨིཾ ཁཎེ ཨནུདྡྷཾསིཏོ ཧོཏི, ཏཾ ཁཎཾ ཏཾ ལཡཾ ཏཾ མུཧུཏྟཾ ཝཱིཏིཝཏྟེ།
Tato aparena samayenāti yasmiṃ khaṇe anuddhaṃsito hoti, taṃ khaṇaṃ taṃ layaṃ taṃ muhuttaṃ vītivatte.
སམནུགྒཱཧཱིཡམཱནོཏི ཡེན ཝཏྠུནཱ ཨནུདྡྷཾསིཏོ ཧོཏི ཏསྨིཾ ཝཏྠུསྨིཾ སམནུགྒཱཧཱིཡམཱནོ།
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
ཨསམནུགྒཱཧཱིཡམཱནོཏི ན ཀེནཙི ཝུཙྩམཱནོ།
Asamanuggāhīyamānoti na kenaci vuccamāno.
ཨདྷིཀརཎཾ ནཱམ ཙཏྟཱརི ཨདྷིཀརཎཱནི – ཝིཝཱདཱདྷིཀརཎཾ, ཨནུཝཱདཱདྷིཀརཎཾ, ཨཱཔཏྟཱདྷིཀརཎཾ, ཀིཙྩཱདྷིཀརཎཾ།
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
ཀོཙི དེསོ ལེསམཏྟོ ཨུཔཱདིནྣོཏི ཏེསཾ དསནྣཾ ལེསཱནཾ ཨཉྙཏརོ ལེསོ ཨུཔཱདིནྣོ ཧོཏི།
Kocideso lesamatto upādinnoti tesaṃ dasannaṃ lesānaṃ aññataro leso upādinno hoti.
བྷིཀྑུ ཙ དོསཾ པཏིཊྛཱཏཱིཏི ཏུཙྪཀཾ མཡཱ བྷཎིཏཾ, མུསཱ མཡཱ བྷཎིཏཾ, ཨབྷཱུཏཾ མཡཱ བྷཎིཏཾ, ཨཛཱནནྟེན མཡཱ བྷཎིཏཾ།
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
སངྒྷཱདིསེསོཏི …པེ॰… ཏེནཔི ཝུཙྩཏི སངྒྷཱདིསེསོཏི།
Saṅghādisesoti …pe… tenapi vuccati saṅghādisesoti.
༤༠༦. བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི, སངྒྷཱདིསེསེ སངྒྷཱདིསེསདིཊྛི ཧོཏི། ཏཉྩེ པཱརཱཛིཀེན ཙོདེཏི – ‘‘ཨསྶམཎོསི, ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
406. Bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི, སངྒྷཱདིསེསེ ཐུལླཙྩཡདིཊྛི ཧོཏི…པེ॰… པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི… དུབྦྷཱསིཏདིཊྛི ཧོཏི། ཏཉྩེ པཱརཱཛིཀེན ཙོདེཏི – ‘‘ཨསྶམཎོསི’’…པེ॰… ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ ཐུལླཙྩཡཾ ཨཛ྄ཛྷཱཔཛྫནྟོ དིཊྛོ ཧོཏི ཐུལླཙྩཡེ ཐུལླཙྩཡདིཊྛི ཧོཏི…པེ॰… ཐུལླཙྩཡེ པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི… དུབྦྷཱསིཏདིཊྛི ཧོཏི… སངྒྷཱདིསེསདིཊྛི ཧོཏི། ཏཉྩེ པཱརཱཛིཀེན ཙོདེཏི – ‘‘ཨསྶམཎོསི’’ …པེ॰… ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codeti – ‘‘assamaṇosi’’ …pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ པཱཙིཏྟིཡཾ…པེ॰… པཱཊིདེསནཱིཡཾ… དུཀྐཊཾ… དུབྦྷཱསིཏཾ ཨཛ྄ཛྷཱཔཛྫནྟོ དིཊྛོ ཧོཏི, དུབྦྷཱསིཏེ དུབྦྷཱསིཏདིཊྛི ཧོཏི…པེ॰… དུབྦྷཱསིཏེ སངྒྷཱདིསེསདིཊྛི ཧོཏི… ཐུལླཙྩཡདིཊྛི ཧོཏི… པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི། ཏཉྩེ པཱརཱཛིཀེན ཙོདེཏི – ‘‘ཨསྶམཎོསི, ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti, dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codeti – ‘‘assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
ཨེཀེཀཾ མཱུལཾ ཀཱཏུན ཙཀྐཾ བནྡྷིཏབྦཾ།
Ekekaṃ mūlaṃ kātuna cakkaṃ bandhitabbaṃ.
༤༠༧. བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི སངྒྷཱདིསེསེ སངྒྷཱདིསེསདིཊྛི ཧོཏི། ཏཉྩེ པཱརཱཛིཀེན ཙོདཱཔེཏི – ‘‘ཨསྶམཎོསི’’…པེ॰… ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
407. Bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ སངྒྷཱདིསེསཾ ཨཛ྄ཛྷཱཔཛྫནྟོ དིཊྛོ ཧོཏི, སངྒྷཱདིསེསེ ཐུལླཙྩཡདིཊྛི ཧོཏི…པེ॰… པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི… དུབྦྷཱསིཏདིཊྛི ཧོཏི། ཏཉྩེ པཱརཱཛིཀེན ཙོདཱཔེཏི – ‘‘ཨསྶམཎོསི’’…པེ॰… ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu saṅghādisesaṃ ajjhāpajjanto diṭṭho hoti, saṅghādisese thullaccayadiṭṭhi hoti…pe… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ ཐུལླཙྩཡཾ ཨཛ྄ཛྷཱཔཛྫནྟོ དིཊྛོ ཧོཏི ཐུལླཙྩཡེ ཐུལླཙྩཡདིཊྛི ཧོཏི…པེ॰… ཐུལླཙྩཡེ པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི… དུབྦྷཱསིཏདིཊྛི ཧོཏི… སངྒྷཱདིསེསདིཊྛི ཧོཏི། ཏཉྩེ པཱརཱཛིཀེན ཙོདཱཔེཏི – ‘‘ཨསྶམཎོསི’’…པེ॰… ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu thullaccayaṃ ajjhāpajjanto diṭṭho hoti thullaccaye thullaccayadiṭṭhi hoti…pe… thullaccaye pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti… dubbhāsitadiṭṭhi hoti… saṅghādisesadiṭṭhi hoti. Tañce pārājikena codāpeti – ‘‘assamaṇosi’’…pe… evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
བྷིཀྑུ པཱཙིཏྟིཡཾ…པེ॰… པཱཊིདེསནཱིཡཾ… དུཀྐཊཾ… དུབྦྷཱསིཏཾ ཨཛ྄ཛྷཱཔཛྫནྟོ དིཊྛོ ཧོཏི དུབྦྷཱསིཏེ དུབྦྷཱསིཏདིཊྛི ཧོཏི…པེ॰… དུབྦྷཱསིཏེ སངྒྷཱདིསེསདིཊྛི ཧོཏི… ཐུལླཙྩཡདིཊྛི ཧོཏི… པཱཙིཏྟིཡདིཊྛི ཧོཏི… པཱཊིདེསནཱིཡདིཊྛི ཧོཏི… དུཀྐཊདིཊྛི ཧོཏི། ཏཉྩེ པཱརཱཛིཀེན ཙོདཱཔེཏི – ‘‘ཨསྶམཎོསི , ཨསཀྱཔུཏྟིཡོསི, ནཏྠི ཏཡཱ སདྡྷིཾ ཨུཔོསཐོ ཝཱ པཝཱརཎཱ ཝཱ སངྒྷཀམྨཾ ཝཱ’’ཏི, ཨེཝམྤི ཨཱཔཏྟཉྙབྷཱགིཡཾ ཧོཏི ལེསོ ཙ ཨུཔཱདིནྣོ, ཨཱཔཏྟི ཝཱཙཱཡ, ཝཱཙཱཡ སངྒྷཱདིསེསསྶ།
Bhikkhu pācittiyaṃ…pe… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho hoti dubbhāsite dubbhāsitadiṭṭhi hoti…pe… dubbhāsite saṅghādisesadiṭṭhi hoti… thullaccayadiṭṭhi hoti… pācittiyadiṭṭhi hoti… pāṭidesanīyadiṭṭhi hoti… dukkaṭadiṭṭhi hoti. Tañce pārājikena codāpeti – ‘‘assamaṇosi , asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, evampi āpattaññabhāgiyaṃ hoti leso ca upādinno, āpatti vācāya, vācāya saṅghādisesassa.
༤༠༨. ཨནཱཔཏྟི ཏཐཱསཉྙཱི ཙོདེཏི ཝཱ ཙོདཱཔེཏི ཝཱ, ཨུམྨཏྟཀསྶ, ཨཱདིཀམྨིཀསྶཱཏི།
408. Anāpatti tathāsaññī codeti vā codāpeti vā, ummattakassa, ādikammikassāti.
དུཏིཡདུཊྛདོསསིཀྑཱཔདཾ ནིཊྛིཏཾ ནཝམཾ།
Dutiyaduṭṭhadosasikkhāpadaṃ niṭṭhitaṃ navamaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༩. དུཏིཡདུཊྛདོསསིཀྑཱཔདཝཎྞནཱ • 9. Dutiyaduṭṭhadosasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༩. དུཏིཡདུཊྛདོསསིཀྑཱཔདཝཎྞནཱ • 9. Dutiyaduṭṭhadosasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༩. དུཏིཡདུཊྛདོསསིཀྑཱཔདཝཎྞནཱ • 9. Dutiyaduṭṭhadosasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༩. དུཏིཡདུཊྛདོསསིཀྑཱཔདཝཎྞནཱ • 9. Dutiyaduṭṭhadosasikkhāpadavaṇṇanā
