| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
9. து³தியது³ட்ட²தோ³ஸஸிக்கா²பத³வண்ணனா
9. Dutiyaduṭṭhadosasikkhāpadavaṇṇanā
391. நவமே மெத்தியங் பி⁴க்கு²னிந்தி லிங்க³னாஸனாய நாஸிதாயபி தஸ்ஸா பூ⁴தபுப்³ப³வோஹாரங் க³ஹெத்வா வுத்தங். அஞ்ஞபா⁴க³ஸ்ஸாதி தே²ரஸ்ஸ மனுஸ்ஸஜாதிபி⁴க்கு²பா⁴வதோ அஞ்ஞஸ்ஸ திரச்சா²னஜாதிச²க³லகபா⁴வஸங்கா²தஸ்ஸ கொட்டா²ஸஸ்ஸ. இத³ந்தி ஸாமஞ்ஞதோ நபுங்ஸகலிங்கே³ன வுத்தங், அயங் ச²க³லகோதி அத்தோ². அஞ்ஞபா⁴கோ³தி யதா²வுத்ததிரச்சா²னஜாதிச²க³லகபா⁴வஸங்கா²தோ அஞ்ஞோ கொட்டா²ஸோ, அஞ்ஞபா⁴க³ஸ்ஸ இத³ந்தி அஞ்ஞபா⁴கி³யந்தி பட²மவிக்³க³ஹஸ்ஸ அத்தோ², அஞ்ஞபா⁴க³மத்தீ²தி து³தியவிக்³க³ஹஸ்ஸ, த்³வீஹிபி ச²க³லகோவ வுத்தோ. இதா³னி த்³வீஹிபி விக்³க³ஹேஹி வுத்தமேவத்த²ங் வித்தா²ரதோ த³ஸ்ஸெந்தோ ‘‘யோ ஹி ஸோ’’திஆதி³மாஹ. தத்த² யோ ஹி ஸோ ச²க³லகோ வுத்தோ, ஸோ அஞ்ஞஸ்ஸ பா⁴க³ஸ்ஸ ஹோதீதி ச அஞ்ஞபா⁴கி³யஸங்க்²யங் லப⁴தீதி ச யோஜனா. து³தியவிக்³க³ஹஸ்ஸ அத்த²ங் த³ஸ்ஸேதுங் ‘‘ஸோ வா’’திஆதி³ வுத்தங். அதி⁴கரணந்தி வேதி³தப்³போ³தி எத்தா²பி யோ ஹி ஸோ ‘‘த³ப்³போ³ மல்லபுத்தோ நாமா’’தி ச²க³லகோ வுத்தோ, ஸோதி ஆனெத்வா ஸம்ப³ந்தி⁴தப்³ப³ங். தஞ்ஹி ஸந்தா⁴யாதி ‘‘த³ப்³போ³’’தி நாமகரணஸ்ஸ அதி⁴ட்டா²னபூ⁴தங் ச²க³லகங் ஸந்தா⁴ய. தே பி⁴க்கூ²தி தே அனுயுஞ்ஜந்தா பி⁴க்கூ². ஆபத்தியாபி புக்³க³லாதி⁴ட்டா²னத்தா ‘‘புக்³க³லானங்யேவ லேஸா’’தி வுத்தங்.
391. Navame mettiyaṃ bhikkhuninti liṅganāsanāya nāsitāyapi tassā bhūtapubbavohāraṃ gahetvā vuttaṃ. Aññabhāgassāti therassa manussajātibhikkhubhāvato aññassa tiracchānajātichagalakabhāvasaṅkhātassa koṭṭhāsassa. Idanti sāmaññato napuṃsakaliṅgena vuttaṃ, ayaṃ chagalakoti attho. Aññabhāgoti yathāvuttatiracchānajātichagalakabhāvasaṅkhāto añño koṭṭhāso, aññabhāgassa idanti aññabhāgiyanti paṭhamaviggahassa attho, aññabhāgamatthīti dutiyaviggahassa, dvīhipi chagalakova vutto. Idāni dvīhipi viggahehi vuttamevatthaṃ vitthārato dassento ‘‘yo hi so’’tiādimāha. Tattha yo hi so chagalako vutto, so aññassa bhāgassa hotīti ca aññabhāgiyasaṅkhyaṃ labhatīti ca yojanā. Dutiyaviggahassa atthaṃ dassetuṃ ‘‘so vā’’tiādi vuttaṃ. Adhikaraṇanti veditabboti etthāpi yo hi so ‘‘dabbo mallaputto nāmā’’ti chagalako vutto, soti ānetvā sambandhitabbaṃ. Tañhi sandhāyāti ‘‘dabbo’’ti nāmakaraṇassa adhiṭṭhānabhūtaṃ chagalakaṃ sandhāya. Te bhikkhūti te anuyuñjantā bhikkhū. Āpattiyāpi puggalādhiṭṭhānattā ‘‘puggalānaṃyeva lesā’’ti vuttaṃ.
393. யா ச ஸா அவஸானே…பே॰… சோத³னா வுத்தாதி ‘‘பி⁴க்கு² ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ² ஹோதி ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி, தஞ்சே பாராஜிகேன சோதே³தீ’’திஆதி³ங் (பாரா॰ 407) சோத³னாபே⁴த³ங் ஸந்தா⁴ய வத³தி. ஸத்தன்னம்பி ஆபத்தீனங் பச்சேகங் பாராஜிகத்தாதி³ஸாமஞ்ஞேபி மேது²னாதி³ன்னாதா³னாதி³வத்து²தோ, ராக³தோ³ஸத்தாதி³ஸபா⁴வதோ ச விஸபா⁴க³தாபி அத்தீ²தி ஆஹ ‘‘யஸ்மா பன…பே॰… ந ஹோதீ’’தி.
393.Yā ca sā avasāne…pe… codanā vuttāti ‘‘bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti, tañce pārājikena codetī’’tiādiṃ (pārā. 407) codanābhedaṃ sandhāya vadati. Sattannampi āpattīnaṃ paccekaṃ pārājikattādisāmaññepi methunādinnādānādivatthuto, rāgadosattādisabhāvato ca visabhāgatāpi atthīti āha ‘‘yasmā pana…pe… na hotī’’ti.
வுத்தனயேனேவாதி ‘‘ஸபா⁴க³விஸபா⁴க³வத்து²தோ’’திஆதி³னா (பாரா॰ அட்ட²॰ 2.393) வுத்தனயேன. கம்மலக்க²ணங், தங்மனஸிகாரோ ச அவிபன்னகம்மஸ்ஸ நிமித்ததோ ப²லூபசாரேன கம்மந்தி வுச்சதீதி ஆஹ ‘‘தங் நிஸ்ஸாய உப்பஜ்ஜனதோ’’தி. பரிவாஸாதி³ங் நிஸ்ஸாய மானத்தாதீ³னங் உப்பஜ்ஜனதோ ‘‘புரிமங் புரிம’’ந்திஆதி³ வுத்தங்.
Vuttanayenevāti ‘‘sabhāgavisabhāgavatthuto’’tiādinā (pārā. aṭṭha. 2.393) vuttanayena. Kammalakkhaṇaṃ, taṃmanasikāro ca avipannakammassa nimittato phalūpacārena kammanti vuccatīti āha ‘‘taṃ nissāya uppajjanato’’ti. Parivāsādiṃ nissāya mānattādīnaṃ uppajjanato ‘‘purimaṃ purima’’ntiādi vuttaṃ.
395. ஸவத்து²கங் கத்வாதி புக்³க³லாதி⁴ட்டா²னங் கத்வா. தீ³கா⁴தி³னோதி தீ³க⁴ரஸ்ஸாதி³லிங்க³ஸ்ஸ. தி³ட்டா²தி³னோதி தி³ட்ட²புப்³பா³தி³னோ.
395.Savatthukaṃ katvāti puggalādhiṭṭhānaṃ katvā. Dīghādinoti dīgharassādiliṅgassa. Diṭṭhādinoti diṭṭhapubbādino.
408. ஏவங் ததா²ஸஞ்ஞீதி அஞ்ஞஸ்ஸ மேது²னாதி³கிரியங் தி³ஸ்வா ‘‘அயங் ஸோ’’தி ஏவங் ததா²ஸஞ்ஞீ. அங்கா³னி பட²மது³ட்ட²தோ³ஸே வுத்தஸதி³ஸானி, இத⁴ பன கிஞ்சிதே³ஸங் லேஸமத்தங் உபாதி³யனா அதி⁴கா.
408.Evaṃ tathāsaññīti aññassa methunādikiriyaṃ disvā ‘‘ayaṃ so’’ti evaṃ tathāsaññī. Aṅgāni paṭhamaduṭṭhadose vuttasadisāni, idha pana kiñcidesaṃ lesamattaṃ upādiyanā adhikā.
து³தியது³ட்ட²தோ³ஸஸிக்கா²பத³வண்ணனா நிட்டி²தா.
Dutiyaduṭṭhadosasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. து³தியது³ட்ட²தோ³ஸஸிக்கா²பத³ங் • 9. Dutiyaduṭṭhadosasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. து³தியது³ட்ட²தோ³ஸஸிக்கா²பத³வண்ணனா • 9. Dutiyaduṭṭhadosasikkhāpadavaṇṇanā
