| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৯. দুতিযদুট্ঠদোসসিক্খাপদৰণ্ণনা
9. Dutiyaduṭṭhadosasikkhāpadavaṇṇanā
৩৯১. তেন সমযেন বুদ্ধো ভগৰাতি দুতিযদুট্ঠদোসসিক্খাপদং। তত্থ হন্দ মযং আৰুসো ইমং ছগলকং দব্বং মল্লপুত্তং নাম করোমাতি তে কির পঠমৰত্থুস্মিং অত্তনো মনোরথং সম্পাদেতুং অসক্কোন্তা লদ্ধনিগ্গহা ৰিঘাতপ্পত্তা ‘‘ইদানি জানিস্সামা’’তি তাদিসং ৰত্থুং পরিযেসমানা ৰিচরন্তি। অথেকদিৰসং দিস্ৰা তুট্ঠা অঞ্ঞমঞ্ঞং ওলোকেত্ৰা এৰমাহংসু – ‘‘হন্দ মযং, আৰুসো, ইমং ছগলকং দব্বং মল্লপুত্তং নাম করোমা’’তি, ‘‘দব্বো মল্লপুত্তো নামায’’ন্তি এৰমস্স নামং করোমাতি ৰুত্তং হোতি। এস নযো মেত্তিযং নাম ভিক্খুনিন্তি এত্থাপি।
391.Tena samayena buddho bhagavāti dutiyaduṭṭhadosasikkhāpadaṃ. Tattha handa mayaṃ āvuso imaṃ chagalakaṃ dabbaṃ mallaputtaṃ nāma karomāti te kira paṭhamavatthusmiṃ attano manorathaṃ sampādetuṃ asakkontā laddhaniggahā vighātappattā ‘‘idāni jānissāmā’’ti tādisaṃ vatthuṃ pariyesamānā vicaranti. Athekadivasaṃ disvā tuṭṭhā aññamaññaṃ oloketvā evamāhaṃsu – ‘‘handa mayaṃ, āvuso, imaṃ chagalakaṃ dabbaṃ mallaputtaṃ nāma karomā’’ti, ‘‘dabbo mallaputto nāmāya’’nti evamassa nāmaṃ karomāti vuttaṃ hoti. Esa nayo mettiyaṃ nāma bhikkhuninti etthāpi.
তে ভিক্খূ মেত্তিযভুমজকে ভিক্খূ অনুযুঞ্জিংসূতি এৰং অনুযুঞ্জিংসু –‘‘আৰুসো, কুহিং তুম্হেহি দব্বো মল্লপুত্তো মেত্তিযায ভিক্খুনিযা সদ্ধিং দিট্ঠো’’তি? ‘‘গিজ্ঝকূটপব্বতপাদে’’তি। ‘‘কায ৰেলায’’তি? ‘‘ভিক্খাচারগমনৰেলাযা’’তি। আৰুসো দব্ব ইমে এৰং ৰদন্তি – ‘‘ত্ৰং তদা কুহি’’ন্তি? ‘‘ৰেল়ুৰনে ভত্তানি উদ্দিসামী’’তি। ‘‘তৰ তায ৰেলায ৰেল়ুৰনে অত্থিভাৰং কো জানাতী’’তি? ‘‘ভিক্খুসঙ্ঘো, ভন্তে’’তি। তে সঙ্ঘং পুচ্ছিংসু – ‘‘জানাথ তুম্হে তায ৰেলায ইমস্স ৰেল়ুৰনে অত্থিভাৰ’’ন্তি। ‘‘আম, আৰুসো, জানাম, থেরো সম্মুতিলদ্ধদিৰসতো পট্ঠায ৰেল়ুৰনেযেৰা’’তি। ততো মেত্তিযভুমজকে আহংসু – ‘‘আৰুসো, তুম্হাকং কথা ন সমেতি, কচ্চি নো লেসং ওড্ডেত্ৰা ৰদথা’’তি। এৰং তে তেহি ভিক্খূহি অনুযুঞ্জিযমানা আম আৰুসোতি ৰত্ৰা এতমত্থং আরোচেসুং।
Te bhikkhū mettiyabhumajake bhikkhū anuyuñjiṃsūti evaṃ anuyuñjiṃsu –‘‘āvuso, kuhiṃ tumhehi dabbo mallaputto mettiyāya bhikkhuniyā saddhiṃ diṭṭho’’ti? ‘‘Gijjhakūṭapabbatapāde’’ti. ‘‘Kāya velāya’’ti? ‘‘Bhikkhācāragamanavelāyā’’ti. Āvuso dabba ime evaṃ vadanti – ‘‘tvaṃ tadā kuhi’’nti? ‘‘Veḷuvane bhattāni uddisāmī’’ti. ‘‘Tava tāya velāya veḷuvane atthibhāvaṃ ko jānātī’’ti? ‘‘Bhikkhusaṅgho, bhante’’ti. Te saṅghaṃ pucchiṃsu – ‘‘jānātha tumhe tāya velāya imassa veḷuvane atthibhāva’’nti. ‘‘Āma, āvuso, jānāma, thero sammutiladdhadivasato paṭṭhāya veḷuvaneyevā’’ti. Tato mettiyabhumajake āhaṃsu – ‘‘āvuso, tumhākaṃ kathā na sameti, kacci no lesaṃ oḍḍetvā vadathā’’ti. Evaṃ te tehi bhikkhūhi anuyuñjiyamānā āma āvusoti vatvā etamatthaṃ ārocesuṃ.
কিং পন তুম্হে, আৰুসো, আযস্মন্তং দব্বং মল্লপুত্তং অঞ্ঞভাগিযস্স অধিকরণস্সাতি এত্থ অঞ্ঞভাগস্স ইদং, অঞ্ঞভাগো ৰা অস্স অত্থীতি অঞ্ঞভাগিযং। অধিকরণন্তি আধারো ৰেদিতব্বো, ৰত্থু অধিট্ঠানন্তি ৰুত্তং হোতি। যো হি সো ‘‘দব্বো মল্লপুত্তো নামা’’তি ছগলকো ৰুত্তো, সো য্ৰাযং আযস্মতো দব্বস্স মল্লপুত্তস্স ভাগো কোট্ঠাসো পক্খো মনুস্সজাতি চেৰ ভিক্খুভাৰো চ ততো অঞ্ঞস্স ভাগস্স কোট্ঠাসস্স পক্খস্স হোতি তিরচ্ছানজাতিযা চেৰ ছগলকভাৰস্স চ সো ৰা অঞ্ঞভাগো অস্স অত্থীতি তস্মা অঞ্ঞভাগিযসঙ্খ্যং লভতি। যস্মা চ তেসং ‘‘ইমং মযং দব্বং মল্লপুত্তং নাম করোমা’’তি ৰদন্তানং তস্সা নামকরণসঞ্ঞায আধারো ৰত্থু অধিট্ঠানং, তস্মা অধিকরণন্তি ৰেদিতব্বো। তঞ্হি সন্ধায ‘‘তে ভিক্খূ অঞ্ঞভাগিযস্স অধিকরণস্সা’’তি আহংসু, ন ৰিৰাদাধিকরণাদীসু অঞ্ঞতরং। কস্মা? অসম্ভৰতো। ন হি তে চতুন্নং অধিকরণানং কস্সচি অঞ্ঞভাগিযস্স অধিকরণস্স কঞ্চিদেসং লেসমত্তং উপাদিযিংসু। ন চ চতুন্নং অধিকরণানং লেসো নাম অত্থি। জাতিলেসাদযো হি পুগ্গলানংযেৰ লেসা ৰুত্তা, ন ৰিৰাদাধিকরণাদীনং। ইদঞ্চ ‘‘দব্বো মল্লপুত্তো’’তি নামং তস্স অঞ্ঞভাগিযাধিকরণভাৰে ঠিতস্স ছগলকস্স কোচি দেসো হোতি থেরং অমূলকেন পারাজিকেন অনুদ্ধংসেতুং লেসমত্তো।
Kiṃpana tumhe, āvuso, āyasmantaṃ dabbaṃ mallaputtaṃ aññabhāgiyassa adhikaraṇassāti ettha aññabhāgassa idaṃ, aññabhāgo vā assa atthīti aññabhāgiyaṃ. Adhikaraṇanti ādhāro veditabbo, vatthu adhiṭṭhānanti vuttaṃ hoti. Yo hi so ‘‘dabbo mallaputto nāmā’’ti chagalako vutto, so yvāyaṃ āyasmato dabbassa mallaputtassa bhāgo koṭṭhāso pakkho manussajāti ceva bhikkhubhāvo ca tato aññassa bhāgassa koṭṭhāsassa pakkhassa hoti tiracchānajātiyā ceva chagalakabhāvassa ca so vā aññabhāgo assa atthīti tasmā aññabhāgiyasaṅkhyaṃ labhati. Yasmā ca tesaṃ ‘‘imaṃ mayaṃ dabbaṃ mallaputtaṃ nāma karomā’’ti vadantānaṃ tassā nāmakaraṇasaññāya ādhāro vatthu adhiṭṭhānaṃ, tasmā adhikaraṇanti veditabbo. Tañhi sandhāya ‘‘te bhikkhū aññabhāgiyassa adhikaraṇassā’’ti āhaṃsu, na vivādādhikaraṇādīsu aññataraṃ. Kasmā? Asambhavato. Na hi te catunnaṃ adhikaraṇānaṃ kassaci aññabhāgiyassa adhikaraṇassa kañcidesaṃ lesamattaṃ upādiyiṃsu. Na ca catunnaṃ adhikaraṇānaṃ leso nāma atthi. Jātilesādayo hi puggalānaṃyeva lesā vuttā, na vivādādhikaraṇādīnaṃ. Idañca ‘‘dabbo mallaputto’’ti nāmaṃ tassa aññabhāgiyādhikaraṇabhāve ṭhitassa chagalakassa koci deso hoti theraṃ amūlakena pārājikena anuddhaṃsetuṃ lesamatto.
এত্থ চ দিস্সতি অপদিস্সতি অস্স অযন্তি ৰোহরীযতীতি দেসো। জাতিআদীসু অঞ্ঞতরকোট্ঠাসস্সেতং অধিৰচনং। অঞ্ঞম্পি ৰত্থুং লিস্সতি সিলিস্সতি ৰোহারমত্তেনেৰ ঈসকং অল্লীযতীতি লেসো। জাতিআদীনংযেৰ অঞ্ঞতরকোট্ঠাসস্সেতং অধিৰচনং। ততো পরং উত্তানত্থমেৰ। সিক্খাপদপঞ্ঞত্তিযম্পি অযমেৰত্থো। পদভাজনে পন যস্স অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেয্য , তং যস্মা অট্ঠুপ্পত্তিৰসেনেৰ আৰিভূতং, তস্মা ন ৰিভত্তন্তি ৰেদিতব্বং।
Ettha ca dissati apadissati assa ayanti voharīyatīti deso. Jātiādīsu aññatarakoṭṭhāsassetaṃ adhivacanaṃ. Aññampi vatthuṃ lissati silissati vohāramatteneva īsakaṃ allīyatīti leso. Jātiādīnaṃyeva aññatarakoṭṭhāsassetaṃ adhivacanaṃ. Tato paraṃ uttānatthameva. Sikkhāpadapaññattiyampi ayamevattho. Padabhājane pana yassa aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃseyya , taṃ yasmā aṭṭhuppattivaseneva āvibhūtaṃ, tasmā na vibhattanti veditabbaṃ.
৩৯৩. যানি পন অধিকরণন্তি ৰচনসামঞ্ঞতো অত্থুদ্ধারৰসেন পৰত্তানি চত্তারি অধিকরণানি, তেসং অঞ্ঞভাগিযতা চ তব্ভাগিযতা চ যস্মা অপাকটা জানিতব্বা চ ৰিনযধরেহি, তস্মা ৰচনসামঞ্ঞতো লদ্ধং অধিকরণং নিস্সায তং আৰিকরোন্তো ‘‘অঞ্ঞভাগিযস্স অধিকরণস্সাতি আপত্তঞ্ঞভাগিযং ৰা হোতি অধিকরণঞ্ঞভাগিযং ৰা’’তিআদিমাহ। যা চ সা অৰসানে আপত্তঞ্ঞভাগিযস্স অধিকরণস্স ৰসেন চোদনা ৰুত্তা, তম্পি দস্সেতুং অযং সব্বাধিকরণানং তব্ভাগিযঅঞ্ঞভাগিযতা সমাহটাতি ৰেদিতব্বা।
393. Yāni pana adhikaraṇanti vacanasāmaññato atthuddhāravasena pavattāni cattāri adhikaraṇāni, tesaṃ aññabhāgiyatā ca tabbhāgiyatā ca yasmā apākaṭā jānitabbā ca vinayadharehi, tasmā vacanasāmaññato laddhaṃ adhikaraṇaṃ nissāya taṃ āvikaronto ‘‘aññabhāgiyassa adhikaraṇassāti āpattaññabhāgiyaṃ vā hoti adhikaraṇaññabhāgiyaṃ vā’’tiādimāha. Yā ca sā avasāne āpattaññabhāgiyassa adhikaraṇassa vasena codanā vuttā, tampi dassetuṃ ayaṃ sabbādhikaraṇānaṃ tabbhāgiyaaññabhāgiyatā samāhaṭāti veditabbā.
তত্থ চ আপত্তঞ্ঞভাগিযং ৰাতি পঠমং উদ্দিট্ঠত্তা ‘‘কথঞ্চ আপত্তি আপত্তিযা অঞ্ঞভাগিযা হোতী’’তি নিদ্দেসে আরভিতব্বে যস্মা আপত্তাধিকরণস্স তব্ভাগিযৰিচারণাযংযেৰ অযমত্থো আগমিস্সতি, তস্মা এৰং অনারভিত্ৰা ‘‘কথঞ্চ অধিকরণং অধিকরণস্স অঞ্ঞভাগিয’’ন্তি পচ্ছিমপদংযেৰ গহেত্ৰা নিদ্দেসো আরদ্ধোতি ৰেদিতব্বো।
Tattha ca āpattaññabhāgiyaṃ vāti paṭhamaṃ uddiṭṭhattā ‘‘kathañca āpatti āpattiyā aññabhāgiyā hotī’’ti niddese ārabhitabbe yasmā āpattādhikaraṇassa tabbhāgiyavicāraṇāyaṃyeva ayamattho āgamissati, tasmā evaṃ anārabhitvā ‘‘kathañca adhikaraṇaṃ adhikaraṇassa aññabhāgiya’’nti pacchimapadaṃyeva gahetvā niddeso āraddhoti veditabbo.
তত্থ অঞ্ঞভাগিযৰারো উত্তানত্থোযেৰ। একমেকঞ্হি অধিকরণং ইতরেসং তিণ্ণং তিণ্ণং অঞ্ঞভাগিযং অঞ্ঞপক্খিযং অঞ্ঞকোট্ঠাসিযং হোতি, ৰত্থুৰিসভাগত্তা, তব্ভাগিযৰারে পন ৰিৰাদাধিকরণং ৰিৰাদাধিকরণস্স তব্ভাগিযং তপ্পক্খিযং তংকোট্ঠাসিযং ৰত্থুসভাগত্তা, তথা অনুৰাদাধিকরণং অনুৰাদাধিকরণস্স। কথং? বুদ্ধকালতো পট্ঠায হি অট্ঠারস ভেদকরৰত্থূনি নিস্সায উপ্পন্নৰিৰাদো চ ইদানি উপ্পজ্জনকৰিৰাদো চ ৰত্থুসভাগতায একং ৰিৰাদাধিকরণমেৰ হোতি, তথা বুদ্ধকালতো পট্ঠায চতস্সো ৰিপত্তিযো নিস্সায উপ্পন্নঅনুৰাদো চ ইদানি উপ্পজ্জনকঅনুৰাদো চ ৰত্থুসভাগতায একং অনুৰাদাধিকরণমেৰ হোতি। যস্মা পন আপত্তাধিকরণং আপত্তাধিকরণস্স সভাগৰিসভাগৰত্থুতো সভাগসরিক্খাসরিক্খতো চ একংসেন তব্ভাগিযং ন হোতি, তস্মা আপত্তাধিকরণং আপত্তাধিকরণস্স সিযা তব্ভাগিযং সিযা অঞ্ঞভাগিযন্তি ৰুত্তং। তত্থ আদিতো পট্ঠায অঞ্ঞভাগিযস্স পঠমং নিদ্দিট্ঠত্তা ইধাপি অঞ্ঞভাগিযমেৰ পঠমং নিদ্দিট্ঠং, তত্থ অঞ্ঞভাগিযত্তঞ্চ পরতো তব্ভাগিযত্তঞ্চ ৰুত্তনযেনেৰ ৰেদিতব্বং।
Tattha aññabhāgiyavāro uttānatthoyeva. Ekamekañhi adhikaraṇaṃ itaresaṃ tiṇṇaṃ tiṇṇaṃ aññabhāgiyaṃ aññapakkhiyaṃ aññakoṭṭhāsiyaṃ hoti, vatthuvisabhāgattā, tabbhāgiyavāre pana vivādādhikaraṇaṃ vivādādhikaraṇassa tabbhāgiyaṃ tappakkhiyaṃ taṃkoṭṭhāsiyaṃ vatthusabhāgattā, tathā anuvādādhikaraṇaṃ anuvādādhikaraṇassa. Kathaṃ? Buddhakālato paṭṭhāya hi aṭṭhārasa bhedakaravatthūni nissāya uppannavivādo ca idāni uppajjanakavivādo ca vatthusabhāgatāya ekaṃ vivādādhikaraṇameva hoti, tathā buddhakālato paṭṭhāya catasso vipattiyo nissāya uppannaanuvādo ca idāni uppajjanakaanuvādo ca vatthusabhāgatāya ekaṃ anuvādādhikaraṇameva hoti. Yasmā pana āpattādhikaraṇaṃ āpattādhikaraṇassa sabhāgavisabhāgavatthuto sabhāgasarikkhāsarikkhato ca ekaṃsena tabbhāgiyaṃ na hoti, tasmā āpattādhikaraṇaṃ āpattādhikaraṇassa siyā tabbhāgiyaṃ siyā aññabhāgiyanti vuttaṃ. Tattha ādito paṭṭhāya aññabhāgiyassa paṭhamaṃ niddiṭṭhattā idhāpi aññabhāgiyameva paṭhamaṃ niddiṭṭhaṃ, tattha aññabhāgiyattañca parato tabbhāgiyattañca vuttanayeneva veditabbaṃ.
কিচ্চাধিকরণং কিচ্চাধিকরণস্স তব্ভাগিযন্তি এত্থ পন বুদ্ধকালতো পট্ঠায চত্তারি সঙ্ঘকম্মানি নিস্সায উপ্পন্নং অধিকরণঞ্চ ইদানি চত্তারি সঙ্ঘকম্মানি নিস্সায উপ্পজ্জনকং অধিকরণঞ্চ সভাগতায সরিক্খতায চ একং কিচ্চাধিকরণমেৰ হোতি। কিং পন সঙ্ঘকম্মানি নিস্সায উপ্পন্নং অধিকরণং কিচ্চাধিকরণং, উদাহু সঙ্ঘকম্মানমেৰেতং অধিৰচনন্তি? সঙ্ঘকম্মানমেৰেতং অধিৰচনং। এৰং সন্তেপি সঙ্ঘকম্মং নাম ‘‘ইদঞ্চিদঞ্চ এৰং কত্তব্ব’’ন্তি যং কম্মলক্খণং মনসিকরোতি তং নিস্সায উপ্পজ্জনতো পুরিমং পুরিমং সঙ্ঘকম্মং নিস্সায উপ্পজ্জনতো চ সঙ্ঘকম্মানি নিস্সায উপ্পন্নং অধিকরণং কিচ্চাধিকরণন্তি ৰুত্তং।
Kiccādhikaraṇaṃkiccādhikaraṇassa tabbhāgiyanti ettha pana buddhakālato paṭṭhāya cattāri saṅghakammāni nissāya uppannaṃ adhikaraṇañca idāni cattāri saṅghakammāni nissāya uppajjanakaṃ adhikaraṇañca sabhāgatāya sarikkhatāya ca ekaṃ kiccādhikaraṇameva hoti. Kiṃ pana saṅghakammāni nissāya uppannaṃ adhikaraṇaṃ kiccādhikaraṇaṃ, udāhu saṅghakammānamevetaṃ adhivacananti? Saṅghakammānamevetaṃ adhivacanaṃ. Evaṃ santepi saṅghakammaṃ nāma ‘‘idañcidañca evaṃ kattabba’’nti yaṃ kammalakkhaṇaṃ manasikaroti taṃ nissāya uppajjanato purimaṃ purimaṃ saṅghakammaṃ nissāya uppajjanato ca saṅghakammāni nissāya uppannaṃ adhikaraṇaṃ kiccādhikaraṇanti vuttaṃ.
৩৯৪. কিঞ্চি দেসং লেসমত্তং উপাদাযাতি এত্থ পন যস্মা দেসোতি ৰা লেসমত্তোতি ৰা পুব্বে ৰুত্তনযেনেৰ ব্যঞ্জনতো নানং অত্থতো একং, তস্মা ‘‘লেসো নাম দস লেসা জাতিলেসো নামলেসো’’তিআদিমাহ। তত্থ জাতিযেৰ জাতিলেসো। এস নযো সেসেসু।
394.Kiñci desaṃ lesamattaṃ upādāyāti ettha pana yasmā desoti vā lesamattoti vā pubbe vuttanayeneva byañjanato nānaṃ atthato ekaṃ, tasmā ‘‘leso nāma dasa lesā jātileso nāmaleso’’tiādimāha. Tattha jātiyeva jātileso. Esa nayo sesesu.
৩৯৫. ইদানি তমেৰ লেসং ৰিত্থারতো দস্সেতুং যথা তং উপাদায অনুদ্ধংসনা হোতি তথা সৰত্থুকং কত্ৰা দস্সেন্তো ‘‘জাতিলেসো নাম খত্তিযো দিট্ঠো হোতী’’তিআদিমাহ। তত্থ খত্তিযো দিট্ঠো হোতীতি অঞ্ঞো কোচি খত্তিযজাতিযো ইমিনা চোদকেন দিট্ঠো হোতি। পারাজিকং ধম্মং অজ্ঝাপজ্জন্তোতি মেথুনধম্মাদীসু অঞ্ঞতরং আপজ্জন্তো। অঞ্ঞং খত্তিযং পস্সিত্ৰা চোদেতীতি অথ সো অঞ্ঞং অত্তনো ৰেরিং খত্তিযজাতিযং ভিক্খুং পস্সিত্ৰা তং খত্তিযজাতিলেসং গহেত্ৰা এৰং চোদেতি ‘‘খত্তিযো মযা দিট্ঠো পারাজিকং ধম্মং অজ্ঝাপজ্জন্তো, ত্ৰং খত্তিযো, পারাজিকং ধম্মং অজ্ঝাপন্নোসী’’ অথ ৰা ‘‘ত্ৰং সো খত্তিযো, ন অঞ্ঞো, পারাজিকং ধম্মং অজ্ঝাপন্নোসি, অস্সমণোসি অসক্যপুত্তিযোসি নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায ৰাচায সঙ্ঘাদিসেসস্স। এত্থ চ তেসং খত্তিযানং অঞ্ঞমঞ্ঞং অসদিসস্স তস্স তস্স দীঘাদিনো ৰা দিট্ঠাদিনো ৰা ৰসেন অঞ্ঞভাগিযতা খত্তিযজাতিপঞ্ঞত্তিযা আধারৰসেন অধিকরণতা চ ৰেদিতব্বা, এতেনুপাযেন সব্বপদেসু যোজনা ৰেদিতব্বা।
395. Idāni tameva lesaṃ vitthārato dassetuṃ yathā taṃ upādāya anuddhaṃsanā hoti tathā savatthukaṃ katvā dassento ‘‘jātileso nāma khattiyo diṭṭho hotī’’tiādimāha. Tattha khattiyo diṭṭho hotīti añño koci khattiyajātiyo iminā codakena diṭṭho hoti. Pārājikaṃ dhammaṃ ajjhāpajjantoti methunadhammādīsu aññataraṃ āpajjanto. Aññaṃ khattiyaṃ passitvācodetīti atha so aññaṃ attano veriṃ khattiyajātiyaṃ bhikkhuṃ passitvā taṃ khattiyajātilesaṃ gahetvā evaṃ codeti ‘‘khattiyo mayā diṭṭho pārājikaṃ dhammaṃ ajjhāpajjanto, tvaṃ khattiyo, pārājikaṃ dhammaṃ ajjhāpannosī’’ atha vā ‘‘tvaṃ so khattiyo, na añño, pārājikaṃ dhammaṃ ajjhāpannosi, assamaṇosi asakyaputtiyosi natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya vācāya saṅghādisesassa. Ettha ca tesaṃ khattiyānaṃ aññamaññaṃ asadisassa tassa tassa dīghādino vā diṭṭhādino vā vasena aññabhāgiyatā khattiyajātipaññattiyā ādhāravasena adhikaraṇatā ca veditabbā, etenupāyena sabbapadesu yojanā veditabbā.
৪০০. পত্তলেসনিদ্দেসে চ সাটকপত্তোতি লোহপত্তসদিসো সুসণ্ঠানো সুচ্ছৰি সিনিদ্ধো ভমরৰণ্ণো মত্তিকাপত্তো ৰুচ্চতি। সুম্ভকপত্তোতি পকতিমত্তিকাপত্তো।
400. Pattalesaniddese ca sāṭakapattoti lohapattasadiso susaṇṭhāno succhavi siniddho bhamaravaṇṇo mattikāpatto vuccati. Sumbhakapattoti pakatimattikāpatto.
৪০৬. যস্মা পন আপত্তিলেসস্স একপদেনেৰ সঙ্খেপতো নিদ্দেসো ৰুত্তো, তস্মা ৰিত্থারতোপি তং দস্সেতুং ‘‘ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতী’’তিআদি ৰুত্তং। কস্মা পনস্স তত্থেৰ নিদ্দেসং অৰত্ৰা ইধ ৰিসুং ৰুত্তোতি? সেসনিদ্দেসেহি অসভাগত্তা। সেসনিদ্দেসা হি অঞ্ঞং দিস্ৰা অঞ্ঞস্স চোদনাৰসেন ৰুত্তা। অযং পন একমেৰ অঞ্ঞং আপত্তিং আপজ্জন্তং দিস্ৰা অঞ্ঞায আপত্তিযা চোদনাৰসেন ৰুত্তো। যদি এৰং কথং অঞ্ঞভাগিযং অধিকরণং হোতীতি? আপত্তিযা। তেনেৰ ৰুত্তং – ‘‘এৰম্পি আপত্তঞ্ঞভাগিযঞ্চ হোতি লেসো চ উপাদিন্নো’’তি। যঞ্হি সো সঙ্ঘাদিসেসং আপন্নো তং পারাজিকস্স অঞ্ঞভাগিযং অধিকরণং। তস্স পন অঞ্ঞভাগিযস্স অধিকরণস্স লেসো নাম যো সো সব্বখত্তিযানং সাধারণো খত্তিযভাৰো ৰিয সব্বাপত্তীনং সাধারণো আপত্তিভাৰো। এতেনুপাযেন সেসাপত্তিমূলকনযো চোদাপকৰারো চ ৰেদিতব্বো।
406. Yasmā pana āpattilesassa ekapadeneva saṅkhepato niddeso vutto, tasmā vitthāratopi taṃ dassetuṃ ‘‘bhikkhu saṅghādisesaṃ ajjhāpajjanto diṭṭho hotī’’tiādi vuttaṃ. Kasmā panassa tattheva niddesaṃ avatvā idha visuṃ vuttoti? Sesaniddesehi asabhāgattā. Sesaniddesā hi aññaṃ disvā aññassa codanāvasena vuttā. Ayaṃ pana ekameva aññaṃ āpattiṃ āpajjantaṃ disvā aññāya āpattiyā codanāvasena vutto. Yadi evaṃ kathaṃ aññabhāgiyaṃ adhikaraṇaṃ hotīti? Āpattiyā. Teneva vuttaṃ – ‘‘evampi āpattaññabhāgiyañca hoti leso ca upādinno’’ti. Yañhi so saṅghādisesaṃ āpanno taṃ pārājikassa aññabhāgiyaṃ adhikaraṇaṃ. Tassa pana aññabhāgiyassa adhikaraṇassa leso nāma yo so sabbakhattiyānaṃ sādhāraṇo khattiyabhāvo viya sabbāpattīnaṃ sādhāraṇo āpattibhāvo. Etenupāyena sesāpattimūlakanayo codāpakavāro ca veditabbo.
৪০৮. অনাপত্তি তথাসঞ্ঞী চোদেতি ৰা চোদাপেতি ৰাতি ‘‘পারাজিকংযেৰ অযং আপন্নো’’তি যো এৰং তথাসঞ্ঞী চোদেতি ৰা চোদাপেতি ৰা তস্স অনাপত্তি। সেসং সব্বত্থ উত্তানমেৰ। সমুট্ঠানাদীনিপি পঠমদুট্ঠদোসসদিসানেৰাতি।
408.Anāpatti tathāsaññī codeti vā codāpeti vāti ‘‘pārājikaṃyeva ayaṃ āpanno’’ti yo evaṃ tathāsaññī codeti vā codāpeti vā tassa anāpatti. Sesaṃ sabbattha uttānameva. Samuṭṭhānādīnipi paṭhamaduṭṭhadosasadisānevāti.
দুতিযদুট্ঠদোসসিক্খাপদৰণ্ণনা নিট্ঠিতা।
Dutiyaduṭṭhadosasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. দুতিযদুট্ঠদোসসিক্খাপদং • 9. Dutiyaduṭṭhadosasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
