| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৯. দুতিযদুট্ঠদোসসিক্খাপদৰণ্ণনা
9. Dutiyaduṭṭhadosasikkhāpadavaṇṇanā
৩৯১. নৰমে দিস্ৰাতি অজিকায ৰিপ্পটিপজ্জন্তং ছগলকং দিস্ৰা। মেত্তিযং ভিক্খুনিন্তি তস্সা ভিক্খুনিকালং গহেত্ৰা ভূতপুব্বৰোহারেন ৰোহরন্তি। ৰেল়ুৰনেযেৰাতি থেরস্স ভিক্খাচারৰেলং অগ্গহেত্ৰা তেহি ৰুত্তভত্তুদ্দেসৰেলংযেৰ সন্ধায ৰুত্তং। কচ্চি নোতি কচ্চি নু। এতমত্থং আরোচেসুন্তি অঞ্ঞভাগিযস্স অধিকরণস্স কঞ্চিদেসং লেসমত্তং উপাদায পারাজিকেন ধম্মেন অনুদ্ধংসিতভাৰং আরোচেসুং।
391. Navame disvāti ajikāya vippaṭipajjantaṃ chagalakaṃ disvā. Mettiyaṃ bhikkhuninti tassā bhikkhunikālaṃ gahetvā bhūtapubbavohārena voharanti. Veḷuvaneyevāti therassa bhikkhācāravelaṃ aggahetvā tehi vuttabhattuddesavelaṃyeva sandhāya vuttaṃ. Kacci noti kacci nu. Etamatthaṃ ārocesunti aññabhāgiyassa adhikaraṇassa kañcidesaṃ lesamattaṃ upādāya pārājikena dhammena anuddhaṃsitabhāvaṃ ārocesuṃ.
অঞ্ঞভাগস্সাতি অঞ্ঞকোট্ঠাসস্স, থেরস্স মনুস্সজাতিভিক্খুভাৰতো অঞ্ঞস্স তিরচ্ছানজাতিছগলকভাৰসঙ্খাতস্স কোট্ঠাসস্সাতি ৰুত্তং হোতি। ইদন্তি সামঞ্ঞতো নপুংসকনিদ্দেসেন ছগলকং নিদ্দিসতি, ইদং ছগলকজাতন্তি অত্থো, অযং ছগলকোতি ৰুত্তং হোতি। অধিকরণসদ্দাপেক্খো ৰা নপুংসকনিদ্দেসো, ইদং ছগলকসঙ্খাতং অধিকরণন্তি ৰুত্তং হোতি। অঞ্ঞভাগোতি যথাৰুত্ততিরচ্ছানজাতিছগলকভাৰসঙ্খাতো অঞ্ঞভাগো, অঞ্ঞকোট্ঠাসোতি অত্থো। অস্সাতি ছগলকস্স। ‘‘অঞ্ঞভাগসম্বন্ধী অঞ্ঞভাগিয’’ন্তি পঠমৰিগ্গহস্স অত্থো, ‘‘অঞ্ঞভাগৰন্তং অঞ্ঞভাগিয’’ন্তি দুতিযৰিগ্গহস্স। দ্ৰীহিপি ৰিগ্গহেহি অঞ্ঞভাগিযন্তি ছগলকোৰ ৰুত্তো। তিরচ্ছানজাতিছগলকভাৰঞ্চ ঠপেত্ৰা পরমত্থতো ৰিসুং ছগলকে অসতিপি ‘‘পটিমায সরীর’’ন্তিআদীসু ৰিয অভেদেপি ভেদকপ্পনায পৰত্তলোকৰোহারৰসেন ‘‘অঞ্ঞভাগস্স ইদং, অঞ্ঞভাগো ৰা অস্স অত্থী’’তি ৰুত্তং।
Aññabhāgassāti aññakoṭṭhāsassa, therassa manussajātibhikkhubhāvato aññassa tiracchānajātichagalakabhāvasaṅkhātassa koṭṭhāsassāti vuttaṃ hoti. Idanti sāmaññato napuṃsakaniddesena chagalakaṃ niddisati, idaṃ chagalakajātanti attho, ayaṃ chagalakoti vuttaṃ hoti. Adhikaraṇasaddāpekkho vā napuṃsakaniddeso, idaṃ chagalakasaṅkhātaṃ adhikaraṇanti vuttaṃ hoti. Aññabhāgoti yathāvuttatiracchānajātichagalakabhāvasaṅkhāto aññabhāgo, aññakoṭṭhāsoti attho. Assāti chagalakassa. ‘‘Aññabhāgasambandhī aññabhāgiya’’nti paṭhamaviggahassa attho, ‘‘aññabhāgavantaṃ aññabhāgiya’’nti dutiyaviggahassa. Dvīhipi viggahehi aññabhāgiyanti chagalakova vutto. Tiracchānajātichagalakabhāvañca ṭhapetvā paramatthato visuṃ chagalake asatipi ‘‘paṭimāya sarīra’’ntiādīsu viya abhedepi bhedakappanāya pavattalokavohāravasena ‘‘aññabhāgassa idaṃ, aññabhāgo vā assa atthī’’ti vuttaṃ.
ইদানি দ্ৰীহিপি ৰিগ্গহেহি ৰুত্তমত্থং ৰিত্থারেত্ৰা দস্সেন্তো ‘‘যো হি সো’’তিআদিমাহ। সোতি সো ছগলকো। তস্স ‘‘হোতী’’তি ইমিনা সম্বন্ধো। ততোতি ততো মনুস্সজাতিতো ভিক্খুভাৰতো চ। সো ৰা অঞ্ঞভাগোতি যথাৰুত্ততিরচ্ছানজাতিছগলকভাৰসঙ্খাতো অঞ্ঞভাগো। অস্সাতি ছগলকস্স। সো ছগলকো অঞ্ঞভাগিযসঙ্খাতং লভতীতি যোজেতব্বং। ‘‘অধিকরণন্তি আধারো, ৰত্থু অধিট্ঠান’’ন্তি হেট্ঠা ৰুত্তমত্থং সরূপতো দস্সেতুং ‘‘যস্মা চা’’তিআদিমাহ। তেসন্তি মেত্তিযভূমজকানং। ইমন্তি ছগলকং। নামকরণসঞ্ঞাযাতি নামকরণসঙ্খাতায সঞ্ঞায সো ছগলকো অধিকরণন্তি ৰেদিতব্বোতি যোজেতব্বং। তঞ্হি সন্ধাযাতি ‘‘অৰস্সং তুম্হেহি লেসো ওড্ডিতো, কিং ৰদথ, কিং পস্সিত্থা’’তি অনুযুত্তেহি তেহি ভিক্খূহি ‘‘ছগলকস্স ৰিপ্পটিপত্তিং দিস্ৰা দব্বস্স নামং তস্স করিম্হা’’তি ৰুত্তত্তা তস্স নামকরণসঞ্ঞায অধিট্ঠানভূতং তং ছগলকং সন্ধায। তে ভিক্খূতি তে অনুযুঞ্জকা ভিক্খূ। আপত্তিলেসম্পি পুগ্গলস্মিংযেৰ আরোপেত্ৰা ৰুত্তত্তা ‘‘পুগ্গলানংযেৰ লেসা’’তি ৰুত্তং। পদভাজনে পন…পে॰… ৰেদিতব্বন্তি ইমিনা নামকরণসঞ্ঞায আধারভূতস্স ছগলকসঙ্খাতস্স অধিকরণস্স অৰচনে কারণং ৰুত্তং।
Idāni dvīhipi viggahehi vuttamatthaṃ vitthāretvā dassento ‘‘yo hi so’’tiādimāha. Soti so chagalako. Tassa ‘‘hotī’’ti iminā sambandho. Tatoti tato manussajātito bhikkhubhāvato ca. So vā aññabhāgoti yathāvuttatiracchānajātichagalakabhāvasaṅkhāto aññabhāgo. Assāti chagalakassa. So chagalako aññabhāgiyasaṅkhātaṃ labhatīti yojetabbaṃ. ‘‘Adhikaraṇanti ādhāro, vatthu adhiṭṭhāna’’nti heṭṭhā vuttamatthaṃ sarūpato dassetuṃ ‘‘yasmā cā’’tiādimāha. Tesanti mettiyabhūmajakānaṃ. Imanti chagalakaṃ. Nāmakaraṇasaññāyāti nāmakaraṇasaṅkhātāya saññāya so chagalako adhikaraṇanti veditabboti yojetabbaṃ. Tañhi sandhāyāti ‘‘avassaṃ tumhehi leso oḍḍito, kiṃ vadatha, kiṃ passitthā’’ti anuyuttehi tehi bhikkhūhi ‘‘chagalakassa vippaṭipattiṃ disvā dabbassa nāmaṃ tassa karimhā’’ti vuttattā tassa nāmakaraṇasaññāya adhiṭṭhānabhūtaṃ taṃ chagalakaṃ sandhāya. Te bhikkhūti te anuyuñjakā bhikkhū. Āpattilesampi puggalasmiṃyeva āropetvā vuttattā ‘‘puggalānaṃyeva lesā’’ti vuttaṃ. Padabhājane pana…pe… veditabbanti iminā nāmakaraṇasaññāya ādhārabhūtassa chagalakasaṅkhātassa adhikaraṇassa avacane kāraṇaṃ vuttaṃ.
৩৯৩. ‘‘অঞ্ঞভাগিযস্স অধিকরণস্সা’’তি এত্থ পাল়িআগতঅধিকরণসদ্দপতিরূপকং অঞ্ঞং অধিকরণসদ্দং পাল়িআগততদঞ্ঞসাধারণতায উভযপদত্থং উদ্ধরিত্ৰা ‘‘অধিকরণং নাম চত্তারি অধিকরণানী’’তি ৰুত্তং। অত্থুদ্ধারৰসেন হি অত্থং দস্সেন্তেন পাল়িযং আগতসদ্দপতিরূপকো অঞ্ঞো সদ্দো উভযপদত্থো উদ্ধরিতব্বো, ন চ অঞ্ঞং উদ্ধরিত্ৰা অঞ্ঞস্স অত্থো ৰত্তব্বো, তস্মা পাল়িআগতঅধিকরণসদ্দপতিরূপকো অঞ্ঞোযেৰ উভযপদত্থসাধারণো অধিকরণসদ্দো উদ্ধটোতি দট্ঠব্বং। তেনেৰাহ ‘‘অধিকরণন্তি ৰচনসামঞ্ঞতো অত্থুদ্ধারৰসেন পৰত্তানি চত্তারি অধিকরণানী’’তি। যা চ সা অৰসানে…পে॰… চোদনা ৰুত্তাতি ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে সঙ্ঘাদিসেসদিট্ঠী হোতি, তঞ্চে পারাজিকেন চোদেতীতিআদিচোদনং সন্ধায ৰদতি।
393. ‘‘Aññabhāgiyassa adhikaraṇassā’’ti ettha pāḷiāgataadhikaraṇasaddapatirūpakaṃ aññaṃ adhikaraṇasaddaṃ pāḷiāgatatadaññasādhāraṇatāya ubhayapadatthaṃ uddharitvā ‘‘adhikaraṇaṃ nāma cattāri adhikaraṇānī’’ti vuttaṃ. Atthuddhāravasena hi atthaṃ dassentena pāḷiyaṃ āgatasaddapatirūpako añño saddo ubhayapadattho uddharitabbo, na ca aññaṃ uddharitvā aññassa attho vattabbo, tasmā pāḷiāgataadhikaraṇasaddapatirūpako aññoyeva ubhayapadatthasādhāraṇo adhikaraṇasaddo uddhaṭoti daṭṭhabbaṃ. Tenevāha ‘‘adhikaraṇanti vacanasāmaññato atthuddhāravasena pavattāni cattāri adhikaraṇānī’’ti. Yā ca sā avasāne…pe… codanā vuttāti bhikkhu saṅghādisesaṃ ajjhāpajjanto diṭṭho hoti, saṅghādisese saṅghādisesadiṭṭhī hoti, tañce pārājikena codetītiādicodanaṃ sandhāya vadati.
মেথুনৰীতিক্কমাপত্তিযো ৰত্থুতো সভাগা, ইতরাসং পন অদিন্নাদানাদিআপত্তীনং সমানেপি পারাজিকাপত্তিভাৰে ৰত্থুতো ৰিসভাগাতি আহ ‘‘সভাগৰিসভাগৰত্থুতো’’তি। সভাৰসরিক্খাসরিক্খতোতি সভাৰেন সদিসাসদিসভাৰতো। পঠমপারাজিকঞ্হি পঠমপারাজিকাপত্তিযা মেথুনরাগেন সভাৰতো সদিসং, দোসসম্পযুত্তমনুস্সৰিগ্গহেন অসদিসং। ননু চ ‘‘আপত্তাধিকরণং আপত্তাধিকরণস্স সিযা তব্ভাগিযং, সিযা অঞ্ঞভাগিয’’ন্তি ৰুত্তত্তা উদ্দেসানুক্কমেন তব্ভাগিযতং অনিদ্দিসিত্ৰা অঞ্ঞভাগিযতা পঠমং কস্মা নিদ্দিট্ঠাতি আহ ‘‘আদিতো পট্ঠাযা’’তিআদি। ৰুত্তনযেনেৰাতি ‘‘সভাগৰিসভাগৰত্থুতো’’তিআদিনা ৰুত্তনযেন।
Methunavītikkamāpattiyo vatthuto sabhāgā, itarāsaṃ pana adinnādānādiāpattīnaṃ samānepi pārājikāpattibhāve vatthuto visabhāgāti āha ‘‘sabhāgavisabhāgavatthuto’’ti. Sabhāvasarikkhāsarikkhatoti sabhāvena sadisāsadisabhāvato. Paṭhamapārājikañhi paṭhamapārājikāpattiyā methunarāgena sabhāvato sadisaṃ, dosasampayuttamanussaviggahena asadisaṃ. Nanu ca ‘‘āpattādhikaraṇaṃ āpattādhikaraṇassa siyā tabbhāgiyaṃ, siyā aññabhāgiya’’nti vuttattā uddesānukkamena tabbhāgiyataṃ aniddisitvā aññabhāgiyatā paṭhamaṃ kasmā niddiṭṭhāti āha ‘‘ādito paṭṭhāyā’’tiādi. Vuttanayenevāti ‘‘sabhāgavisabhāgavatthuto’’tiādinā vuttanayena.
‘‘সঙ্ঘকম্মানি নিস্সায উপ্পন্ন’’ন্তি ৰুত্তত্তা সঙ্ঘকম্মতো কিচ্চাধিকরণং ৰিসুং ৰিয দিস্সতীতি আহ ‘‘কিং পনা’’তিআদি। ‘‘কিচ্চমেৰ কিচ্চাধিকরণ’’ন্তি ৰুত্তত্তা ‘‘সঙ্ঘকম্মানমেৰেতং অধিৰচন’’ন্তি ৰুত্তং। যদি এৰং ‘‘সঙ্ঘকম্মানি নিস্সায উপ্পন্ন’’ন্তি কস্মা ৰুত্তন্তি আহ ‘‘এৰং সন্তেপী’’তিআদি। তস্স তস্স সঙ্ঘকম্মস্স ভগৰতা ৰুত্তং ইতিকত্তব্বতালক্খণংযেৰ ততো সঙ্ঘকম্মস্স নিপ্ফজ্জনতো ফলূপচারেন সঙ্ঘকম্মন্তি ৰত্তব্বতং অরহতীতি আহ ‘‘যং কম্মলক্খণং মনসি করোতি, তং নিস্সায উপ্পজ্জনতো’’তি। পরিৰাসাদিসঙ্ঘকম্মং নিস্সায মানত্তাদীনং উপ্পজ্জনতো উক্খেপনীযকম্মসীমাসম্মুতিকম্মাদীনি ইস্সায ওসারণসীমাসমূহননাদিকম্মানং উপ্পজ্জনতো চ ‘‘পুরিমং পুরিমং সঙ্ঘকম্ম’’ন্তিআদি ৰুত্তং।
‘‘Saṅghakammāni nissāya uppanna’’nti vuttattā saṅghakammato kiccādhikaraṇaṃ visuṃ viya dissatīti āha ‘‘kiṃ panā’’tiādi. ‘‘Kiccameva kiccādhikaraṇa’’nti vuttattā ‘‘saṅghakammānamevetaṃ adhivacana’’nti vuttaṃ. Yadi evaṃ ‘‘saṅghakammāni nissāya uppanna’’nti kasmā vuttanti āha ‘‘evaṃ santepī’’tiādi. Tassa tassa saṅghakammassa bhagavatā vuttaṃ itikattabbatālakkhaṇaṃyeva tato saṅghakammassa nipphajjanato phalūpacārena saṅghakammanti vattabbataṃ arahatīti āha ‘‘yaṃ kammalakkhaṇaṃ manasi karoti, taṃ nissāya uppajjanato’’ti. Parivāsādisaṅghakammaṃ nissāya mānattādīnaṃ uppajjanato ukkhepanīyakammasīmāsammutikammādīni issāya osāraṇasīmāsamūhananādikammānaṃ uppajjanato ca ‘‘purimaṃ purimaṃ saṅghakamma’’ntiādi vuttaṃ.
৩৯৫-৪০০. সৰত্থুকং কত্ৰাতি পুগ্গলাধিট্ঠানং কত্ৰা। দীঘাদিনোতি দীঘরস্সকাল়ওদাতাদিনো। দিট্ঠাদিনোতি দিট্ঠসুতাদিনো। লোহপত্তসদিসোতি অযোপত্তসদিসো। অঙ্গানি পঠমদুট্ঠদোসে ৰুত্তসদিসানি, ইধ পন কঞ্চিদেসং লেসমত্তং উপাদিযনা অধিকা।
395-400.Savatthukaṃ katvāti puggalādhiṭṭhānaṃ katvā. Dīghādinoti dīgharassakāḷaodātādino. Diṭṭhādinoti diṭṭhasutādino. Lohapattasadisoti ayopattasadiso. Aṅgāni paṭhamaduṭṭhadose vuttasadisāni, idha pana kañcidesaṃ lesamattaṃ upādiyanā adhikā.
দুতিযদুট্ঠদোসসিক্খাপদৰণ্ণনা নিট্ঠিতা।
Dutiyaduṭṭhadosasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. দুতিযদুট্ঠদোসসিক্খাপদং • 9. Dutiyaduṭṭhadosasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
