| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৯. দুতিযদুট্ঠদোসসিক্খাপদৰণ্ণনা
9. Dutiyaduṭṭhadosasikkhāpadavaṇṇanā
৩৯১. নৰমে মেত্তিযং ভিক্খুনিন্তি লিঙ্গনাসনায নাসিতাযপি তস্সা ভূতপুব্বৰোহারং গহেত্ৰা ৰুত্তং। অঞ্ঞভাগস্সাতি থেরস্স মনুস্সজাতিভিক্খুভাৰতো অঞ্ঞস্স তিরচ্ছানজাতিছগলকভাৰসঙ্খাতস্স কোট্ঠাসস্স। ইদন্তি সামঞ্ঞতো নপুংসকলিঙ্গেন ৰুত্তং, অযং ছগলকোতি অত্থো। অঞ্ঞভাগোতি যথাৰুত্ততিরচ্ছানজাতিছগলকভাৰসঙ্খাতো অঞ্ঞো কোট্ঠাসো, অঞ্ঞভাগস্স ইদন্তি অঞ্ঞভাগিযন্তি পঠমৰিগ্গহস্স অত্থো, অঞ্ঞভাগমত্থীতি দুতিযৰিগ্গহস্স, দ্ৰীহিপি ছগলকোৰ ৰুত্তো। ইদানি দ্ৰীহিপি ৰিগ্গহেহি ৰুত্তমেৰত্থং ৰিত্থারতো দস্সেন্তো ‘‘যো হি সো’’তিআদিমাহ। তত্থ যো হি সো ছগলকো ৰুত্তো, সো অঞ্ঞস্স ভাগস্স হোতীতি চ অঞ্ঞভাগিযসঙ্খ্যং লভতীতি চ যোজনা। দুতিযৰিগ্গহস্স অত্থং দস্সেতুং ‘‘সো ৰা’’তিআদি ৰুত্তং। অধিকরণন্তি ৰেদিতব্বোতি এত্থাপি যো হি সো ‘‘দব্বো মল্লপুত্তো নামা’’তি ছগলকো ৰুত্তো, সোতি আনেত্ৰা সম্বন্ধিতব্বং। তঞ্হি সন্ধাযাতি ‘‘দব্বো’’তি নামকরণস্স অধিট্ঠানভূতং ছগলকং সন্ধায। তে ভিক্খূতি তে অনুযুঞ্জন্তা ভিক্খূ। আপত্তিযাপি পুগ্গলাধিট্ঠানত্তা ‘‘পুগ্গলানংযেৰ লেসা’’তি ৰুত্তং।
391. Navame mettiyaṃ bhikkhuninti liṅganāsanāya nāsitāyapi tassā bhūtapubbavohāraṃ gahetvā vuttaṃ. Aññabhāgassāti therassa manussajātibhikkhubhāvato aññassa tiracchānajātichagalakabhāvasaṅkhātassa koṭṭhāsassa. Idanti sāmaññato napuṃsakaliṅgena vuttaṃ, ayaṃ chagalakoti attho. Aññabhāgoti yathāvuttatiracchānajātichagalakabhāvasaṅkhāto añño koṭṭhāso, aññabhāgassa idanti aññabhāgiyanti paṭhamaviggahassa attho, aññabhāgamatthīti dutiyaviggahassa, dvīhipi chagalakova vutto. Idāni dvīhipi viggahehi vuttamevatthaṃ vitthārato dassento ‘‘yo hi so’’tiādimāha. Tattha yo hi so chagalako vutto, so aññassa bhāgassa hotīti ca aññabhāgiyasaṅkhyaṃ labhatīti ca yojanā. Dutiyaviggahassa atthaṃ dassetuṃ ‘‘so vā’’tiādi vuttaṃ. Adhikaraṇanti veditabboti etthāpi yo hi so ‘‘dabbo mallaputto nāmā’’ti chagalako vutto, soti ānetvā sambandhitabbaṃ. Tañhi sandhāyāti ‘‘dabbo’’ti nāmakaraṇassa adhiṭṭhānabhūtaṃ chagalakaṃ sandhāya. Te bhikkhūti te anuyuñjantā bhikkhū. Āpattiyāpi puggalādhiṭṭhānattā ‘‘puggalānaṃyeva lesā’’ti vuttaṃ.
৩৯৩. যা চ সা অৰসানে…পে॰… চোদনা ৰুত্তাতি ‘‘ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি সঙ্ঘাদিসেসে সঙ্ঘাদিসেসদিট্ঠি হোতি, তঞ্চে পারাজিকেন চোদেতী’’তিআদিং (পারা॰ ৪০৭) চোদনাভেদং সন্ধায ৰদতি। সত্তন্নম্পি আপত্তীনং পচ্চেকং পারাজিকত্তাদিসামঞ্ঞেপি মেথুনাদিন্নাদানাদিৰত্থুতো, রাগদোসত্তাদিসভাৰতো চ ৰিসভাগতাপি অত্থীতি আহ ‘‘যস্মা পন…পে॰… ন হোতী’’তি।
393.Yā ca sā avasāne…pe… codanā vuttāti ‘‘bhikkhu saṅghādisesaṃ ajjhāpajjanto diṭṭho hoti saṅghādisese saṅghādisesadiṭṭhi hoti, tañce pārājikena codetī’’tiādiṃ (pārā. 407) codanābhedaṃ sandhāya vadati. Sattannampi āpattīnaṃ paccekaṃ pārājikattādisāmaññepi methunādinnādānādivatthuto, rāgadosattādisabhāvato ca visabhāgatāpi atthīti āha ‘‘yasmā pana…pe… na hotī’’ti.
ৰুত্তনযেনেৰাতি ‘‘সভাগৰিসভাগৰত্থুতো’’তিআদিনা (পারা॰ অট্ঠ॰ ২.৩৯৩) ৰুত্তনযেন। কম্মলক্খণং, তংমনসিকারো চ অৰিপন্নকম্মস্স নিমিত্ততো ফলূপচারেন কম্মন্তি ৰুচ্চতীতি আহ ‘‘তং নিস্সায উপ্পজ্জনতো’’তি। পরিৰাসাদিং নিস্সায মানত্তাদীনং উপ্পজ্জনতো ‘‘পুরিমং পুরিম’’ন্তিআদি ৰুত্তং।
Vuttanayenevāti ‘‘sabhāgavisabhāgavatthuto’’tiādinā (pārā. aṭṭha. 2.393) vuttanayena. Kammalakkhaṇaṃ, taṃmanasikāro ca avipannakammassa nimittato phalūpacārena kammanti vuccatīti āha ‘‘taṃ nissāya uppajjanato’’ti. Parivāsādiṃ nissāya mānattādīnaṃ uppajjanato ‘‘purimaṃ purima’’ntiādi vuttaṃ.
৩৯৫. সৰত্থুকং কত্ৰাতি পুগ্গলাধিট্ঠানং কত্ৰা। দীঘাদিনোতি দীঘরস্সাদিলিঙ্গস্স। দিট্ঠাদিনোতি দিট্ঠপুব্বাদিনো।
395.Savatthukaṃ katvāti puggalādhiṭṭhānaṃ katvā. Dīghādinoti dīgharassādiliṅgassa. Diṭṭhādinoti diṭṭhapubbādino.
৪০৮. এৰং তথাসঞ্ঞীতি অঞ্ঞস্স মেথুনাদিকিরিযং দিস্ৰা ‘‘অযং সো’’তি এৰং তথাসঞ্ঞী। অঙ্গানি পঠমদুট্ঠদোসে ৰুত্তসদিসানি, ইধ পন কিঞ্চিদেসং লেসমত্তং উপাদিযনা অধিকা।
408.Evaṃ tathāsaññīti aññassa methunādikiriyaṃ disvā ‘‘ayaṃ so’’ti evaṃ tathāsaññī. Aṅgāni paṭhamaduṭṭhadose vuttasadisāni, idha pana kiñcidesaṃ lesamattaṃ upādiyanā adhikā.
দুতিযদুট্ঠদোসসিক্খাপদৰণ্ণনা নিট্ঠিতা।
Dutiyaduṭṭhadosasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. দুতিযদুট্ঠদোসসিক্খাপদং • 9. Dutiyaduṭṭhadosasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. দুতিযদুট্ঠদোসসিক্খাপদৰণ্ণনা • 9. Dutiyaduṭṭhadosasikkhāpadavaṇṇanā
