| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. দুতিযদ্ৰেব্রাহ্মণসুত্তং
2. Dutiyadvebrāhmaṇasuttaṃ
৫৩. অথ খো দ্ৰে ব্রাহ্মণা জিণ্ণা ৰুদ্ধা মহল্লকা অদ্ধগতা ৰযোঅনুপ্পত্তা ৰীসৰস্সসতিকা জাতিযা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ব্রাহ্মণা ভগৰন্তং এতদৰোচুং – ‘‘মযমস্সু, ভো গোতম, ব্রাহ্মণা জিণ্ণা ৰুদ্ধা মহল্লকা অদ্ধগতা ৰযোঅনুপ্পত্তা ৰীসৰস্সসতিকা জাতিযা; তে চম্হা অকতকল্যাণা অকতকুসলা অকতভীরুত্তাণা। ওৰদতু নো ভৰং গোতমো, অনুসাসতু নো ভৰং গোতমো যং অম্হাকং অস্স দীঘরত্তং হিতায সুখাযা’’তি।
53. Atha kho dve brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te brāhmaṇā bhagavantaṃ etadavocuṃ – ‘‘mayamassu, bho gotama, brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā; te camhā akatakalyāṇā akatakusalā akatabhīruttāṇā. Ovadatu no bhavaṃ gotamo, anusāsatu no bhavaṃ gotamo yaṃ amhākaṃ assa dīgharattaṃ hitāya sukhāyā’’ti.
‘‘তগ্ঘ তুম্হে, ব্রাহ্মণা, জিণ্ণা ৰুদ্ধা মহল্লকা অদ্ধগতা ৰযোঅনুপ্পত্তা ৰীসৰস্সসতিকা জাতিযা; তে চত্থ অকতকল্যাণা অকতকুসলা অকতভীরুত্তাণা। আদিত্তো খো অযং, ব্রাহ্মণা, লোকো জরায ব্যাধিনা মরণেন। এৰং আদিত্তে খো, ব্রাহ্মণা, লোকে জরায ব্যাধিনা মরণেন, যো ইধ কাযেন সংযমো ৰাচায সংযমো মনসা সংযমো, তং তস্স পেতস্স তাণঞ্চ লেণঞ্চ দীপঞ্চ সরণঞ্চ পরাযণঞ্চা’’তি।
‘‘Taggha tumhe, brāhmaṇā, jiṇṇā vuddhā mahallakā addhagatā vayoanuppattā vīsavassasatikā jātiyā; te cattha akatakalyāṇā akatakusalā akatabhīruttāṇā. Āditto kho ayaṃ, brāhmaṇā, loko jarāya byādhinā maraṇena. Evaṃ āditte kho, brāhmaṇā, loke jarāya byādhinā maraṇena, yo idha kāyena saṃyamo vācāya saṃyamo manasā saṃyamo, taṃ tassa petassa tāṇañca leṇañca dīpañca saraṇañca parāyaṇañcā’’ti.
‘‘আদিত্তস্মিং অগারস্মিং, যং নীহরতি ভাজনং।
‘‘Ādittasmiṃ agārasmiṃ, yaṃ nīharati bhājanaṃ;
তং তস্স হোতি অত্থায, নো চ যং তত্থ ডয্হতি॥
Taṃ tassa hoti atthāya, no ca yaṃ tattha ḍayhati.
‘‘যোধ কাযেন সংযমো, ৰাচায উদ চেতসা।
‘‘Yodha kāyena saṃyamo, vācāya uda cetasā;
তং তস্স পেতস্স সুখায হোতি,
Taṃ tassa petassa sukhāya hoti,
যং জীৰমানো পকরোতি পুঞ্ঞ’’ন্তি॥ দুতিযং।
Yaṃ jīvamāno pakaroti puñña’’nti. dutiyaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. দুতিযদ্ৰেব্রাহ্মণসুত্তৰণ্ণনা • 2. Dutiyadvebrāhmaṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. দুতিযদ্ৰেব্রাহ্মণসুত্তৰণ্ণনা • 2. Dutiyadvebrāhmaṇasuttavaṇṇanā
