| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. து³தியஏஜாஸுத்தங்
8. Dutiyaejāsuttaṃ
91. ‘‘ஏஜா , பி⁴க்க²வே, ரோகோ³, ஏஜா க³ண்டோ³, ஏஜா ஸல்லங். தஸ்மாதிஹ, பி⁴க்க²வே, ததா²க³தோ அனேஜோ விஹரதி வீதஸல்லோ. தஸ்மாதிஹ, பி⁴க்க²வே, பி⁴க்கு² சேபி ஆகங்கெ²ய்ய ‘அனேஜோ விஹரெய்யங் வீதஸல்லோ’தி, சக்கு²ங் ந மஞ்ஞெய்ய, சக்கு²ஸ்மிங் ந மஞ்ஞெய்ய, சக்கு²தோ ந மஞ்ஞெய்ய, சக்கு² மேதி ந மஞ்ஞெய்ய; ரூபே ந மஞ்ஞெய்ய… சக்கு²விஞ்ஞாணங்… சக்கு²ஸம்ப²ஸ்ஸங்… யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி, யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவ அபி⁴னந்த³தி…பே॰….
91. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha, bhikkhave, bhikkhu cepi ākaṅkheyya ‘anejo vihareyyaṃ vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya… cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘ஜிவ்ஹங் ந மஞ்ஞெய்ய, ஜிவ்ஹாய ந மஞ்ஞெய்ய, ஜிவ்ஹாதோ ந மஞ்ஞெய்ய, ஜிவ்ஹா மேதி ந மஞ்ஞெய்ய; ரஸே ந மஞ்ஞெய்ய… ஜிவ்ஹாவிஞ்ஞாணங்… ஜிவ்ஹாஸம்ப²ஸ்ஸங்… யம்பித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி, யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவ அபி⁴னந்த³தி…பே॰….
‘‘Jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya… jivhāviññāṇaṃ… jivhāsamphassaṃ… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘மனங் ந மஞ்ஞெய்ய, மனஸ்மிங் ந மஞ்ஞெய்ய, மனதோ ந மஞ்ஞெய்ய, மனோ மேதி ந மஞ்ஞெய்ய… மனோவிஞ்ஞாணங்… மனோஸம்ப²ஸ்ஸங்… யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி , யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவ அபி⁴னந்த³தி.
‘‘Manaṃ na maññeyya, manasmiṃ na maññeyya, manato na maññeyya, mano meti na maññeyya… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati , yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati.
‘‘யாவதா, பி⁴க்க²வே, க²ந்த⁴தா⁴துஆயதனா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய. ஸோ ஏவங் அமஞ்ஞமானோ ந கிஞ்சி லோகே உபாதி³யதி. அனுபாதி³யங் ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி. அட்ட²மங்.
‘‘Yāvatā, bhikkhave, khandhadhātuāyatanā tampi na maññeyya, tasmimpi na maññeyya, tatopi na maññeyya, taṃ meti na maññeyya. So evaṃ amaññamāno na kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7-8. பட²மஏஜாஸுத்தாதி³வண்ணனா • 7-8. Paṭhamaejāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7-8. பட²மஏஜாஸுத்தாதி³வண்ணனா • 7-8. Paṭhamaejāsuttādivaṇṇanā
