| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. দুতিযএজাসুত্তং
8. Dutiyaejāsuttaṃ
৯১. ‘‘এজা , ভিক্খৰে, রোগো, এজা গণ্ডো, এজা সল্লং। তস্মাতিহ, ভিক্খৰে, তথাগতো অনেজো ৰিহরতি ৰীতসল্লো। তস্মাতিহ, ভিক্খৰে, ভিক্খু চেপি আকঙ্খেয্য ‘অনেজো ৰিহরেয্যং ৰীতসল্লো’তি, চক্খুং ন মঞ্ঞেয্য, চক্খুস্মিং ন মঞ্ঞেয্য, চক্খুতো ন মঞ্ঞেয্য, চক্খু মেতি ন মঞ্ঞেয্য; রূপে ন মঞ্ঞেয্য… চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য। যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা। অঞ্ঞথাভাৰী ভৰসত্তো লোকো ভৰমেৰ অভিনন্দতি…পে॰…।
91. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha, bhikkhave, bhikkhu cepi ākaṅkheyya ‘anejo vihareyyaṃ vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya… cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘জিৰ্হং ন মঞ্ঞেয্য, জিৰ্হায ন মঞ্ঞেয্য, জিৰ্হাতো ন মঞ্ঞেয্য, জিৰ্হা মেতি ন মঞ্ঞেয্য; রসে ন মঞ্ঞেয্য… জিৰ্হাৰিঞ্ঞাণং… জিৰ্হাসম্ফস্সং… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য। যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা। অঞ্ঞথাভাৰী ভৰসত্তো লোকো ভৰমেৰ অভিনন্দতি…পে॰…।
‘‘Jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya… jivhāviññāṇaṃ… jivhāsamphassaṃ… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘মনং ন মঞ্ঞেয্য, মনস্মিং ন মঞ্ঞেয্য, মনতো ন মঞ্ঞেয্য, মনো মেতি ন মঞ্ঞেয্য… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য। যঞ্হি, ভিক্খৰে, মঞ্ঞতি, যস্মিং মঞ্ঞতি , যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা। অঞ্ঞথাভাৰী ভৰসত্তো লোকো ভৰমেৰ অভিনন্দতি।
‘‘Manaṃ na maññeyya, manasmiṃ na maññeyya, manato na maññeyya, mano meti na maññeyya… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati , yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati.
‘‘যাৰতা, ভিক্খৰে, খন্ধধাতুআযতনা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য। সো এৰং অমঞ্ঞমানো ন কিঞ্চি লোকে উপাদিযতি। অনুপাদিযং ন পরিতস্সতি। অপরিতস্সং পচ্চত্তঞ্ঞেৰ পরিনিব্বাযতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি। অট্ঠমং।
‘‘Yāvatā, bhikkhave, khandhadhātuāyatanā tampi na maññeyya, tasmimpi na maññeyya, tatopi na maññeyya, taṃ meti na maññeyya. So evaṃ amaññamāno na kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭-৮. পঠমএজাসুত্তাদিৰণ্ণনা • 7-8. Paṭhamaejāsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭-৮. পঠমএজাসুত্তাদিৰণ্ণনা • 7-8. Paṭhamaejāsuttādivaṇṇanā
