| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. දුතියඑජාසුත්‌තං
8. Dutiyaejāsuttaṃ
91. ‘‘එජා , භික්‌ඛවෙ, රොගො, එජා ගණ්‌ඩො, එජා සල්‌ලං. තස්‌මාතිහ, භික්‌ඛවෙ, තථාගතො අනෙජො විහරති වීතසල්‌ලො. තස්‌මාතිහ, භික්‌ඛවෙ, භික්‌ඛු චෙපි ආකඞ්‌ඛෙය්‍ය ‘අනෙජො විහරෙය්‍යං වීතසල්‌ලො’ති, චක්‌ඛුං න මඤ්‌ඤෙය්‍ය, චක්‌ඛුස්‌මිං න මඤ්‌ඤෙය්‍ය, චක්‌ඛුතො න මඤ්‌ඤෙය්‍ය, චක්‌ඛු මෙති න මඤ්‌ඤෙය්‍ය; රූපෙ න මඤ්‌ඤෙය්‍ය… චක්‌ඛුවිඤ්‌ඤාණං… චක්‌ඛුසම්‌ඵස්‌සං… යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය. යඤ්‌හි, භික්‌ඛවෙ, මඤ්‌ඤති, යස්‌මිං මඤ්‌ඤති, යතො මඤ්‌ඤති, යං මෙති මඤ්‌ඤති, තතො තං හොති අඤ්‌ඤථා. අඤ්‌ඤථාභාවී භවසත්‌තො ලොකො භවමෙව අභිනන්‌දති…පෙ.….
91. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha, bhikkhave, bhikkhu cepi ākaṅkheyya ‘anejo vihareyyaṃ vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya… cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘ජිව්‌හං න මඤ්‌ඤෙය්‍ය, ජිව්‌හාය න මඤ්‌ඤෙය්‍ය, ජිව්‌හාතො න මඤ්‌ඤෙය්‍ය, ජිව්‌හා මෙති න මඤ්‌ඤෙය්‍ය; රසෙ න මඤ්‌ඤෙය්‍ය… ජිව්‌හාවිඤ්‌ඤාණං… ජිව්‌හාසම්‌ඵස්‌සං… යම්‌පිදං ජිව්‌හාසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය. යඤ්‌හි, භික්‌ඛවෙ, මඤ්‌ඤති, යස්‌මිං මඤ්‌ඤති, යතො මඤ්‌ඤති, යං මෙති මඤ්‌ඤති, තතො තං හොති අඤ්‌ඤථා. අඤ්‌ඤථාභාවී භවසත්‌තො ලොකො භවමෙව අභිනන්‌දති…පෙ.….
‘‘Jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya… jivhāviññāṇaṃ… jivhāsamphassaṃ… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘මනං න මඤ්‌ඤෙය්‍ය, මනස්‌මිං න මඤ්‌ඤෙය්‍ය, මනතො න මඤ්‌ඤෙය්‍ය, මනො මෙති න මඤ්‌ඤෙය්‍ය… මනොවිඤ්‌ඤාණං… මනොසම්‌ඵස්‌සං… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය. යඤ්‌හි, භික්‌ඛවෙ, මඤ්‌ඤති, යස්‌මිං මඤ්‌ඤති , යතො මඤ්‌ඤති, යං මෙති මඤ්‌ඤති, තතො තං හොති අඤ්‌ඤථා. අඤ්‌ඤථාභාවී භවසත්‌තො ලොකො භවමෙව අභිනන්‌දති.
‘‘Manaṃ na maññeyya, manasmiṃ na maññeyya, manato na maññeyya, mano meti na maññeyya… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati , yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati.
‘‘යාවතා, භික්‌ඛවෙ, ඛන්‌ධධාතුආයතනා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය. සො එවං අමඤ්‌ඤමානො න කිඤ්‌චි ලොකෙ උපාදියති. අනුපාදියං න පරිතස්‌සති. අපරිතස්‌සං පච්‌චත්‌තඤ්‌ඤෙව පරිනිබ්‌බායති. ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාතී’’ති. අට්‌ඨමං.
‘‘Yāvatā, bhikkhave, khandhadhātuāyatanā tampi na maññeyya, tasmimpi na maññeyya, tatopi na maññeyya, taṃ meti na maññeyya. So evaṃ amaññamāno na kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-8. පඨමඑජාසුත්‌තාදිවණ්‌ණනා • 7-8. Paṭhamaejāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-8. පඨමඑජාසුත්‌තාදිවණ්‌ණනා • 7-8. Paṭhamaejāsuttādivaṇṇanā
