| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
6. д̣̇уд̇ияазсанаасуд̇д̇аван̣н̣анаа
6. Dutiyaesanāsuttavaṇṇanā
55. чадтз б̣рахмажариязсанаа сахаад̇и б̣рахмажариязсанааяа сад̣̇д̇хим̣. вибхад̇д̇илобзна хи аяам̣ нид̣̇д̣̇зсо, гаран̣ад̇т̇з ваа зд̇ам̣ бажжад̇д̇аважанам̣. ид̣̇ам̣ вуд̇д̇ам̣ ход̇и ‘‘б̣рахмажариязсанааяа сад̣̇д̇хим̣ гаамзсанаа, бхавзсанаад̇и д̇иссо зсанаа’’д̇и. д̇аасу б̣рахмажариязсанам̣ саруубад̇о д̣̇ассзд̇ум̣ ‘‘ид̇исажжабараамаасо, д̣̇идтидтаанаа самуссаяаа’’д̇и вуд̇д̇ам̣. д̇ассад̇т̇о – ид̇и звам̣ сажжанд̇и бараамаасо ид̇исажжабараамаасо. ид̣̇амзва сажжам̣, могхаман̃н̃анд̇и д̣̇идтияаа бавад̇д̇иаагаарам̣ д̣̇ассзд̇и. д̣̇идтияо зва саб̣б̣аанад̇т̇ахзд̇убхаавад̇о д̣̇идтидтаанаа. вуд̇д̇ан̃хзд̇ам̣ – ‘‘мижчаад̣̇идтибарамаахам̣, бхигкавз, важ̇ж̇ам̣ вад̣̇аамий’’д̇и (а. ни. 1.310). д̇аа зва жа убаруубари вад̣дхамаанаа лобхаад̣̇игилзсасамуссаязна жа самуссаяаа, ‘‘ид̣̇амзва сажжам̣, могхаман̃н̃а’’нд̇и мижчаабхинивисамаанаа саб̣б̣аанад̇т̇ахзд̇убхууд̇аа гилзсад̣̇угкуубажаяахзд̇убхууд̇аа жа д̣̇идтияо б̣рахмажариязсанаад̇и вуд̇д̇ам̣ ход̇и. зд̇зна бавад̇д̇иаагаарад̇о ниб̣б̣ад̇д̇ид̇о жа б̣рахмажариязсанаа д̣̇ассид̇аад̇и взд̣̇ид̇аб̣б̣аа.
55. Chaṭṭhe brahmacariyesanā sahāti brahmacariyesanāya saddhiṃ. Vibhattilopena hi ayaṃ niddeso, karaṇatthe vā etaṃ paccattavacanaṃ. Idaṃ vuttaṃ hoti ‘‘brahmacariyesanāya saddhiṃ kāmesanā, bhavesanāti tisso esanā’’ti. Tāsu brahmacariyesanaṃ sarūpato dassetuṃ ‘‘itisaccaparāmāso, diṭṭhiṭṭhānā samussayā’’ti vuttaṃ. Tassattho – iti evaṃ saccanti parāmāso itisaccaparāmāso. Idameva saccaṃ, moghamaññanti diṭṭhiyā pavattiākāraṃ dasseti. Diṭṭhiyo eva sabbānatthahetubhāvato diṭṭhiṭṭhānā. Vuttañhetaṃ – ‘‘micchādiṭṭhiparamāhaṃ, bhikkhave, vajjaṃ vadāmī’’ti (a. ni. 1.310). Tā eva ca uparūpari vaḍḍhamānā lobhādikilesasamussayena ca samussayā, ‘‘idameva saccaṃ, moghamañña’’nti micchābhinivisamānā sabbānatthahetubhūtā kilesadukkhūpacayahetubhūtā ca diṭṭhiyo brahmacariyesanāti vuttaṃ hoti. Etena pavattiākārato nibbattito ca brahmacariyesanā dassitāti veditabbā.
саб̣б̣арааг̇авирад̇д̇ассаад̇и саб̣б̣зхи гаамарааг̇абхаварааг̇зхи вирад̇д̇асса. д̇ад̇о зва д̇ан̣хагкаяасан̇каад̇з ниб̣б̣аанз вимуд̇д̇ад̇д̇аа д̇ан̣хагкаяавимуд̇д̇ино арахад̇о. зсанаа бадиниссадтаад̇и гаамзсанаа, бхавзсанаа жа саб̣б̣асо ниссадтаа бахийнаа. д̣̇идтидтаанаа самуухад̇аад̇и б̣рахмажариязсанаасан̇каад̇аа д̣̇идтидтаанаа жа батамамаг̇г̇знзва самуг̇гхаад̇ид̇аа. зсанаанам̣ каяаад̇и звамзд̇аасам̣ д̇иссаннам̣ зсанаанам̣ каяаа ануббаад̣̇анирод̇хаа бхиннагилзсад̇д̇аа. бхигкууд̇и жа саб̣б̣асо аасаабхаа ваа. нираасод̇и жа д̣̇идтзгадтасса вижигижчаагат̇ам̣гат̇аасалласса бахийнад̇д̇аа агат̇ам̣гат̇ийд̇и жа вужжад̇ийд̇и.
Sabbarāgavirattassāti sabbehi kāmarāgabhavarāgehi virattassa. Tato eva taṇhakkhayasaṅkhāte nibbāne vimuttattā taṇhakkhayavimuttino arahato. Esanā paṭinissaṭṭhāti kāmesanā, bhavesanā ca sabbaso nissaṭṭhā pahīnā. Diṭṭhiṭṭhānā samūhatāti brahmacariyesanāsaṅkhātā diṭṭhiṭṭhānā ca paṭhamamaggeneva samugghātitā. Esanānaṃ khayāti evametāsaṃ tissannaṃ esanānaṃ khayā anuppādanirodhā bhinnakilesattā. Bhikkhūti ca sabbaso āsābhā vā. Nirāsoti ca diṭṭhekaṭṭhassa vicikicchākathaṃkathāsallassa pahīnattā akathaṃkathīti ca vuccatīti.
чадтасуд̇д̇аван̣н̣анаа нидтид̇аа.
Chaṭṭhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 6. д̣̇уд̇ияазсанаасуд̇д̇ам̣ • 6. Dutiyaesanāsuttaṃ
