| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༦. དུཏིཡཨེསནཱསུཏྟཝཎྞནཱ
6. Dutiyaesanāsuttavaṇṇanā
༥༥. ཚཊྛེ བྲཧྨཙརིཡེསནཱ སཧཱཏི བྲཧྨཙརིཡེསནཱཡ སདྡྷིཾ། ཝིབྷཏྟིལོཔེན ཧི ཨཡཾ ནིདྡེསོ, ཀརཎཏྠེ ཝཱ ཨེཏཾ པཙྩཏྟཝཙནཾ། ཨིདཾ ཝུཏྟཾ ཧོཏི ‘‘བྲཧྨཙརིཡེསནཱཡ སདྡྷིཾ ཀཱམེསནཱ, བྷཝེསནཱཏི ཏིསྶོ ཨེསནཱ’’ཏི། ཏཱསུ བྲཧྨཙརིཡེསནཾ སརཱུཔཏོ དསྶེཏུཾ ‘‘ཨིཏིསཙྩཔརཱམཱསོ, དིཊྛིཊྛཱནཱ སམུསྶཡཱ’’ཏི ཝུཏྟཾ། ཏསྶཏྠོ – ཨིཏི ཨེཝཾ སཙྩནྟི པརཱམཱསོ ཨིཏིསཙྩཔརཱམཱསོ། ཨིདམེཝ སཙྩཾ, མོགྷམཉྙནྟི དིཊྛིཡཱ པཝཏྟིཨཱཀཱརཾ དསྶེཏི། དིཊྛིཡོ ཨེཝ སབྦཱནཏྠཧེཏུབྷཱཝཏོ དིཊྛིཊྛཱནཱ། ཝུཏྟཉྷེཏཾ – ‘‘མིཙྪཱདིཊྛིཔརམཱཧཾ, བྷིཀྑཝེ, ཝཛྫཾ ཝདཱམཱི’’ཏི (ཨ॰ ནི॰ ༡.༣༡༠)། ཏཱ ཨེཝ ཙ ཨུཔརཱུཔརི ཝཌྜྷམཱནཱ ལོབྷཱདིཀིལེསསམུསྶཡེན ཙ སམུསྶཡཱ, ‘‘ཨིདམེཝ སཙྩཾ, མོགྷམཉྙ’’ནྟི མིཙྪཱབྷིནིཝིསམཱནཱ སབྦཱནཏྠཧེཏུབྷཱུཏཱ ཀིལེསདུཀྑཱུཔཙཡཧེཏུབྷཱུཏཱ ཙ དིཊྛིཡོ བྲཧྨཙརིཡེསནཱཏི ཝུཏྟཾ ཧོཏི། ཨེཏེན པཝཏྟིཨཱཀཱརཏོ ནིབྦཏྟིཏོ ཙ བྲཧྨཙརིཡེསནཱ དསྶིཏཱཏི ཝེདིཏབྦཱ།
55. Chaṭṭhe brahmacariyesanā sahāti brahmacariyesanāya saddhiṃ. Vibhattilopena hi ayaṃ niddeso, karaṇatthe vā etaṃ paccattavacanaṃ. Idaṃ vuttaṃ hoti ‘‘brahmacariyesanāya saddhiṃ kāmesanā, bhavesanāti tisso esanā’’ti. Tāsu brahmacariyesanaṃ sarūpato dassetuṃ ‘‘itisaccaparāmāso, diṭṭhiṭṭhānā samussayā’’ti vuttaṃ. Tassattho – iti evaṃ saccanti parāmāso itisaccaparāmāso. Idameva saccaṃ, moghamaññanti diṭṭhiyā pavattiākāraṃ dasseti. Diṭṭhiyo eva sabbānatthahetubhāvato diṭṭhiṭṭhānā. Vuttañhetaṃ – ‘‘micchādiṭṭhiparamāhaṃ, bhikkhave, vajjaṃ vadāmī’’ti (a. ni. 1.310). Tā eva ca uparūpari vaḍḍhamānā lobhādikilesasamussayena ca samussayā, ‘‘idameva saccaṃ, moghamañña’’nti micchābhinivisamānā sabbānatthahetubhūtā kilesadukkhūpacayahetubhūtā ca diṭṭhiyo brahmacariyesanāti vuttaṃ hoti. Etena pavattiākārato nibbattito ca brahmacariyesanā dassitāti veditabbā.
སབྦརཱགཝིརཏྟསྶཱཏི སབྦེཧི ཀཱམརཱགབྷཝརཱགེཧི ཝིརཏྟསྶ། ཏཏོ ཨེཝ ཏཎྷཀྑཡསངྑཱཏེ ནིབྦཱནེ ཝིམུཏྟཏྟཱ ཏཎྷཀྑཡཝིམུཏྟིནོ ཨརཧཏོ། ཨེསནཱ པཊིནིསྶཊྛཱཏི ཀཱམེསནཱ, བྷཝེསནཱ ཙ སབྦསོ ནིསྶཊྛཱ པཧཱིནཱ། དིཊྛིཊྛཱནཱ སམཱུཧཏཱཏི བྲཧྨཙརིཡེསནཱསངྑཱཏཱ དིཊྛིཊྛཱནཱ ཙ པཋམམགྒེནེཝ སམུགྒྷཱཏིཏཱ། ཨེསནཱནཾ ཁཡཱཏི ཨེཝམེཏཱསཾ ཏིསྶནྣཾ ཨེསནཱནཾ ཁཡཱ ཨནུཔྤཱདནིརོདྷཱ བྷིནྣཀིལེསཏྟཱ། བྷིཀྑཱུཏི ཙ སབྦསོ ཨཱསཱབྷཱ ཝཱ། ནིརཱསོཏི ཙ དིཊྛེཀཊྛསྶ ཝིཙིཀིཙྪཱཀཐཾཀཐཱསལླསྶ པཧཱིནཏྟཱ ཨཀཐཾཀཐཱིཏི ཙ ཝུཙྩཏཱིཏི།
Sabbarāgavirattassāti sabbehi kāmarāgabhavarāgehi virattassa. Tato eva taṇhakkhayasaṅkhāte nibbāne vimuttattā taṇhakkhayavimuttino arahato. Esanā paṭinissaṭṭhāti kāmesanā, bhavesanā ca sabbaso nissaṭṭhā pahīnā. Diṭṭhiṭṭhānā samūhatāti brahmacariyesanāsaṅkhātā diṭṭhiṭṭhānā ca paṭhamamaggeneva samugghātitā. Esanānaṃ khayāti evametāsaṃ tissannaṃ esanānaṃ khayā anuppādanirodhā bhinnakilesattā. Bhikkhūti ca sabbaso āsābhā vā. Nirāsoti ca diṭṭhekaṭṭhassa vicikicchākathaṃkathāsallassa pahīnattā akathaṃkathīti ca vuccatīti.
ཚཊྛསུཏྟཝཎྞནཱ ནིཊྛིཏཱ།
Chaṭṭhasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༦. དུཏིཡཨེསནཱསུཏྟཾ • 6. Dutiyaesanāsuttaṃ
