| Library / Tipiṭaka / ਤਿਪਿਟਕ • Tipiṭaka / ਇਤਿવੁਤ੍ਤਕ-ਅਟ੍ਠਕਥਾ • Itivuttaka-aṭṭhakathā |
੬. ਦੁਤਿਯਏਸਨਾਸੁਤ੍ਤવਣ੍ਣਨਾ
6. Dutiyaesanāsuttavaṇṇanā
੫੫. ਛਟ੍ਠੇ ਬ੍ਰਹ੍ਮਚਰਿਯੇਸਨਾ ਸਹਾਤਿ ਬ੍ਰਹ੍ਮਚਰਿਯੇਸਨਾਯ ਸਦ੍ਧਿਂ। વਿਭਤ੍ਤਿਲੋਪੇਨ ਹਿ ਅਯਂ ਨਿਦ੍ਦੇਸੋ, ਕਰਣਤ੍ਥੇ વਾ ਏਤਂ ਪਚ੍ਚਤ੍ਤવਚਨਂ। ਇਦਂ વੁਤ੍ਤਂ ਹੋਤਿ ‘‘ਬ੍ਰਹ੍ਮਚਰਿਯੇਸਨਾਯ ਸਦ੍ਧਿਂ ਕਾਮੇਸਨਾ, ਭવੇਸਨਾਤਿ ਤਿਸ੍ਸੋ ਏਸਨਾ’’ਤਿ। ਤਾਸੁ ਬ੍ਰਹ੍ਮਚਰਿਯੇਸਨਂ ਸਰੂਪਤੋ ਦਸ੍ਸੇਤੁਂ ‘‘ਇਤਿਸਚ੍ਚਪਰਾਮਾਸੋ, ਦਿਟ੍ਠਿਟ੍ਠਾਨਾ ਸਮੁਸ੍ਸਯਾ’’ਤਿ વੁਤ੍ਤਂ। ਤਸ੍ਸਤ੍ਥੋ – ਇਤਿ ਏવਂ ਸਚ੍ਚਨ੍ਤਿ ਪਰਾਮਾਸੋ ਇਤਿਸਚ੍ਚਪਰਾਮਾਸੋ। ਇਦਮੇવ ਸਚ੍ਚਂ, ਮੋਘਮਞ੍ਞਨ੍ਤਿ ਦਿਟ੍ਠਿਯਾ ਪવਤ੍ਤਿਆਕਾਰਂ ਦਸ੍ਸੇਤਿ। ਦਿਟ੍ਠਿਯੋ ਏવ ਸਬ੍ਬਾਨਤ੍ਥਹੇਤੁਭਾવਤੋ ਦਿਟ੍ਠਿਟ੍ਠਾਨਾ। વੁਤ੍ਤਞ੍ਹੇਤਂ – ‘‘ਮਿਚ੍ਛਾਦਿਟ੍ਠਿਪਰਮਾਹਂ, ਭਿਕ੍ਖવੇ, વਜ੍ਜਂ વਦਾਮੀ’’ਤਿ (ਅ॰ ਨਿ॰ ੧.੩੧੦)। ਤਾ ਏવ ਚ ਉਪਰੂਪਰਿ વਡ੍ਢਮਾਨਾ ਲੋਭਾਦਿਕਿਲੇਸਸਮੁਸ੍ਸਯੇਨ ਚ ਸਮੁਸ੍ਸਯਾ, ‘‘ਇਦਮੇવ ਸਚ੍ਚਂ, ਮੋਘਮਞ੍ਞ’’ਨ੍ਤਿ ਮਿਚ੍ਛਾਭਿਨਿવਿਸਮਾਨਾ ਸਬ੍ਬਾਨਤ੍ਥਹੇਤੁਭੂਤਾ ਕਿਲੇਸਦੁਕ੍ਖੂਪਚਯਹੇਤੁਭੂਤਾ ਚ ਦਿਟ੍ਠਿਯੋ ਬ੍ਰਹ੍ਮਚਰਿਯੇਸਨਾਤਿ વੁਤ੍ਤਂ ਹੋਤਿ। ਏਤੇਨ ਪવਤ੍ਤਿਆਕਾਰਤੋ ਨਿਬ੍ਬਤ੍ਤਿਤੋ ਚ ਬ੍ਰਹ੍ਮਚਰਿਯੇਸਨਾ ਦਸ੍ਸਿਤਾਤਿ વੇਦਿਤਬ੍ਬਾ।
55. Chaṭṭhe brahmacariyesanā sahāti brahmacariyesanāya saddhiṃ. Vibhattilopena hi ayaṃ niddeso, karaṇatthe vā etaṃ paccattavacanaṃ. Idaṃ vuttaṃ hoti ‘‘brahmacariyesanāya saddhiṃ kāmesanā, bhavesanāti tisso esanā’’ti. Tāsu brahmacariyesanaṃ sarūpato dassetuṃ ‘‘itisaccaparāmāso, diṭṭhiṭṭhānā samussayā’’ti vuttaṃ. Tassattho – iti evaṃ saccanti parāmāso itisaccaparāmāso. Idameva saccaṃ, moghamaññanti diṭṭhiyā pavattiākāraṃ dasseti. Diṭṭhiyo eva sabbānatthahetubhāvato diṭṭhiṭṭhānā. Vuttañhetaṃ – ‘‘micchādiṭṭhiparamāhaṃ, bhikkhave, vajjaṃ vadāmī’’ti (a. ni. 1.310). Tā eva ca uparūpari vaḍḍhamānā lobhādikilesasamussayena ca samussayā, ‘‘idameva saccaṃ, moghamañña’’nti micchābhinivisamānā sabbānatthahetubhūtā kilesadukkhūpacayahetubhūtā ca diṭṭhiyo brahmacariyesanāti vuttaṃ hoti. Etena pavattiākārato nibbattito ca brahmacariyesanā dassitāti veditabbā.
ਸਬ੍ਬਰਾਗવਿਰਤ੍ਤਸ੍ਸਾਤਿ ਸਬ੍ਬੇਹਿ ਕਾਮਰਾਗਭવਰਾਗੇਹਿ વਿਰਤ੍ਤਸ੍ਸ। ਤਤੋ ਏવ ਤਣ੍ਹਕ੍ਖਯਸਙ੍ਖਾਤੇ ਨਿਬ੍ਬਾਨੇ વਿਮੁਤ੍ਤਤ੍ਤਾ ਤਣ੍ਹਕ੍ਖਯવਿਮੁਤ੍ਤਿਨੋ ਅਰਹਤੋ। ਏਸਨਾ ਪਟਿਨਿਸ੍ਸਟ੍ਠਾਤਿ ਕਾਮੇਸਨਾ, ਭવੇਸਨਾ ਚ ਸਬ੍ਬਸੋ ਨਿਸ੍ਸਟ੍ਠਾ ਪਹੀਨਾ। ਦਿਟ੍ਠਿਟ੍ਠਾਨਾ ਸਮੂਹਤਾਤਿ ਬ੍ਰਹ੍ਮਚਰਿਯੇਸਨਾਸਙ੍ਖਾਤਾ ਦਿਟ੍ਠਿਟ੍ਠਾਨਾ ਚ ਪਠਮਮਗ੍ਗੇਨੇવ ਸਮੁਗ੍ਘਾਤਿਤਾ। ਏਸਨਾਨਂ ਖਯਾਤਿ ਏવਮੇਤਾਸਂ ਤਿਸ੍ਸਨ੍ਨਂ ਏਸਨਾਨਂ ਖਯਾ ਅਨੁਪ੍ਪਾਦਨਿਰੋਧਾ ਭਿਨ੍ਨਕਿਲੇਸਤ੍ਤਾ। ਭਿਕ੍ਖੂਤਿ ਚ ਸਬ੍ਬਸੋ ਆਸਾਭਾ વਾ। ਨਿਰਾਸੋਤਿ ਚ ਦਿਟ੍ਠੇਕਟ੍ਠਸ੍ਸ વਿਚਿਕਿਚ੍ਛਾਕਥਂਕਥਾਸਲ੍ਲਸ੍ਸ ਪਹੀਨਤ੍ਤਾ ਅਕਥਂਕਥੀਤਿ ਚ વੁਚ੍ਚਤੀਤਿ।
Sabbarāgavirattassāti sabbehi kāmarāgabhavarāgehi virattassa. Tato eva taṇhakkhayasaṅkhāte nibbāne vimuttattā taṇhakkhayavimuttino arahato. Esanā paṭinissaṭṭhāti kāmesanā, bhavesanā ca sabbaso nissaṭṭhā pahīnā. Diṭṭhiṭṭhānā samūhatāti brahmacariyesanāsaṅkhātā diṭṭhiṭṭhānā ca paṭhamamaggeneva samugghātitā. Esanānaṃ khayāti evametāsaṃ tissannaṃ esanānaṃ khayā anuppādanirodhā bhinnakilesattā. Bhikkhūti ca sabbaso āsābhā vā. Nirāsoti ca diṭṭhekaṭṭhassa vicikicchākathaṃkathāsallassa pahīnattā akathaṃkathīti ca vuccatīti.
ਛਟ੍ਠਸੁਤ੍ਤવਣ੍ਣਨਾ ਨਿਟ੍ਠਿਤਾ।
Chaṭṭhasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਇਤਿવੁਤ੍ਤਕਪਾਲ਼ਿ • Itivuttakapāḷi / ੬. ਦੁਤਿਯਏਸਨਾਸੁਤ੍ਤਂ • 6. Dutiyaesanāsuttaṃ
