| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. து³தியக³த்³து³லப³த்³த⁴ஸுத்தவண்ணனா
8. Dutiyagaddulabaddhasuttavaṇṇanā
100. அட்ட²மே தஸ்மாதி யஸ்மா தி³ட்டி²க³த்³து³லனிஸ்ஸிதாய தண்ஹாரஜ்ஜுயா ஸக்காயத²ம்பே⁴ உபனிப³த்³தோ⁴ வட்டனிஸ்ஸிதோ பா³லபுது²ஜ்ஜனோ ஸப்³பி³ரியாபதே²ஸு க²ந்த⁴பஞ்சகங் நிஸ்ஸாயேவ பவத்ததி, யஸ்மா வா தீ³க⁴ரத்தமித³ங் சித்தங் ஸங்கிலிட்ட²ங் ராகே³ன தோ³ஸேன மோஹேன, தஸ்மா. சித்தஸங்கிலேஸாதி ஸுன்ஹாதாபி ஹி ஸத்தா சித்தஸங்கிலேஸேனேவ ஸங்கிலிஸ்ஸந்தி, மலக்³க³ஹிதஸரீராபி சித்தஸ்ஸ வோதா³னத்தா விஸுஜ்ஜ²ந்தி. தேனாஹு போராணா –
100. Aṭṭhame tasmāti yasmā diṭṭhigaddulanissitāya taṇhārajjuyā sakkāyathambhe upanibaddho vaṭṭanissito bālaputhujjano sabbiriyāpathesu khandhapañcakaṃ nissāyeva pavattati, yasmā vā dīgharattamidaṃ cittaṃ saṃkiliṭṭhaṃ rāgena dosena mohena, tasmā. Cittasaṃkilesāti sunhātāpi hi sattā cittasaṃkileseneva saṃkilissanti, malaggahitasarīrāpi cittassa vodānattā visujjhanti. Tenāhu porāṇā –
‘‘ரூபம்ஹி ஸங்கிலிட்ட²ம்ஹி, ஸங்கிலிஸ்ஸந்தி மாணவா;
‘‘Rūpamhi saṃkiliṭṭhamhi, saṃkilissanti māṇavā;
ரூபே ஸுத்³தே⁴ விஸுஜ்ஜ²ந்தி, அனக்கா²தங் மஹேஸினா.
Rūpe suddhe visujjhanti, anakkhātaṃ mahesinā.
‘‘சித்தம்ஹி ஸங்கிலிட்ட²ம்ஹி, ஸங்கிலிஸ்ஸந்தி மாணவா;
‘‘Cittamhi saṃkiliṭṭhamhi, saṃkilissanti māṇavā;
சித்தே ஸுத்³தே⁴ விஸுஜ்ஜ²ந்தி, இதி வுத்தங் மஹேஸினா’’தி.
Citte suddhe visujjhanti, iti vuttaṃ mahesinā’’ti.
சரணங் நாம சித்தந்தி விசரணசித்தங். ஸங்கா² நாம ப்³ராஹ்மணபாஸண்டி³கா ஹொந்தி, தே படகொட்ட²கங் கத்வா தத்த² நானப்பகாரா ஸுக³திது³க்³க³திவஸேன ஸம்பத்திவிபத்தியோ லேகா²பெத்வா, ‘‘இமங் கம்மங் கத்வா இத³ங் படிலப⁴தி, இத³ங் கத்வா இத³’’ந்தி த³ஸ்ஸெந்தா தங் சித்தங் க³ஹெத்வா விசரந்தி. சித்தேனேவ சித்திதந்தி சித்தகாரேன சிந்தெத்வா கதத்தா சித்தேன சிந்திதங் நாம. சித்தஞ்ஞேவ சித்ததரந்தி தஸ்ஸ சித்தஸ்ஸ உபாயபரியேஸனசித்தங் ததோபி சித்ததரங். திரச்சா²னக³தா பாணா சித்தேனேவ சித்திதாதி கம்மசித்தேனேவ சித்திதா. தங் பன கம்மசித்தங் இமே வட்டகதித்திராத³யோ ‘‘ஏவங் சித்தா ப⁴விஸ்ஸாமா’’தி ஆயூஹந்தா நாம நத்தி². கம்மங் பன யோனிங் உபனேதி, யோனிமூலகோ தேஸங் சித்தபா⁴வோ. யோனிஉபக³தா ஹி ஸத்தா தங்தங்யோனிகேஹி ஸதி³ஸசித்தாவ ஹொந்தி. இதி யோனிஸித்³தோ⁴ சித்தபா⁴வோ, கம்மஸித்³தா⁴ யோனீதி வேதி³தப்³பா³.
Caraṇaṃ nāma cittanti vicaraṇacittaṃ. Saṅkhā nāma brāhmaṇapāsaṇḍikā honti, te paṭakoṭṭhakaṃ katvā tattha nānappakārā sugatiduggativasena sampattivipattiyo lekhāpetvā, ‘‘imaṃ kammaṃ katvā idaṃ paṭilabhati, idaṃ katvā ida’’nti dassentā taṃ cittaṃ gahetvā vicaranti. Citteneva cittitanti cittakārena cintetvā katattā cittena cintitaṃ nāma. Cittaññeva cittataranti tassa cittassa upāyapariyesanacittaṃ tatopi cittataraṃ. Tiracchānagatā pāṇā citteneva cittitāti kammacitteneva cittitā. Taṃ pana kammacittaṃ ime vaṭṭakatittirādayo ‘‘evaṃ cittā bhavissāmā’’ti āyūhantā nāma natthi. Kammaṃ pana yoniṃ upaneti, yonimūlako tesaṃ cittabhāvo. Yoniupagatā hi sattā taṃtaṃyonikehi sadisacittāva honti. Iti yonisiddho cittabhāvo, kammasiddhā yonīti veditabbā.
அபிச சித்தங் நாமேதங் ஸஹஜாதங் ஸஹஜாதத⁴ம்மசித்ததாய பூ⁴மிசித்ததாய வத்து²சித்ததாய த்³வாரசித்ததாய ஆரம்மணசித்ததாய கம்மனானத்தமூலகானங் லிங்க³னானத்தஸஞ்ஞானானத்தவோஹாரனானத்தாதீ³னங் அனேகவிதா⁴னங் சித்தானங் நிப்பா²த³னதாயபி திரச்சா²னக³தசித்ததோ சித்ததரமேவ வேதி³தப்³ப³ங்.
Apica cittaṃ nāmetaṃ sahajātaṃ sahajātadhammacittatāya bhūmicittatāya vatthucittatāya dvāracittatāya ārammaṇacittatāya kammanānattamūlakānaṃ liṅganānattasaññānānattavohāranānattādīnaṃ anekavidhānaṃ cittānaṃ nipphādanatāyapi tiracchānagatacittato cittatarameva veditabbaṃ.
ரஜகோதி வத்தே²ஸு ரங்கே³ன ரூபஸமுட்டா²பனகோ. ஸோ பன அசே²கோ அமனாபங் ரூபங் கரோதி, சே²கோ மனாபங் த³ஸ்ஸனீயங், ஏவமேவ புது²ஜ்ஜனோ அகுஸலசித்தேன வா ஞாணவிப்பயுத்தகுஸலேன வா சக்கு²ஸம்பதா³தி³விரஹிதங் விரூபங் ஸமுட்டா²பேதி, ஞாணஸம்பயுத்தகுஸலேன சக்கு²ஸம்பதா³தி³ஸம்பன்னங் அபி⁴ரூபங். அட்ட²மங்.
Rajakoti vatthesu raṅgena rūpasamuṭṭhāpanako. So pana acheko amanāpaṃ rūpaṃ karoti, cheko manāpaṃ dassanīyaṃ, evameva puthujjano akusalacittena vā ñāṇavippayuttakusalena vā cakkhusampadādivirahitaṃ virūpaṃ samuṭṭhāpeti, ñāṇasampayuttakusalena cakkhusampadādisampannaṃ abhirūpaṃ. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. து³தியக³த்³து³லப³த்³த⁴ஸுத்தங் • 8. Dutiyagaddulabaddhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. து³தியக³த்³து³லப³த்³த⁴ஸுத்தவண்ணனா • 8. Dutiyagaddulabaddhasuttavaṇṇanā
