| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. দুতিযগদ্দুলবদ্ধসুত্তৰণ্ণনা
8. Dutiyagaddulabaddhasuttavaṇṇanā
১০০. অট্ঠমে তস্মাতি যস্মা দিট্ঠিগদ্দুলনিস্সিতায তণ্হারজ্জুযা সক্কাযথম্ভে উপনিবদ্ধো ৰট্টনিস্সিতো বালপুথুজ্জনো সব্বিরিযাপথেসু খন্ধপঞ্চকং নিস্সাযেৰ পৰত্ততি, যস্মা ৰা দীঘরত্তমিদং চিত্তং সংকিলিট্ঠং রাগেন দোসেন মোহেন, তস্মা। চিত্তসংকিলেসাতি সুন্হাতাপি হি সত্তা চিত্তসংকিলেসেনেৰ সংকিলিস্সন্তি, মলগ্গহিতসরীরাপি চিত্তস্স ৰোদানত্তা ৰিসুজ্ঝন্তি। তেনাহু পোরাণা –
100. Aṭṭhame tasmāti yasmā diṭṭhigaddulanissitāya taṇhārajjuyā sakkāyathambhe upanibaddho vaṭṭanissito bālaputhujjano sabbiriyāpathesu khandhapañcakaṃ nissāyeva pavattati, yasmā vā dīgharattamidaṃ cittaṃ saṃkiliṭṭhaṃ rāgena dosena mohena, tasmā. Cittasaṃkilesāti sunhātāpi hi sattā cittasaṃkileseneva saṃkilissanti, malaggahitasarīrāpi cittassa vodānattā visujjhanti. Tenāhu porāṇā –
‘‘রূপম্হি সংকিলিট্ঠম্হি, সংকিলিস্সন্তি মাণৰা।
‘‘Rūpamhi saṃkiliṭṭhamhi, saṃkilissanti māṇavā;
রূপে সুদ্ধে ৰিসুজ্ঝন্তি, অনক্খাতং মহেসিনা॥
Rūpe suddhe visujjhanti, anakkhātaṃ mahesinā.
‘‘চিত্তম্হি সংকিলিট্ঠম্হি, সংকিলিস্সন্তি মাণৰা।
‘‘Cittamhi saṃkiliṭṭhamhi, saṃkilissanti māṇavā;
চিত্তে সুদ্ধে ৰিসুজ্ঝন্তি, ইতি ৰুত্তং মহেসিনা’’তি॥
Citte suddhe visujjhanti, iti vuttaṃ mahesinā’’ti.
চরণং নাম চিত্তন্তি ৰিচরণচিত্তং। সঙ্খা নাম ব্রাহ্মণপাসণ্ডিকা হোন্তি, তে পটকোট্ঠকং কত্ৰা তত্থ নানপ্পকারা সুগতিদুগ্গতিৰসেন সম্পত্তিৰিপত্তিযো লেখাপেত্ৰা, ‘‘ইমং কম্মং কত্ৰা ইদং পটিলভতি, ইদং কত্ৰা ইদ’’ন্তি দস্সেন্তা তং চিত্তং গহেত্ৰা ৰিচরন্তি। চিত্তেনেৰ চিত্তিতন্তি চিত্তকারেন চিন্তেত্ৰা কতত্তা চিত্তেন চিন্তিতং নাম। চিত্তঞ্ঞেৰ চিত্ততরন্তি তস্স চিত্তস্স উপাযপরিযেসনচিত্তং ততোপি চিত্ততরং। তিরচ্ছানগতা পাণা চিত্তেনেৰ চিত্তিতাতি কম্মচিত্তেনেৰ চিত্তিতা। তং পন কম্মচিত্তং ইমে ৰট্টকতিত্তিরাদযো ‘‘এৰং চিত্তা ভৰিস্সামা’’তি আযূহন্তা নাম নত্থি। কম্মং পন যোনিং উপনেতি, যোনিমূলকো তেসং চিত্তভাৰো। যোনিউপগতা হি সত্তা তংতংযোনিকেহি সদিসচিত্তাৰ হোন্তি। ইতি যোনিসিদ্ধো চিত্তভাৰো, কম্মসিদ্ধা যোনীতি ৰেদিতব্বা।
Caraṇaṃ nāma cittanti vicaraṇacittaṃ. Saṅkhā nāma brāhmaṇapāsaṇḍikā honti, te paṭakoṭṭhakaṃ katvā tattha nānappakārā sugatiduggativasena sampattivipattiyo lekhāpetvā, ‘‘imaṃ kammaṃ katvā idaṃ paṭilabhati, idaṃ katvā ida’’nti dassentā taṃ cittaṃ gahetvā vicaranti. Citteneva cittitanti cittakārena cintetvā katattā cittena cintitaṃ nāma. Cittaññeva cittataranti tassa cittassa upāyapariyesanacittaṃ tatopi cittataraṃ. Tiracchānagatā pāṇā citteneva cittitāti kammacitteneva cittitā. Taṃ pana kammacittaṃ ime vaṭṭakatittirādayo ‘‘evaṃ cittā bhavissāmā’’ti āyūhantā nāma natthi. Kammaṃ pana yoniṃ upaneti, yonimūlako tesaṃ cittabhāvo. Yoniupagatā hi sattā taṃtaṃyonikehi sadisacittāva honti. Iti yonisiddho cittabhāvo, kammasiddhā yonīti veditabbā.
অপিচ চিত্তং নামেতং সহজাতং সহজাতধম্মচিত্ততায ভূমিচিত্ততায ৰত্থুচিত্ততায দ্ৰারচিত্ততায আরম্মণচিত্ততায কম্মনানত্তমূলকানং লিঙ্গনানত্তসঞ্ঞানানত্তৰোহারনানত্তাদীনং অনেকৰিধানং চিত্তানং নিপ্ফাদনতাযপি তিরচ্ছানগতচিত্ততো চিত্ততরমেৰ ৰেদিতব্বং।
Apica cittaṃ nāmetaṃ sahajātaṃ sahajātadhammacittatāya bhūmicittatāya vatthucittatāya dvāracittatāya ārammaṇacittatāya kammanānattamūlakānaṃ liṅganānattasaññānānattavohāranānattādīnaṃ anekavidhānaṃ cittānaṃ nipphādanatāyapi tiracchānagatacittato cittatarameva veditabbaṃ.
রজকোতি ৰত্থেসু রঙ্গেন রূপসমুট্ঠাপনকো। সো পন অছেকো অমনাপং রূপং করোতি, ছেকো মনাপং দস্সনীযং, এৰমেৰ পুথুজ্জনো অকুসলচিত্তেন ৰা ঞাণৰিপ্পযুত্তকুসলেন ৰা চক্খুসম্পদাদিৰিরহিতং ৰিরূপং সমুট্ঠাপেতি, ঞাণসম্পযুত্তকুসলেন চক্খুসম্পদাদিসম্পন্নং অভিরূপং। অট্ঠমং।
Rajakoti vatthesu raṅgena rūpasamuṭṭhāpanako. So pana acheko amanāpaṃ rūpaṃ karoti, cheko manāpaṃ dassanīyaṃ, evameva puthujjano akusalacittena vā ñāṇavippayuttakusalena vā cakkhusampadādivirahitaṃ virūpaṃ samuṭṭhāpeti, ñāṇasampayuttakusalena cakkhusampadādisampannaṃ abhirūpaṃ. Aṭṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. দুতিযগদ্দুলবদ্ধসুত্তং • 8. Dutiyagaddulabaddhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. দুতিযগদ্দুলবদ্ধসুত্তৰণ্ণনা • 8. Dutiyagaddulabaddhasuttavaṇṇanā
