| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³தியகி³லானஸுத்தங்
2. Dutiyagilānasuttaṃ
75. அத² கோ² அஞ்ஞதரோ பி⁴க்கு²…பே॰… ப⁴க³வந்தங் ஏதத³வோச – ‘‘அமுகஸ்மிங், ப⁴ந்தே, விஹாரே அஞ்ஞதரோ பி⁴க்கு² நவோ அப்பஞ்ஞாதோ ஆபா³தி⁴கோ து³க்கி²தோ பா³ள்ஹகி³லானோ. ஸாது⁴, ப⁴ந்தே, ப⁴க³வா யேன ஸோ பி⁴க்கு² தேனுபஸங்கமது அனுகம்பங் உபாதா³யா’’தி.
75. Atha kho aññataro bhikkhu…pe… bhagavantaṃ etadavoca – ‘‘amukasmiṃ, bhante, vihāre aññataro bhikkhu navo appaññāto ābādhiko dukkhito bāḷhagilāno. Sādhu, bhante, bhagavā yena so bhikkhu tenupasaṅkamatu anukampaṃ upādāyā’’ti.
அத² கோ² ப⁴க³வா நவவாத³ஞ்ச ஸுத்வா கி³லானவாத³ஞ்ச, ‘‘அப்பஞ்ஞாதோ பி⁴க்கூ²’’தி இதி விதி³த்வா யேன ஸோ பி⁴க்கு² தேனுபஸங்கமி. அத்³த³ஸா கோ² ஸோ பி⁴க்கு² ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான மஞ்சகே ஸமதோ⁴ஸி. அத² கோ² ப⁴க³வா தங் பி⁴க்கு²ங் ஏதத³வோச – ‘‘அலங், பி⁴க்கு², மா த்வங் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி, தத்தா²ஹங் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா தங் பி⁴க்கு²ங் ஏதத³வோச – ‘‘கச்சி தே, பி⁴க்கு², க²மனீயங், கச்சி யாபனீயங், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானங் பஞ்ஞாயதி நோ அபி⁴க்கமோ’’தி?
Atha kho bhagavā navavādañca sutvā gilānavādañca, ‘‘appaññāto bhikkhū’’ti iti viditvā yena so bhikkhu tenupasaṅkami. Addasā kho so bhikkhu bhagavantaṃ dūratova āgacchantaṃ. Disvāna mañcake samadhosi. Atha kho bhagavā taṃ bhikkhuṃ etadavoca – ‘‘alaṃ, bhikkhu, mā tvaṃ mañcake samadhosi. Santimāni āsanāni paññattāni, tatthāhaṃ nisīdissāmī’’ti. Nisīdi bhagavā paññatte āsane. Nisajja kho bhagavā taṃ bhikkhuṃ etadavoca – ‘‘kacci te, bhikkhu, khamanīyaṃ, kacci yāpanīyaṃ, kacci dukkhā vedanā paṭikkamanti no abhikkamanti, paṭikkamosānaṃ paññāyati no abhikkamo’’ti?
‘‘ந மே, ப⁴ந்தே, க²மனீயங், ந யாபனீயங்…பே॰… ந கோ² மங் 1, ப⁴ந்தே, அத்தா ஸீலதோ உபவத³தீ’’தி.
‘‘Na me, bhante, khamanīyaṃ, na yāpanīyaṃ…pe… na kho maṃ 2, bhante, attā sīlato upavadatī’’ti.
‘‘நோ சே கிர தே, பி⁴க்கு², அத்தா ஸீலதோ உபவத³தி, அத² கிஞ்ச தே குக்குச்சங் கோ ச விப்படிஸாரோ’’தி?
‘‘No ce kira te, bhikkhu, attā sīlato upavadati, atha kiñca te kukkuccaṃ ko ca vippaṭisāro’’ti?
‘‘ந க்²வாஹங், ப⁴ந்தே, ஸீலவிஸுத்³த⁴த்த²ங் ப⁴க³வதா த⁴ம்மங் தே³ஸிதங் ஆஜானாமீ’’தி.
‘‘Na khvāhaṃ, bhante, sīlavisuddhatthaṃ bhagavatā dhammaṃ desitaṃ ājānāmī’’ti.
‘‘நோ சே கிர த்வங், பி⁴க்கு², ஸீலவிஸுத்³த⁴த்த²ங் மயா த⁴ம்மங் தே³ஸிதங் ஆஜானாஸி, அத² கிமத்த²ங் சரஹி த்வங், பி⁴க்கு², மயா த⁴ம்மங் தே³ஸிதங் ஆஜானாஸீ’’தி?
‘‘No ce kira tvaṃ, bhikkhu, sīlavisuddhatthaṃ mayā dhammaṃ desitaṃ ājānāsi, atha kimatthaṃ carahi tvaṃ, bhikkhu, mayā dhammaṃ desitaṃ ājānāsī’’ti?
‘‘அனுபாதா³பரினிப்³பா³னத்த²ங் க்²வாஹங், ப⁴ந்தே, ப⁴க³வதா த⁴ம்மங் தே³ஸிதங் ஆஜானாமீ’’தி.
‘‘Anupādāparinibbānatthaṃ khvāhaṃ, bhante, bhagavatā dhammaṃ desitaṃ ājānāmī’’ti.
‘‘ஸாது⁴ ஸாது⁴, பி⁴க்கு²! ஸாது⁴ கோ² த்வங், பி⁴க்கு², அனுபாதா³பரினிப்³பா³னத்த²ங் மயா த⁴ம்மங் தே³ஸிதங் ஆஜானாஸி. அனுபாதா³பரினிப்³பா³னத்தோ² ஹி, பி⁴க்கு², மயா த⁴ம்மோ தே³ஸிதோ.
‘‘Sādhu sādhu, bhikkhu! Sādhu kho tvaṃ, bhikkhu, anupādāparinibbānatthaṃ mayā dhammaṃ desitaṃ ājānāsi. Anupādāparinibbānattho hi, bhikkhu, mayā dhammo desito.
‘‘தங் கிங் மஞ்ஞஸி, பி⁴க்கு², சக்கு² நிச்சங் வா அனிச்சங் வா’’தி?
‘‘Taṃ kiṃ maññasi, bhikkhu, cakkhu niccaṃ vā aniccaṃ vā’’ti?
‘‘அனிச்சங் , ப⁴ந்தே’’.
‘‘Aniccaṃ , bhante’’.
‘‘யங்…பே॰… ஸோதங்… கா⁴னங்… ஜிவ்ஹா… காயோ… மனோ… மனோவிஞ்ஞாணங்… மனோஸம்ப²ஸ்ஸோ… யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி நிச்சங் வா அனிச்சங் வா’’தி?
‘‘Yaṃ…pe… sotaṃ… ghānaṃ… jivhā… kāyo… mano… manoviññāṇaṃ… manosamphasso… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi niccaṃ vā aniccaṃ vā’’ti?
‘‘அனிச்சங், ப⁴ந்தே’’.
‘‘Aniccaṃ, bhante’’.
‘‘யங் பனானிச்சங் து³க்க²ங் வா தங் ஸுக²ங் வா’’தி?
‘‘Yaṃ panāniccaṃ dukkhaṃ vā taṃ sukhaṃ vā’’ti?
‘‘து³க்க²ங், ப⁴ந்தே’’.
‘‘Dukkhaṃ, bhante’’.
‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி?
‘‘Yaṃ panāniccaṃ dukkhaṃ vipariṇāmadhammaṃ, kallaṃ nu taṃ samanupassituṃ – ‘etaṃ mama, esohamasmi, eso me attā’’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘ஏவங் பஸ்ஸங், பி⁴க்கு², ஸுதவா அரியஸாவகோ சக்கு²ஸ்மிம்பி நிப்³பி³ந்த³தி…பே॰… மனஸ்மிம்பி… மனோவிஞ்ஞாணேபி… மனோஸம்ப²ஸ்ஸேபி நிப்³பி³ந்த³தி. யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தஸ்மிம்பி நிப்³பி³ந்த³தி. நிப்³பி³ந்த³ங் விரஜ்ஜதி; விராகா³ விமுச்சதி; விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி.
‘‘Evaṃ passaṃ, bhikkhu, sutavā ariyasāvako cakkhusmimpi nibbindati…pe… manasmimpi… manoviññāṇepi… manosamphassepi nibbindati. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tasmimpi nibbindati. Nibbindaṃ virajjati; virāgā vimuccati; vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti.
இத³மவோச ப⁴க³வா. அத்தமனோ ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³. இமஸ்மிஞ்ச பன வெய்யாகரணஸ்மிங் ப⁴ஞ்ஞமானே தஸ்ஸ பி⁴க்கு²ஸ்ஸ அனுபாதா³ய ஆஸவேஹி சித்தங் விமுச்சீதி 3. து³தியங்.
Idamavoca bhagavā. Attamano so bhikkhu bhagavato bhāsitaṃ abhinandi. Imasmiñca pana veyyākaraṇasmiṃ bhaññamāne tassa bhikkhussa anupādāya āsavehi cittaṃ vimuccīti 4. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-5. பட²மகி³லானஸுத்தாதி³வண்ணனா • 1-5. Paṭhamagilānasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-5. பட²மகி³லானஸுத்தாதி³வண்ணனா • 1-5. Paṭhamagilānasuttādivaṇṇanā
