| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. দুতিযহালিদ্দিকানিসুত্তং
4. Dutiyahāliddikānisuttaṃ
৪. এৰং মে সুতং – একং সমযং আযস্মা মহাকচ্চানো অৰন্তীসু ৰিহরতি কুররঘরে পপাতে পব্বতে। অথ খো হালিদ্দিকানি গহপতি যেনাযস্মা মহাকচ্চানো…পে॰… একমন্তং নিসিন্নো খো হালিদ্দিকানি গহপতি আযস্মন্তং মহাকচ্চানং এতদৰোচ – ‘‘ৰুত্তমিদং, ভন্তে, ভগৰতা সক্কপঞ্হে – ‘যে তে সমণব্রাহ্মণা তণ্হাসঙ্খযৰিমুত্তা, তে অচ্চন্তনিট্ঠা অচ্চন্তযোগক্খেমিনো অচ্চন্তব্রহ্মচারিনো অচ্চন্তপরিযোসানা সেট্ঠা দেৰমনুস্সান’’’ন্তি।
4. Evaṃ me sutaṃ – ekaṃ samayaṃ āyasmā mahākaccāno avantīsu viharati kuraraghare papāte pabbate. Atha kho hāliddikāni gahapati yenāyasmā mahākaccāno…pe… ekamantaṃ nisinno kho hāliddikāni gahapati āyasmantaṃ mahākaccānaṃ etadavoca – ‘‘vuttamidaṃ, bhante, bhagavatā sakkapañhe – ‘ye te samaṇabrāhmaṇā taṇhāsaṅkhayavimuttā, te accantaniṭṭhā accantayogakkhemino accantabrahmacārino accantapariyosānā seṭṭhā devamanussāna’’’nti.
‘‘ইমস্স নু খো, ভন্তে, ভগৰতা সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি?
‘‘Imassa nu kho, bhante, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘রূপধাতুযা খো, গহপতি, যো ছন্দো যো রাগো যা নন্দী যা তণ্হা যে উপযুপাদানা চেতসো অধিট্ঠানাভিনিৰেসানুসযা, তেসং খযা ৰিরাগা নিরোধা চাগা পটিনিস্সগ্গা চিত্তং সুৰিমুত্তন্তি ৰুচ্চতি।
‘‘Rūpadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā cittaṃ suvimuttanti vuccati.
‘‘ৰেদনাধাতুযা খো, গহপতি… সঞ্ঞাধাতুযা খো, গহপতি… সঙ্খারধাতুযা খো, গহপতি… ৰিঞ্ঞাণধাতুযা খো, গহপতি, যো ছন্দো যো রাগো যা নন্দী যা তণ্হা যে উপযুপাদানা চেতসো অধিট্ঠানাভিনিৰেসানুসযা, তেসং খযা ৰিরাগা নিরোধা চাগা পটিনিস্সগ্গা চিত্তং সুৰিমুত্তন্তি ৰুচ্চতি।
‘‘Vedanādhātuyā kho, gahapati… saññādhātuyā kho, gahapati… saṅkhāradhātuyā kho, gahapati… viññāṇadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā cittaṃ suvimuttanti vuccati.
‘‘ইতি খো, গহপতি, যং তং ৰুত্তং ভগৰতা সক্কপঞ্হে – ‘যে তে সমণব্রাহ্মণা তণ্হাসঙ্খযৰিমুত্তা তে অচ্চন্তনিট্ঠা অচ্চন্তযোগক্খেমিনো অচ্চন্তব্রহ্মচারিনো অচ্চন্তপরিযোসানা সেট্ঠা দেৰমনুস্সান’’’ন্তি।
‘‘Iti kho, gahapati, yaṃ taṃ vuttaṃ bhagavatā sakkapañhe – ‘ye te samaṇabrāhmaṇā taṇhāsaṅkhayavimuttā te accantaniṭṭhā accantayogakkhemino accantabrahmacārino accantapariyosānā seṭṭhā devamanussāna’’’nti.
‘‘ইমস্স খো, গহপতি, ভগৰতা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি। চতুত্থং।
‘‘Imassa kho, gahapati, bhagavatā saṃkhittena bhāsitassa evaṃ vitthārena attho daṭṭhabbo’’ti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. দুতিযহালিদ্দিকানিসুত্তৰণ্ণনা • 4. Dutiyahāliddikānisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. দুতিযহালিদ্দিকানিসুত্তৰণ্ণনা • 4. Dutiyahāliddikānisuttavaṇṇanā
