| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. දුතියහාලිද්‌දිකානිසුත්‌තං
4. Dutiyahāliddikānisuttaṃ
4. එවං මෙ සුතං – එකං සමයං ආයස්‌මා මහාකච්‌චානො අවන්‌තීසු විහරති කුරරඝරෙ පපාතෙ පබ්‌බතෙ. අථ ඛො හාලිද්‌දිකානි ගහපති යෙනායස්‌මා මහාකච්‌චානො…පෙ.… එකමන්‌තං නිසින්‌නො ඛො හාලිද්‌දිකානි ගහපති ආයස්‌මන්‌තං මහාකච්‌චානං එතදවොච – ‘‘වුත්‌තමිදං, භන්‌තෙ, භගවතා සක්‌කපඤ්‌හෙ – ‘යෙ තෙ සමණබ්‍රාහ්‌මණා තණ්‌හාසඞ්‌ඛයවිමුත්‌තා, තෙ අච්‌චන්‌තනිට්‌ඨා අච්‌චන්‌තයොගක්‌ඛෙමිනො අච්‌චන්‌තබ්‍රහ්‌මචාරිනො අච්‌චන්‌තපරියොසානා සෙට්‌ඨා දෙවමනුස්‌සාන’’’න්‌ති.
4. Evaṃ me sutaṃ – ekaṃ samayaṃ āyasmā mahākaccāno avantīsu viharati kuraraghare papāte pabbate. Atha kho hāliddikāni gahapati yenāyasmā mahākaccāno…pe… ekamantaṃ nisinno kho hāliddikāni gahapati āyasmantaṃ mahākaccānaṃ etadavoca – ‘‘vuttamidaṃ, bhante, bhagavatā sakkapañhe – ‘ye te samaṇabrāhmaṇā taṇhāsaṅkhayavimuttā, te accantaniṭṭhā accantayogakkhemino accantabrahmacārino accantapariyosānā seṭṭhā devamanussāna’’’nti.
‘‘ඉමස්‌ස නු ඛො, භන්‌තෙ, භගවතා සංඛිත්‌තෙන භාසිතස්‌ස කථං විත්‌ථාරෙන අත්‌ථො දට්‌ඨබ්‌බො’’ති?
‘‘Imassa nu kho, bhante, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘රූපධාතුයා ඛො, ගහපති, යො ඡන්‌දො යො රාගො යා නන්‌දී යා තණ්‌හා යෙ උපයුපාදානා චෙතසො අධිට්‌ඨානාභිනිවෙසානුසයා, තෙසං ඛයා විරාගා නිරොධා චාගා පටිනිස්‌සග්‌ගා චිත්‌තං සුවිමුත්‌තන්‌ති වුච්‌චති.
‘‘Rūpadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā cittaṃ suvimuttanti vuccati.
‘‘වෙදනාධාතුයා ඛො, ගහපති… සඤ්‌ඤාධාතුයා ඛො, ගහපති… සඞ්‌ඛාරධාතුයා ඛො, ගහපති… විඤ්‌ඤාණධාතුයා ඛො, ගහපති, යො ඡන්‌දො යො රාගො යා නන්‌දී යා තණ්‌හා යෙ උපයුපාදානා චෙතසො අධිට්‌ඨානාභිනිවෙසානුසයා, තෙසං ඛයා විරාගා නිරොධා චාගා පටිනිස්‌සග්‌ගා චිත්‌තං සුවිමුත්‌තන්‌ති වුච්‌චති.
‘‘Vedanādhātuyā kho, gahapati… saññādhātuyā kho, gahapati… saṅkhāradhātuyā kho, gahapati… viññāṇadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṃ khayā virāgā nirodhā cāgā paṭinissaggā cittaṃ suvimuttanti vuccati.
‘‘ඉති ඛො, ගහපති, යං තං වුත්‌තං භගවතා සක්‌කපඤ්‌හෙ – ‘යෙ තෙ සමණබ්‍රාහ්‌මණා තණ්‌හාසඞ්‌ඛයවිමුත්‌තා තෙ අච්‌චන්‌තනිට්‌ඨා අච්‌චන්‌තයොගක්‌ඛෙමිනො අච්‌චන්‌තබ්‍රහ්‌මචාරිනො අච්‌චන්‌තපරියොසානා සෙට්‌ඨා දෙවමනුස්‌සාන’’’න්‌ති.
‘‘Iti kho, gahapati, yaṃ taṃ vuttaṃ bhagavatā sakkapañhe – ‘ye te samaṇabrāhmaṇā taṇhāsaṅkhayavimuttā te accantaniṭṭhā accantayogakkhemino accantabrahmacārino accantapariyosānā seṭṭhā devamanussāna’’’nti.
‘‘ඉමස්‌ස ඛො, ගහපති, භගවතා සංඛිත්‌තෙන භාසිතස්‌ස එවං විත්‌ථාරෙන අත්‌ථො දට්‌ඨබ්‌බො’’ති. චතුත්‌ථං.
‘‘Imassa kho, gahapati, bhagavatā saṃkhittena bhāsitassa evaṃ vitthārena attho daṭṭhabbo’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. දුතියහාලිද්‌දිකානිසුත්‌තවණ්‌ණනා • 4. Dutiyahāliddikānisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. දුතියහාලිද්‌දිකානිසුත්‌තවණ්‌ණනා • 4. Dutiyahāliddikānisuttavaṇṇanā
