| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. ဒုတိယဟတ္ထကသုတ္တံ
4. Dutiyahatthakasuttaṃ
၂၄. ဧကံ သမယံ ဘဂဝာ အာဠဝိယံ ဝိဟရတိ အဂ္ဂာဠဝေ စေတိယေ။ အထ ခော ဟတ္ထကော အာဠဝကော ပဉ္စမတ္တေဟိ ဥပာသကသတေဟိ ပရိဝုတော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော ဟတ္ထကံ အာဠဝကံ ဘဂဝာ ဧတဒဝောစ – ‘‘မဟတီ ခော တ္ယာယံ, ဟတ္ထက, ပရိသာ။ ကထံ ပန တ္ဝံ, ဟတ္ထက, ဣမံ မဟတိံ ပရိသံ သင္ဂဏ္ဟာသီ’’တိ? ‘‘ယာနိမာနိ, ဘန္တေ, ဘဂဝတာ ဒေသိတာနိ 1 စတ္တာရိ သင္ဂဟဝတ္ထူနိ, တေဟာဟံ 2 ဣမံ မဟတိံ ပရိသံ သင္ဂဏ္ဟာမိ။ အဟံ, ဘန္တေ, ယံ ဇာနာမိ – ‘အယံ ဒာနေန သင္ဂဟေတဗ္ဗော’တိ, တံ ဒာနေန သင္ဂဏ္ဟာမိ; ယံ ဇာနာမိ – ‘အယံ ပေယ္ယဝဇ္ဇေန သင္ဂဟေတဗ္ဗော’တိ, တံ ပေယ္ယဝဇ္ဇေန သင္ဂဏ္ဟာမိ; ယံ ဇာနာမိ – ‘အယံ အတ္ထစရိယာယ သင္ဂဟေတဗ္ဗော’တိ, တံ အတ္ထစရိယာယ သင္ဂဏ္ဟာမိ; ယံ ဇာနာမိ – ‘အယံ သမာနတ္တတာယ သင္ဂဟေတဗ္ဗော’တိ, တံ သမာနတ္တတာယ သင္ဂဏ္ဟာမိ။ သံဝိဇ္ဇန္တိ ခော ပန မေ, ဘန္တေ, ကုလေ ဘောဂာ။ ဒလိဒ္ဒသ္သ ခော နော တထာ သောတဗ္ဗံ မညန္တီ’’တိ။ ‘‘သာဓု သာဓု, ဟတ္ထက! ယောနိ ခော တ္ယာယံ, ဟတ္ထက, မဟတိံ ပရိသံ သင္ဂဟေတုံ။ ယေ ဟိ ကေစိ, ဟတ္ထက, အတီတမဒ္ဓာနံ မဟတိံ ပရိသံ သင္ဂဟေသုံ, သဗ္ဗေ တေ ဣမေဟေဝ စတူဟိ သင္ဂဟဝတ္ထူဟိ မဟတိံ ပရိသံ သင္ဂဟေသုံ။ ယေပိ ဟိ ကေစိ, ဟတ္ထက, အနာဂတမဒ္ဓာနံ မဟတိံ ပရိသံ သင္ဂဏ္ဟိသ္သန္တိ , သဗ္ဗေ တေ ဣမေဟေဝ စတူဟိ သင္ဂဟဝတ္ထူဟိ မဟတိံ ပရိသံ သင္ဂဏ္ဟိသ္သန္တိ။ ယေပိ ဟိ ကေစိ, ဟတ္ထက, ဧတရဟိ မဟတိံ ပရိသံ သင္ဂဏ္ဟန္တိ, သဗ္ဗေ တေ ဣမေဟေဝ စတူဟိ သင္ဂဟဝတ္ထူဟိ မဟတိံ ပရိသံ သင္ဂဏ္ဟန္တီ’’တိ။
24. Ekaṃ samayaṃ bhagavā āḷaviyaṃ viharati aggāḷave cetiye. Atha kho hatthako āḷavako pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho hatthakaṃ āḷavakaṃ bhagavā etadavoca – ‘‘mahatī kho tyāyaṃ, hatthaka, parisā. Kathaṃ pana tvaṃ, hatthaka, imaṃ mahatiṃ parisaṃ saṅgaṇhāsī’’ti? ‘‘Yānimāni, bhante, bhagavatā desitāni 3 cattāri saṅgahavatthūni, tehāhaṃ 4 imaṃ mahatiṃ parisaṃ saṅgaṇhāmi. Ahaṃ, bhante, yaṃ jānāmi – ‘ayaṃ dānena saṅgahetabbo’ti, taṃ dānena saṅgaṇhāmi; yaṃ jānāmi – ‘ayaṃ peyyavajjena saṅgahetabbo’ti, taṃ peyyavajjena saṅgaṇhāmi; yaṃ jānāmi – ‘ayaṃ atthacariyāya saṅgahetabbo’ti, taṃ atthacariyāya saṅgaṇhāmi; yaṃ jānāmi – ‘ayaṃ samānattatāya saṅgahetabbo’ti, taṃ samānattatāya saṅgaṇhāmi. Saṃvijjanti kho pana me, bhante, kule bhogā. Daliddassa kho no tathā sotabbaṃ maññantī’’ti. ‘‘Sādhu sādhu, hatthaka! Yoni kho tyāyaṃ, hatthaka, mahatiṃ parisaṃ saṅgahetuṃ. Ye hi keci, hatthaka, atītamaddhānaṃ mahatiṃ parisaṃ saṅgahesuṃ, sabbe te imeheva catūhi saṅgahavatthūhi mahatiṃ parisaṃ saṅgahesuṃ. Yepi hi keci, hatthaka, anāgatamaddhānaṃ mahatiṃ parisaṃ saṅgaṇhissanti , sabbe te imeheva catūhi saṅgahavatthūhi mahatiṃ parisaṃ saṅgaṇhissanti. Yepi hi keci, hatthaka, etarahi mahatiṃ parisaṃ saṅgaṇhanti, sabbe te imeheva catūhi saṅgahavatthūhi mahatiṃ parisaṃ saṅgaṇhantī’’ti.
အထ ခော ဟတ္ထကော အာဠဝကော ဘဂဝတာ ဓမ္မိယာ ကထာယ သန္ဒသ္သိတော သမာဒပိတော သမုတ္တေဇိတော သမ္ပဟံသိတော ဥဋ္ဌာယာသနာ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ ပက္ကာမိ ။ အထ ခော ဘဂဝာ အစိရပက္ကန္တေ ဟတ္ထကေ အာဠဝကေ ဘိက္ခူ အာမန္တေသိ – ‘‘အဋ္ဌဟိ, ဘိက္ခဝေ, အစ္ဆရိယေဟိ အဗ္ဘုတေဟိ ဓမ္မေဟိ သမန္နာဂတံ ဟတ္ထကံ အာဠဝကံ ဓာရေထ။ ကတမေဟိ အဋ္ဌဟိ? သဒ္ဓော, ဘိက္ခဝေ, ဟတ္ထကော အာဠဝကော; သီလဝာ, ဘိက္ခဝေ။ပေ.။ ဟိရီမာ။ ဩတ္တပ္ပီ။ ဗဟုသ္သုတော။ စာဂဝာ။ ပညဝာ, ဘိက္ခဝေ, ဟတ္ထကော အာဠဝကော; အပ္ပိစ္ဆော, ဘိက္ခဝေ, ဟတ္ထကော အာဠဝကော။ ဣမေဟိ ခော, ဘိက္ခဝေ, အဋ္ဌဟိ အစ္ဆရိယေဟိ အဗ္ဘုတေဟိ ဓမ္မေဟိ သမန္နာဂတံ ဟတ္ထကံ အာဠဝကံ ဓာရေထာ’’တိ။ စတုတ္ထံ။
Atha kho hatthako āḷavako bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi . Atha kho bhagavā acirapakkante hatthake āḷavake bhikkhū āmantesi – ‘‘aṭṭhahi, bhikkhave, acchariyehi abbhutehi dhammehi samannāgataṃ hatthakaṃ āḷavakaṃ dhāretha. Katamehi aṭṭhahi? Saddho, bhikkhave, hatthako āḷavako; sīlavā, bhikkhave…pe… hirīmā… ottappī… bahussuto… cāgavā… paññavā, bhikkhave, hatthako āḷavako; appiccho, bhikkhave, hatthako āḷavako. Imehi kho, bhikkhave, aṭṭhahi acchariyehi abbhutehi dhammehi samannāgataṃ hatthakaṃ āḷavakaṃ dhārethā’’ti. Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. ဒုတိယဟတ္ထကသုတ္တဝဏ္ဏနာ • 4. Dutiyahatthakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. ပဌမဥဂ္ဂသုတ္တာဒိဝဏ္ဏနာ • 1-7. Paṭhamauggasuttādivaṇṇanā
