| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
4. д̣̇уд̇ияахад̇т̇агасуд̇д̇аван̣н̣анаа
4. Dutiyahatthakasuttavaṇṇanā
24. жад̇уд̇т̇з бан̃жамад̇д̇зхи убаасагасад̇зхийд̇и сод̇аабаннасагад̣̇ааг̇аамийнам̣язва арияасаавагаубаасагаанам̣ бан̃жахи сад̇зхи баривуд̇о бхуд̇д̇абаад̇араасо г̇анд̇хамаалавилзбзнажун̣н̣аани г̇ахзд̇ваа язна бхаг̇аваа д̇знубасан̇гами. сан̇г̇ахавад̇т̇уунийд̇и сан̇г̇ан̣ханагааран̣аани. д̇зхааханд̇и д̇зхи ахам̣. д̇ам̣ д̣̇аанзна сан̇г̇ан̣хаамийд̇и нан̇г̇алаб̣алиб̣ад̣̇д̣̇абхад̇д̇аб̣ийж̇аад̣̇ийни жзва г̇анд̇хамааламуулаад̣̇ийни жа д̣̇ад̇ваа сан̇г̇ан̣хаами. бзяяаваж̇ж̇знаад̇и амма, д̇аад̇а, бхаад̇ара, бхаг̇инийд̇иаад̣̇игзна ган̣н̣асукзна муд̣̇угзна бияаважанзна сан̇г̇ан̣хаами. ад̇т̇ажарияааяаад̇и ‘‘имасса д̣̇аанзна ваа бияаважанзна ваа гижжам̣ над̇т̇и, ад̇т̇ажарияааяа сан̇г̇ан̣хид̇аб̣б̣аяуд̇д̇аго аяа’’нд̇и н̃ад̇ваа уббаннагижжанид̇т̇аран̣асан̇каад̇ааяа ад̇т̇ажарияааяа сан̇г̇ан̣хаами. самаанад̇д̇ад̇ааяаад̇и ‘‘имасса д̣̇аанаад̣̇ийхи гижжам̣ над̇т̇и, самаанад̇д̇ад̇ааяа сан̇г̇ан̣хид̇аб̣б̣о аяа’’нд̇и згад̇о каад̣̇анабивананисаж̇ж̇аад̣̇ийхи ад̇д̇анаа самаанам̣ гад̇ваа сан̇г̇ан̣хаами. д̣̇алид̣̇д̣̇асса ко но д̇ат̇аа сод̇аб̣б̣ам̣ ман̃н̃анд̇ийд̇и д̣̇алид̣̇д̣̇асса гин̃жи д̣̇аад̇ум̣ ваа гаад̇ум̣ ваа асаггонд̇асса, яат̇аа д̣̇алид̣̇д̣̇асса но д̇ат̇аа сод̇аб̣б̣ам̣ ман̃н̃анд̇и, мама бана сод̇аб̣б̣ам̣ ман̃н̃анд̇и, д̣̇инноваад̣̇з д̇идтанд̇и, на мз анусаасаним̣ ад̇иггамид̇аб̣б̣ам̣ ман̃н̃анд̇и. яони ко д̇яааяанд̇и убааяо ко д̇з аяам̣. имзсу бана д̣̇вийсуби суд̇д̇зсу сад̇т̇аараа сийлажааг̇абан̃н̃аа миссагаа гат̇ид̇аад̇и взд̣̇ид̇аб̣б̣аа.
24. Catutthe pañcamattehi upāsakasatehīti sotāpannasakadāgāmīnaṃyeva ariyasāvakaupāsakānaṃ pañcahi satehi parivuto bhuttapātarāso gandhamālavilepenacuṇṇāni gahetvā yena bhagavā tenupasaṅkami. Saṅgahavatthūnīti saṅgaṇhanakāraṇāni. Tehāhanti tehi ahaṃ. Taṃ dānena saṅgaṇhāmīti naṅgalabalibaddabhattabījādīni ceva gandhamālamūlādīni ca datvā saṅgaṇhāmi. Peyyavajjenāti amma, tāta, bhātara, bhaginītiādikena kaṇṇasukhena mudukena piyavacanena saṅgaṇhāmi. Atthacariyāyāti ‘‘imassa dānena vā piyavacanena vā kiccaṃ natthi, atthacariyāya saṅgaṇhitabbayuttako aya’’nti ñatvā uppannakiccanittharaṇasaṅkhātāya atthacariyāya saṅgaṇhāmi. Samānattatāyāti ‘‘imassa dānādīhi kiccaṃ natthi, samānattatāya saṅgaṇhitabbo aya’’nti ekato khādanapivananisajjādīhi attanā samānaṃ katvā saṅgaṇhāmi. Daliddassa kho no tathā sotabbaṃ maññantīti daliddassa kiñci dātuṃ vā kātuṃ vā asakkontassa, yathā daliddassa no tathā sotabbaṃ maññanti, mama pana sotabbaṃ maññanti, dinnovāde tiṭṭhanti, na me anusāsaniṃ atikkamitabbaṃ maññanti. Yoni kho tyāyanti upāyo kho te ayaṃ. Imesu pana dvīsupi suttesu satthārā sīlacāgapaññā missakā kathitāti veditabbā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. д̣̇уд̇ияахад̇т̇агасуд̇д̇ам̣ • 4. Dutiyahatthakasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1-7. батамауг̇г̇асуд̇д̇аад̣̇иван̣н̣анаа • 1-7. Paṭhamauggasuttādivaṇṇanā
