| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၄. ဒုတိယဟတ္ထကသုတ္တဝဏ္ဏနာ
4. Dutiyahatthakasuttavaṇṇanā
၂၄. စတုတ္ထေ ပဉ္စမတ္တေဟိ ဥပာသကသတေဟီတိ သောတာပန္နသကဒာဂာမီနံယေဝ အရိယသာဝကဥပာသကာနံ ပဉ္စဟိ သတေဟိ ပရိဝုတော ဘုတ္တပာတရာသော ဂန္ဓမာလဝိလေပေနစုဏ္ဏာနိ ဂဟေတ္ဝာ ယေန ဘဂဝာ တေနုပသင္ကမိ။ သင္ဂဟဝတ္ထူနီတိ သင္ဂဏ္ဟနကာရဏာနိ။ တေဟာဟန္တိ တေဟိ အဟံ။ တံ ဒာနေန သင္ဂဏ္ဟာမီတိ နင္ဂလဗလိဗဒ္ဒဘတ္တဗီဇာဒီနိ စေဝ ဂန္ဓမာလမူလာဒီနိ စ ဒတ္ဝာ သင္ဂဏ္ဟာမိ။ ပေယ္ယဝဇ္ဇေနာတိ အမ္မ, တာတ, ဘာတရ, ဘဂိနီတိအာဒိကေန ကဏ္ဏသုခေန မုဒုကေန ပိယဝစနေန သင္ဂဏ္ဟာမိ။ အတ္ထစရိယာယာတိ ‘‘ဣမသ္သ ဒာနေန ဝာ ပိယဝစနေန ဝာ ကိစ္စံ နတ္ထိ, အတ္ထစရိယာယ သင္ဂဏ္ဟိတဗ္ဗယုတ္တကော အယ’’န္တိ ဉတ္ဝာ ဥပ္ပန္နကိစ္စနိတ္ထရဏသင္ခာတာယ အတ္ထစရိယာယ သင္ဂဏ္ဟာမိ။ သမာနတ္တတာယာတိ ‘‘ဣမသ္သ ဒာနာဒီဟိ ကိစ္စံ နတ္ထိ, သမာနတ္တတာယ သင္ဂဏ္ဟိတဗ္ဗော အယ’’န္တိ ဧကတော ခာဒနပိဝနနိသဇ္ဇာဒီဟိ အတ္တနာ သမာနံ ကတ္ဝာ သင္ဂဏ္ဟာမိ။ ဒလိဒ္ဒသ္သ ခော နော တထာ သောတဗ္ဗံ မညန္တီတိ ဒလိဒ္ဒသ္သ ကိဉ္စိ ဒာတုံ ဝာ ကာတုံ ဝာ အသက္ကောန္တသ္သ, ယထာ ဒလိဒ္ဒသ္သ နော တထာ သောတဗ္ဗံ မညန္တိ, မမ ပန သောတဗ္ဗံ မညန္တိ, ဒိန္နောဝာဒေ တိဋ္ဌန္တိ, န မေ အနုသာသနိံ အတိက္ကမိတဗ္ဗံ မညန္တိ။ ယောနိ ခော တ္ယာယန္တိ ဥပာယော ခော တေ အယံ။ ဣမေသု ပန ဒ္ဝီသုပိ သုတ္တေသု သတ္ထာရာ သီလစာဂပညာ မိသ္သကာ ကထိတာတိ ဝေဒိတဗ္ဗာ။
24. Catutthe pañcamattehi upāsakasatehīti sotāpannasakadāgāmīnaṃyeva ariyasāvakaupāsakānaṃ pañcahi satehi parivuto bhuttapātarāso gandhamālavilepenacuṇṇāni gahetvā yena bhagavā tenupasaṅkami. Saṅgahavatthūnīti saṅgaṇhanakāraṇāni. Tehāhanti tehi ahaṃ. Taṃ dānena saṅgaṇhāmīti naṅgalabalibaddabhattabījādīni ceva gandhamālamūlādīni ca datvā saṅgaṇhāmi. Peyyavajjenāti amma, tāta, bhātara, bhaginītiādikena kaṇṇasukhena mudukena piyavacanena saṅgaṇhāmi. Atthacariyāyāti ‘‘imassa dānena vā piyavacanena vā kiccaṃ natthi, atthacariyāya saṅgaṇhitabbayuttako aya’’nti ñatvā uppannakiccanittharaṇasaṅkhātāya atthacariyāya saṅgaṇhāmi. Samānattatāyāti ‘‘imassa dānādīhi kiccaṃ natthi, samānattatāya saṅgaṇhitabbo aya’’nti ekato khādanapivananisajjādīhi attanā samānaṃ katvā saṅgaṇhāmi. Daliddassa kho no tathā sotabbaṃ maññantīti daliddassa kiñci dātuṃ vā kātuṃ vā asakkontassa, yathā daliddassa no tathā sotabbaṃ maññanti, mama pana sotabbaṃ maññanti, dinnovāde tiṭṭhanti, na me anusāsaniṃ atikkamitabbaṃ maññanti. Yoni kho tyāyanti upāyo kho te ayaṃ. Imesu pana dvīsupi suttesu satthārā sīlacāgapaññā missakā kathitāti veditabbā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. ဒုတိယဟတ္ထကသုတ္တံ • 4. Dutiyahatthakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. ပဌမဥဂ္ဂသုတ္တာဒိဝဏ္ဏနာ • 1-7. Paṭhamauggasuttādivaṇṇanā
