| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযহত্থপাদোপমসুত্তং
10. Dutiyahatthapādopamasuttaṃ
২৩৭. ‘‘হত্থেসু, ভিক্খৰে, সতি আদাননিক্খেপনং হোতি; পাদেসু সতি অভিক্কমপটিক্কমো হোতি; পব্বেসু সতি সমিঞ্জনপসারণং হোতি; কুচ্ছিস্মিং সতি জিঘচ্ছা পিপাসা হোতি। এৰমেৰ খো, ভিক্খৰে, চক্খুস্মিং সতি চক্খুসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে॰… জিৰ্হায সতি…পে॰… মনস্মিং সতি মনোসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে॰…।
237. ‘‘Hatthesu, bhikkhave, sati ādānanikkhepanaṃ hoti; pādesu sati abhikkamapaṭikkamo hoti; pabbesu sati samiñjanapasāraṇaṃ hoti; kucchismiṃ sati jighacchā pipāsā hoti. Evameva kho, bhikkhave, cakkhusmiṃ sati cakkhusamphassapaccayā uppajjati ajjhattaṃ sukhaṃ dukkhaṃ…pe… jivhāya sati…pe… manasmiṃ sati manosamphassapaccayā uppajjati ajjhattaṃ sukhaṃ dukkhaṃ…pe….
‘‘হত্থেসু, ভিক্খৰে, অসতি আদাননিক্খেপনং ন হোতি; পাদেসু অসতি অভিক্কমপটিক্কমো ন হোতি; পব্বেসু অসতি সমিঞ্জনপসারণং ন হোতি; কুচ্ছিস্মিং অসতি জিঘচ্ছা পিপাসা ন হোতি। এৰমেৰ খো, ভিক্খৰে, চক্খুস্মিং অসতি চক্খুসম্ফস্সপচ্চযা নুপ্পজ্জতি অজ্ঝত্তং সুখং দুক্খং…পে॰… জিৰ্হায অসতি জিৰ্হাসম্ফস্সপচ্চযা নুপ্পজ্জতি…পে॰… মনস্মিং অসতি মনোসম্ফস্সপচ্চযা নুপ্পজ্জতি অজ্ঝত্তং সুখং দুক্খ’’ন্তি। দসমং।
‘‘Hatthesu, bhikkhave, asati ādānanikkhepanaṃ na hoti; pādesu asati abhikkamapaṭikkamo na hoti; pabbesu asati samiñjanapasāraṇaṃ na hoti; kucchismiṃ asati jighacchā pipāsā na hoti. Evameva kho, bhikkhave, cakkhusmiṃ asati cakkhusamphassapaccayā nuppajjati ajjhattaṃ sukhaṃ dukkhaṃ…pe… jivhāya asati jivhāsamphassapaccayā nuppajjati…pe… manasmiṃ asati manosamphassapaccayā nuppajjati ajjhattaṃ sukhaṃ dukkha’’nti. Dasamaṃ.
সমুদ্দৰগ্গো অট্ঠরসমো।
Samuddavaggo aṭṭharasamo.
তস্সুদ্দানং –
Tassuddānaṃ –
দ্ৰে সমুদ্দা বাল়িসিকো, খীররুক্খেন কোট্ঠিকো।
Dve samuddā bāḷisiko, khīrarukkhena koṭṭhiko;
কামভূ উদাযী চেৰ, আদিত্তেন চ অট্ঠমং।
Kāmabhū udāyī ceva, ādittena ca aṭṭhamaṃ;
হত্থপাদূপমা দ্ৰেতি, ৰগ্গো তেন পৰুচ্চতীতি॥
Hatthapādūpamā dveti, vaggo tena pavuccatīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯-১০. পঠমহত্থপাদোপমসুত্তাদিৰণ্ণনা • 9-10. Paṭhamahatthapādopamasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯-১০. পঠমহত্থপাদোপমসুত্তাদিৰণ্ণনা • 9-10. Paṭhamahatthapādopamasuttādivaṇṇanā
