| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. து³தியஇஸித³த்தஸுத்தங்
3. Dutiyaisidattasuttaṃ
345. ஏகங் ஸமயங் ஸம்ப³ஹுலா தே²ரா பி⁴க்கூ² மச்சி²காஸண்டே³ விஹரந்தி அம்பா³டகவனே. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி தே²ரே பி⁴க்கூ² ஏதத³வோச – ‘‘அதி⁴வாஸெந்து மே, ப⁴ந்தே தே²ரா, ஸ்வாதனாய ப⁴த்த’’ந்தி. அதி⁴வாஸேஸுங் கோ² தே²ரா பி⁴க்கூ² துண்ஹீபா⁴வேன. அத² கோ² சித்தோ க³ஹபதி தே²ரானங் பி⁴க்கூ²னங் அதி⁴வாஸனங் விதி³த்வா உட்டா²யாஸனா தே²ரே பி⁴க்கூ² அபி⁴வாதெ³த்வா பத³க்கி²ணங் கத்வா பக்காமி. அத² கோ² தே²ரா பி⁴க்கூ² தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன சித்தஸ்ஸ க³ஹபதிஸ்ஸ நிவேஸனங் தேனுபஸங்கமிங்ஸு; உபஸங்கமித்வா பஞ்ஞத்தே ஆஸனே நிஸீதி³ங்ஸு.
345. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘adhivāsentu me, bhante therā, svātanāya bhatta’’nti. Adhivāsesuṃ kho therā bhikkhū tuṇhībhāvena. Atha kho citto gahapati therānaṃ bhikkhūnaṃ adhivāsanaṃ viditvā uṭṭhāyāsanā there bhikkhū abhivādetvā padakkhiṇaṃ katvā pakkāmi. Atha kho therā bhikkhū tassā rattiyā accayena pubbaṇhasamayaṃ nivāsetvā pattacīvaramādāya yena cittassa gahapatissa nivesanaṃ tenupasaṅkamiṃsu; upasaṅkamitvā paññatte āsane nisīdiṃsu.
அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி ஆயஸ்மந்தங் தே²ரங் ஏதத³வோச – ‘‘யா இமா, ப⁴ந்தே தே²ர, அனேகவிஹிதா தி³ட்டி²யோ லோகே உப்பஜ்ஜந்தி – ‘ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தங் ஜீவங் தங் ஸரீரந்தி வா, அஞ்ஞங் ஜீவங் அஞ்ஞங் ஸரீரந்தி வா, ஹோதி ததா²க³தோ பரங் மரணாதி வா, ந ஹோதி ததா²க³தோ பரங் மரணாதி வா, ஹோதி ச ந ச ஹோதி ததா²க³தோ பரங் மரணாதி வா, நேவ ஹோதி ந ந ஹோதி ததா²க³தோ பரங் மரணா’தி வா. யானி சிமானி த்³வாஸட்டி² தி³ட்டி²க³தானி ப்³ரஹ்மஜாலே ப⁴ணிதானி; இமா நு கோ², ப⁴ந்தே, தி³ட்டி²யோ கிஸ்மிங் ஸதி ஹொந்தி, கிஸ்மிங் அஸதி ந ஹொந்தீ’’தி?
Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati āyasmantaṃ theraṃ etadavoca – ‘‘yā imā, bhante thera, anekavihitā diṭṭhiyo loke uppajjanti – ‘sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇā’ti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā nu kho, bhante, diṭṭhiyo kismiṃ sati honti, kismiṃ asati na hontī’’ti?
ஏவங் வுத்தே, ஆயஸ்மா தே²ரோ துண்ஹீ அஹோஸி. து³தியம்பி கோ² சித்தோ க³ஹபதி…பே॰… ததியம்பி கோ² சித்தோ க³ஹபதி ஆயஸ்மந்தங் தே²ரங் ஏதத³வோச – ‘‘யா இமா, ப⁴ந்தே தே²ர, அனேகவிஹிதா தி³ட்டி²யோ லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தங் ஜீவங் தங் ஸரீரந்தி வா, அஞ்ஞங் ஜீவங் அஞ்ஞங் ஸரீரந்தி வா, ஹோதி ததா²க³தோ பரங் மரணாதி வா, ந ஹோதி ததா²க³தோ பரங் மரணாதி வா, ஹோதி ச ந ச ஹோதி ததா²க³தோ பரங் மரணாதி வா, நேவ ஹோதி ந ந ஹோதி ததா²க³தோ பரங் மரணாதி வா. யானி சிமானி த்³வாஸட்டி² தி³ட்டி²க³தானி ப்³ரஹ்மஜாலே ப⁴ணிதானி; இமா நு கோ², ப⁴ந்தே, தி³ட்டி²யோ கிஸ்மிங் ஸதி ஹொந்தி, கிஸ்மிங் அஸதி ந ஹொந்தீ’’தி? ததியம்பி கோ² ஆயஸ்மா தே²ரோ துண்ஹீ அஹோஸி.
Evaṃ vutte, āyasmā thero tuṇhī ahosi. Dutiyampi kho citto gahapati…pe… tatiyampi kho citto gahapati āyasmantaṃ theraṃ etadavoca – ‘‘yā imā, bhante thera, anekavihitā diṭṭhiyo loke uppajjanti – sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā nu kho, bhante, diṭṭhiyo kismiṃ sati honti, kismiṃ asati na hontī’’ti? Tatiyampi kho āyasmā thero tuṇhī ahosi.
தேன கோ² பன ஸமயேன ஆயஸ்மா இஸித³த்தோ தஸ்மிங் பி⁴க்கு²ஸங்கே⁴ ஸப்³ப³னவகோ ஹோதி. அத² கோ² ஆயஸ்மா இஸித³த்தோ ஆயஸ்மந்தங் தே²ரங் ஏதத³வோச – ‘‘ப்³யாகரோமஹங், ப⁴ந்தே தே²ர, சித்தஸ்ஸ க³ஹபதினோ ஏதங் பஞ்ஹ’’ந்தி? ‘‘ப்³யாகரோஹி த்வங், ஆவுஸோ இஸித³த்த, சித்தஸ்ஸ க³ஹபதினோ ஏதங் பஞ்ஹ’’ந்தி. ‘‘ஏவஞ்ஹி த்வங், க³ஹபதி, புச்ச²ஸி – ‘யா இமா, ப⁴ந்தே தே²ர, அனேகவிஹிதா தி³ட்டி²யோ லோகே உப்பஜ்ஜந்தி – ஸஸ்ஸதோ லோகோதி வா…பே॰…; இமா நு கோ², ப⁴ந்தே, தி³ட்டி²யோ கிஸ்மிங் ஸதி ஹொந்தி, கிஸ்மிங் அஸதி ந ஹொந்தீ’’’தி? ‘‘ஏவங், ப⁴ந்தே’’. ‘‘யா இமா, க³ஹபதி, அனேகவிஹிதா தி³ட்டி²யோ லோகே உப்பஜ்ஜந்தி – ‘ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா அனந்தவா லோகோதி வா, தங் ஜீவங் தங் ஸரீரந்தி வா, அஞ்ஞங் ஜீவங் அஞ்ஞங் ஸரீரந்தி வா, ஹோதி ததா²க³தோ பரங் மரணாதி வா, ந ஹோதி ததா²க³தோ பரங் மரணாதி வா, ஹோதி ச ந ச ஹோதி ததா²க³தோ பரங் மரணாதி வா, நேவ ஹோதி ந ந ஹோதி ததா²க³தோ பரங் மரணாதி வா. யானி சிமானி த்³வாஸட்டி² தி³ட்டி²க³தானி ப்³ரஹ்மஜாலே ப⁴ணிதானி; இமா கோ², க³ஹபதி, தி³ட்டி²யோ ஸக்காயதி³ட்டி²யா ஸதி ஹொந்தி, ஸக்காயதி³ட்டி²யா அஸதி ந ஹொந்தீ’’’தி.
Tena kho pana samayena āyasmā isidatto tasmiṃ bhikkhusaṅghe sabbanavako hoti. Atha kho āyasmā isidatto āyasmantaṃ theraṃ etadavoca – ‘‘byākaromahaṃ, bhante thera, cittassa gahapatino etaṃ pañha’’nti? ‘‘Byākarohi tvaṃ, āvuso isidatta, cittassa gahapatino etaṃ pañha’’nti. ‘‘Evañhi tvaṃ, gahapati, pucchasi – ‘yā imā, bhante thera, anekavihitā diṭṭhiyo loke uppajjanti – sassato lokoti vā…pe…; imā nu kho, bhante, diṭṭhiyo kismiṃ sati honti, kismiṃ asati na hontī’’’ti? ‘‘Evaṃ, bhante’’. ‘‘Yā imā, gahapati, anekavihitā diṭṭhiyo loke uppajjanti – ‘sassato lokoti vā, asassato lokoti vā, antavā lokoti vā anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā kho, gahapati, diṭṭhiyo sakkāyadiṭṭhiyā sati honti, sakkāyadiṭṭhiyā asati na hontī’’’ti.
‘‘கத²ங் பன, ப⁴ந்தே, ஸக்காயதி³ட்டி² ஹோதீ’’தி? ‘‘இத⁴, க³ஹபதி, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி, ரூபவந்தங் வா அத்தானங், அத்தனி வா ரூபங், ரூபஸ்மிங் வா அத்தானங்; வேத³னங் அத்ததோ ஸமனுபஸ்ஸதி…பே॰… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங், அத்தனி வா விஞ்ஞாணங், விஞ்ஞாணஸ்மிங் வா அத்தானங். ஏவங் கோ², க³ஹபதி, ஸக்காயதி³ட்டி² ஹோதீ’’தி.
‘‘Kathaṃ pana, bhante, sakkāyadiṭṭhi hotī’’ti? ‘‘Idha, gahapati, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ, attani vā rūpaṃ, rūpasmiṃ vā attānaṃ; vedanaṃ attato samanupassati…pe… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Evaṃ kho, gahapati, sakkāyadiṭṭhi hotī’’ti.
‘‘கத²ங் பன, ப⁴ந்தே, ஸக்காயதி³ட்டி² ந ஹோதீ’’தி? ‘‘இத⁴, க³ஹபதி, ஸுதவா அரியஸாவகோ அரியானங் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ ஸப்புரிஸானங் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபங் அத்ததோ ஸமனுபஸ்ஸதி, ந ரூபவந்தங் வா அத்தானங், ந அத்தனி வா ரூபங், ந ரூபஸ்மிங் வா அத்தானங்; ந வேத³னங்… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி, ந விஞ்ஞாணவந்தங் வா அத்தானங், ந அத்தனி வா விஞ்ஞாணங், ந விஞ்ஞாணஸ்மிங் வா அத்தானங். ஏவங் கோ², க³ஹபதி, ஸக்காயதி³ட்டி² ந ஹோதீ’’தி.
‘‘Kathaṃ pana, bhante, sakkāyadiṭṭhi na hotī’’ti? ‘‘Idha, gahapati, sutavā ariyasāvako ariyānaṃ dassāvī ariyadhammassa kovido ariyadhamme suvinīto sappurisānaṃ dassāvī sappurisadhammassa kovido sappurisadhamme suvinīto na rūpaṃ attato samanupassati, na rūpavantaṃ vā attānaṃ, na attani vā rūpaṃ, na rūpasmiṃ vā attānaṃ; na vedanaṃ… na saññaṃ… na saṅkhāre… na viññāṇaṃ attato samanupassati, na viññāṇavantaṃ vā attānaṃ, na attani vā viññāṇaṃ, na viññāṇasmiṃ vā attānaṃ. Evaṃ kho, gahapati, sakkāyadiṭṭhi na hotī’’ti.
‘‘குதோ , ப⁴ந்தே, அய்யோ இஸித³த்தோ ஆக³ச்ச²தீ’’தி? ‘‘அவந்தியா கோ², க³ஹபதி, ஆக³ச்சா²மீ’’தி. ‘‘அத்தி², ப⁴ந்தே, அவந்தியா இஸித³த்தோ நாம குலபுத்தோ அம்ஹாகங் அதி³ட்ட²ஸஹாயோ பப்³ப³ஜிதோ? தி³ட்டோ² ஸோ ஆயஸ்மதா’’தி? ‘‘ஏவங், க³ஹபதீ’’தி. ‘‘கஹங் நு கோ² ஸோ, ப⁴ந்தே, ஆயஸ்மா ஏதரஹி விஹரதீ’’தி? ஏவங் வுத்தே, ஆயஸ்மா இஸித³த்தோ துண்ஹீ அஹோஸி. ‘‘அய்யோ நோ, ப⁴ந்தே, இஸித³த்தோ’’தி? ‘‘ஏவங், க³ஹபதீ’’தி. ‘‘அபி⁴ரமது, ப⁴ந்தே, அய்யோ இஸித³த்தோ மச்சி²காஸண்டே³. ரமணீயங் அம்பா³டகவனங். அஹங் அய்யஸ்ஸ இஸித³த்தஸ்ஸ உஸ்ஸுக்கங் கரிஸ்ஸாமி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரான’’ந்தி. ‘‘கல்யாணங் வுச்சதி, க³ஹபதீ’’தி.
‘‘Kuto , bhante, ayyo isidatto āgacchatī’’ti? ‘‘Avantiyā kho, gahapati, āgacchāmī’’ti. ‘‘Atthi, bhante, avantiyā isidatto nāma kulaputto amhākaṃ adiṭṭhasahāyo pabbajito? Diṭṭho so āyasmatā’’ti? ‘‘Evaṃ, gahapatī’’ti. ‘‘Kahaṃ nu kho so, bhante, āyasmā etarahi viharatī’’ti? Evaṃ vutte, āyasmā isidatto tuṇhī ahosi. ‘‘Ayyo no, bhante, isidatto’’ti? ‘‘Evaṃ, gahapatī’’ti. ‘‘Abhiramatu, bhante, ayyo isidatto macchikāsaṇḍe. Ramaṇīyaṃ ambāṭakavanaṃ. Ahaṃ ayyassa isidattassa ussukkaṃ karissāmi cīvarapiṇḍapātasenāsanagilānappaccayabhesajjaparikkhārāna’’nti. ‘‘Kalyāṇaṃ vuccati, gahapatī’’ti.
அத² கோ² சித்தோ க³ஹபதி ஆயஸ்மதோ இஸித³த்தஸ்ஸ பா⁴ஸிதங் அபி⁴னந்தி³த்வா அனுமோதி³த்வா தே²ரே பி⁴க்கூ² பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி. அத² கோ² தே²ரா பி⁴க்கூ² பு⁴த்தாவினோ ஓனீதபத்தபாணினோ உட்டா²யாஸனா பக்கமிங்ஸு. அத² கோ² ஆயஸ்மா தே²ரோ ஆயஸ்மந்தங் இஸித³த்தங் ஏதத³வோச – ‘‘ஸாது⁴ கோ² தங், ஆவுஸோ இஸித³த்த, ஏஸோ பஞ்ஹோ படிபா⁴ஸி. நேஸோ பஞ்ஹோ மங் படிபா⁴ஸி. தேனஹாவுஸோ இஸித³த்த, யதா³ அஞ்ஞதா²பி ஏவரூபோ பஞ்ஹோ ஆக³ச்செ²ய்ய, தஞ்ஞேவெத்த² படிபா⁴ஸெய்யா’’தி. அத² கோ² ஆயஸ்மா இஸித³த்தோ ஸேனாஸனங் ஸங்ஸாமெத்வா பத்தசீவரமாதா³ய மச்சி²காஸண்ட³ம்ஹா பக்காமி. யங் மச்சி²காஸண்ட³ம்ஹா பக்காமி, ததா² பக்கந்தோவ அஹோஸி, ந புன பச்சாக³ச்சீ²தி. ததியங்.
Atha kho citto gahapati āyasmato isidattassa bhāsitaṃ abhinanditvā anumoditvā there bhikkhū paṇītena khādanīyena bhojanīyena sahatthā santappesi sampavāresi. Atha kho therā bhikkhū bhuttāvino onītapattapāṇino uṭṭhāyāsanā pakkamiṃsu. Atha kho āyasmā thero āyasmantaṃ isidattaṃ etadavoca – ‘‘sādhu kho taṃ, āvuso isidatta, eso pañho paṭibhāsi. Neso pañho maṃ paṭibhāsi. Tenahāvuso isidatta, yadā aññathāpi evarūpo pañho āgaccheyya, taññevettha paṭibhāseyyā’’ti. Atha kho āyasmā isidatto senāsanaṃ saṃsāmetvā pattacīvaramādāya macchikāsaṇḍamhā pakkāmi. Yaṃ macchikāsaṇḍamhā pakkāmi, tathā pakkantova ahosi, na puna paccāgacchīti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. து³தியஇஸித³த்தஸுத்தவண்ணனா • 3. Dutiyaisidattasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. து³தியஇஸித³த்தஸுத்தவண்ணனா • 3. Dutiyaisidattasuttavaṇṇanā
