| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. দুতিযকালসুত্তং
7. Dutiyakālasuttaṃ
১৪৭. ‘‘চত্তারোমে, ভিক্খৰে, কালা সম্মা ভাৰিযমানা সম্মা অনুপরিৰত্তিযমানা অনুপুব্বেন আসৰানং খযং পাপেন্তি। কতমে চত্তারো? কালেন ধম্মস্সৰনং, কালেন ধম্মসাকচ্ছা, কালেন সম্মসনা, কালেন ৰিপস্সনা – ইমে খো, ভিক্খৰে, চত্তারো কালা সম্মা ভাৰিযমানা সম্মা অনুপরিৰত্তিযমানা অনুপুব্বেন আসৰানং খযং পাপেন্তি।
147. ‘‘Cattārome, bhikkhave, kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti. Katame cattāro? Kālena dhammassavanaṃ, kālena dhammasākacchā, kālena sammasanā, kālena vipassanā – ime kho, bhikkhave, cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpenti.
‘‘সেয্যথাপি, ভিক্খৰে, উপরিপব্বতে থুল্লফুসিতকে দেৰে ৰস্সন্তে তং উদকং যথানিন্নং পৰত্তমানং পব্বতকন্দরপদরসাখা পরিপূরেতি; পব্বতকন্দরপদরসাখা পরিপূরা কুসোব্ভে পরিপূরেন্তি; কুসোব্ভা পরিপূরা মহাসোব্ভে পরিপূরেন্তি; মহাসোব্ভা পরিপূরা কুন্নদিযো পরিপূরেন্তি; কুন্নদিযো পরিপূরা মহানদিযো পরিপূরেন্তি; মহানদিযো পরিপূরা সমুদ্দং 1 পরিপূরেন্তি। এৰমেৰং খো, ভিক্খৰে, ইমে চত্তারো কালা সম্মা ভাৰিযমানা সম্মা অনুপরিৰত্তিযমানা অনুপুব্বেন আসৰানং খযং পাপেন্তী’’তি। সত্তমং।
‘‘Seyyathāpi, bhikkhave, uparipabbate thullaphusitake deve vassante taṃ udakaṃ yathāninnaṃ pavattamānaṃ pabbatakandarapadarasākhā paripūreti; pabbatakandarapadarasākhā paripūrā kusobbhe paripūrenti; kusobbhā paripūrā mahāsobbhe paripūrenti; mahāsobbhā paripūrā kunnadiyo paripūrenti; kunnadiyo paripūrā mahānadiyo paripūrenti; mahānadiyo paripūrā samuddaṃ 2 paripūrenti. Evamevaṃ kho, bhikkhave, ime cattāro kālā sammā bhāviyamānā sammā anuparivattiyamānā anupubbena āsavānaṃ khayaṃ pāpentī’’ti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. দুতিযকালসুত্তৰণ্ণনা • 7. Dutiyakālasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-১০. দুতিযকালসুত্তাদিৰণ্ণনা • 7-10. Dutiyakālasuttādivaṇṇanā
