| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. দুতিযকামভূসুত্তং
6. Dutiyakāmabhūsuttaṃ
৩৪৮. একং সমযং আযস্মা কামভূ মচ্ছিকাসণ্ডে ৰিহরতি অম্বাটকৰনে। অথ খো চিত্তো গহপতি যেনাযস্মা কামভূ তেনুপসঙ্কমি; উপসঙ্কমিত্ৰা একমন্তং নিসীদি। একমন্তং নিসিন্নো খো চিত্তো গহপতি আযস্মন্তং কামভুং এতদৰোচ – ‘‘কতি নু খো, ভন্তে, সঙ্খারা’’তি? ‘‘তযো খো, গহপতি, সঙ্খারা – কাযসঙ্খারো, ৰচীসঙ্খারো, চিত্তসঙ্খারো’’তি। ‘‘সাধু, ভন্তে’’তি খো চিত্তো গহপতি আযস্মতো কামভুস্স ভাসিতং অভিনন্দিত্ৰা অনুমোদিত্ৰা আযস্মন্তং কামভুং উত্তরিং পঞ্হং অপুচ্ছি – ‘‘কতমো পন, ভন্তে, কাযসঙ্খারো, কতমো ৰচীসঙ্খারো, কতমো চিত্তসঙ্খারো’’তি? ‘‘অস্সাসপস্সাসা খো, গহপতি, কাযসঙ্খারো, ৰিতক্কৰিচারা ৰচীসঙ্খারো, সঞ্ঞা চ ৰেদনা চ চিত্তসঙ্খারো’’তি।
348. Ekaṃ samayaṃ āyasmā kāmabhū macchikāsaṇḍe viharati ambāṭakavane. Atha kho citto gahapati yenāyasmā kāmabhū tenupasaṅkami; upasaṅkamitvā ekamantaṃ nisīdi. Ekamantaṃ nisinno kho citto gahapati āyasmantaṃ kāmabhuṃ etadavoca – ‘‘kati nu kho, bhante, saṅkhārā’’ti? ‘‘Tayo kho, gahapati, saṅkhārā – kāyasaṅkhāro, vacīsaṅkhāro, cittasaṅkhāro’’ti. ‘‘Sādhu, bhante’’ti kho citto gahapati āyasmato kāmabhussa bhāsitaṃ abhinanditvā anumoditvā āyasmantaṃ kāmabhuṃ uttariṃ pañhaṃ apucchi – ‘‘katamo pana, bhante, kāyasaṅkhāro, katamo vacīsaṅkhāro, katamo cittasaṅkhāro’’ti? ‘‘Assāsapassāsā kho, gahapati, kāyasaṅkhāro, vitakkavicārā vacīsaṅkhāro, saññā ca vedanā ca cittasaṅkhāro’’ti.
‘‘সাধু, ভন্তে’’তি খো চিত্তো গহপতি…পে॰… উত্তরিং পঞ্হং অপুচ্ছি – ‘‘কস্মা পন, ভন্তে, অস্সাসপস্সাসা কাযসঙ্খারো, কস্মা ৰিতক্কৰিচারা ৰচীসঙ্খারো, কস্মা সঞ্ঞা চ ৰেদনা চ চিত্তসঙ্খারো’’তি? ‘‘অস্সাসপস্সাসা খো, গহপতি, কাযিকা। এতে ধম্মা কাযপ্পটিবদ্ধা, তস্মা অস্সাসপস্সাসা কাযসঙ্খারো। পুব্বে খো, গহপতি, ৰিতক্কেত্ৰা ৰিচারেত্ৰা পচ্ছা ৰাচং ভিন্দতি, তস্মা ৰিতক্কৰিচারা ৰচীসঙ্খারো। সঞ্ঞা চ ৰেদনা চ চেতসিকা। এতে ধম্মা চিত্তপ্পটিবদ্ধা, তস্মা সঞ্ঞা চ ৰেদনা চ চিত্তসঙ্খারো’’তি।
‘‘Sādhu, bhante’’ti kho citto gahapati…pe… uttariṃ pañhaṃ apucchi – ‘‘kasmā pana, bhante, assāsapassāsā kāyasaṅkhāro, kasmā vitakkavicārā vacīsaṅkhāro, kasmā saññā ca vedanā ca cittasaṅkhāro’’ti? ‘‘Assāsapassāsā kho, gahapati, kāyikā. Ete dhammā kāyappaṭibaddhā, tasmā assāsapassāsā kāyasaṅkhāro. Pubbe kho, gahapati, vitakketvā vicāretvā pacchā vācaṃ bhindati, tasmā vitakkavicārā vacīsaṅkhāro. Saññā ca vedanā ca cetasikā. Ete dhammā cittappaṭibaddhā, tasmā saññā ca vedanā ca cittasaṅkhāro’’ti.
সাধু…পে॰… উত্তরিং পঞ্হং অপুচ্ছি – ‘‘কথং পন, ভন্তে, সঞ্ঞাৰেদযিতনিরোধসমাপত্তি হোতী’’তি? ‘‘ন খো, গহপতি, সঞ্ঞাৰেদযিতনিরোধং সমাপজ্জন্তস্স ভিক্খুনো এৰং হোতি – ‘অহং সঞ্ঞাৰেদযিতনিরোধং সমাপজ্জিস্স’ন্তি ৰা ‘অহং সঞ্ঞাৰেদযিতনিরোধং সমাপজ্জামী’তি ৰা ‘অহং সঞ্ঞাৰেদযিতনিরোধং সমাপন্নো’তি ৰা । অথ খ্ৰস্স পুব্বেৰ তথা চিত্তং ভাৰিতং হোতি যং তং তথত্তায উপনেতী’’তি।
Sādhu…pe… uttariṃ pañhaṃ apucchi – ‘‘kathaṃ pana, bhante, saññāvedayitanirodhasamāpatti hotī’’ti? ‘‘Na kho, gahapati, saññāvedayitanirodhaṃ samāpajjantassa bhikkhuno evaṃ hoti – ‘ahaṃ saññāvedayitanirodhaṃ samāpajjissa’nti vā ‘ahaṃ saññāvedayitanirodhaṃ samāpajjāmī’ti vā ‘ahaṃ saññāvedayitanirodhaṃ samāpanno’ti vā . Atha khvassa pubbeva tathā cittaṃ bhāvitaṃ hoti yaṃ taṃ tathattāya upanetī’’ti.
সাধু …পে॰… উত্তরিং পঞ্হং অপুচ্ছি – ‘‘সঞ্ঞাৰেদযিতনিরোধং সমাপজ্জন্তস্স পন, ভন্তে , ভিক্খুনো কতমে ধম্মা পঠমং নিরুজ্ঝন্তি, যদি ৰা কাযসঙ্খারো, যদি ৰা ৰচীসঙ্খারো, যদি ৰা চিত্তসঙ্খারো’’তি? ‘‘সঞ্ঞাৰেদযিতনিরোধং সমাপজ্জন্তস্স খো, গহপতি, ভিক্খুনো ৰচীসঙ্খারো পঠমং নিরুজ্ঝতি, ততো কাযসঙ্খারো, ততো চিত্তসঙ্খারো’’তি।
Sādhu …pe… uttariṃ pañhaṃ apucchi – ‘‘saññāvedayitanirodhaṃ samāpajjantassa pana, bhante , bhikkhuno katame dhammā paṭhamaṃ nirujjhanti, yadi vā kāyasaṅkhāro, yadi vā vacīsaṅkhāro, yadi vā cittasaṅkhāro’’ti? ‘‘Saññāvedayitanirodhaṃ samāpajjantassa kho, gahapati, bhikkhuno vacīsaṅkhāro paṭhamaṃ nirujjhati, tato kāyasaṅkhāro, tato cittasaṅkhāro’’ti.
সাধু…পে॰… উত্তরিং পঞ্হং অপুচ্ছি – ‘‘য্ৰাযং, ভন্তে, মতো কালঙ্কতো, যো চাযং ভিক্খু সঞ্ঞাৰেদযিতনিরোধং সমাপন্নো, ইমেসং কিং নানাকরণ’’ন্তি? ‘‘য্ৰাযং গহপতি, মতো কালঙ্কতো তস্স কাযসঙ্খারো নিরুদ্ধো পটিপ্পস্সদ্ধো, ৰচীসঙ্খারো নিরুদ্ধো পটিপ্পস্সদ্ধো, চিত্তসঙ্খারো নিরুদ্ধো পটিপ্পস্সদ্ধো, আযু পরিক্খীণো, উস্মা ৰূপসন্তা, ইন্দ্রিযানি ৰিপরিভিন্নানি। যো চ খ্ৰাযং, গহপতি, ভিক্খু সঞ্ঞাৰেদযিতনিরোধং সমাপন্নো, তস্সপি কাযসঙ্খারো নিরুদ্ধো পটিপ্পস্সদ্ধো, ৰচীসঙ্খারো নিরুদ্ধো পটিপ্পস্সদ্ধো, চিত্তসঙ্খারো নিরুদ্ধো পটিপ্পস্সদ্ধো, আযু অপরিক্খীণো, উস্মা অৰূপসন্তা, ইন্দ্রিযানি ৰিপ্পসন্নানি। য্ৰাযং, গহপতি, মতো কালঙ্কতো, যো চাযং ভিক্খু সঞ্ঞাৰেদযিতনিরোধং সমাপন্নো, ইদং নেসং নানাকরণ’’ন্তি।
Sādhu…pe… uttariṃ pañhaṃ apucchi – ‘‘yvāyaṃ, bhante, mato kālaṅkato, yo cāyaṃ bhikkhu saññāvedayitanirodhaṃ samāpanno, imesaṃ kiṃ nānākaraṇa’’nti? ‘‘Yvāyaṃ gahapati, mato kālaṅkato tassa kāyasaṅkhāro niruddho paṭippassaddho, vacīsaṅkhāro niruddho paṭippassaddho, cittasaṅkhāro niruddho paṭippassaddho, āyu parikkhīṇo, usmā vūpasantā, indriyāni viparibhinnāni. Yo ca khvāyaṃ, gahapati, bhikkhu saññāvedayitanirodhaṃ samāpanno, tassapi kāyasaṅkhāro niruddho paṭippassaddho, vacīsaṅkhāro niruddho paṭippassaddho, cittasaṅkhāro niruddho paṭippassaddho, āyu aparikkhīṇo, usmā avūpasantā, indriyāni vippasannāni. Yvāyaṃ, gahapati, mato kālaṅkato, yo cāyaṃ bhikkhu saññāvedayitanirodhaṃ samāpanno, idaṃ nesaṃ nānākaraṇa’’nti.
সাধু…পে॰… উত্তরিং পঞ্হং অপুচ্ছি – ‘‘কথং পন, ভন্তে, সঞ্ঞাৰেদযিতনিরোধসমাপত্তিযা ৰুট্ঠানং হোতী’’তি? ‘‘ন খো, গহপতি, সঞ্ঞাৰেদযিতনিরোধসমাপত্তিযা ৰুট্ঠহন্তস্স ভিক্খুনো এৰং হোতি – ‘অহং সঞ্ঞাৰেদযিতনিরোধসমাপত্তিযা ৰুট্ঠহিস্স’ন্তি ৰা ‘অহং সঞ্ঞাৰেদযিতনিরোধসমাপত্তিযা ৰুট্ঠহামী’তি ৰা ‘অহং সঞ্ঞাৰেদযিতনিরোধসমাপত্তিযা ৰুট্ঠিতো’তি ৰা। অথ খ্ৰস্স পুব্বেৰ তথা চিত্তং ভাৰিতং হোতি, যং তং তথত্তায উপনেতী’’তি।
Sādhu…pe… uttariṃ pañhaṃ apucchi – ‘‘kathaṃ pana, bhante, saññāvedayitanirodhasamāpattiyā vuṭṭhānaṃ hotī’’ti? ‘‘Na kho, gahapati, saññāvedayitanirodhasamāpattiyā vuṭṭhahantassa bhikkhuno evaṃ hoti – ‘ahaṃ saññāvedayitanirodhasamāpattiyā vuṭṭhahissa’nti vā ‘ahaṃ saññāvedayitanirodhasamāpattiyā vuṭṭhahāmī’ti vā ‘ahaṃ saññāvedayitanirodhasamāpattiyā vuṭṭhito’ti vā. Atha khvassa pubbeva tathā cittaṃ bhāvitaṃ hoti, yaṃ taṃ tathattāya upanetī’’ti.
সাধু , ভন্তে…পে॰… উত্তরিং পঞ্হং অপুচ্ছি – ‘‘সঞ্ঞাৰেদযিতনিরোধসমাপত্তিযা ৰুট্ঠহন্তস্স পন, ভন্তে, ভিক্খুনো কতমে ধম্মা পঠমং উপ্পজ্জন্তি, যদি ৰা কাযসঙ্খারো, যদি ৰা ৰচীসঙ্খারো, যদি ৰা চিত্তসঙ্খারো’’তি? ‘‘সঞ্ঞাৰেদযিতনিরোধসমাপত্তিযা ৰুট্ঠহন্তস্স, গহপতি, ভিক্খুনো চিত্তসঙ্খারো পঠমং উপ্পজ্জতি, ততো কাযসঙ্খারো, ততো ৰচীসঙ্খারো’’তি।
Sādhu , bhante…pe… uttariṃ pañhaṃ apucchi – ‘‘saññāvedayitanirodhasamāpattiyā vuṭṭhahantassa pana, bhante, bhikkhuno katame dhammā paṭhamaṃ uppajjanti, yadi vā kāyasaṅkhāro, yadi vā vacīsaṅkhāro, yadi vā cittasaṅkhāro’’ti? ‘‘Saññāvedayitanirodhasamāpattiyā vuṭṭhahantassa, gahapati, bhikkhuno cittasaṅkhāro paṭhamaṃ uppajjati, tato kāyasaṅkhāro, tato vacīsaṅkhāro’’ti.
সাধু…পে॰… উত্তরিং পঞ্হং অপুচ্ছি – ‘‘সঞ্ঞাৰেদযিতনিরোধসমাপত্তিযা ৰুট্ঠিতং পন, ভন্তে , ভিক্খুং কতি ফস্সা ফুসন্তি’’? ‘‘সঞ্ঞাৰেদযিতনিরোধসমাপত্তিযা ৰুট্ঠিতং খো, গহপতি, ভিক্খুং তযো ফস্সা ফুসন্তি – সুঞ্ঞতো ফস্সো, অনিমিত্তো ফস্সো, অপ্পণিহিতো ফস্সো’’তি।
Sādhu…pe… uttariṃ pañhaṃ apucchi – ‘‘saññāvedayitanirodhasamāpattiyā vuṭṭhitaṃ pana, bhante , bhikkhuṃ kati phassā phusanti’’? ‘‘Saññāvedayitanirodhasamāpattiyā vuṭṭhitaṃ kho, gahapati, bhikkhuṃ tayo phassā phusanti – suññato phasso, animitto phasso, appaṇihito phasso’’ti.
সাধু…পে॰… উত্তরিং পঞ্হং অপুচ্ছি – ‘‘সঞ্ঞাৰেদযিতনিরোধসমাপত্তিযা ৰুট্ঠিতস্স পন, ভন্তে, ভিক্খুনো কিংনিন্নং চিত্তং হোতি, কিংপোণং, কিংপব্ভার’’ন্তি? ‘‘সঞ্ঞাৰেদযিতনিরোধসমাপত্তিযা ৰুট্ঠিতস্স খো, গহপতি, ভিক্খুনো ৰিৰেকনিন্নং চিত্তং হোতি ৰিৰেকপোণং ৰিৰেকপব্ভার’’ন্তি।
Sādhu…pe… uttariṃ pañhaṃ apucchi – ‘‘saññāvedayitanirodhasamāpattiyā vuṭṭhitassa pana, bhante, bhikkhuno kiṃninnaṃ cittaṃ hoti, kiṃpoṇaṃ, kiṃpabbhāra’’nti? ‘‘Saññāvedayitanirodhasamāpattiyā vuṭṭhitassa kho, gahapati, bhikkhuno vivekaninnaṃ cittaṃ hoti vivekapoṇaṃ vivekapabbhāra’’nti.
‘‘সাধু, ভন্তে’’তি খো চিত্তো গহপতি আযস্মতো কামভুস্স ভাসিতং অভিনন্দিত্ৰা অনুমোদিত্ৰা আযস্মন্তং কামভুং উত্তরিং পঞ্হং অপুচ্ছি – ‘‘সঞ্ঞাৰেদযিতনিরোধসমাপত্তিযা পন, ভন্তে, কতি ধম্মা বহূপকারা’’তি? ‘‘অদ্ধা খো ত্ৰং, গহপতি, যং পঠমং পুচ্ছিতব্বং তং পুচ্ছসি। অপি চ ত্যাহং ব্যাকরিস্সামি। সঞ্ঞাৰেদযিতনিরোধসমাপত্তিযা খো, গহপতি, দ্ৰে ধম্মা বহূপকারা – সমথো চ ৰিপস্সনা চা’’তি। ছট্ঠং।
‘‘Sādhu, bhante’’ti kho citto gahapati āyasmato kāmabhussa bhāsitaṃ abhinanditvā anumoditvā āyasmantaṃ kāmabhuṃ uttariṃ pañhaṃ apucchi – ‘‘saññāvedayitanirodhasamāpattiyā pana, bhante, kati dhammā bahūpakārā’’ti? ‘‘Addhā kho tvaṃ, gahapati, yaṃ paṭhamaṃ pucchitabbaṃ taṃ pucchasi. Api ca tyāhaṃ byākarissāmi. Saññāvedayitanirodhasamāpattiyā kho, gahapati, dve dhammā bahūpakārā – samatho ca vipassanā cā’’ti. Chaṭṭhaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. দুতিযকামভূসুত্তৰণ্ণনা • 6. Dutiyakāmabhūsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. দুতিযকামভূসুত্তৰণ্ণনা • 6. Dutiyakāmabhūsuttavaṇṇanā
