| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. து³தியகாமபூ⁴ஸுத்தவண்ணனா
6. Dutiyakāmabhūsuttavaṇṇanā
348. ச²ட்டே² கதி நு கோ² ப⁴ந்தே ஸங்கா²ராதி அயங் கிர, க³ஹபதி, நிரோத⁴ங் வலஞ்ஜேதி, தஸ்மா ‘‘நிரோத⁴பாத³கே ஸங்கா²ரே புச்சி²ஸ்ஸாமீ’’தி சிந்தெத்வா ஏவமாஹ. தே²ரோபிஸ்ஸ அதி⁴ப்பாயங் ஞத்வா புஞ்ஞாபி⁴ஸங்கா²ராதீ³ஸு அனேகேஸு ஸங்கா²ரேஸு விஜ்ஜமானேஸுபி காயஸங்கா²ராத³யோவ ஆசிக்க²ந்தோ தயோ கோ² க³ஹபதீதிஆதி³மாஹ. தத்த² காயப்படிப³த்³த⁴த்தா காயேன ஸங்க²ரீயதி நிப்³ப³த்தீயதீதி காயஸங்கா²ரோ. வாசாய ஸங்க²ரோதி நிப்³ப³த்தேதீதி வசீஸங்கா²ரோ. சித்தப்படிப³த்³த⁴த்தா சித்தேன ஸங்க²ரீயதி நிப்³ப³த்தீயதீதி சித்தஸங்கா²ரோ.
348. Chaṭṭhe kati nu kho bhante saṅkhārāti ayaṃ kira, gahapati, nirodhaṃ valañjeti, tasmā ‘‘nirodhapādake saṅkhāre pucchissāmī’’ti cintetvā evamāha. Theropissa adhippāyaṃ ñatvā puññābhisaṅkhārādīsu anekesu saṅkhāresu vijjamānesupi kāyasaṅkhārādayova ācikkhanto tayo kho gahapatītiādimāha. Tattha kāyappaṭibaddhattā kāyena saṅkharīyati nibbattīyatīti kāyasaṅkhāro. Vācāya saṅkharoti nibbattetīti vacīsaṅkhāro. Cittappaṭibaddhattā cittena saṅkharīyati nibbattīyatīti cittasaṅkhāro.
கதமோ பன ப⁴ந்தேதி இத⁴ கிங் புச்ச²தி? ‘‘இமே ஸங்கா²ரா அஞ்ஞமஞ்ஞங் மிஸ்ஸா ஆலுளிதா அவிபூ⁴தா து³த்³தீ³பனா. ததா² ஹி காயத்³வாரே ஆதா³னக்³க³ஹணமுஞ்சனசோபனானி பாபெத்வா உப்பன்னா அட்ட² காமாவசரகுஸலசேதனா த்³வாத³ஸ அகுஸலசேதனாதி ஏவங் குஸலாகுஸலா வீஸதி சேதனாபி, அஸ்ஸாஸபஸ்ஸாஸாபி காயஸங்கா²ரோத்வேவ வுச்சந்தி. வசீத்³வாரே ஹனுஸஞ்சோபனங் வசீபே⁴த³ங் பாபெத்வா உப்பன்னா வுத்தப்பகாராவ வீஸதி சேதனாபி விதக்கவிசாராபி வசீஸங்கா²ரோத்வேவ வுச்சந்தி. காயவசீத்³வாரேஸு சோபனங் அபத்வா ரஹோ நிஸின்னஸ்ஸ சிந்தயதோ உப்பன்னா குஸலாகுஸலா ஏகூனதிங்ஸசேதனாபி, ஸஞ்ஞா ச வேத³னா சாதி இமே த்³வே த⁴ம்மாபி சித்தஸங்கா²ரோத்வேவ வுச்சந்தி. ஏவங் இமே ஸங்கா²ரா அஞ்ஞமஞ்ஞங் மிஸ்ஸா ஆலுளிதா அவிபூ⁴தா து³த்³தீ³பனா, தே பாகடே விபூ⁴தே கத்வா கதா²பெஸ்ஸாமீ’’தி புச்சி².
Katamopana bhanteti idha kiṃ pucchati? ‘‘Ime saṅkhārā aññamaññaṃ missā āluḷitā avibhūtā duddīpanā. Tathā hi kāyadvāre ādānaggahaṇamuñcanacopanāni pāpetvā uppannā aṭṭha kāmāvacarakusalacetanā dvādasa akusalacetanāti evaṃ kusalākusalā vīsati cetanāpi, assāsapassāsāpi kāyasaṅkhārotveva vuccanti. Vacīdvāre hanusañcopanaṃ vacībhedaṃ pāpetvā uppannā vuttappakārāva vīsati cetanāpi vitakkavicārāpi vacīsaṅkhārotveva vuccanti. Kāyavacīdvāresu copanaṃ apatvā raho nisinnassa cintayato uppannā kusalākusalā ekūnatiṃsacetanāpi, saññā ca vedanā cāti ime dve dhammāpi cittasaṅkhārotveva vuccanti. Evaṃ ime saṅkhārā aññamaññaṃ missā āluḷitā avibhūtā duddīpanā, te pākaṭe vibhūte katvā kathāpessāmī’’ti pucchi.
கஸ்மா பன ப⁴ந்தேதி இத⁴ காயஸங்கா²ராதி³னாமஸ்ஸ பத³த்த²ங் புச்ச²தி. தஸ்ஸ விஸ்ஸஜ்ஜனே காயப்படிப³த்³தா⁴தி காயனிஸ்ஸிதா. காயே ஸதி ஹொந்தி, அஸதி ந ஹொந்தி. சித்தப்படிப³த்³தா⁴தி சித்தனிஸ்ஸிதா. சித்தே ஸதி ஹொந்தி, அஸதி ந ஹொந்தி.
Kasmā pana bhanteti idha kāyasaṅkhārādināmassa padatthaṃ pucchati. Tassa vissajjane kāyappaṭibaddhāti kāyanissitā. Kāye sati honti, asati na honti. Cittappaṭibaddhāti cittanissitā. Citte sati honti, asati na honti.
இதா³னி ‘‘கிங் நு கோ² ஏஸ ஸஞ்ஞாவேத³யிதனிரோத⁴ங் வலஞ்ஜேதி, நோ வலஞ்ஜேதி, சிண்ணவஸீ வா தத்த² நோ சிண்ணவஸீ’’தி ஜானநத்த²ங் புச்ச²ந்தோ கத²ங் பன ப⁴ந்தே ஸஞ்ஞாவேத³யிதனிரோத⁴ஸமாபத்தி ஹோதீதி ஆஹ. தஸ்ஸ விஸ்ஸஜ்ஜனே ஸமாபஜ்ஜிஸ்ஸந்தி வா ஸமாபஜ்ஜாமீதி வா பத³த்³வயேன நேவஸஞ்ஞானாஸஞ்ஞாயதனஸமாபத்திகாலோ கதி²தோ. ஸமாபன்னோதி பதே³ன அந்தோனிரோதோ⁴. ததா² புரிமேஹி த்³வீஹி பதே³ஹி ஸசித்தககாலோ கதி²தோ, பச்சி²மேன அசித்தககாலோ.
Idāni ‘‘kiṃ nu kho esa saññāvedayitanirodhaṃ valañjeti, no valañjeti, ciṇṇavasī vā tattha no ciṇṇavasī’’ti jānanatthaṃ pucchanto kathaṃ pana bhante saññāvedayitanirodhasamāpatti hotīti āha. Tassa vissajjane samāpajjissanti vā samāpajjāmīti vā padadvayena nevasaññānāsaññāyatanasamāpattikālo kathito. Samāpannoti padena antonirodho. Tathā purimehi dvīhi padehi sacittakakālo kathito, pacchimena acittakakālo.
புப்³பே³வ ததா² சித்தங் பா⁴விதங் ஹோதீதி நிரோத⁴ஸமாபத்திதோ புப்³பே³ அத்³தா⁴னபரிச்சே²த³காலேயேவ ‘‘எத்தகங் காலங் அசித்தகோ ப⁴விஸ்ஸாமீ’’தி அத்³தா⁴னபரிச்சே²த³ங் சித்தங் பா⁴விதங் ஹோதி. யங் தங் தத²த்தாய உபனேதீதி யங் பன ஏவங் பா⁴விதங் சித்தங், தங் புக்³க³லங் தத²த்தாய அசித்தகபா⁴வாய உபனேதி. வசீஸங்கா²ரோ பட²மங் நிருஜ்ஜ²தீதி ஸேஸஸங்கா²ரேஹி பட²மங் து³தியஜ்ஜா²னேயேவ நிருஜ்ஜ²தி. ததோ காயஸங்கா²ரோதி ததோ பரங் காயஸங்கா²ரோ சதுத்த²ஜ்ஜா²னே நிருஜ்ஜ²தி. ததோ சித்தஸங்கா²ரோதி ததோ பரங் சித்தஸங்கா²ரோ அந்தோனிரோதே⁴ நிருஜ்ஜ²தி. ஆயூதி ரூபஜீவிதிந்த்³ரியங். விபரிபி⁴ன்னானீதி உபஹதானி வினட்டா²னி.
Pubbeva tathā cittaṃ bhāvitaṃ hotīti nirodhasamāpattito pubbe addhānaparicchedakāleyeva ‘‘ettakaṃ kālaṃ acittako bhavissāmī’’ti addhānaparicchedaṃ cittaṃ bhāvitaṃ hoti. Yaṃ taṃ tathattāya upanetīti yaṃ pana evaṃ bhāvitaṃ cittaṃ, taṃ puggalaṃ tathattāya acittakabhāvāya upaneti. Vacīsaṅkhāro paṭhamaṃ nirujjhatīti sesasaṅkhārehi paṭhamaṃ dutiyajjhāneyeva nirujjhati. Tato kāyasaṅkhāroti tato paraṃ kāyasaṅkhāro catutthajjhāne nirujjhati. Tato cittasaṅkhāroti tato paraṃ cittasaṅkhāro antonirodhe nirujjhati. Āyūti rūpajīvitindriyaṃ. Viparibhinnānīti upahatāni vinaṭṭhāni.
தத்த² கேசி ‘‘நிரோத⁴ஸமாபன்னஸ்ஸ ‘சித்தஸங்கா²ரோ ச நிருத்³தோ⁴’தி வசனதோ சித்தங் அனிருத்³த⁴ங் ஹோதி, தஸ்மா ஸசித்தகாபி அயங் ஸமாபத்தீ’’தி வத³ந்தி. தே வத்தப்³பா³ – ‘‘வசீஸங்கா²ரோபிஸ்ஸ நிருத்³தோ⁴’’தி வசனதோ வாசா அனிருத்³தா⁴ ஹோதி, தஸ்மா நிரோத⁴ஸமாபன்னேன த⁴ம்மம்பி கதெ²ந்தேன ஸஜ்ஜா²யம்பி கரொந்தேன நிஸீதி³தப்³ப³ங் ஸியா. யோ சாயங் மதோ காலங்கதோ, தஸ்ஸாபி சித்தஸங்கா²ரோ நிருத்³தோ⁴தி வசனதோ சித்தங் அனிருத்³த⁴ங் ப⁴வெய்ய, தஸ்மா காலங்கதே மாதாபிதரோ வா அரஹந்தே வா ஜா²பெந்தேன ஆனந்தரியகம்மங் கதங் ப⁴வெய்ய. இதி ப்³யஞ்ஜனே அபி⁴னிவேஸங் அகத்வா ஆசரியானங் நயே ட²த்வா அத்தோ² உபபரிக்கி²தப்³போ³. அத்தோ² ஹி படிஸரணங், ந ப்³யஞ்ஜனங்.
Tattha keci ‘‘nirodhasamāpannassa ‘cittasaṅkhāro ca niruddho’ti vacanato cittaṃ aniruddhaṃ hoti, tasmā sacittakāpi ayaṃ samāpattī’’ti vadanti. Te vattabbā – ‘‘vacīsaṅkhāropissa niruddho’’ti vacanato vācā aniruddhā hoti, tasmā nirodhasamāpannena dhammampi kathentena sajjhāyampi karontena nisīditabbaṃ siyā. Yo cāyaṃ mato kālaṅkato, tassāpi cittasaṅkhāro niruddhoti vacanato cittaṃ aniruddhaṃ bhaveyya, tasmā kālaṅkate mātāpitaro vā arahante vā jhāpentena ānantariyakammaṃ kataṃ bhaveyya. Iti byañjane abhinivesaṃ akatvā ācariyānaṃ naye ṭhatvā attho upaparikkhitabbo. Attho hi paṭisaraṇaṃ, na byañjanaṃ.
இந்த்³ரியானி விப்பஸன்னானீதி கிரியமயபவத்தஸ்மிஞ்ஹி வத்தமானே ப³ஹித்³தா⁴ரம்மணேஸு பஸாதே³ க⁴ட்டெந்தேஸு இந்த்³ரியானி கிலமந்தி, உபஹதானி மக்கி²த்தானி விய ஹொந்தி வாதாதீ³ஹி உட்டி²தரஜேன சதுமஹாபதே² ட²பிதஆதா³ஸோ விய. யதா² பன த²விகாய பக்கி²பித்வா மஞ்ஜூஸாதீ³ஸு ட²பிதோ ஆதா³ஸோ அந்தோயேவ விரோசதி, ஏவங் நிரோத⁴ஸமாபன்னஸ்ஸ பி⁴க்கு²னோ அந்தோனிரோதே⁴ பஞ்ச பஸாதா³ அதிவிய விரோசந்தி. தேன வுத்தங் ‘‘இந்த்³ரியானி விப்பஸன்னானீ’’தி.
Indriyāni vippasannānīti kiriyamayapavattasmiñhi vattamāne bahiddhārammaṇesu pasāde ghaṭṭentesu indriyāni kilamanti, upahatāni makkhittāni viya honti vātādīhi uṭṭhitarajena catumahāpathe ṭhapitaādāso viya. Yathā pana thavikāya pakkhipitvā mañjūsādīsu ṭhapito ādāso antoyeva virocati, evaṃ nirodhasamāpannassa bhikkhuno antonirodhe pañca pasādā ativiya virocanti. Tena vuttaṃ ‘‘indriyāni vippasannānī’’ti.
வுட்ட²ஹிஸ்ஸந்தி வா வுட்ட²ஹாமீதி வா பத³த்³வயேன அந்தோனிரோத⁴காலோ கதி²தோ, வுட்டி²தோதி பதே³ன ப²லஸமாபத்திகாலோ. ததா² புரிமேஹி த்³வீஹி பதே³ஹி அசித்தககாலோ கதி²தோ, பச்சி²மேன ஸசித்தககாலோ. புப்³பே³வ ததா² சித்தங் பா⁴விதங் ஹோதீதி நிரோத⁴ஸமாபத்திதோ புப்³பே³ அத்³தா⁴னபரிச்சே²த³காலேயேவ ‘‘எத்தகங் காலங் அசித்தகோ ஹுத்வா ததோ பரங் ஸசித்தகோ ப⁴விஸ்ஸாமீ’’தி அத்³தா⁴னபரிச்சே²த³ங் சித்தங் பா⁴விதங் ஹோதி. யங் தங் தத²த்தாய உபனேதீதி யங் ஏவங் பா⁴விதங் சித்தங், தங் புக்³க³லங் தத²த்தாய ஸசித்தகபா⁴வாய உபனேதி. இதி ஹெட்டா² நிரோத⁴ஸமாபஜ்ஜன்னகாலோ க³ஹிதோ, இத⁴ நிரோத⁴தோ வுட்டா²னகாலோ.
Vuṭṭhahissanti vā vuṭṭhahāmīti vā padadvayena antonirodhakālo kathito, vuṭṭhitoti padena phalasamāpattikālo. Tathā purimehi dvīhi padehi acittakakālo kathito, pacchimena sacittakakālo. Pubbeva tathā cittaṃ bhāvitaṃ hotīti nirodhasamāpattito pubbe addhānaparicchedakāleyeva ‘‘ettakaṃ kālaṃ acittako hutvā tato paraṃ sacittako bhavissāmī’’ti addhānaparicchedaṃ cittaṃ bhāvitaṃ hoti. Yaṃ taṃ tathattāya upanetīti yaṃ evaṃ bhāvitaṃ cittaṃ, taṃ puggalaṃ tathattāya sacittakabhāvāya upaneti. Iti heṭṭhā nirodhasamāpajjannakālo gahito, idha nirodhato vuṭṭhānakālo.
இதா³னி நிரோத⁴கத²ங் கதே²துங் காலோதி நிரோத⁴கதா² கதே²தப்³பா³ ஸியா. ஸா பனேஸா ‘‘த்³வீஹி ப³லேஹி ஸமன்னாக³தத்தா தயோ ச ஸங்கா²ரானங் படிபஸ்ஸத்³தி⁴யா ஸோளஸஹி ஞாணசரியாஹி நவஹி ஸமாதி⁴சரியாஹி வஸீபா⁴வதாபஞ்ஞா நிரோத⁴ஸமாபத்தியங் ஞாண’’ந்தி மாதிகங் ட²பெத்வா ஸப்³பா³காரேன விஸுத்³தி⁴மக்³கே³ கதி²தா, தஸ்மா தத்த² கதி²தனயேனேவ க³ஹேதப்³பா³. கோ பனாயங் நிரோதோ⁴ நாம? சதுன்னங் க²ந்தா⁴னங் படிஸங்கா² அப்பவத்தி. அத² கிமத்த²மேதங் ஸமாபஜ்ஜந்தீதி? ஸங்கா²ரானங் பவத்தே உக்கண்டி²தா ஸத்தாஹங் அசித்தகா ஹுத்வா ஸுக²ங் விஹரிஸ்ஸாம, தி³ட்ட²த⁴ம்மனிப்³பா³னங் நாமேதங் யதி³த³ங் நிரோதோ⁴தி ஏதத³த்த²ங் ஸமாபஜ்ஜந்தி.
Idāni nirodhakathaṃ kathetuṃ kāloti nirodhakathā kathetabbā siyā. Sā panesā ‘‘dvīhi balehi samannāgatattā tayo ca saṅkhārānaṃ paṭipassaddhiyā soḷasahi ñāṇacariyāhi navahi samādhicariyāhi vasībhāvatāpaññā nirodhasamāpattiyaṃ ñāṇa’’nti mātikaṃ ṭhapetvā sabbākārena visuddhimagge kathitā, tasmā tattha kathitanayeneva gahetabbā. Ko panāyaṃ nirodho nāma? Catunnaṃ khandhānaṃ paṭisaṅkhā appavatti. Atha kimatthametaṃ samāpajjantīti? Saṅkhārānaṃ pavatte ukkaṇṭhitā sattāhaṃ acittakā hutvā sukhaṃ viharissāma, diṭṭhadhammanibbānaṃ nāmetaṃ yadidaṃ nirodhoti etadatthaṃ samāpajjanti.
சித்தஸங்கா²ரோ பட²மங் உப்பஜ்ஜதீதி நிரோதா⁴ வுட்ட²ஹந்தஸ்ஸ ஹி ப²லஸமாபத்திசித்தங் பட²மங் உப்பஜ்ஜதி. தங்ஸம்பயுத்தங் ஸஞ்ஞஞ்ச வேத³னஞ்ச ஸந்தா⁴ய ‘‘சித்தஸங்கா²ரோ பட²மங் உப்பஜ்ஜதீ’’தி ஆஹ. ததோ காயஸங்கா²ரோதி ததோ பரங் ப⁴வங்க³ஸமயே காயஸங்கா²ரோ உப்பஜ்ஜதி.
Cittasaṅkhāro paṭhamaṃ uppajjatīti nirodhā vuṭṭhahantassa hi phalasamāpatticittaṃ paṭhamaṃ uppajjati. Taṃsampayuttaṃ saññañca vedanañca sandhāya ‘‘cittasaṅkhāro paṭhamaṃ uppajjatī’’ti āha. Tato kāyasaṅkhāroti tato paraṃ bhavaṅgasamaye kāyasaṅkhāro uppajjati.
கிங் பன ப²லஸமாபத்தி அஸ்ஸாஸபஸ்ஸாஸே ந ஸமுட்டா²பேதீதி? ஸமுட்டா²பேதி. இமஸ்ஸ பன சதுத்த²ஜ்ஜா²னிகா ப²லஸமாபத்தி, ஸா ந ஸமுட்டா²பேதி. கிங் வா ஏதேன? ப²லஸமாபத்தி பட²மஜ்ஜா²னிகா வா ஹோது து³தியததியசதுத்த²ஜ்ஜா²னிகா வா, ஸந்தஸமாபத்திதோ வுட்டி²தஸ்ஸ பி⁴க்கு²னோ அஸ்ஸாஸபஸ்ஸாஸா அப்³போ³ஹாரிகா ஹொந்தி, தேஸங் அப்³போ³ஹாரிகபா⁴வோ ஸஞ்ஜீவத்தே²ரவத்து²னா வேதி³தப்³போ³. ஸஞ்ஜீவத்தே²ரஸ்ஸ ஹி ஸமாபத்திதோ வுட்டா²ய கிங்ஸுகபுப்ப²ஸதி³ஸே வீதச்சிதங்கா³ரே மத்³த³மானஸ்ஸ க³ச்ச²தோ சீவரே அங்ஸுமத்தம்பி ந ஜா²யி, உஸ்மாகாரமத்தம்பி நாஹோஸி. ஸமாபத்திப³லங் நாமேதந்தி வத³ந்தி. ஏவமேவ ஸந்தாய ப²லஸமாபத்தியா வுட்டி²தஸ்ஸ பி⁴க்கு²னோ அஸ்ஸாஸபஸ்ஸாஸா அப்³போ³ஹாரிகா ஹொந்தீதி ப⁴வங்க³ஸமயேனேவேதங் கதி²தந்தி வேதி³தப்³ப³ங்.
Kiṃ pana phalasamāpatti assāsapassāse na samuṭṭhāpetīti? Samuṭṭhāpeti. Imassa pana catutthajjhānikā phalasamāpatti, sā na samuṭṭhāpeti. Kiṃ vā etena? Phalasamāpatti paṭhamajjhānikā vā hotu dutiyatatiyacatutthajjhānikā vā, santasamāpattito vuṭṭhitassa bhikkhuno assāsapassāsā abbohārikā honti, tesaṃ abbohārikabhāvo sañjīvattheravatthunā veditabbo. Sañjīvattherassa hi samāpattito vuṭṭhāya kiṃsukapupphasadise vītaccitaṅgāre maddamānassa gacchato cīvare aṃsumattampi na jhāyi, usmākāramattampi nāhosi. Samāpattibalaṃ nāmetanti vadanti. Evameva santāya phalasamāpattiyā vuṭṭhitassa bhikkhuno assāsapassāsā abbohārikā hontīti bhavaṅgasamayenevetaṃ kathitanti veditabbaṃ.
ததோ வசீஸங்கா²ரோதி ததோ பரங் கிரியமயபவத்தவலஞ்ஜனகாலே வசீஸங்கா²ரோ உப்பஜ்ஜதி. கிங் ப⁴வங்க³ங் விதக்கவிசாரே ந ஸமுட்டா²பேதீதி? ஸமுட்டா²பேதி. தங்ஸமுட்டா²னா பன விதக்கவிசாரா வாசங் அபி⁴ஸங்கா²துங் ந ஸக்கொந்தீதி கிரியமயபவத்தவலஞ்ஜனகாலேனேவேதங் கதி²தங்.
Tatovacīsaṅkhāroti tato paraṃ kiriyamayapavattavalañjanakāle vacīsaṅkhāro uppajjati. Kiṃ bhavaṅgaṃ vitakkavicāre na samuṭṭhāpetīti? Samuṭṭhāpeti. Taṃsamuṭṭhānā pana vitakkavicārā vācaṃ abhisaṅkhātuṃ na sakkontīti kiriyamayapavattavalañjanakālenevetaṃ kathitaṃ.
ஸுஞ்ஞதோ ப²ஸ்ஸோதிஆத³யோ ஸகு³ணேனாபி ஆரம்மணேனாபி கதே²தப்³பா³. ஸகு³ணேன தாவ ஸுஞ்ஞதா நாம ப²லஸமாபத்தி, தாய ஸஹஜாதப²ஸ்ஸங் ஸந்தா⁴ய ‘‘ஸுஞ்ஞதோ ப²ஸ்ஸோ’’தி வுத்தங். அனிமித்தப்பணிஹிதேஸுபி ஏஸேவ நயோ. ஆரம்மணேன பன நிப்³பா³னங் ராகா³தீ³ஹி ஸுஞ்ஞத்தா ஸுஞ்ஞதா நாம, ராக³னிமித்தாதீ³னங் அபா⁴வா அனிமித்தங், ராக³தோ³ஸமோஹப்பணிதீ⁴னங் அபா⁴வா அப்பணிஹிதங், ஸுஞ்ஞதங் நிப்³பா³னங் ஆரம்மணங் கத்வா உப்பன்னப²லஸமாபத்திஸம்ப²ஸ்ஸோ ஸுஞ்ஞதோ நாம. அனிமித்தப்பணிஹிதேஸுபி ஏஸேவ நயோ.
Suññato phassotiādayo saguṇenāpi ārammaṇenāpi kathetabbā. Saguṇena tāva suññatā nāma phalasamāpatti, tāya sahajātaphassaṃ sandhāya ‘‘suññato phasso’’ti vuttaṃ. Animittappaṇihitesupi eseva nayo. Ārammaṇena pana nibbānaṃ rāgādīhi suññattā suññatā nāma, rāganimittādīnaṃ abhāvā animittaṃ, rāgadosamohappaṇidhīnaṃ abhāvā appaṇihitaṃ, suññataṃ nibbānaṃ ārammaṇaṃ katvā uppannaphalasamāpattisamphasso suññato nāma. Animittappaṇihitesupi eseva nayo.
அபரா ஆக³மனியகதா² நாம ஹோதி. ஸுஞ்ஞதஅனிமித்தஅப்பணிஹிதாதி ஹி விபஸ்ஸனாபி வுச்சதி. தத்த² யோ பி⁴க்கு² ஸங்கா²ரே அனிச்சதோ பரிக்³க³ஹெத்வா அனிச்சதோ தி³ஸ்வா அனிச்சதோ வுட்டா²தி, தஸ்ஸ வுட்டா²னகா³மினிவிபஸ்ஸனா அனிமித்தா நாம ஹோதி. யோ து³க்க²தோ பரிக்³க³ஹெத்வா து³க்க²தோ தி³ஸ்வா து³க்க²தோ வுட்டா²தி, தஸ்ஸ அப்பணிஹிதா நாம. யோ அனத்ததோ பரிக்³க³ஹெத்வா அனத்ததோ தி³ஸ்வா அனத்ததோ வுட்டா²தி, தஸ்ஸ ஸுஞ்ஞதா நாம. தத்த² அனிமித்தவிபஸ்ஸனாய மக்³கோ³ அனிமித்தோ நாம, அனிமித்தமக்³க³ஸ்ஸ ப²லங் அனிமித்தங் நாம, அனிமித்தப²லஸமாபத்திஸஹஜாதே ப²ஸ்ஸே பு²ஸந்தே ‘‘அனிமித்தோ ப²ஸ்ஸோ பு²ஸதீ’’தி வுச்சதி. அப்பணிஹிதஸுஞ்ஞதேஸுபி ஏஸேவ நயோ. ஆக³மனியேன கதி²தே பன ஸுஞ்ஞதோ வா ப²ஸ்ஸோ அனிமித்தோ வா ப²ஸ்ஸோ அப்பணிஹிதோ வா ப²ஸ்ஸோதி விகப்போ ஆபஜ்ஜெய்ய, தஸ்மா ஸகு³ணேன சேவ ஆரம்மணேன ச கதே²தப்³ப³ங். ஏவஞ்ஹி தயோ ப²ஸ்ஸா பு²ஸந்தீதி ஸமேதி.
Aparā āgamaniyakathā nāma hoti. Suññataanimittaappaṇihitāti hi vipassanāpi vuccati. Tattha yo bhikkhu saṅkhāre aniccato pariggahetvā aniccato disvā aniccato vuṭṭhāti, tassa vuṭṭhānagāminivipassanā animittā nāma hoti. Yo dukkhato pariggahetvā dukkhato disvā dukkhato vuṭṭhāti, tassa appaṇihitā nāma. Yo anattato pariggahetvā anattato disvā anattato vuṭṭhāti, tassa suññatā nāma. Tattha animittavipassanāya maggo animitto nāma, animittamaggassa phalaṃ animittaṃ nāma, animittaphalasamāpattisahajāte phasse phusante ‘‘animitto phasso phusatī’’ti vuccati. Appaṇihitasuññatesupi eseva nayo. Āgamaniyena kathite pana suññato vā phasso animitto vā phasso appaṇihito vā phassoti vikappo āpajjeyya, tasmā saguṇena ceva ārammaṇena ca kathetabbaṃ. Evañhi tayo phassā phusantīti sameti.
விவேகனின்னந்திஆதீ³ஸு நிப்³பா³னங் விவேகோ நாம. தஸ்மிங் விவேகே நின்னங் ஓனதந்தி விவேகனின்னங். விவேகபோணந்தி அஞ்ஞதோ அக³ந்த்வா யேன விவேகோ, தேன வங்கங் விய ஹுத்வா டி²தந்தி விவேகபோணங். யேன விவேகோ, தேன பதமானங் விய டி²தந்தி விவேகபப்³பா⁴ரங்.
Vivekaninnantiādīsu nibbānaṃ viveko nāma. Tasmiṃ viveke ninnaṃ onatanti vivekaninnaṃ. Vivekapoṇanti aññato agantvā yena viveko, tena vaṅkaṃ viya hutvā ṭhitanti vivekapoṇaṃ. Yena viveko, tena patamānaṃ viya ṭhitanti vivekapabbhāraṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. து³தியகாமபூ⁴ஸுத்தங் • 6. Dutiyakāmabhūsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. து³தியகாமபூ⁴ஸுத்தவண்ணனா • 6. Dutiyakāmabhūsuttavaṇṇanā
