| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༦. དུཏིཡཀཱམབྷཱུསུཏྟཝཎྞནཱ
6. Dutiyakāmabhūsuttavaṇṇanā
༣༤༨. ནིརོདྷཾ ཝལཉྫེཏི ཨནཱགཱམིབྷཱཝཏོ། ཨིམེ སངྑཱརཱཏི ཨིམེ ‘‘ཀཱཡསངྑཱརོ, ཝཙཱིསངྑཱརོ, ཙིཏྟསངྑཱརོ’’ཏི ཝུཙྩམཱནཱ ཏཡོ སངྑཱརཱ། སདྡཏོཔི, ཨཏྠཏོཔི ཨཉྙམཉྙཾ མིསྶཱ, ཏཏོ ཨེཝ ཨཱལུལི༹ཏཱ ཨཱཀུལཱ, ཨཝིབྷཱུཏཱ དུབྦིབྷཱཝནཱ, དུདྡཱིཔནཱ ཨསངྐརཏོ དཱིཔེཏུཾ དུཀྐརཱ། ཏཐཱ ཧི ཀུསལཙེཏནཱ ཨེཝ ‘‘ཀཱཡསངྑཱརོ’’ཏིཔི ཝུཙྩཏི, ‘‘ཝཙཱིསངྑཱརོ’’ཏིཔི, ‘‘ཙིཏྟསངྑཱརོ’’ཏིཔི། ཨསྶཱསཔསྶཱསཱཔི ཀཏྠཙི ‘‘ཀཱཡསངྑཱརོ’’ཏི, ཝིཏཀྐཝིཙཱརཱཔི ‘‘ཝཙཱིསངྑཱརོ’’ཏི ཝུཙྩནྟི, སཉྙཱཝེདནཱཔི ‘‘ཙིཏྟསངྑཱརོ’’ཏི ཝུཙྩནྟི། ཏེན ཝུཏྟཾ ‘‘ཏཐཱ ཧཱི’’ཏིཨཱདི། ཏཏྠ ཨཱཀཌྜྷིཏྭཱ གཧཎཾ ཨཱདཱནཾ, སམྤཏྟསྶ ཧཏྠེ ཀརཎཾ གཧཎཾ, གཧིཏསྶ ཝིསྶཛྫནཾ མུཉྩནཾ, ཕནྡནཾ ཙོཔནཾ པཱཔེཏྭཱ ནིཔྥཱདེཏྭཱ། ཧནུསཉྩོཔནནྟི ཀཱཡཝིཉྙཏྟིཝསེན པུབྦབྷཱགེ ཧནུསཉྩོཔནཾ ཀཏྭཱ། ཨེཝཉྷི ཝཙཱིབྷེདཀརཎཾ། ཨེཝཾ ཨིམེཏིཨཱདི ཡཐཱཝུཏྟསྶ ཨཏྠསྶ ནིགམནཾ།
348.Nirodhaṃvalañjeti anāgāmibhāvato. Ime saṅkhārāti ime ‘‘kāyasaṅkhāro, vacīsaṅkhāro, cittasaṅkhāro’’ti vuccamānā tayo saṅkhārā. Saddatopi, atthatopi aññamaññaṃ missā, tato eva āluḷitā ākulā, avibhūtā dubbibhāvanā, duddīpanā asaṅkarato dīpetuṃ dukkarā. Tathā hi kusalacetanā eva ‘‘kāyasaṅkhāro’’tipi vuccati, ‘‘vacīsaṅkhāro’’tipi, ‘‘cittasaṅkhāro’’tipi. Assāsapassāsāpi katthaci ‘‘kāyasaṅkhāro’’ti, vitakkavicārāpi ‘‘vacīsaṅkhāro’’ti vuccanti, saññāvedanāpi ‘‘cittasaṅkhāro’’ti vuccanti. Tena vuttaṃ ‘‘tathā hī’’tiādi. Tattha ākaḍḍhitvā gahaṇaṃ ādānaṃ, sampattassa hatthe karaṇaṃ gahaṇaṃ, gahitassa vissajjanaṃ muñcanaṃ, phandanaṃ copanaṃ pāpetvā nipphādetvā. Hanusañcopananti kāyaviññattivasena pubbabhāge hanusañcopanaṃ katvā. Evañhi vacībhedakaraṇaṃ. Evaṃ imetiādi yathāvuttassa atthassa nigamanaṃ.
པདཏྠཾ པུཙྪཏི ཨིཏརསངྑཱརེཧི པདཏྠཏོ ཝིསེསཾ ཀཐཱཔེསྶཱམཱིཏི། ཀཱཡནིསྶིཏཱཏི ཨེཏྠ ཀཱཡནིསྶིཏཏཱ ཙ ནེསཾ ཏབྦྷཱཝབྷཱཝིཏཱཡ ཝེདིཏབྦཱ, ན ཀཱཡསྶ ནིསྶཡཔཙྩཡཏཱཝསེནཱཏི དསྶེནྟོ ‘‘ཀཱཡེ སཏི ཧོནྟི, ཨསཏི ན ཧོནྟཱི’’ཏི ཨཱཧ། ཀཱཡོཏི ཙེཏྠ ཀརཛཀཱཡོ དཊྛབྦོ། ཙིཏྟནིསྶིཏཱཏི ཙིཏྟཾ ནིསྶཱཡ ཏཾ ནིསྶཡཔཙྩཡབྷཱུཏཾ ལབྷིཏྭཱ ཨུཔྤནྣཱ།
Padatthaṃ pucchati itarasaṅkhārehi padatthato visesaṃ kathāpessāmīti. Kāyanissitāti ettha kāyanissitatā ca nesaṃ tabbhāvabhāvitāya veditabbā, na kāyassa nissayapaccayatāvasenāti dassento ‘‘kāye sati honti, asati na hontī’’ti āha. Kāyoti cettha karajakāyo daṭṭhabbo. Cittanissitāti cittaṃ nissāya taṃ nissayapaccayabhūtaṃ labhitvā uppannā.
‘‘སམཱཔཛྫཱམཱི’’ཏི པདསྶ སམཱིཔེ ཝུཙྩམཱནཾ ‘‘སམཱཔཛྫིསྶ’’ནྟི པདཾ ཨཱསནྣཱནཱགཏཀཱལཝཱཙཱི ཨེཝ བྷཝིཏུཾ ཡུཏྟཾ, ན ཨིཏརནྟི ཨཱཧ – ‘‘པདདྭཡེན ནེཝསཉྙཱནཱསཉྙཱཡཏནསམཱཔཏྟིཀཱལོ ཀཐིཏོ’’ཏི། ཏཡིདཾ ཏསྶ ཏཐཱ ཝཏྟབྦཏཱཡ ཝུཏྟཾ, ན པན ཏསྶ ཏཐཱ ཙིཏྟཔཝཏྟིསམྦྷཝཏོ། སམཱཔནྣེཔི ཨེསེཝ ནཡོ། པུརིམེཧཱིཏི ‘‘སམཱཔཛྫིསྶཾ སམཱཔཛྫཱམཱི’’ཏི དྭཱིཧི པདེཧི། པཙྪིམེནཱཏི ‘‘སམཱཔནྣོ’’ཏི པདེན།
‘‘Samāpajjāmī’’ti padassa samīpe vuccamānaṃ ‘‘samāpajjissa’’nti padaṃ āsannānāgatakālavācī eva bhavituṃ yuttaṃ, na itaranti āha – ‘‘padadvayena nevasaññānāsaññāyatanasamāpattikālo kathito’’ti. Tayidaṃ tassa tathā vattabbatāya vuttaṃ, na pana tassa tathā cittapavattisambhavato. Samāpannepi eseva nayo. Purimehīti ‘‘samāpajjissaṃ samāpajjāmī’’ti dvīhi padehi. Pacchimenāti ‘‘samāpanno’’ti padena.
བྷཱཝིཏཾ ཧོཏི ཨུཔྤཱདིཏཾ ཧོཏི ནིརོདྷསམཱཔནྣཏྠཱཡ། ཨནུཔུབྦསམཱཔཏྟིསམཱཔཛྫནསངྑཱཏཱཡ ནིརོདྷབྷཱཝནཱཡ ཏཾ ཙིཏྟཾ བྷཱཝིཏཾ ཧོཏི། ཏེནཱཧ ‘‘ཡཾ ཏ’’ནྟིཨཱདི། དུཏིཡཛ྄ཛྷཱནེཡེཝཱཏི དུཏིཡཛ྄ཛྷཱནཀྑཎེ ནིརུཛ྄ཛྷཏི། ཏཏྠ ཨནུཔྤཛྫནཏོ ཨནུཔྤཱདནཏོ ཧེཊྛཱ ནིརོདྷོཏི ཨདྷིཔྤེཏོ། ཙཏུནྣཾ ཨརཱུཔཀྑནྡྷཱནཾ ཏཛྫཱ པརིཀམྨསིདྡྷཱ ཡཱ ཨཔྤཝཏྟི , ཏཏྠ ‘‘ནིརོདྷསམཱཔཏྟིསཉྙཱ’’ཏི, ཡཱ ནེསཾ ཏཐཱ ཨཔྤཝཏྟི། སཱ ‘‘ཨནྟོནིརོདྷེ ནིརུཛ྄ཛྷཏཱི’’ཏི ཝུཏྟཱ།
Bhāvitaṃ hoti uppāditaṃ hoti nirodhasamāpannatthāya. Anupubbasamāpattisamāpajjanasaṅkhātāya nirodhabhāvanāya taṃ cittaṃ bhāvitaṃ hoti. Tenāha ‘‘yaṃ ta’’ntiādi. Dutiyajjhāneyevāti dutiyajjhānakkhaṇe nirujjhati. Tattha anuppajjanato anuppādanato heṭṭhā nirodhoti adhippeto. Catunnaṃ arūpakkhandhānaṃ tajjā parikammasiddhā yā appavatti , tattha ‘‘nirodhasamāpattisaññā’’ti, yā nesaṃ tathā appavatti. Sā ‘‘antonirodhe nirujjhatī’’ti vuttā.
‘‘ཙིཏྟསངྑཱརོ ནིརུདྡྷོ’’ཏི ཝཙནཏོ ཏདཉྙེསཾ ཨནིརོདྷཾ ཨིཙྪནྟཱནཾ ཝཱདཾ དསྶེནྟོ ‘‘ཙིཏྟསངྑཱརོ ནིརུདྡྷོཏི ཝཙནཏོ’’ཏིཨཱདིཾ ཝཏྭཱ ཏཏྠ ཨཏིཔྤསངྒདསྶནམུཁེན ཏཾ ཝཱདཾ ནིསེདྷེཏུཾ ‘‘ཏེ ཝཏྟབྦཱ’’ཏིཨཱདིམཱཧ། ཨབྷིནིཝེསཾ ཨཀཏྭཱཏི ཡཐཱགཏེ བྱཉྫནམཏྟེ ཨབྷིནིཝེསཾ ཨཀཏྭཱ། ཨཱཙརིཡཱནཾ ནཡེཏི ཨཱཙརིཡཱནཾ པརམྤརཱགཏེ དྷམྨནཡེ དྷམྨནེཏྟིཡཾ ཋཏྭཱ།
‘‘Cittasaṅkhāro niruddho’’ti vacanato tadaññesaṃ anirodhaṃ icchantānaṃ vādaṃ dassento ‘‘cittasaṅkhāro niruddhoti vacanato’’tiādiṃ vatvā tattha atippasaṅgadassanamukhena taṃ vādaṃ nisedhetuṃ ‘‘te vattabbā’’tiādimāha. Abhinivesaṃ akatvāti yathāgate byañjanamatte abhinivesaṃ akatvā. Ācariyānaṃ nayeti ācariyānaṃ paramparāgate dhammanaye dhammanettiyaṃ ṭhatvā.
ཀིརིཡམཡཔཝཏྟསྨིནྟི པརིཏྟབྷཱུམཀཀུསལཱཀུསལདྷམྨཔབནྡྷེ ཝཏྟམཱནེ། ཏསྨིཉྷི ཝཏྟམཱནེ ཀཱཡིཀ-ཝཱཙསིཀ-ཀིརིཡསམྤཝཏྟི ཧོཏི, དསྶན-སཝནཱདིཝསེན ཨཱརམྨཎགྒཧཎེ པཝཏྟམཱནེཏི ཨཏྠོ། ཏེནཱཧ – ‘‘བཧིདྡྷཱརམྨཎེསུ པསཱདེ གྷཊྚེནྟེསཱུ’’ཏི། མཀྑིཏཱནི ཝིཡཱཏི པུཉྪིཏཱནི ཝིཡ ཧོནྟི གྷཊྚནཱཡ ཝིབཱདྷིཏཏྟཱ། ཨེཏེནཱཡཾ གྷཊྚནཱ པཉྩདྭཱརིཀཝིཉྙཱཎཱནཾ ཝེགསཱ ཨུཔྤཛྫནཱཡ ན ཨཱརམྨཎནྟི དསྶེཏི། ཏེནེཝཱཧ – ‘‘ཨནྟོནིརོདྷེ པཉྩ པསཱདཱ ཨཏིཝིཡ ཝིརོཙནྟཱི’’ཏི།
Kiriyamayapavattasminti parittabhūmakakusalākusaladhammapabandhe vattamāne. Tasmiñhi vattamāne kāyika-vācasika-kiriyasampavatti hoti, dassana-savanādivasena ārammaṇaggahaṇe pavattamāneti attho. Tenāha – ‘‘bahiddhārammaṇesu pasāde ghaṭṭentesū’’ti. Makkhitāni viyāti puñchitāni viya honti ghaṭṭanāya vibādhitattā. Etenāyaṃ ghaṭṭanā pañcadvārikaviññāṇānaṃ vegasā uppajjanāya na ārammaṇanti dasseti. Tenevāha – ‘‘antonirodhe pañca pasādā ativiya virocantī’’ti.
ཏཏོ པརཾ སཙིཏྟཀོ བྷཝིསྶཱམཱིཏི ཨིདཾ ཨཏྠཏོ ཨཱཔནྣཾ གཧེཏྭཱ ཝུཏྟཾ – ‘‘ཨེཏྟཀཾ ཀཱལཾ ཨཙིཏྟཀོ བྷཝིསྶཱམཱི’’ཏི ཨེཏེནེཝ ཏསྶ ཨཏྠསྶ སིདྡྷཏྟཱ། ཡཾ ཨེཝཾ བྷཱཝིཏནྟི ཨེཏྠ ཝིསུཾ ཙིཏྟསྶ བྷཱཝནཱ ནཱམ ནཏྠི, ཨདྡྷཱནཔརིཙྪེདཾ པན ཀཏྭཱ ནིརོདྷསམཱཔཏྟཏྠཱཡ ཀཱཏབྦཔརིཀམྨབྷཱཝནཱཡ ཨེཝ ཏསྶ སིཛ྄ཛྷནཏོ།
Tato paraṃ sacittako bhavissāmīti idaṃ atthato āpannaṃ gahetvā vuttaṃ – ‘‘ettakaṃ kālaṃ acittako bhavissāmī’’ti eteneva tassa atthassa siddhattā. Yaṃ evaṃ bhāvitanti ettha visuṃ cittassa bhāvanā nāma natthi, addhānaparicchedaṃ pana katvā nirodhasamāpattatthāya kātabbaparikammabhāvanāya eva tassa sijjhanato.
སཱ པནེསཱ ནིརོདྷཀཐཱ། དྭཱིཧི བལེཧཱིཏི སམཐཝིཔསྶནཱབལེཧི། ཏཡོ ཙ སངྑཱརཱནནྟི ཏིཎྞཾ ཀཱཡཝཙཱིཙིཏྟསངྑཱརཱནཾ པཊིཔྤསྶདྡྷིཡཱ། སོལ༹སཧི ཉཱཎཙརིཡཱཧཱིཏི ཨནིཙྩཱནུཔསྶནཱདཱིནཾ ཨཊྛནྣཾ ཨནུཔསྶནཱཉཱཎཱནཾ, ཨཊྛནྣཉྩ མགྒཕལཉཱཎཱནཾ ཝསེན ཨིམཱཧི སོལ༹སཧི ཉཱཎཔྤཝཏྟཱིཧི། ནཝཧི སམཱདྷིཙརིཡཱཧཱིཏི ཨཊྛ སམཱཔཏྟིཡོ ཨཊྛ སམཱདྷིཙརིཡཱ, ཏཱསཾ ཨུཔཙཱརསམཱདྷི སམཱདྷིབྷཱཝསཱམཉྙེན ཨེཀཱ སམཱདྷིཙརིཡཱཏི ཨེཝཾ ནཝཧི སམཱདྷིཙརིཡཱཧི། ཝསཱིབྷཱཝཏཱཔཉྙཱཏི ཝསཱིབྷཱཝཏཱསངྑཱཏཱ པཉྙཱ། སབྦཱཀཱརེན ཝིསུདྡྷིམགྒེ ཀཐིཏཱ, ཏེ ཏཱཝ ཨཱཀཱརཱ ཏིཊྛནྟུ, སརཱུཔམཏྟསྶ པནསྶ ཝཏྟབྦནྟི ཨཱཧ – ‘‘ཀོ པནཱཡཾ ནིརོདྷོ ནཱམཱ’’ཏི། ཡདི ཁནྡྷཱནཾ ཨཔྤཝཏྟི, ཨཐ ཀིམཏྠམེཏཾ ཛྷཱནསུཁཱདིཾ ཝིཡ སམཱཔཛྫནྟཱིཏི ཨཱཧ ‘‘སངྑཱརཱན’’ནྟིཨཱདི།
Sā panesā nirodhakathā. Dvīhi balehīti samathavipassanābalehi. Tayo ca saṅkhārānanti tiṇṇaṃ kāyavacīcittasaṅkhārānaṃ paṭippassaddhiyā. Soḷasahi ñāṇacariyāhīti aniccānupassanādīnaṃ aṭṭhannaṃ anupassanāñāṇānaṃ, aṭṭhannañca maggaphalañāṇānaṃ vasena imāhi soḷasahi ñāṇappavattīhi. Navahi samādhicariyāhīti aṭṭha samāpattiyo aṭṭha samādhicariyā, tāsaṃ upacārasamādhi samādhibhāvasāmaññena ekā samādhicariyāti evaṃ navahi samādhicariyāhi. Vasībhāvatāpaññāti vasībhāvatāsaṅkhātā paññā. Sabbākārena visuddhimagge kathitā, te tāva ākārā tiṭṭhantu, sarūpamattassa panassa vattabbanti āha – ‘‘ko panāyaṃ nirodho nāmā’’ti. Yadi khandhānaṃ appavatti, atha kimatthametaṃ jhānasukhādiṃ viya samāpajjantīti āha ‘‘saṅkhārāna’’ntiādi.
ཕལསམཱཔཏྟིཙིཏྟནྟི ཨརཧཏྟཾ ཨནཱགཱམིཕལཙིཏྟཾ། ‘‘ཏཏོ པརཾ བྷཝངྒསམཡེ’’ཏི ཝུཏྟཏྟཱ ཨཱཧ ‘‘ཀིཾ པན…པེ॰… ན སམུཊྛཱཔེཏཱི’’ཏི། སམུཊྛཱཔེཏི རཱུཔསམུཔྤཱདཀཏྟཱ། ཨིམསྶཱཏི ནིརོདྷཾ སམཱཔནྣབྷིཀྑུནོ། སཱ ན སམུཊྛཱཔེཏཱིཏི སཱ ཙཏུཏྠཛ྄ཛྷཱནིཀཱ ཕལསམཱཔཏྟི ན སམུཊྛཱཔེཏི ཨསྶཱསཔསྶཱསེ། ཕལསམཱཔཏྟིཡཱ ཙཏུཏྠཛ྄ཛྷཱནིཀབྷཱཝོ ཀཐཾ ནིཙྪིཏོཏི ཨཱཧ – ‘‘ཀིཾ ཝཱ ཨེཏེནཱ’’ཏིཨཱདི། ཝཀྑམཱནཱཀཱརེནཔི པརིཧཱརོ ཧོཏཱིཏི། སནྟསམཱཔཏྟིཏོཏི ནིརོདྷསམཱཔཏྟིམེཝ སནྡྷཱཡ ཝདཏི། ཨབྦོཧཱརིཀཱ ཧོནྟི ཨཏིསུཁུམསབྷཱཝཏྟཱ, སཉྫཱིཝཏྠེརསྶ པུབྦེ སམཱཔཏྟིཀྑཎེ ཨསྶཱསཔསྶཱསཱ ཨབྦོཧཱརིཀབྷཱཝཾ གཙྪནྟི། ཏེན ཝུཏྟཾ ‘‘བྷཝངྒསམཡེནེཝེཏཾ ཀཐིཏ’’ནྟི།
Phalasamāpatticittanti arahattaṃ anāgāmiphalacittaṃ. ‘‘Tato paraṃ bhavaṅgasamaye’’ti vuttattā āha ‘‘kiṃ pana…pe… na samuṭṭhāpetī’’ti. Samuṭṭhāpeti rūpasamuppādakattā. Imassāti nirodhaṃ samāpannabhikkhuno. Sā na samuṭṭhāpetīti sā catutthajjhānikā phalasamāpatti na samuṭṭhāpeti assāsapassāse. Phalasamāpattiyā catutthajjhānikabhāvo kathaṃ nicchitoti āha – ‘‘kiṃ vā etenā’’tiādi. Vakkhamānākārenapi parihāro hotīti. Santasamāpattitoti nirodhasamāpattimeva sandhāya vadati. Abbohārikā honti atisukhumasabhāvattā, sañjīvattherassa pubbe samāpattikkhaṇe assāsapassāsā abbohārikabhāvaṃ gacchanti. Tena vuttaṃ ‘‘bhavaṅgasamayenevetaṃ kathita’’nti.
ཀིརིཡམཡ …པེ॰… ཨུཔྤཛྫཏཱིཏི ཀསྨཱ ཝུཏྟཾ? ནནུ བྷཝངྒུཔྤཏྟིཀཱལམྤི ཝིཏཀྐཝིཙཱརཱ ཨུཔྤཛྫནྟེཝཱཏི? ཀིཉྩཱཔི ཨུཔྤཛྫནྟི, ཝཙཱིསངྑཱརལཀྑཎཔྤཏྟཱ པན ན ཧོནྟཱིཏི ཨིམམཏྠཾ དསྶེཏུཾ ‘‘ཀིཾ བྷཝངྒ’’ནྟིཨཱདི ཝུཏྟཾ།
Kiriyamaya…pe… uppajjatīti kasmā vuttaṃ? Nanu bhavaṅguppattikālampi vitakkavicārā uppajjantevāti? Kiñcāpi uppajjanti, vacīsaṅkhāralakkhaṇappattā pana na hontīti imamatthaṃ dassetuṃ ‘‘kiṃ bhavaṅga’’ntiādi vuttaṃ.
སུཉྙཏོ ཕསྶོཏིཨཱདཡོ སགུཎེནཔི ཨཱརམྨཎེནཱཏི ཨཱརམྨཎབྷཱུཏམེཏཾ། སུཉྙཏཱ ནཱམ ཕལསམཱཔཏྟི ནིཙྩསུཁཨཏྟསབྷཱཝཏོ སུཉྙཏྟཱ། ‘‘སུཉྙཏོ ཕསྶོ’’ཏི ཝུཏྟཾ ཝུཏྟནཡེན སུཉྙསབྷཱཝཏྟཱ། ཨནིམིཏྟཱ ནཱམ ཕལསམཱཔཏྟི རཱགནིམིཏྟཱདཱིནཾ ཨབྷཱཝཏོ། ཨཔྤཎིཧིཏཱ ནཱམ ཕལསམཱཔཏྟི རཱགཔཎིདྷིཨཱདཱིནམབྷཱཝཏོ། སེསཾ ཝུཏྟནཡམེཝ། ཏེནཱཧ ‘‘ཨནིམིཏྟཔྤཎིཧིཏེསུཔི ཨེསེཝ ནཡོ’’ཏི། རཱགནིམིཏྟཱདཱིནནྟི ཨེཏྠ ཨཱདི-སདྡེན སངྑཱརནིམིཏྟསྶཔི སངྒཧོ དཊྛབྦོ། ཡདགྒེན ཕལསམཱཔཏྟིསམྥསྶོ སུཉྙཏོ ནཱམ, ཏདགྒེན ཕལསམཱཔཏྟིཔི སུཉྙཏཱ ནཱམ, ཕསྶསཱིསེན པན དེསནཱ ཨཱགཏཱཏི ཏཐཱ ཝུཏྟཾ། ཨནིམིཏྟཔྤཎིཧིཏེསུཔི ཨེསེཝ ནཡོ།
Suññato phassotiādayo saguṇenapi ārammaṇenāti ārammaṇabhūtametaṃ. Suññatā nāma phalasamāpatti niccasukhaattasabhāvato suññattā. ‘‘Suññato phasso’’ti vuttaṃ vuttanayena suññasabhāvattā. Animittā nāma phalasamāpatti rāganimittādīnaṃ abhāvato. Appaṇihitā nāma phalasamāpatti rāgapaṇidhiādīnamabhāvato. Sesaṃ vuttanayameva. Tenāha ‘‘animittappaṇihitesupi eseva nayo’’ti. Rāganimittādīnanti ettha ādi-saddena saṅkhāranimittassapi saṅgaho daṭṭhabbo. Yadaggena phalasamāpattisamphasso suññato nāma, tadaggena phalasamāpattipi suññatā nāma, phassasīsena pana desanā āgatāti tathā vuttaṃ. Animittappaṇihitesupi eseva nayo.
ཨཱགམནཾ ཨེཏྠ, ཨེཏཱཡཱཏི ཝཱ ཨཱགམནིཀཱ, སཱ ཨེཝ ཨཱགམནིཡཱ ཀ-ཀཱརསྶ ཡ-ཀཱརཾ ཀཏྭཱ། ཝུཊྛཱཏི ནིམིཏྟཏོ མགྒསྶ ཨུཔྤཱདནེན། ཨནིམིཏྟཱ ནཱམ ནིཙྩནིམིཏྟསྶ ཨུགྒྷཱཊནཏོ། ཨེཏྠ ཙ ཝུཊྛཱནམེཝ པམཱཎཾ, ན པརིགྒཧདསྶནཱནི། ཨཔྤཎིཧིཏཱ ནཱམ སུཁཔཎིདྷིཡཱ པཊིཔཀྑཏོ། སུཉྙཏཱ ནཱམ ཨཏྟདིཊྛིཡཱ ཨུཛུཔཊིཔཀྑཏྟཱ སཏྟསུཉྙཏཱཡ སུདིཊྛཏྟཱ། མགྒོ ཨནིམིཏྟོ ནཱམ ཝིཔསྶནཱགམནཏོ། ཕལཾ ཨནིམིཏྟཾ ནཱམ མགྒཱགམནཏོ། ཝིཀཔྤོ ཨཱཔཛྫེཡྻ ཨཱགམནསྶ ཝཝཏྠཱནསྶ ཨབྷཱཝེན, ཝིཔསྶནཱཡ ཨནིམིཏྟཱདིནཱམལཱབྷོ ཨཝཝཏྠིཏོཏི ཨདྷིཔྤཱཡོ། ཏེན ཝུཏྟཾ ‘‘ཏསྨཱ’’ཏིཨཱདི། ཡསྨཱ པན སཱ མགྒཝུཊྛཱནཀཱལེ ཨེཝརཱུཔཱཔི ཧོཏཱིཏི ཏསྶ ཝསེན མགྒཕལཱནཾ ཝིཡ ཕསྶསྶཔི པཝཏྟིརཱུཔཏྟཱ ཡཐཱཝུཏྟོ ཝིཀཔྤོ ཨནཝསརོཏི དཊྛབྦཾ། ཏཡོ ཕསྶཱ ཕུསནྟཱིཏི པུགྒལབྷེདཝསེན ཝུཏྟཾ། ན ཧི ཨེཀཾཡེཝ པུགྒལཾ ཨེཏསྨིཾ ཁཎེ ཏཡོ ཕསྶཱ ཕུསནྟི། ‘‘ཏིཝིདྷོ ཕསྶོ ཕུསཏཱི’’ཏི ཝཱ བྷཝིཏབྦཾ། ཡསྨཱ པན ‘‘ནིརོདྷཕལསམཱཔཏྟིཡཱ ཝུཊྛིཏསྶཱ’’ཏིཨཱདི ཡསྶ ཡཐཱཝུཏྟཱ ཏཡོ ཨེཝ ཕསྶཱ སམྦྷཝནྟི, ཏསྶ ཨནཝསེསགྒཧཎཝསེནེཝ ཝུཏྟཾ ‘‘ཏཡོ ཕསྶཱ ཕུསནྟཱི’’ཏི།
Āgamanaṃ ettha, etāyāti vā āgamanikā, sā eva āgamaniyā ka-kārassa ya-kāraṃ katvā. Vuṭṭhāti nimittato maggassa uppādanena. Animittā nāma niccanimittassa ugghāṭanato. Ettha ca vuṭṭhānameva pamāṇaṃ, na pariggahadassanāni. Appaṇihitā nāma sukhapaṇidhiyā paṭipakkhato. Suññatā nāma attadiṭṭhiyā ujupaṭipakkhattā sattasuññatāya sudiṭṭhattā. Maggo animitto nāma vipassanāgamanato. Phalaṃ animittaṃ nāma maggāgamanato. Vikappo āpajjeyya āgamanassa vavatthānassa abhāvena, vipassanāya animittādināmalābho avavatthitoti adhippāyo. Tena vuttaṃ ‘‘tasmā’’tiādi. Yasmā pana sā maggavuṭṭhānakāle evarūpāpi hotīti tassa vasena maggaphalānaṃ viya phassassapi pavattirūpattā yathāvutto vikappo anavasaroti daṭṭhabbaṃ. Tayo phassā phusantīti puggalabhedavasena vuttaṃ. Na hi ekaṃyeva puggalaṃ etasmiṃ khaṇe tayo phassā phusanti. ‘‘Tividho phasso phusatī’’ti vā bhavitabbaṃ. Yasmā pana ‘‘nirodhaphalasamāpattiyā vuṭṭhitassā’’tiādi yassa yathāvuttā tayo eva phassā sambhavanti, tassa anavasesaggahaṇavaseneva vuttaṃ ‘‘tayo phassā phusantī’’ti.
ནིབྦཱནཾ ཝིཝེཀོ ནཱམ སབྦསངྑཱརཝིཝིཏྟབྷཱཝཏོ། ཏསྨིཾ ཝིཝེཀེ ཨེཀནྟེནེཝ ནིནྣཔོཎཏྟཱ ཨེཝ ཧི ཏེ པཊིཔྤསྶདྡྷསབྦུསྶུཀྐཱ ཨུཏྟམཔུརིསཱ ཙཏུནྣཾ ཁནྡྷཱནཾ ཨཔྤཝཏྟིཾ ཨནཝསེསགྒཧཎལཀྑཎཾ ནིརོདྷསམཱཔཏྟིཾ སམཱཔཛྫནྟཱིཏི།
Nibbānaṃ viveko nāma sabbasaṅkhāravivittabhāvato. Tasmiṃ viveke ekanteneva ninnapoṇattā eva hi te paṭippassaddhasabbussukkā uttamapurisā catunnaṃ khandhānaṃ appavattiṃ anavasesaggahaṇalakkhaṇaṃ nirodhasamāpattiṃ samāpajjantīti.
དུཏིཡཀཱམབྷཱུསུཏྟཝཎྞནཱ ནིཊྛིཏཱ།
Dutiyakāmabhūsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༦. དུཏིཡཀཱམབྷཱུསུཏྟཾ • 6. Dutiyakāmabhūsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༦. དུཏིཡཀཱམབྷཱུསུཏྟཝཎྞནཱ • 6. Dutiyakāmabhūsuttavaṇṇanā
