| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
७. दुतियकरणीयविमानवत्थु
7. Dutiyakaraṇīyavimānavatthu
९३५.
935.
‘‘उच्चमिदं मणिथूणं विमानं, समन्ततो द्वादस योजनानि।
‘‘Uccamidaṃ maṇithūṇaṃ vimānaṃ, samantato dvādasa yojanāni;
कूटागारा सत्तसता उळारा, वेळुरियथम्भा रुचकत्थता सुभा॥
Kūṭāgārā sattasatā uḷārā, veḷuriyathambhā rucakatthatā subhā.
९३६.
936.
‘‘तत्थच्छसि पिवसि खादसि च, दिब्बा च वीणा पवदन्ति वग्गुं।
‘‘Tatthacchasi pivasi khādasi ca, dibbā ca vīṇā pavadanti vagguṃ;
दिब्बा रसा कामगुणेत्थ पञ्च, नारियो च नच्चन्ति सुवण्णछन्ना॥
Dibbā rasā kāmaguṇettha pañca, nāriyo ca naccanti suvaṇṇachannā.
९३७.
937.
‘‘केन तेतादिसो वण्णो…पे॰… वण्णो च ते सब्बदिसा पभासती’’ति॥
‘‘Kena tetādiso vaṇṇo…pe… vaṇṇo ca te sabbadisā pabhāsatī’’ti.
९३९.
939.
सो देवपुत्तो अत्तमनो…पे॰… यस्स कम्मस्सिदं फलं॥
So devaputto attamano…pe… yassa kammassidaṃ phalaṃ.
९४०.
940.
‘‘करणीयानि पुञ्ञानि, पण्डितेन विजानता।
‘‘Karaṇīyāni puññāni, paṇḍitena vijānatā;
सम्मग्गतेसु भिक्खूसु, यत्थ दिन्नं महप्फलं॥
Sammaggatesu bhikkhūsu, yattha dinnaṃ mahapphalaṃ.
९४१.
941.
‘‘अत्थाय वत मे भिक्खु, अरञ्ञा गाममागतो।
‘‘Atthāya vata me bhikkhu, araññā gāmamāgato;
तत्थ चित्तं पसादेत्वा, तावतिंसूपगो अहं॥
Tattha cittaṃ pasādetvā, tāvatiṃsūpago ahaṃ.
९४२.
942.
‘‘तेन मेतादिसो वण्णो…पे॰…
‘‘Tena metādiso vaṇṇo…pe…
वण्णो च मे सब्बदिसा पभासती’’ति॥
Vaṇṇo ca me sabbadisā pabhāsatī’’ti.
दुतियकरणीयविमानं सत्तमं।
Dutiyakaraṇīyavimānaṃ sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ७. दुतियकरणीयविमानवण्णना • 7. Dutiyakaraṇīyavimānavaṇṇanā
