| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа • Aṅguttaranikāya |
10. д̣̇уд̇ияагосаласуд̇д̇ам̣
10. Dutiyakosalasuttaṃ
30. згам̣ самаяам̣ бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. д̇зна ко бана самаязна рааж̇аа басзнад̣̇и госало уяяод̇хигаа нивад̇д̇о ход̇и виж̇ид̇асан̇г̇аамо лад̣̇д̇хаад̇хиббааяо. ат̇а ко рааж̇аа басзнад̣̇и госало язна аараамо д̇зна бааяааси. яаавад̇игаа яаанасса бхууми, яаанзна г̇анд̇ваа яаанаа бажжорохид̇ваа бад̇д̇игова аараамам̣ баависи. д̇зна ко бана самаязна самб̣ахулаа бхигкуу аб̣бхогаасз жан̇гаманд̇и. ат̇а ко рааж̇аа басзнад̣̇и госало язна д̇з бхигкуу д̇знубасан̇гами; убасан̇гамид̇ваа д̇з бхигкуу зд̇ад̣̇авожа – ‘‘гахам̣ ну ко, бханд̇з, бхаг̇аваа зд̇арахи вихарад̇и арахам̣ саммаасамб̣уд̣̇д̇хо. д̣̇ассанагаамаа хи маяам̣, бханд̇з, д̇ам̣ бхаг̇аванд̇ам̣ араханд̇ам̣ саммаасамб̣уд̣̇д̇ха’’нд̇и. ‘‘зсо, махаарааж̇а, вихааро сам̣вуд̇ад̣̇вааро. д̇зна аббасад̣̇д̣̇о убасан̇гамид̇ваа ад̇арамаано аалинд̣̇ам̣ бависид̇ваа уггаасид̇ваа аг̇г̇ал̣ам̣ аагодзхи; вивариссад̇и д̇з бхаг̇аваа д̣̇ваара’’нд̇и.
30. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena rājā pasenadi kosalo uyyodhikā nivatto hoti vijitasaṅgāmo laddhādhippāyo. Atha kho rājā pasenadi kosalo yena ārāmo tena pāyāsi. Yāvatikā yānassa bhūmi, yānena gantvā yānā paccorohitvā pattikova ārāmaṃ pāvisi. Tena kho pana samayena sambahulā bhikkhū abbhokāse caṅkamanti. Atha kho rājā pasenadi kosalo yena te bhikkhū tenupasaṅkami; upasaṅkamitvā te bhikkhū etadavoca – ‘‘kahaṃ nu kho, bhante, bhagavā etarahi viharati arahaṃ sammāsambuddho. Dassanakāmā hi mayaṃ, bhante, taṃ bhagavantaṃ arahantaṃ sammāsambuddha’’nti. ‘‘Eso, mahārāja, vihāro saṃvutadvāro. Tena appasaddo upasaṅkamitvā ataramāno ālindaṃ pavisitvā ukkāsitvā aggaḷaṃ ākoṭehi; vivarissati te bhagavā dvāra’’nti.
ат̇а ко рааж̇аа басзнад̣̇и госало язна со вихааро сам̣вуд̇ад̣̇вааро, д̇зна аббасад̣̇д̣̇о убасан̇гамид̇ваа ад̇арамаано аалинд̣̇ам̣ бависид̇ваа уггаасид̇ваа аг̇г̇ал̣ам̣ аагодзси. вивари бхаг̇аваа д̣̇ваарам̣. ат̇а ко рааж̇аа басзнад̣̇и госало вихаарам̣ бависид̇ваа бхаг̇авад̇о баад̣̇зсу сирасаа нибад̇ид̇ваа бхаг̇авад̇о баад̣̇аани мукзна жа барижумб̣ад̇и баан̣ийхи жа барисамб̣аахад̇и нааман̃жа саавзд̇и – ‘‘рааж̇аахам̣, бханд̇з, басзнад̣̇и госало; рааж̇аахам̣, бханд̇з , басзнад̣̇и госало’’д̇и.
Atha kho rājā pasenadi kosalo yena so vihāro saṃvutadvāro, tena appasaddo upasaṅkamitvā ataramāno ālindaṃ pavisitvā ukkāsitvā aggaḷaṃ ākoṭesi. Vivari bhagavā dvāraṃ. Atha kho rājā pasenadi kosalo vihāraṃ pavisitvā bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati nāmañca sāveti – ‘‘rājāhaṃ, bhante, pasenadi kosalo; rājāhaṃ, bhante , pasenadi kosalo’’ti.
‘‘гам̣ бана д̇вам̣, махаарааж̇а, ад̇т̇авасам̣ самбассамаано имасмим̣ сарийрз зваруубам̣ бараманибажжагаарам̣ гароси, мзд̇д̇уубахаарам̣ убад̣̇ам̣сзсий’’д̇и? ‘‘гад̇ан̃н̃уд̇ам̣ ко ахам̣, бханд̇з, гад̇авзд̣̇ид̇ам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Kaṃ pana tvaṃ, mahārāja, atthavasaṃ sampassamāno imasmiṃ sarīre evarūpaṃ paramanipaccakāraṃ karosi, mettūpahāraṃ upadaṃsesī’’ti? ‘‘Kataññutaṃ kho ahaṃ, bhante, kataveditaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘бхаг̇аваа хи, бханд̇з, б̣ахуж̇анахид̇ааяа бадибанно б̣ахуж̇анасукааяа б̣ахуно ж̇анасса арияз н̃ааяз бад̇идтаабид̇аа яад̣̇ид̣̇ам̣ галяаан̣ад̇хаммад̇ааяа гусалад̇хаммад̇ааяа. яамби, бханд̇з, бхаг̇аваа б̣ахуж̇анахид̇ааяа бадибанно б̣ахуж̇анасукааяа б̣ахуно ж̇анасса арияз н̃ааяз бад̇идтаабид̇аа яад̣̇ид̣̇ам̣ галяаан̣ад̇хаммад̇ааяа гусалад̇хаммад̇ааяа, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Bhagavā hi, bhante, bahujanahitāya paṭipanno bahujanasukhāya bahuno janassa ariye ñāye patiṭṭhāpitā yadidaṃ kalyāṇadhammatāya kusaladhammatāya. Yampi, bhante, bhagavā bahujanahitāya paṭipanno bahujanasukhāya bahuno janassa ariye ñāye patiṭṭhāpitā yadidaṃ kalyāṇadhammatāya kusaladhammatāya, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа сийлаваа вуд̣̇д̇хасийло арияасийло гусаласийло гусаласийлзна саманнааг̇ад̇о. яамби, бханд̇з, бхаг̇аваа сийлаваа вуд̣̇д̇хасийло арияасийло гусаласийло гусаласийлзна саманнааг̇ад̇о, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā sīlavā vuddhasīlo ariyasīlo kusalasīlo kusalasīlena samannāgato. Yampi, bhante, bhagavā sīlavā vuddhasīlo ariyasīlo kusalasīlo kusalasīlena samannāgato, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа д̣̇ийгхарад̇д̇ам̣ ааран̃н̃иго, аран̃н̃аванабад̇т̇аани банд̇аани сзнаасанаани бадисзвад̇и. яамби, бханд̇з, бхаг̇аваа д̣̇ийгхарад̇д̇ам̣ ааран̃н̃иго, аран̃н̃аванабад̇т̇аани банд̇аани сзнаасанаани бадисзвад̇и, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā dīgharattaṃ āraññiko, araññavanapatthāni pantāni senāsanāni paṭisevati. Yampi, bhante, bhagavā dīgharattaṃ āraññiko, araññavanapatthāni pantāni senāsanāni paṭisevati, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа санд̇удто ид̇арийд̇аражийварабин̣д̣абаад̇асзнаасанаг̇илаанабажжаяабхзсаж̇ж̇абаригкаарзна. яамби, бханд̇з, бхаг̇аваа санд̇удто ид̇арийд̇аражийварабин̣д̣абаад̇асзнаасанаг̇илаанабажжаяабхзсаж̇ж̇абаригкаарзна, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми. ‘‘буна жабарам̣, бханд̇з, бхаг̇аваа аахунзяяо баахунзяяо д̣̇агкин̣зяяо ан̃ж̇алигаран̣ийяо ануд̇д̇арам̣ бун̃н̃агкзд̇д̇ам̣ логасса. яамби, бханд̇з, бхаг̇аваа аахунзяяо баахунзяяо д̣̇агкин̣зяяо ан̃ж̇алигаран̣ийяо ануд̇д̇арам̣ бун̃н̃агкзд̇д̇ам̣ логасса, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā santuṭṭho itarītaracīvarapiṇḍapātasenāsanagilānapaccayabhesajjaparikkhārena. Yampi, bhante, bhagavā santuṭṭho itarītaracīvarapiṇḍapātasenāsanagilānapaccayabhesajjaparikkhārena, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi. ‘‘Puna caparaṃ, bhante, bhagavā āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Yampi, bhante, bhagavā āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа яааяам̣ гат̇аа абхисаллзкигаа жзд̇овиваран̣асаббааяаа, сзяяат̇ид̣̇ам̣ – аббижчагат̇аа санд̇удтигат̇аа бавивзгагат̇аа асам̣саг̇г̇агат̇аа вийрияаарамбхагат̇аа сийлагат̇аа самаад̇хигат̇аа бан̃н̃аагат̇аа вимуд̇д̇игат̇аа вимуд̇д̇ин̃аан̣ад̣̇ассанагат̇аа, зваруубааяа гат̇ааяа нигаамалаабхий агижчалаабхий агасиралаабхий. яамби, бханд̇з, бхаг̇аваа яааяам̣ гат̇аа абхисаллзкигаа жзд̇овиваран̣асаббааяаа, сзяяат̇ид̣̇ам̣ – аббижчагат̇аа…бз… вимуд̇д̇ин̃аан̣ад̣̇ассанагат̇аа, зваруубааяа гат̇ааяа нигаамалаабхий агижчалаабхий агасиралаабхий, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā yāyaṃ kathā abhisallekhikā cetovivaraṇasappāyā, seyyathidaṃ – appicchakathā santuṭṭhikathā pavivekakathā asaṃsaggakathā vīriyārambhakathā sīlakathā samādhikathā paññākathā vimuttikathā vimuttiñāṇadassanakathā, evarūpāya kathāya nikāmalābhī akicchalābhī akasiralābhī. Yampi, bhante, bhagavā yāyaṃ kathā abhisallekhikā cetovivaraṇasappāyā, seyyathidaṃ – appicchakathā…pe… vimuttiñāṇadassanakathā, evarūpāya kathāya nikāmalābhī akicchalābhī akasiralābhī, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа жад̇уннам̣ жхаанаанам̣ аабхижзд̇асигаанам̣ д̣̇идтад̇хаммасукавихаараанам̣ нигаамалаабхий агижчалаабхий агасиралаабхий. яамби, бханд̇з, бхаг̇аваа жад̇уннам̣ жхаанаанам̣ аабхижзд̇асигаанам̣ д̣̇идтад̇хаммасукавихаараанам̣ нигаамалаабхий агижчалаабхий агасиралаабхий, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī akicchalābhī akasiralābhī. Yampi, bhante, bhagavā catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī akicchalābhī akasiralābhī, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа анзгавихид̇ам̣ буб̣б̣зниваасам̣ ануссарад̇и, сзяяат̇ид̣̇ам̣ – згамби ж̇аад̇им̣ д̣̇взби ж̇аад̇ияо д̇иссоби ж̇аад̇ияо жад̇ассоби ж̇аад̇ияо бан̃жаби ж̇аад̇ияо д̣̇асаби ж̇аад̇ияо вийсамби ж̇аад̇ияо д̇им̣самби ж̇аад̇ияо жад̇д̇аалийсамби ж̇аад̇ияо бан̃н̃аасамби ж̇аад̇ияо ж̇аад̇исад̇амби ж̇аад̇исахассамби ж̇аад̇исад̇асахассамби анзгзби сам̣ваддагаббз анзгзби виваддагаббз анзгзби сам̣ваддавиваддагаббз – ‘амуд̇раасим̣ звам̣наамо звам̣г̇од̇д̇о звам̣ван̣н̣о звамаахааро звам̣сукад̣̇угкаббадисам̣взд̣̇ий звамааяубарияанд̇о, со д̇ад̇о жуд̇о амуд̇ра уд̣̇абаад̣̇им̣; д̇ад̇раабаасим̣ звам̣наамо звам̣г̇од̇д̇о звам̣ван̣н̣о звамаахааро звам̣сукад̣̇угкаббадисам̣взд̣̇ий звамааяубарияанд̇о, со д̇ад̇о жуд̇о ид̇хуубабанно’д̇и. ид̇и саагаарам̣ сауд̣̇д̣̇зсам̣ анзгавихид̇ам̣ буб̣б̣зниваасам̣ ануссарад̇и. яамби, бханд̇з, бхаг̇аваа анзгавихид̇ам̣ буб̣б̣зниваасам̣ ануссарад̇и, сзяяат̇ид̣̇ам̣ – згамби ж̇аад̇им̣ д̣̇взби ж̇аад̇ияо…бз… ид̇и саагаарам̣ сауд̣̇д̣̇зсам̣ анзгавихид̇ам̣ буб̣б̣зниваасам̣ ануссарад̇и, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe – ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarati. Yampi, bhante, bhagavā anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа д̣̇иб̣б̣зна жагкунаа висуд̣̇д̇хзна ад̇игганд̇амаанусагзна сад̇д̇з бассад̇и жавамаанз убабаж̇ж̇амаанз хийнз бан̣ийд̇з суван̣н̣з д̣̇уб̣б̣ан̣н̣з, суг̇ад̇з д̣̇уг̇г̇ад̇з яат̇аагаммуубаг̇з сад̇д̇з баж̇аанаад̇и – ‘имз вад̇а бхонд̇о сад̇д̇аа гааяад̣̇ужжарид̇зна саманнааг̇ад̇аа важийд̣̇ужжарид̇зна саманнааг̇ад̇аа манод̣̇ужжарид̇зна саманнааг̇ад̇аа арияаанам̣ убаваад̣̇агаа мижчаад̣̇идтигаа мижчаад̣̇идтигаммасамаад̣̇аанаа, д̇з гааяасса бхзд̣̇аа барам̣ маран̣аа абааяам̣ д̣̇уг̇г̇ад̇им̣ винибаад̇ам̣ нираяам̣ убабаннаа; имз ваа бана бхонд̇о сад̇д̇аа гааяасужарид̇зна саманнааг̇ад̇аа важийсужарид̇зна саманнааг̇ад̇аа маносужарид̇зна саманнааг̇ад̇аа арияаанам̣ анубаваад̣̇агаа саммаад̣̇идтигаа саммаад̣̇идтигаммасамаад̣̇аанаа, д̇з гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаннаа’д̇и, ид̇и д̣̇иб̣б̣зна жагкунаа висуд̣̇д̇хзна ад̇игганд̇амаанусагзна сад̇д̇з бассад̇и…бз… яат̇аагаммуубаг̇з сад̇д̇з баж̇аанаад̇и. яамби, бханд̇з, бхаг̇аваа д̣̇иб̣б̣зна жагкунаа висуд̣̇д̇хзна ад̇игганд̇амаанусагзна…бз… яат̇аагаммуубаг̇з сад̇д̇з баж̇аанаад̇и, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāti – ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannā’ti, iti dibbena cakkhunā visuddhena atikkantamānusakena satte passati…pe… yathākammūpage satte pajānāti. Yampi, bhante, bhagavā dibbena cakkhunā visuddhena atikkantamānusakena…pe… yathākammūpage satte pajānāti, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘буна жабарам̣, бханд̇з, бхаг̇аваа аасаваанам̣ каяаа анаасавам̣ жзд̇овимуд̇д̇им̣ бан̃н̃аавимуд̇д̇им̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихарад̇и. яамби, бханд̇з, бхаг̇аваа аасаваанам̣ каяаа анаасавам̣ жзд̇овимуд̇д̇им̣…бз… сажчигад̇ваа убасамбаж̇ж̇а вихарад̇и, ид̣̇амби ко ахам̣, бханд̇з, ад̇т̇авасам̣ самбассамаано бхаг̇авад̇и зваруубам̣ бараманибажжагаарам̣ гароми, мзд̇д̇уубахаарам̣ убад̣̇ам̣сзми.
‘‘Puna caparaṃ, bhante, bhagavā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Yampi, bhante, bhagavā āsavānaṃ khayā anāsavaṃ cetovimuttiṃ…pe… sacchikatvā upasampajja viharati, idampi kho ahaṃ, bhante, atthavasaṃ sampassamāno bhagavati evarūpaṃ paramanipaccakāraṃ karomi, mettūpahāraṃ upadaṃsemi.
‘‘ханд̣̇а жа д̣̇аани маяам̣, бханд̇з, г̇ажчаама. б̣ахугижжаа маяам̣ б̣ахугаран̣ийяаа’’д̇и. ‘‘яасса д̣̇аани д̇вам̣, махаарааж̇а, гаалам̣ ман̃н̃асий’’д̇и. ат̇а ко рааж̇аа басзнад̣̇и госало удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаамийд̇и. д̣̇асамам̣.
‘‘Handa ca dāni mayaṃ, bhante, gacchāma. Bahukiccā mayaṃ bahukaraṇīyā’’ti. ‘‘Yassa dāni tvaṃ, mahārāja, kālaṃ maññasī’’ti. Atha kho rājā pasenadi kosalo uṭṭhāyāsanā bhagavantaṃ abhivādetvā padakkhiṇaṃ katvā pakkāmīti. Dasamaṃ.
махааваг̇г̇о д̇ад̇ияо.
Mahāvaggo tatiyo.
д̇ассуд̣̇д̣̇аанам̣ –
Tassuddānaṃ –
сийхаад̇хивуд̇д̇и гааязна, жунд̣̇зна гасин̣зна жа;
Sīhādhivutti kāyena, cundena kasiṇena ca;
гаал̣ий жа д̣̇вз махаабан̃хаа, госалзхи барз д̣̇увзд̇и.
Kāḷī ca dve mahāpañhā, kosalehi pare duveti.
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 10. д̣̇уд̇ияагосаласуд̇д̇аван̣н̣анаа • 10. Dutiyakosalasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 10. д̣̇уд̇ияагосаласуд̇д̇аван̣н̣анаа • 10. Dutiyakosalasuttavaṇṇanā
