| Library / Tipiṭaka / တိပိဋက • Tipiṭaka / ဝိမာနဝတ္ထုပာဠိ • Vimānavatthupāḷi |
၉. ဒုတိယကုဏ္ဍလီဝိမာနဝတ္ထု
9. Dutiyakuṇḍalīvimānavatthu
၁၁၀၁.
1101.
‘‘အလင္ကတော မလ္ယဓရော သုဝတ္ထော၊ သုကုဏ္ဍလီ ကပ္ပိတကေသမသ္သု။
‘‘Alaṅkato malyadharo suvattho, sukuṇḍalī kappitakesamassu;
အာမုတ္တဟတ္ထာဘရဏော ယသသ္သီ၊ ဒိဗ္ဗေ ဝိမာနမ္ဟိ ယထာပိ စန္ဒိမာ။
Āmuttahatthābharaṇo yasassī, dibbe vimānamhi yathāpi candimā.
၁၁၀၂.
1102.
‘‘ဒိဗ္ဗာ စ ဝီဏာ ပဝဒန္တိ ဝဂ္ဂုံ၊ အဋ္ဌဋ္ဌကာ သိက္ခိတာ သာဓုရူပာ။
‘‘Dibbā ca vīṇā pavadanti vagguṃ, aṭṭhaṭṭhakā sikkhitā sādhurūpā;
ဒိဗ္ဗာ စ ကညာ တိဒသစရာ ဥဠာရာ၊ နစ္စန္တိ ဂာယန္တိ ပမောဒယန္တိ။
Dibbā ca kaññā tidasacarā uḷārā, naccanti gāyanti pamodayanti.
၁၁၀၃.
1103.
‘‘ဒေဝိဒ္ဓိပတ္တောသိ မဟာနုဘာဝော၊ မနုသ္သဘူတော ကိမကာသိ ပုညံ။
‘‘Deviddhipattosi mahānubhāvo, manussabhūto kimakāsi puññaṃ;
ကေနာသိ ဧဝံ ဇလိတာနုဘာဝော၊ ဝဏ္ဏော စ တေ သဗ္ဗဒိသာ ပဘာသတီ’’တိ။
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
၁၁၀၄.
1104.
သော ဒေဝပုတ္တော အတ္တမနော။ပေ.။ ယသ္သ ကမ္မသ္သိဒံ ဖလံ။
So devaputto attamano…pe… yassa kammassidaṃ phalaṃ.
၁၁၀၅.
1105.
‘‘အဟံ မနုသ္သေသု မနုသ္သဘူတော၊ ဒိသ္ဝာန သမဏေ သာဓုရူပေ 1။
‘‘Ahaṃ manussesu manussabhūto, disvāna samaṇe sādhurūpe 2;
သမ္ပန္နဝိဇ္ဇာစရဏေ ယသသ္သီ၊ ဗဟုသ္သုတေ သီလဝန္တေ ပသန္နေ 3။
Sampannavijjācaraṇe yasassī, bahussute sīlavante pasanne 4;
အန္နဉ္စ ပာနဉ္စ ပသန္နစိတ္တော၊ သက္ကစ္စ ဒာနံ ဝိပုလံ အဒာသိံ။
Annañca pānañca pasannacitto, sakkacca dānaṃ vipulaṃ adāsiṃ.
၁၁၀၆.
1106.
‘‘တေန မေတာဒိသော ဝဏ္ဏော။ပေ.။ဝဏ္ဏော စ မေ သဗ္ဗဒိသာ ပဘာသတီ’’တိ။
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti.
ဒုတိယကုဏ္ဍလီဝိမာနံ နဝမံ။
Dutiyakuṇḍalīvimānaṃ navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဝိမာနဝတ္ထု-အဋ္ဌကထာ • Vimānavatthu-aṭṭhakathā / ၉. ဒုတိယကုဏ္ဍလီဝိမာနဝဏ္ဏနာ • 9. Dutiyakuṇḍalīvimānavaṇṇanā
