| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
দুতিযমগ্গো
Dutiyamaggo
৩৬১. ইদানি দুতিযমগ্গাদীনং দস্সনত্থং পুন কতমে ধম্মা কুসলাতিআদি আরদ্ধং। তত্থ কামরাগব্যাপাদানং তনুভাৰাযাতি এতেসং কিলেসানং তনুভাৰত্থায। তত্থ দ্ৰীহি কারণেহি তনুভাৰো ৰেদিতব্বো – অধিচ্চুপ্পত্তিযা চ পরিযুট্ঠানমন্দতায চ। সকদাগামিস্স হি, ৰট্টানুসারিমহাজনস্সেৰ, কিলেসা অভিণ্হং নুপ্পজ্জন্তি, কদাচি কদাচি উপ্পজ্জন্তি; উপ্পজ্জন্তাপি ৰিরল়াকারা হুত্ৰা উপ্পজ্জন্তি, ৰিরল়ৰাপিতখেত্তে অঙ্কুরা ৰিয। উপ্পজ্জমানাপি, চ ৰট্টানুসারিমহাজনস্সেৰ, মদ্দন্তা ফরন্তা ছাদেন্তা অন্ধকারং করোন্তা নুপ্পজ্জন্তি। দ্ৰীহি পন মগ্গেহি পহীনত্তা মন্দা মন্দা উপ্পজ্জন্তি। তনুকাকারা হুত্ৰা উপ্পজ্জন্তি, অব্ভপটলং ৰিয মক্খিকাপত্তং ৰিয চ।
361. Idāni dutiyamaggādīnaṃ dassanatthaṃ puna katame dhammā kusalātiādi āraddhaṃ. Tattha kāmarāgabyāpādānaṃ tanubhāvāyāti etesaṃ kilesānaṃ tanubhāvatthāya. Tattha dvīhi kāraṇehi tanubhāvo veditabbo – adhiccuppattiyā ca pariyuṭṭhānamandatāya ca. Sakadāgāmissa hi, vaṭṭānusārimahājanasseva, kilesā abhiṇhaṃ nuppajjanti, kadāci kadāci uppajjanti; uppajjantāpi viraḷākārā hutvā uppajjanti, viraḷavāpitakhette aṅkurā viya. Uppajjamānāpi, ca vaṭṭānusārimahājanasseva, maddantā pharantā chādentā andhakāraṃ karontā nuppajjanti. Dvīhi pana maggehi pahīnattā mandā mandā uppajjanti. Tanukākārā hutvā uppajjanti, abbhapaṭalaṃ viya makkhikāpattaṃ viya ca.
তত্থ কেচি থেরা ৰদন্তি – ‘সকদাগামিস্স কিলেসা কিঞ্চাপি চিরেন উপ্পজ্জন্তি, বহলাৰ পন হুত্ৰা উপ্পজ্জন্তি, তথা হিস্স পুত্তা চ ধীতরো চ দিস্সন্তী’তি। এতং পন অপ্পমাণং। পুত্তধীতরো হি অঙ্গপচ্চঙ্গপরামসনমত্তেনপি হোন্তি। দ্ৰীহি পন মগ্গেহি পহীনত্তা নত্থি কিলেসানং বহলতাতি। দ্ৰীহি এৰ কারণেহিস্স কিলেসানং তনুভাৰো ৰেদিতব্বো – অধিচ্চুপ্পত্তিযা চ পরিযুট্ঠানমন্দতায চাতি।
Tattha keci therā vadanti – ‘sakadāgāmissa kilesā kiñcāpi cirena uppajjanti, bahalāva pana hutvā uppajjanti, tathā hissa puttā ca dhītaro ca dissantī’ti. Etaṃ pana appamāṇaṃ. Puttadhītaro hi aṅgapaccaṅgaparāmasanamattenapi honti. Dvīhi pana maggehi pahīnattā natthi kilesānaṃ bahalatāti. Dvīhi eva kāraṇehissa kilesānaṃ tanubhāvo veditabbo – adhiccuppattiyā ca pariyuṭṭhānamandatāya cāti.
দুতিযাযাতি গণনৰসেনাপি দুতিযুপ্পত্তিৰসেনাপি দুতিযায। ভূমিযা পত্তিযাতি সামঞ্ঞফলস্স পটিলাভত্থায। ততিযচতুত্থেসুপি এসেৰ নযো। ৰিসেসমত্তংযেৰ পন ৰক্খাম।
Dutiyāyāti gaṇanavasenāpi dutiyuppattivasenāpi dutiyāya. Bhūmiyā pattiyāti sāmaññaphalassa paṭilābhatthāya. Tatiyacatutthesupi eseva nayo. Visesamattaṃyeva pana vakkhāma.
অঞ্ঞিন্দ্রিযন্তি আজাননকং ইন্দ্রিযং। পঠমমগ্গেন ঞাতমরিযাদং অনতিক্কমিত্ৰা তেসংযেৰ তেন মগ্গেন ঞাতানং চতুসচ্চধম্মানং জাননকং ইন্দ্রিযন্তি ৰুত্তং হোতি। নিদ্দেসৰারেপিস্স ইমিনাৰ নযেন অত্থো ৰেদিতব্বো। কোট্ঠাসৰারেপি ইমিনাৰ সদ্ধিং নৰিন্দ্রিযানি হোন্তি। সেসং পুরিমনযেনেৰ ৰেদিতব্বং।
Aññindriyanti ājānanakaṃ indriyaṃ. Paṭhamamaggena ñātamariyādaṃ anatikkamitvā tesaṃyeva tena maggena ñātānaṃ catusaccadhammānaṃ jānanakaṃ indriyanti vuttaṃ hoti. Niddesavārepissa imināva nayena attho veditabbo. Koṭṭhāsavārepi imināva saddhiṃ navindriyāni honti. Sesaṃ purimanayeneva veditabbaṃ.
দুতিযমগ্গো নিট্ঠিতো।
Dutiyamaggo niṭṭhito.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / লোকুত্তরকুসলং • Lokuttarakusalaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / দুতিযমগ্গৰণ্ণনা • Dutiyamaggavaṇṇanā
