| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
८-९. दुतियमहापञ्हसुत्तादिवण्णना
8-9. Dutiyamahāpañhasuttādivaṇṇanā
२८-२९. अट्ठमे एवंनामकेति कजङ्गलाति एवं इत्थिलिङ्गवसेन लद्धनामके मज्झिमप्पदेसस्स मरियादभूते नगरे। ‘‘निगमे’’तिपि वदन्ति, ‘‘निचुलवने’’तिपि वदन्ति। निचुलं नाम एका रुक्खजाति, ‘‘नीपरुक्खो’’तिपि वदन्ति। तेन सञ्छन्नो महावनसण्डो, तत्थ विहरतीति अत्थो। हेतुना नयेनाति च हेट्ठा वुत्तमेव। ननु च ‘‘एसो चेव तस्स अत्थो’’ति कस्मा वुत्तं। भगवता हि चत्तारोतिआदिपञ्हब्याकरणा चत्तारो आहारा, पञ्चुपादानक्खन्धा, छ अज्झत्तिकानि आयतनानि, सत्त विञ्ञाणट्ठितियो, अट्ठ लोकधम्मा दस्सिता। भिक्खुनिया पन चत्तारो सतिपट्ठाना, पञ्चिन्द्रियानि, छ निस्सारणीया धातुयो, सत्त बोज्झङ्गा, अरियो अट्ठङ्गिको मग्गोति दस्सितधम्मा अञ्ञोयेवत्थो भिक्खुनिया दस्सितोति चोदनं सन्धायाह ‘‘किञ्चापी’’तिआदि। नवमे नत्थि वत्तब्बं।
28-29. Aṭṭhame evaṃnāmaketi kajaṅgalāti evaṃ itthiliṅgavasena laddhanāmake majjhimappadesassa mariyādabhūte nagare. ‘‘Nigame’’tipi vadanti, ‘‘niculavane’’tipi vadanti. Niculaṃ nāma ekā rukkhajāti, ‘‘nīparukkho’’tipi vadanti. Tena sañchanno mahāvanasaṇḍo, tattha viharatīti attho. Hetunā nayenāti ca heṭṭhā vuttameva. Nanu ca ‘‘eso ceva tassa attho’’ti kasmā vuttaṃ. Bhagavatā hi cattārotiādipañhabyākaraṇā cattāro āhārā, pañcupādānakkhandhā, cha ajjhattikāni āyatanāni, satta viññāṇaṭṭhitiyo, aṭṭha lokadhammā dassitā. Bhikkhuniyā pana cattāro satipaṭṭhānā, pañcindriyāni, cha nissāraṇīyā dhātuyo, satta bojjhaṅgā, ariyo aṭṭhaṅgiko maggoti dassitadhammā aññoyevattho bhikkhuniyā dassitoti codanaṃ sandhāyāha ‘‘kiñcāpī’’tiādi. Navame natthi vattabbaṃ.
दुतियमहापञ्हसुत्तादिवण्णना निट्ठिता।
Dutiyamahāpañhasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
८. दुतियमहापञ्हासुत्तं • 8. Dutiyamahāpañhāsuttaṃ
९. पठमकोसलसुत्तं • 9. Paṭhamakosalasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
८. दुतियमहापञ्हसुत्तवण्णना • 8. Dutiyamahāpañhasuttavaṇṇanā
९. पठमकोसलसुत्तवण्णना • 9. Paṭhamakosalasuttavaṇṇanā
