| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. དུཏིཡམཧཱཔཉྷཱསུཏྟཾ
8. Dutiyamahāpañhāsuttaṃ
༢༨. ཨེཀཾ སམཡཾ བྷགཝཱ ཀཛངྒལཱཡཾ ཝིཧརཏི ཝེལུ༹ཝནེ། ཨཐ ཁོ སམྦཧུལཱ ཀཛངྒལཀཱ ཨུཔཱསཀཱ ཡེན ཀཛངྒལིཀཱ བྷིཀྑུནཱི ཏེནུཔསངྐམིཾསུ; ཨུཔསངྐམིཏྭཱ ཀཛངྒལིཀཾ བྷིཀྑུནིཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཀཛངྒལཀཱ ཨུཔཱསཀཱ ཀཛངྒལིཀཾ བྷིཀྑུནིཾ ཨེཏདཝོཙུཾ –
28. Ekaṃ samayaṃ bhagavā kajaṅgalāyaṃ viharati veḷuvane. Atha kho sambahulā kajaṅgalakā upāsakā yena kajaṅgalikā bhikkhunī tenupasaṅkamiṃsu; upasaṅkamitvā kajaṅgalikaṃ bhikkhuniṃ abhivādetvā ekamantaṃ nisīdiṃsu. Ekamantaṃ nisinnā kho kajaṅgalakā upāsakā kajaṅgalikaṃ bhikkhuniṃ etadavocuṃ –
‘‘ཝུཏྟམིདཾ, ཨཡྻེ, བྷགཝཏཱ མཧཱཔཉྷེསུ – ‘ཨེཀོ པཉྷོ ཨེཀོ ཨུདྡེསོ ཨེཀཾ ཝེཡྻཱཀརཎཾ, དྭེ པཉྷཱ དྭེ ཨུདྡེསཱ དྭེ ཝེཡྻཱཀརཎཱནི, ཏཡོ པཉྷཱ ཏཡོ ཨུདྡེསཱ ཏཱིཎི ཝེཡྻཱཀརཎཱནི, ཙཏྟཱརོ པཉྷཱ ཙཏྟཱརོ ཨུདྡེསཱ ཙཏྟཱརི ཝེཡྻཱཀརཎཱནི, པཉྩ པཉྷཱ པཉྩུདྡེསཱ པཉྩ ཝེཡྻཱཀརཎཱནི, ཚ པཉྷཱ ཚ ཨུདྡེསཱ ཚ ཝེཡྻཱཀརཎཱནི, སཏྟ པཉྷཱ སཏྟུདྡེསཱ སཏྟ ཝེཡྻཱཀརཎཱནི, ཨཊྛ པཉྷཱ ཨཊྛུདྡེསཱ ཨཊྛ ཝེཡྻཱཀརཎཱནི, ནཝ པཉྷཱ ནཝུདྡེསཱ ནཝ ཝེཡྻཱཀརཎཱནི, དས པཉྷཱ དསུདྡེསཱ དས ཝེཡྻཱཀརཎཱནཱི’ཏི། ཨིམསྶ ནུ ཁོ, ཨཡྻེ, བྷགཝཏཱ སཾཁིཏྟེན བྷཱསིཏསྶ ཀཐཾ ཝིཏྠཱརེན ཨཏྠོ དཊྛབྦོ’’ཏི?
‘‘Vuttamidaṃ, ayye, bhagavatā mahāpañhesu – ‘eko pañho eko uddeso ekaṃ veyyākaraṇaṃ, dve pañhā dve uddesā dve veyyākaraṇāni, tayo pañhā tayo uddesā tīṇi veyyākaraṇāni, cattāro pañhā cattāro uddesā cattāri veyyākaraṇāni, pañca pañhā pañcuddesā pañca veyyākaraṇāni, cha pañhā cha uddesā cha veyyākaraṇāni, satta pañhā sattuddesā satta veyyākaraṇāni, aṭṭha pañhā aṭṭhuddesā aṭṭha veyyākaraṇāni, nava pañhā navuddesā nava veyyākaraṇāni, dasa pañhā dasuddesā dasa veyyākaraṇānī’ti. Imassa nu kho, ayye, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘ན ཁོ པནེཏཾ, ཨཱཝུསོ, བྷགཝཏོ སམྨུཁཱ སུཏཾ སམྨུཁཱ པཊིགྒཧིཏཾ, ནཔི མནོབྷཱཝནཱིཡཱནཾ བྷིཀྑཱུནཾ སམྨུཁཱ སུཏཾ སམྨུཁཱ པཊིགྒཧིཏཾ; ཨཔི ཙ, ཡཐཱ མེཏྠ ཁཱཡཏི ཏཾ སུཎཱཐ, སཱདྷུཀཾ མནསི ཀརོཐ, བྷཱསིསྶཱམཱི’’ཏི། ‘‘ཨེཝཾ, ཨཡྻེ’’ཏི, ཁོ ཀཛངྒལཀཱ ཨུཔཱསཀཱ ཀཛངྒལིཀཱཡ བྷིཀྑུནིཡཱ པཙྩསྶོསུཾ། ཀཛངྒལིཀཱ བྷིཀྑུནཱི ཨེཏདཝོཙ –
‘‘Na kho panetaṃ, āvuso, bhagavato sammukhā sutaṃ sammukhā paṭiggahitaṃ, napi manobhāvanīyānaṃ bhikkhūnaṃ sammukhā sutaṃ sammukhā paṭiggahitaṃ; api ca, yathā mettha khāyati taṃ suṇātha, sādhukaṃ manasi karotha, bhāsissāmī’’ti. ‘‘Evaṃ, ayye’’ti, kho kajaṅgalakā upāsakā kajaṅgalikāya bhikkhuniyā paccassosuṃ. Kajaṅgalikā bhikkhunī etadavoca –
‘‘‘ཨེཀོ པཉྷོ ཨེཀོ ཨུདྡེསོ ཨེཀཾ ཝེཡྻཱཀརཎ’ནྟི, ཨིཏི ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? ཨེཀདྷམྨེ, ཨཱཝུསོ, བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམསྨིཾ ཨེཀདྷམྨེ? སབྦེ སཏྟཱ ཨཱཧཱརཊྛིཏིཀཱ – ཨིམསྨིཾ ཁོ, ཨཱཝུསོ, ཨེཀདྷམྨེ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘ཨེཀོ པཉྷོ ཨེཀོ ཨུདྡེསོ ཨེཀཾ ཝེཡྻཱཀརཎནྟི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Eko pañho eko uddeso ekaṃ veyyākaraṇa’nti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Ekadhamme, āvuso, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamasmiṃ ekadhamme? Sabbe sattā āhāraṭṭhitikā – imasmiṃ kho, āvuso, ekadhamme bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Eko pañho eko uddeso ekaṃ veyyākaraṇanti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘དྭེ པཉྷཱ དྭེ ཨུདྡེསཱ དྭེ ཝེཡྻཱཀརཎཱནཱི’ཏི ཨིཏི, ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? དྭཱིསུ, ཨཱཝུསོ, དྷམྨེསུ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམེསུ དྭཱིསུ? ནཱམེ ཙ རཱུཔེ ཙ…པེ॰… ཀཏམེསུ ཏཱིསུ? ཏཱིསུ ཝེདནཱསུ – ཨིམེསུ ཁོ, ཨཱཝུསོ, ཏཱིསུ དྷམྨེསུ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘ཏཡོ པཉྷཱ ཏཡོ ཨུདྡེསཱ ཏཱིཎི ཝེཡྻཱཀརཎཱནཱི’ཏི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Dve pañhā dve uddesā dve veyyākaraṇānī’ti iti, kho panetaṃ vuttaṃ bhagavatā. Kiñcetaṃ paṭicca vuttaṃ? Dvīsu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu dvīsu? Nāme ca rūpe ca…pe… katamesu tīsu? Tīsu vedanāsu – imesu kho, āvuso, tīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Tayo pañhā tayo uddesā tīṇi veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘ཙཏྟཱརོ པཉྷཱ ཙཏྟཱརོ ཨུདྡེསཱ ཙཏྟཱརི ཝེཡྻཱཀརཎཱནཱི’ཏི, ཨིཏི ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? ཙཏཱུསུ, ཨཱཝུསོ, དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམེསུ ཙཏཱུསུ? ཙཏཱུསུ སཏིཔཊྛཱནེསུ – ཨིམེསུ ཁོ, ཨཱཝུསོ, ཙཏཱུསུ དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘ཙཏྟཱརོ པཉྷཱ ཙཏྟཱརོ ཨུདྡེསཱ ཙཏྟཱརི ཝེཡྻཱཀརཎཱནཱི’ཏི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Cattāro pañhā cattāro uddesā cattāri veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Catūsu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu catūsu? Catūsu satipaṭṭhānesu – imesu kho, āvuso, catūsu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Cattāro pañhā cattāro uddesā cattāri veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘པཉྩ པཉྷཱ པཉྩུདྡེསཱ པཉྩ ཝེཡྻཱཀརཎཱནཱི’ཏི, ཨིཏི ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? པཉྩསུ, ཨཱཝུསོ, དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམེསུ པཉྩསུ? པཉྩསུ ཨིནྡྲིཡེསུ…པེ॰… ཀཏམེསུ ཚསུ? ཚསུ ནིསྶརཎཱིཡཱསུ དྷཱཏཱུསུ…པེ॰… ཀཏམེསུ སཏྟསུ? སཏྟསུ བོཛ྄ཛྷངྒེསུ…པེ॰… ཀཏམེསུ ཨཊྛསུ? ཨཊྛསུ ཨརིཡཨཊྛངྒིཀམགྒེསུ – ཨིམེསུ ཁོ, ཨཱཝུསོ, ཨཊྛསུ དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘ཨཊྛ པཉྷཱ ཨཊྛུདྡེསཱ ཨཊྛ ཝེཡྻཱཀརཎཱནཱི’ཏི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Pañca pañhā pañcuddesā pañca veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Pañcasu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu pañcasu? Pañcasu indriyesu…pe… katamesu chasu? Chasu nissaraṇīyāsu dhātūsu…pe… katamesu sattasu? Sattasu bojjhaṅgesu…pe… katamesu aṭṭhasu? Aṭṭhasu ariyaaṭṭhaṅgikamaggesu – imesu kho, āvuso, aṭṭhasu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Aṭṭha pañhā aṭṭhuddesā aṭṭha veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘ནཝ པཉྷཱ ནཝུདྡེསཱ ནཝ ཝེཡྻཱཀརཎཱནཱི’ཏི, ཨིཏི ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? ནཝསུ, ཨཱཝུསོ, དྷམྨེསུ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམེསུ ནཝསུ? ནཝསུ སཏྟཱཝཱསེསུ – ཨིམེསུ ཁོ, ཨཱཝུསོ, ནཝསུ དྷམྨེསུ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘ནཝ པཉྷཱ ནཝུདྡེསཱ ནཝ ཝེཡྻཱཀརཎཱནཱི’ཏི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Nava pañhā navuddesā nava veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Navasu, āvuso, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu navasu? Navasu sattāvāsesu – imesu kho, āvuso, navasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Nava pañhā navuddesā nava veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘དས པཉྷཱ དསུདྡེསཱ དས ཝེཡྻཱཀརཎཱནཱི’ཏི, ཨིཏི ཁོ པནེཏཾ ཝུཏྟཾ བྷགཝཏཱ། ཀིཉྩེཏཾ པཊིཙྩ ཝུཏྟཾ? དསསུ, ཨཱཝུསོ, དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ཀཏམེསུ དསསུ? དསསུ ཀུསལེསུ ཀམྨཔཐེསུ – ཨིམེསུ ཁོ, ཨཱཝུསོ, དསསུ དྷམྨེསུ བྷིཀྑུ སམྨཱ སུབྷཱཝིཏཙིཏྟོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི། ‘དས པཉྷཱ དསུདྡེསཱ དས ཝེཡྻཱཀརཎཱནཱི’ཏི, ཨིཏི ཡཾ ཏཾ ཝུཏྟཾ བྷགཝཏཱ ཨིདམེཏཾ པཊིཙྩ ཝུཏྟཾ།
‘‘‘Dasa pañhā dasuddesā dasa veyyākaraṇānī’ti, iti kho panetaṃ vuttaṃ bhagavatā. Kiñcetaṃ paṭicca vuttaṃ? Dasasu, āvuso, dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. Katamesu dasasu? Dasasu kusalesu kammapathesu – imesu kho, āvuso, dasasu dhammesu bhikkhu sammā subhāvitacitto sammā pariyantadassāvī sammadatthaṃ abhisamecca diṭṭheva dhamme dukkhassantakaro hoti. ‘Dasa pañhā dasuddesā dasa veyyākaraṇānī’ti, iti yaṃ taṃ vuttaṃ bhagavatā idametaṃ paṭicca vuttaṃ.
‘‘ཨིཏི ཁོ, ཨཱཝུསོ, ཡཾ ཏཾ ཝུཏྟཾ བྷགཝཏཱ སཾཁིཏྟེན བྷཱསིཏཱསུ མཧཱཔཉྷཱསུ – ‘ཨེཀོ པཉྷོ ཨེཀོ ཨུདྡེསོ ཨེཀཾ ཝེཡྻཱཀརཎཾ…པེ॰… དས པཉྷཱ དསུདྡེསཱ དས ཝེཡྻཱཀརཎཱནཱི’ཏི, ཨིམསྶ ཁོ ཨཧཾ, ཨཱཝུསོ, བྷགཝཏཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠཾ ཨཱཛཱནཱམི། ཨཱཀངྑམཱནཱ ཙ པན ཏུམྷེ, ཨཱཝུསོ, བྷགཝནྟཉྙེཝ ཨུཔསངྐམིཏྭཱ ཨེཏམཏྠཾ པཊིཔུཙྪེཡྻཱཐ། ཡཐཱ ཝོ 1 བྷགཝཱ བྱཱཀརོཏི ཏཐཱ ནཾ དྷཱརེཡྻཱཐཱ’’ཏི། ‘‘ཨེཝཾ, ཨཡྻེ’’ཏི ཁོ ཀཛངྒལཀཱ ཨུཔཱསཀཱ ཀཛངྒལིཀཱཡ ཁོ བྷིཀྑུནིཡཱ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ ཀཛངྒལིཀཾ བྷིཀྑུནིཾ ཨབྷིཝཱདེཏྭཱ པདཀྑིཎཾ ཀཏྭཱ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཀཛངྒལཀཱ ཨུཔཱསཀཱ ཡཱཝཏཀོ ཨཧོསི ཀཛངྒལིཀཱཡ བྷིཀྑུནིཡཱ སདྡྷིཾ ཀཐཱསལླཱཔོ, ཏཾ སབྦཾ བྷགཝཏོ ཨཱརོཙེསུཾ།
‘‘Iti kho, āvuso, yaṃ taṃ vuttaṃ bhagavatā saṃkhittena bhāsitāsu mahāpañhāsu – ‘eko pañho eko uddeso ekaṃ veyyākaraṇaṃ…pe… dasa pañhā dasuddesā dasa veyyākaraṇānī’ti, imassa kho ahaṃ, āvuso, bhagavatā saṃkhittena bhāsitassa evaṃ vitthārena atthaṃ ājānāmi. Ākaṅkhamānā ca pana tumhe, āvuso, bhagavantaññeva upasaṅkamitvā etamatthaṃ paṭipuccheyyātha. Yathā vo 2 bhagavā byākaroti tathā naṃ dhāreyyāthā’’ti. ‘‘Evaṃ, ayye’’ti kho kajaṅgalakā upāsakā kajaṅgalikāya kho bhikkhuniyā bhāsitaṃ abhinanditvā anumoditvā uṭṭhāyāsanā kajaṅgalikaṃ bhikkhuniṃ abhivādetvā padakkhiṇaṃ katvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho kajaṅgalakā upāsakā yāvatako ahosi kajaṅgalikāya bhikkhuniyā saddhiṃ kathāsallāpo, taṃ sabbaṃ bhagavato ārocesuṃ.
‘‘སཱདྷུ སཱདྷུ, གཧཔཏཡོ! པཎྜིཏཱ, གཧཔཏཡོ, ཀཛངྒལིཀཱ བྷིཀྑུནཱི། མཧཱཔཉྙཱ, གཧཔཏཡོ, ཀཛངྒལིཀཱ བྷིཀྑུནཱི། མཉྩེཔི ཏུམྷེ, གཧཔཏཡོ, ཨུཔསངྐམིཏྭཱ ཨེཏམཏྠཾ པཊིཔུཙྪེཡྻཱཐ, ཨཧམྤི ཙེཏཾ ཨེཝམེཝཾ 3 བྱཱཀརེཡྻཾ ཡཐཱ ཏཾ ཀཛངྒལིཀཱཡ བྷིཀྑུནིཡཱ བྱཱཀཏཾ། ཨེསོ ཙེཝ ཏསྶ 4 ཨཏྠོ། ཨེཝཉྩ ནཾ དྷཱརེཡྻཱཐཱ’’ཏི། ཨཊྛམཾ།
‘‘Sādhu sādhu, gahapatayo! Paṇḍitā, gahapatayo, kajaṅgalikā bhikkhunī. Mahāpaññā, gahapatayo, kajaṅgalikā bhikkhunī. Mañcepi tumhe, gahapatayo, upasaṅkamitvā etamatthaṃ paṭipuccheyyātha, ahampi cetaṃ evamevaṃ 5 byākareyyaṃ yathā taṃ kajaṅgalikāya bhikkhuniyā byākataṃ. Eso ceva tassa 6 attho. Evañca naṃ dhāreyyāthā’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. དུཏིཡམཧཱཔཉྷསུཏྟཝཎྞནཱ • 8. Dutiyamahāpañhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨-༩. དུཏིཡམཧཱཔཉྷསུཏྟཱདིཝཎྞནཱ • 8-9. Dutiyamahāpañhasuttādivaṇṇanā
