| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. து³தியமஹாபஞ்ஹஸுத்தவண்ணனா
8. Dutiyamahāpañhasuttavaṇṇanā
28. அட்ட²மே கஜங்க³லாயந்தி ஏவங்னாமகே நக³ரே. கஜங்க³லாதி கஜங்க³லாவாஸினோ. மஹாபஞ்ஹேஸூதி மஹந்தஅத்த²பரிக்³கா³ஹகேஸு பஞ்ஹேஸு. யதா² மெத்த² கா²யதீதி யதா² மே எத்த² உபட்டா²தி. ஸம்மா ஸுபா⁴விதசித்தோதி ஹேதுனா நயேன ஸுட்டு² பா⁴விதசித்தோ. ஏஸோ சேவ தஸ்ஸ அத்தோ²தி கிஞ்சாபி ப⁴க³வதா ‘‘சத்தாரோ த⁴ம்மா’’திஆத³யோ பஞ்ஹா ‘‘சத்தாரோ ஆஹாரா’’திஆதி³னா நயேன விஸ்ஸஜ்ஜிதா, யஸ்மா பன சதூஸு ஆஹாரேஸு பரிஞ்ஞாதேஸு சத்தாரோ ஸதிபட்டா²னா பா⁴விதா ஹொந்தி, தேஸு ச பா⁴விதேஸு சத்தாரோ ஆஹாரா பரிஞ்ஞாதாவ ஹொந்தி. தஸ்மா தே³ஸனாவிலாஸேன ப்³யஞ்ஜனமேவெத்த² நானங், அத்தோ² பன ஏகோயேவ. இந்த்³ரியாதீ³ஸுபி ஏஸேவ நயோ. தேன வுத்தங் – ‘‘ஏஸோ சேவ தஸ்ஸ அத்தோ²’’தி. அத்த²தோ ஹி உப⁴யம்பேதங் மஜ்ஜே² பி⁴ன்னஸுவண்ணமிவ ஹோதி.
28. Aṭṭhame kajaṅgalāyanti evaṃnāmake nagare. Kajaṅgalāti kajaṅgalāvāsino. Mahāpañhesūti mahantaatthapariggāhakesu pañhesu. Yathā mettha khāyatīti yathā me ettha upaṭṭhāti. Sammā subhāvitacittoti hetunā nayena suṭṭhu bhāvitacitto. Eso ceva tassa atthoti kiñcāpi bhagavatā ‘‘cattāro dhammā’’tiādayo pañhā ‘‘cattāro āhārā’’tiādinā nayena vissajjitā, yasmā pana catūsu āhāresu pariññātesu cattāro satipaṭṭhānā bhāvitā honti, tesu ca bhāvitesu cattāro āhārā pariññātāva honti. Tasmā desanāvilāsena byañjanamevettha nānaṃ, attho pana ekoyeva. Indriyādīsupi eseva nayo. Tena vuttaṃ – ‘‘eso ceva tassa attho’’ti. Atthato hi ubhayampetaṃ majjhe bhinnasuvaṇṇamiva hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. து³தியமஹாபஞ்ஹாஸுத்தங் • 8. Dutiyamahāpañhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. து³தியமஹாபஞ்ஹஸுத்தாதி³வண்ணனா • 8-9. Dutiyamahāpañhasuttādivaṇṇanā
