| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. ဒုတိယမဟာပဉ္ဟသုတ္တဝဏ္ဏနာ
8. Dutiyamahāpañhasuttavaṇṇanā
၂၈. အဋ္ဌမေ ကဇင္ဂလာယန္တိ ဧဝံနာမကေ နဂရေ။ ကဇင္ဂလာတိ ကဇင္ဂလာဝာသိနော။ မဟာပဉ္ဟေသူတိ မဟန္တအတ္ထပရိဂ္ဂာဟကေသု ပဉ္ဟေသု။ ယထာ မေတ္ထ ခာယတီတိ ယထာ မေ ဧတ္ထ ဥပဋ္ဌာတိ။ သမ္မာ သုဘာဝိတစိတ္တောတိ ဟေတုနာ နယေန သုဋ္ဌု ဘာဝိတစိတ္တော။ ဧသော စေဝ တသ္သ အတ္ထောတိ ကိဉ္စာပိ ဘဂဝတာ ‘‘စတ္တာရော ဓမ္မာ’’တိအာဒယော ပဉ္ဟာ ‘‘စတ္တာရော အာဟာရာ’’တိအာဒိနာ နယေန ဝိသ္သဇ္ဇိတာ, ယသ္မာ ပန စတူသု အာဟာရေသု ပရိညာတေသု စတ္တာရော သတိပဋ္ဌာနာ ဘာဝိတာ ဟောန္တိ, တေသု စ ဘာဝိတေသု စတ္တာရော အာဟာရာ ပရိညာတာဝ ဟောန္တိ။ တသ္မာ ဒေသနာဝိလာသေန ဗ္ယဉ္ဇနမေဝေတ္ထ နာနံ, အတ္ထော ပန ဧကောယေဝ။ ဣန္ဒ္ရိယာဒီသုပိ ဧသေဝ နယော။ တေန ဝုတ္တံ – ‘‘ဧသော စေဝ တသ္သ အတ္ထော’’တိ။ အတ္ထတော ဟိ ဥဘယမ္ပေတံ မဇ္ဈေ ဘိန္နသုဝဏ္ဏမိဝ ဟောတိ။
28. Aṭṭhame kajaṅgalāyanti evaṃnāmake nagare. Kajaṅgalāti kajaṅgalāvāsino. Mahāpañhesūti mahantaatthapariggāhakesu pañhesu. Yathā mettha khāyatīti yathā me ettha upaṭṭhāti. Sammā subhāvitacittoti hetunā nayena suṭṭhu bhāvitacitto. Eso ceva tassa atthoti kiñcāpi bhagavatā ‘‘cattāro dhammā’’tiādayo pañhā ‘‘cattāro āhārā’’tiādinā nayena vissajjitā, yasmā pana catūsu āhāresu pariññātesu cattāro satipaṭṭhānā bhāvitā honti, tesu ca bhāvitesu cattāro āhārā pariññātāva honti. Tasmā desanāvilāsena byañjanamevettha nānaṃ, attho pana ekoyeva. Indriyādīsupi eseva nayo. Tena vuttaṃ – ‘‘eso ceva tassa attho’’ti. Atthato hi ubhayampetaṃ majjhe bhinnasuvaṇṇamiva hoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ဒုတိယမဟာပဉ္ဟာသုတ္တံ • 8. Dutiyamahāpañhāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈-၉. ဒုတိယမဟာပဉ္ဟသုတ္တာဒိဝဏ္ဏနာ • 8-9. Dutiyamahāpañhasuttādivaṇṇanā
