| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. දුතියමහාපථවීසුත්‌තං
6. Dutiyamahāpathavīsuttaṃ
1126. ‘‘සෙය්‍යථාපි , භික්‌ඛවෙ, මහාපථවී පරික්‌ඛයං පරියාදානං ගච්‌ඡෙය්‍ය ඨපෙත්‌වා සත්‌ත කොලට්‌ඨිමත්‌තියො ගුළිකා. තං කිං මඤ්‌ඤථ, භික්‌ඛවෙ, කතමං නු ඛො බහුතරං – යං වා මහාපථවියා පරික්‌ඛීණං පරියාදින්‌නං , යා වා සත්‌ත කොලට්‌ඨිමත්‌තියො ගුළිකා අවසිට්‌ඨා’’ති? ‘‘එතදෙව, භන්‌තෙ, බහුතරං මහාපථවියා යදිදං පරික්‌ඛීණං පරියාදින්‌නං; අප්‌පමත්‌තිකා සත්‌ත කොලට්‌ඨිමත්‌තියො ගුළිකා අවසිට්‌ඨා. සඞ්‌ඛම්‌පි න උපෙන්‌ති, උපනිධම්‌පි න උපෙන්‌ති, කලභාගම්‌පි න උපෙන්‌ති මහාපථවියා පරික්‌ඛීණං පරියාදින්‌නං උපනිධාය සත්‌ත කොලට්‌ඨිමත්‌තියො ගුළිකා අවසිට්‌ඨා’’ති. ‘‘එවමෙව ඛො, භික්‌ඛවෙ, අරියසාවකස්‌ස…පෙ.… යොගො කරණීයො’’ති. ඡට්‌ඨං.
1126. ‘‘Seyyathāpi , bhikkhave, mahāpathavī parikkhayaṃ pariyādānaṃ gaccheyya ṭhapetvā satta kolaṭṭhimattiyo guḷikā. Taṃ kiṃ maññatha, bhikkhave, katamaṃ nu kho bahutaraṃ – yaṃ vā mahāpathaviyā parikkhīṇaṃ pariyādinnaṃ , yā vā satta kolaṭṭhimattiyo guḷikā avasiṭṭhā’’ti? ‘‘Etadeva, bhante, bahutaraṃ mahāpathaviyā yadidaṃ parikkhīṇaṃ pariyādinnaṃ; appamattikā satta kolaṭṭhimattiyo guḷikā avasiṭṭhā. Saṅkhampi na upenti, upanidhampi na upenti, kalabhāgampi na upenti mahāpathaviyā parikkhīṇaṃ pariyādinnaṃ upanidhāya satta kolaṭṭhimattiyo guḷikā avasiṭṭhā’’ti. ‘‘Evameva kho, bhikkhave, ariyasāvakassa…pe… yogo karaṇīyo’’ti. Chaṭṭhaṃ.
