| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. དུཏིཡམརཎསྶཏིསུཏྟཾ
4. Dutiyamaraṇassatisuttaṃ
༧༤. ཨེཀཾ སམཡཾ བྷགཝཱ ནཱཏིཀེ ཝིཧརཏི གིཉྫཀཱཝསཐེ། ཏཏྲ ཁོ བྷགཝཱ བྷིཀྑཱུ ཨཱམནྟེསི …པེ॰… མརཎསྶཏི, བྷིཀྑཝེ, བྷཱཝིཏཱ བཧུལཱིཀཏཱ མཧཔྥལཱ ཧོཏི མཧཱནིསཾསཱ ཨམཏོགདྷཱ ཨམཏཔརིཡོསཱནཱ།
74. Ekaṃ samayaṃ bhagavā nātike viharati giñjakāvasathe. Tatra kho bhagavā bhikkhū āmantesi …pe… maraṇassati, bhikkhave, bhāvitā bahulīkatā mahapphalā hoti mahānisaṃsā amatogadhā amatapariyosānā.
‘‘ཀཐཾ བྷཱཝིཏཱ ཙ, བྷིཀྑཝེ, མརཎསྶཏི ཀཐཾ བཧུལཱིཀཏཱ མཧཔྥལཱ ཧོཏི མཧཱནིསཾསཱ ཨམཏོགདྷཱ ཨམཏཔརིཡོསཱནཱ? ཨིདྷ, བྷིཀྑཝེ, བྷིཀྑུ དིཝསེ ནིཀྑནྟེ རཏྟིཡཱ པཏིཧིཏཱཡ 1 ཨིཏི པཊིསཉྩིཀྑཏི – ‘བཧུཀཱ ཁོ མེ པཙྩཡཱ མརཎསྶ – ཨཧི ཝཱ མཾ ཌཾསེཡྻ, ཝིཙྪིཀོ ཝཱ མཾ ཌཾསེཡྻ, སཏཔདཱི ཝཱ མཾ ཌཾསེཡྻ; ཏེན མེ ཨསྶ ཀཱལཀིརིཡཱ། སོ མམ ཨསྶ 2 ཨནྟརཱཡོ། ཨུཔཀྑལིཏྭཱ ཝཱ པཔཏེཡྻཾ, བྷཏྟཾ ཝཱ མེ བྷུཏྟཾ བྱཱཔཛྫེཡྻ, པིཏྟཾ ཝཱ མེ ཀུཔྤེཡྻ, སེམྷཾ ཝཱ མེ ཀུཔྤེཡྻ, སཏྠཀཱ ཝཱ མེ ཝཱཏཱ ཀུཔྤེཡྻུཾ , མནུསྶཱ ཝཱ མཾ ཨུཔཀྐམེཡྻུཾ, ཨམནུསྶཱ ཝཱ མཾ ཨུཔཀྐམེཡྻུཾ; ཏེན མེ ཨསྶ ཀཱལཀིརིཡཱ། སོ མམ ཨསྶ ཨནྟརཱཡོ’ཏི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཏྠི ནུ ཁོ མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ རཏྟིཾ ཀཱལཾ ཀརོནྟསྶ ཨནྟརཱཡཱཡཱ’’’ཏི།
‘‘Kathaṃ bhāvitā ca, bhikkhave, maraṇassati kathaṃ bahulīkatā mahapphalā hoti mahānisaṃsā amatogadhā amatapariyosānā? Idha, bhikkhave, bhikkhu divase nikkhante rattiyā patihitāya 3 iti paṭisañcikkhati – ‘bahukā kho me paccayā maraṇassa – ahi vā maṃ ḍaṃseyya, vicchiko vā maṃ ḍaṃseyya, satapadī vā maṃ ḍaṃseyya; tena me assa kālakiriyā. So mama assa 4 antarāyo. Upakkhalitvā vā papateyyaṃ, bhattaṃ vā me bhuttaṃ byāpajjeyya, pittaṃ vā me kuppeyya, semhaṃ vā me kuppeyya, satthakā vā me vātā kuppeyyuṃ , manussā vā maṃ upakkameyyuṃ, amanussā vā maṃ upakkameyyuṃ; tena me assa kālakiriyā. So mama assa antarāyo’ti. Tena, bhikkhave, bhikkhunā iti paṭisañcikkhitabbaṃ – ‘atthi nu kho me pāpakā akusalā dhammā appahīnā ye me assu rattiṃ kālaṃ karontassa antarāyāyā’’’ti.
‘‘སཙེ, བྷིཀྑཝེ, བྷིཀྑུ པཙྩཝེཀྑམཱནོ ཨེཝཾ ཛཱནཱཏི – ‘ཨཏྠི མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ རཏྟིཾ ཀཱལཾ ཀརོནྟསྶ ཨནྟརཱཡཱཡཱ’ཏི, ཏེན, བྷིཀྑཝེ, བྷིཀྑུནཱ ཏེསཾཡེཝ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཨདྷིམཏྟོ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ ཀརཎཱིཡཾ།
‘‘Sace, bhikkhave, bhikkhu paccavekkhamāno evaṃ jānāti – ‘atthi me pāpakā akusalā dhammā appahīnā ye me assu rattiṃ kālaṃ karontassa antarāyāyā’ti, tena, bhikkhave, bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘སེཡྻཐཱཔི, བྷིཀྑཝེ, ཨཱདིཏྟཙེལོ ཝཱ ཨཱདིཏྟསཱིསོ ཝཱ ཏསྶེཝ ཙེལསྶ ཝཱ སཱིསསྶ ཝཱ ནིབྦཱཔནཱཡ ཨདྷིམཏྟཾ ཚནྡཉྩ ཝཱཡཱམཉྩ ཨུསྶཱཧཉྩ ཨུསྶོལ༹ྷིཉྩ ཨཔྤཊིཝཱནིཉྩ སཏིཉྩ སམྤཛཉྙཉྩ ཀརེཡྻ; ཨེཝམེཝཾ ཁོ, བྷིཀྑཝེ, ཏེན བྷིཀྑུནཱ ཏེསཾཡེཝ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཨདྷིམཏྟོ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ ཀརཎཱིཡཾ།
‘‘Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṃ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya; evamevaṃ kho, bhikkhave, tena bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘སཙེ པན, བྷིཀྑཝེ, བྷིཀྑུ པཙྩཝེཀྑམཱནོ ཨེཝཾ ཛཱནཱཏི – ‘ནཏྠི མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ རཏྟིཾ ཀཱལཾ ཀརོནྟསྶ ཨནྟརཱཡཱཡཱ’ཏི , ཏེན, བྷིཀྑཝེ, བྷིཀྑུནཱ ཏེནེཝ པཱིཏིཔཱམོཛྫེན ཝིཧཱཏབྦཾ ཨཧོརཏྟཱནུསིཀྑིནཱ ཀུསལེསུ དྷམྨེསུ།
‘‘Sace pana, bhikkhave, bhikkhu paccavekkhamāno evaṃ jānāti – ‘natthi me pāpakā akusalā dhammā appahīnā ye me assu rattiṃ kālaṃ karontassa antarāyāyā’ti , tena, bhikkhave, bhikkhunā teneva pītipāmojjena vihātabbaṃ ahorattānusikkhinā kusalesu dhammesu.
‘‘ཨིདྷ པན, བྷིཀྑཝེ, བྷིཀྑུ རཏྟིཡཱ ནིཀྑནྟཱཡ དིཝསེ པཏིཧིཏེ ཨིཏི པཊིསཉྩིཀྑཏི – ‘བཧུཀཱ ཁོ མེ པཙྩཡཱ མརཎསྶ – ཨཧི ཝཱ མཾ ཌཾསེཡྻ, ཝིཙྪིཀོ ཝཱ མཾ ཌཾསེཡྻ, སཏཔདཱི ཝཱ མཾ ཌཾསེཡྻ; ཏེན མེ ཨསྶ ཀཱལཀིརིཡཱ། སོ མམ ཨསྶ ཨནྟརཱཡོ། ཨུཔཀྑལིཏྭཱ ཝཱ པཔཏེཡྻཾ, བྷཏྟཾ ཝཱ མེ བྷུཏྟཾ བྱཱཔཛྫེཡྻ, པིཏྟཾ ཝཱ མེ ཀུཔྤེཡྻ, སེམྷཾ ཝཱ མེ ཀུཔྤེཡྻ, སཏྠཀཱ ཝཱ མེ ཝཱཏཱ ཀུཔྤེཡྻུཾ, མནུསྶཱ ཝཱ མཾ ཨུཔཀྐམེཡྻུཾ, ཨམནུསྶཱ ཝཱ མཾ ཨུཔཀྐམེཡྻུཾ; ཏེན མེ ཨསྶ ཀཱལཀིརིཡཱ། སོ མམ ཨསྶ ཨནྟརཱཡོ’ཏི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཏྠི ནུ ཁོ མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ དིཝཱ ཀཱལཾ ཀརོནྟསྶ ཨནྟརཱཡཱཡཱ’’’ཏི།
‘‘Idha pana, bhikkhave, bhikkhu rattiyā nikkhantāya divase patihite iti paṭisañcikkhati – ‘bahukā kho me paccayā maraṇassa – ahi vā maṃ ḍaṃseyya, vicchiko vā maṃ ḍaṃseyya, satapadī vā maṃ ḍaṃseyya; tena me assa kālakiriyā. So mama assa antarāyo. Upakkhalitvā vā papateyyaṃ, bhattaṃ vā me bhuttaṃ byāpajjeyya, pittaṃ vā me kuppeyya, semhaṃ vā me kuppeyya, satthakā vā me vātā kuppeyyuṃ, manussā vā maṃ upakkameyyuṃ, amanussā vā maṃ upakkameyyuṃ; tena me assa kālakiriyā. So mama assa antarāyo’ti. Tena, bhikkhave, bhikkhunā iti paṭisañcikkhitabbaṃ – ‘atthi nu kho me pāpakā akusalā dhammā appahīnā ye me assu divā kālaṃ karontassa antarāyāyā’’’ti.
‘‘སཙེ , བྷིཀྑཝེ, བྷིཀྑུ པཙྩཝེཀྑམཱནོ ཨེཝཾ ཛཱནཱཏི – ‘ཨཏྠི མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ དིཝཱ ཀཱལཾ ཀརོནྟསྶ ཨནྟརཱཡཱཡཱ’ཏི, ཏེན, བྷིཀྑཝེ, བྷིཀྑུནཱ ཏེསཾཡེཝ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཨདྷིམཏྟོ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ ཀརཎཱིཡཾ།
‘‘Sace , bhikkhave, bhikkhu paccavekkhamāno evaṃ jānāti – ‘atthi me pāpakā akusalā dhammā appahīnā ye me assu divā kālaṃ karontassa antarāyāyā’ti, tena, bhikkhave, bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘སེཡྻཐཱཔི, བྷིཀྑཝེ, ཨཱདིཏྟཙེལོ ཝཱ ཨཱདིཏྟསཱིསོ ཝཱ ཏསྶེཝ ཙེལསྶ ཝཱ སཱིསསྶ ཝཱ ནིབྦཱཔནཱཡ ཨདྷིམཏྟཾ ཚནྡཉྩ ཝཱཡཱམཉྩ ཨུསྶཱཧཉྩ ཨུསྶོལ༹ྷིཉྩ ཨཔྤཊིཝཱནིཉྩ སཏིཉྩ སམྤཛཉྙཉྩ ཀརེཡྻ; ཨེཝམེཝཾ ཁོ, བྷིཀྑཝེ, ཏེན བྷིཀྑུནཱ ཏེསཾཡེཝ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཨདྷིམཏྟོ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ ཀརཎཱིཡཾ།
‘‘Seyyathāpi, bhikkhave, ādittacelo vā ādittasīso vā tasseva celassa vā sīsassa vā nibbāpanāya adhimattaṃ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya; evamevaṃ kho, bhikkhave, tena bhikkhunā tesaṃyeva pāpakānaṃ akusalānaṃ dhammānaṃ pahānāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘སཙེ པན, བྷིཀྑཝེ, བྷིཀྑུ པཙྩཝེཀྑམཱནོ ཨེཝཾ ཛཱནཱཏི – ‘ནཏྠི མེ པཱཔཀཱ ཨཀུསལཱ དྷམྨཱ ཨཔྤཧཱིནཱ ཡེ མེ ཨསྶུ དིཝཱ ཀཱལཾ ཀརོནྟསྶ ཨནྟརཱཡཱཡཱ’ཏི, ཏེན, བྷིཀྑཝེ, བྷིཀྑུནཱ ཏེནེཝ པཱིཏིཔཱམོཛྫེན ཝིཧཱཏབྦཾ ཨཧོརཏྟཱནུསིཀྑིནཱ ཀུསལེསུ དྷམྨེསུ། ཨེཝཾ བྷཱཝིཏཱ ཁོ, བྷིཀྑཝེ, མརཎསྶཏི ཨེཝཾ བཧུལཱིཀཏཱ མཧཔྥལཱ ཧོཏི མཧཱནིསཾསཱ ཨམཏོགདྷཱ ཨམཏཔརིཡོསཱནཱ’’ཏི། ཙཏུཏྠཾ།
‘‘Sace pana, bhikkhave, bhikkhu paccavekkhamāno evaṃ jānāti – ‘natthi me pāpakā akusalā dhammā appahīnā ye me assu divā kālaṃ karontassa antarāyāyā’ti, tena, bhikkhave, bhikkhunā teneva pītipāmojjena vihātabbaṃ ahorattānusikkhinā kusalesu dhammesu. Evaṃ bhāvitā kho, bhikkhave, maraṇassati evaṃ bahulīkatā mahapphalā hoti mahānisaṃsā amatogadhā amatapariyosānā’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣-༩. མརཎསྶཏིསུཏྟདྭཡཱདིཝཎྞནཱ • 3-9. Maraṇassatisuttadvayādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སདྡྷཱསུཏྟཱདིཝཎྞནཱ • 1-10. Saddhāsuttādivaṇṇanā
