| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
१०. दुतियमरणस्सतिसुत्तवण्णना
10. Dutiyamaraṇassatisuttavaṇṇanā
२०. दसमे निक्खन्तेति वीतिवत्ते। पतिगतायाति पच्चागताय, सम्पत्तायाति अत्थो। तेनाह ‘‘पटिपन्नाया’’ति। सो ममस्स अन्तरायोति यथावुत्ता न केवलं कालकिरियाव, मम अतिदुल्लभं खणं लभित्वा तस्स सत्थुसासनमनसिकारस्स चेव जीवितस्स च सग्गमोक्खानञ्च अन्तरायो अस्स, भवेय्याति अत्थो। तेनाह ‘‘तिविधो अन्तरायो’’तिआदि। विपज्जेय्याति विपत्तिं गच्छेय्य। सत्थकेन विय अङ्गपच्चङ्गानं कन्तनकारका काये सन्धिबन्धनच्छेदकवाता सत्थकवाता। कत्तुकम्यताछन्दोति निय्यानावहो कत्तुकम्यताकुसलच्छन्दो। पयोगवीरियन्ति भावनानुयोगवीरियं। न पटिवाति न पटिनिवत्ततीति अप्पटिवानी, अन्तरा वोसानानापज्जनवीरियं। तेनाह ‘‘अनुक्कण्ठना अप्पटिसङ्घरणा’’ति।
20. Dasame nikkhanteti vītivatte. Patigatāyāti paccāgatāya, sampattāyāti attho. Tenāha ‘‘paṭipannāyā’’ti. So mamassa antarāyoti yathāvuttā na kevalaṃ kālakiriyāva, mama atidullabhaṃ khaṇaṃ labhitvā tassa satthusāsanamanasikārassa ceva jīvitassa ca saggamokkhānañca antarāyo assa, bhaveyyāti attho. Tenāha ‘‘tividho antarāyo’’tiādi. Vipajjeyyāti vipattiṃ gaccheyya. Satthakena viya aṅgapaccaṅgānaṃ kantanakārakā kāye sandhibandhanacchedakavātā satthakavātā. Kattukamyatāchandoti niyyānāvaho kattukamyatākusalacchando. Payogavīriyanti bhāvanānuyogavīriyaṃ. Na paṭivāti na paṭinivattatīti appaṭivānī, antarā vosānānāpajjanavīriyaṃ. Tenāha ‘‘anukkaṇṭhanā appaṭisaṅgharaṇā’’ti.
दुतियमरणस्सतिसुत्तवण्णना निट्ठिता।
Dutiyamaraṇassatisuttavaṇṇanā niṭṭhitā.
सारणीयवग्गवण्णना निट्ठिता।
Sāraṇīyavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १०. दुतियमरणस्सतिसुत्तं • 10. Dutiyamaraṇassatisuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १०. दुतियमरणस्सतिसुत्तवण्णना • 10. Dutiyamaraṇassatisuttavaṇṇanā
