| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. দুতিযমারপাসসুত্তং
5. Dutiyamārapāsasuttaṃ
১৪১. একং সমযং ভগৰা বারাণসিযং ৰিহরতি ইসিপতনে মিগদাযে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
141. Ekaṃ samayaṃ bhagavā bārāṇasiyaṃ viharati isipatane migadāye. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘মুত্তাহং, ভিক্খৰে, সব্বপাসেহি যে দিব্বা যে চ মানুসা। তুম্হেপি, ভিক্খৰে, মুত্তা সব্বপাসেহি যে দিব্বা যে চ মানুসা। চরথ, ভিক্খৰে, চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং। মা একেন দ্ৰে অগমিত্থ। দেসেথ, ভিক্খৰে, ধম্মং আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেথ। সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি। ভৰিস্সন্তি ধম্মস্স অঞ্ঞাতারো। অহম্পি, ভিক্খৰে, যেন উরুৰেলা সেনানিগমো তেনুপসঙ্কমিস্সামি ধম্মদেসনাযা’’তি। অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
‘‘Muttāhaṃ, bhikkhave, sabbapāsehi ye dibbā ye ca mānusā. Tumhepi, bhikkhave, muttā sabbapāsehi ye dibbā ye ca mānusā. Caratha, bhikkhave, cārikaṃ bahujanahitāya bahujanasukhāya lokānukampāya atthāya hitāya sukhāya devamanussānaṃ. Mā ekena dve agamittha. Desetha, bhikkhave, dhammaṃ ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsetha. Santi sattā apparajakkhajātikā, assavanatā dhammassa parihāyanti. Bhavissanti dhammassa aññātāro. Ahampi, bhikkhave, yena uruvelā senānigamo tenupasaṅkamissāmi dhammadesanāyā’’ti. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘বদ্ধোসি সব্বপাসেহি, যে দিব্বা যে চ মানুসা।
‘‘Baddhosi sabbapāsehi, ye dibbā ye ca mānusā;
মহাবন্ধনবদ্ধোসি, ন মে সমণ মোক্খসী’’তি॥
Mahābandhanabaddhosi, na me samaṇa mokkhasī’’ti.
‘‘মুত্তাহং সব্বপাসেহি, যে দিব্বা যে চ মানুসা।
‘‘Muttāhaṃ sabbapāsehi, ye dibbā ye ca mānusā;
মহাবন্ধনমুত্তোম্হি, নিহতো ত্ৰমসি অন্তকা’’তি॥
Mahābandhanamuttomhi, nihato tvamasi antakā’’ti.
অথ খো মারো পাপিমা…পে॰… তত্থেৰন্তরধাযীতি।
Atha kho māro pāpimā…pe… tatthevantaradhāyīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. দুতিযমারপাসসুত্তৰণ্ণনা • 5. Dutiyamārapāsasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. দুতিযমারপাসসুত্তৰণ্ণনা • 5. Dutiyamārapāsasuttavaṇṇanā
