| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. දුතියමාරපාසසුත්‌තං
2. Dutiyamārapāsasuttaṃ
115. ‘‘සන්‌ති, භික්‌ඛවෙ, චක්‌ඛුවිඤ්‌ඤෙය්‍යා රූපා, ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු අභිනන්‌දති අභිවදති අජ්‌ඣොසාය තිට්‌ඨති – අයං වුච්‌චති, භික්‌ඛවෙ, භික්‌ඛු බද්‌ධො චක්‌ඛුවිඤ්‌ඤෙය්‍යෙසු රූපෙසු, ආවාසගතො මාරස්‌ස, මාරස්‌ස වසං ගතො, පටිමුක්‌කස්‌ස මාරපාසො. බද්‌ධො සො මාරබන්‌ධනෙන යථාකාමකරණීයො පාපිමතො…පෙ.….
115. ‘‘Santi, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho cakkhuviññeyyesu rūpesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘සන්‌ති, භික්‌ඛවෙ, ජිව්‌හාවිඤ්‌ඤෙය්‍යා රසා…පෙ.… සන්‌ති, භික්‌ඛවෙ, මනොවිඤ්‌ඤෙය්‍යා ධම්‌මා, ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු අභිනන්‌දති අභිවදති අජ්‌ඣොසාය තිට්‌ඨති – අයං වුච්‌චති, භික්‌ඛවෙ, භික්‌ඛු බද්‌ධො මනොවිඤ්‌ඤෙය්‍යෙසු ධම්‌මෙසු, ආවාසගතො මාරස්‌ස, මාරස්‌ස වසං ගතො, පටිමුක්‌කස්‌ස මාරපාසො. බද්‌ධො සො මාරබන්‌ධනෙන යථාකාමකරණීයො පාපිමතො…පෙ.….
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho manoviññeyyesu dhammesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘සන්‌ති ච ඛො, භික්‌ඛවෙ, චක්‌ඛුවිඤ්‌ඤෙය්‍යා රූපා, ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති – අයං වුච්‌චති, භික්‌ඛවෙ , භික්‌ඛු මුත්‌තො චක්‌ඛුවිඤ්‌ඤෙය්‍යෙහි රූපෙහි, නාවාසගතො මාරස්‌ස, න මාරස්‌ස වසං ගතො, උම්‌මුක්‌කස්‌ස මාරපාසො. මුත්‌තො සො මාරබන්‌ධනෙන න යථාකාමකරණීයො පාපිමතො…පෙ.….
‘‘Santi ca kho, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave , bhikkhu mutto cakkhuviññeyyehi rūpehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato…pe….
‘‘සන්‌ති, භික්‌ඛවෙ, ජිව්‌හාවිඤ්‌ඤෙය්‍යා රසා…පෙ.… සන්‌ති, භික්‌ඛවෙ, මනොවිඤ්‌ඤෙය්‍යා ධම්‌මා, ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති – අයං වුච්‌චති, භික්‌ඛවෙ, භික්‌ඛු මුත්‌තො මනොවිඤ්‌ඤෙය්‍යෙහි ධම්‌මෙහි, නාවාසගතො මාරස්‌ස, න මාරස්‌ස වසං ගතො, උම්‌මුක්‌කස්‌ස මාරපාසො. මුත්‌තො සො මාරබන්‌ධනෙන න යථාකාමකරණීයො පාපිමතො’’ති. දුතියං.
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave, bhikkhu mutto manoviññeyyehi dhammehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-2. පඨමමාරපාසසුත්‌තාදිවණ්‌ණනා • 1-2. Paṭhamamārapāsasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-2. පඨමමාරපාසසුත්‌තාදිවණ්‌ණනා • 1-2. Paṭhamamārapāsasuttādivaṇṇanā
