| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ဒုတိယမာရပာသသုတ္တဝဏ္ဏနာ
5. Dutiyamārapāsasuttavaṇṇanā
၁၄၁. ပဉ္စမေ မုတ္တာဟန္တိ မုတ္တော အဟံ။ ပုရိမံ သုတ္တံ အန္တောဝသ္သေ ဝုတ္တံ, ဣဒံ ပန ပဝာရေတ္ဝာ ဝုဋ္ဌဝသ္သကာလေ။ စာရိကန္တိ အနုပုဗ္ဗဂမနစာရိကံ။ (ပဝာရေတ္ဝာ) ဒိဝသေ ဒိဝသေ ယောဇနပရမံ ဂစ္ဆန္တာ စရထာတိ ဝဒတိ။ မာ ဧကေန ဒ္ဝေတိ ဧကမဂ္ဂေန ဒ္ဝေ ဇနာ မာ အဂမိတ္ထ။ ဧဝဉ္ဟိ ဂတေသု ဧကသ္မိံ ဓမ္မံ ဒေသေန္တေ, ဧကေန တုဏ္ဟီဘူတေန ဌာတဗ္ဗံ ဟောတိ။ တသ္မာ ဧဝမာဟ။
141. Pañcame muttāhanti mutto ahaṃ. Purimaṃ suttaṃ antovasse vuttaṃ, idaṃ pana pavāretvā vuṭṭhavassakāle. Cārikanti anupubbagamanacārikaṃ. (Pavāretvā) divase divase yojanaparamaṃ gacchantā carathāti vadati. Mā ekena dveti ekamaggena dve janā mā agamittha. Evañhi gatesu ekasmiṃ dhammaṃ desente, ekena tuṇhībhūtena ṭhātabbaṃ hoti. Tasmā evamāha.
အာဒိကလ္ယာဏန္တိ အာဒိမ္ဟိ ကလ္ယာဏံ သုန္ဒရံ ဘဒ္ဒကံ။ တထာ မဇ္ဈပရိယောသာနေသု။ အာဒိမဇ္ဈပရိယောသာနဉ္စ နာမေတံ သာသနသ္သ စ ဒေသနာယ စ ဝသေန ဒုဝိဓံ။ တတ္ထ သာသနသ္သ သီလံ အာဒိ, သမထဝိပသ္သနာမဂ္ဂာ မဇ္ဈံ, ဖလနိဗ္ဗာနာနိ ပရိယောသာနံ။ သီလသမာဓယော ဝာ အာဒိ , ဝိပသ္သနာမဂ္ဂာ မဇ္ဈံ, ဖလနိဗ္ဗာနာနိ ပရိယောသာနံ။ သီလသမာဓိဝိပသ္သနာ ဝာ အာဒိ, မဂ္ဂော မဇ္ဈံ, ဖလနိဗ္ဗာနာနိ ပရိယောသာနံ။ ဒေသနာယ ပန စတုပ္ပဒိကာယ ဂာထာယ တာဝ ပဌမပာဒော အာဒိ, ဒုတိယတတိယာ မဇ္ဈံ, စတုတ္ထော ပရိယောသာနံ။ ပဉ္စပဒဆပ္ပဒာနံ ပဌမပာဒော အာဒိ, အဝသာနပာဒော ပရိယောသာနံ, အဝသေသာ မဇ္ဈံ။ ဧကာနုသန္ဓိကသုတ္တသ္သ နိဒာနံ အာဒိ, ‘‘ဣဒမဝောစာ’’တိ ပရိယောသာနံ, သေသံ မဇ္ဈံ။ အနေကာနုသန္ဓိကသ္သ မဇ္ဈေ ဗဟူပိ အနုသန္ဓိ မဇ္ဈမေဝ, နိဒာနံ အာဒိ, ‘‘ဣဒမဝောစာ’’တိ ပရိယောသာနံ။
Ādikalyāṇanti ādimhi kalyāṇaṃ sundaraṃ bhaddakaṃ. Tathā majjhapariyosānesu. Ādimajjhapariyosānañca nāmetaṃ sāsanassa ca desanāya ca vasena duvidhaṃ. Tattha sāsanassa sīlaṃ ādi, samathavipassanāmaggā majjhaṃ, phalanibbānāni pariyosānaṃ. Sīlasamādhayo vā ādi , vipassanāmaggā majjhaṃ, phalanibbānāni pariyosānaṃ. Sīlasamādhivipassanā vā ādi, maggo majjhaṃ, phalanibbānāni pariyosānaṃ. Desanāya pana catuppadikāya gāthāya tāva paṭhamapādo ādi, dutiyatatiyā majjhaṃ, catuttho pariyosānaṃ. Pañcapadachappadānaṃ paṭhamapādo ādi, avasānapādo pariyosānaṃ, avasesā majjhaṃ. Ekānusandhikasuttassa nidānaṃ ādi, ‘‘idamavocā’’ti pariyosānaṃ, sesaṃ majjhaṃ. Anekānusandhikassa majjhe bahūpi anusandhi majjhameva, nidānaṃ ādi, ‘‘idamavocā’’ti pariyosānaṃ.
သာတ္ထန္တိ သာတ္ထကံ ကတ္ဝာ ဒေသေထ။ သဗ္ယဉ္ဇနန္တိ ဗ္ယဉ္ဇနေဟိ စေဝ ပဒေဟိ စ ပရိပူရံ ကတ္ဝာ ဒေသေထ။ ကေဝလပရိပုဏ္ဏန္တိ သကလပရိပုဏ္ဏံ။ ပရိသုဒ္ဓန္တိ နိရုပက္ကိလေသံ။ ဗ္ရဟ္မစရိယန္တိ သိက္ခတ္တယသင္ဂဟံ သာသနဗ္ရဟ္မစရိယံ။ ပကာသေထာတိ အာဝိကရောထ။
Sātthanti sātthakaṃ katvā desetha. Sabyañjananti byañjanehi ceva padehi ca paripūraṃ katvā desetha. Kevalaparipuṇṇanti sakalaparipuṇṇaṃ. Parisuddhanti nirupakkilesaṃ. Brahmacariyanti sikkhattayasaṅgahaṃ sāsanabrahmacariyaṃ. Pakāsethāti āvikarotha.
အပ္ပရဇက္ခဇာတိကာတိ ပညာစက္ခုမ္ဟိ အပ္ပကိလေသရဇသဘာဝာ, ဒုကူလသာဏိယာ ပဋိစ္ဆန္နာ ဝိယ စတုပ္ပဒိကဂာထာပရိယောသာနေ အရဟတ္တံ ပတ္တုံ သမတ္ထာ သန္တီတိ အတ္ထော။ အသ္သဝနတာတိ အသ္သဝနတာယ။ ပရိဟာယန္တီတိ အလာဘပရိဟာနိယာ ဓမ္မတော ပရိဟာယန္တိ။ သေနာနိဂမောတိ ပဌမကပ္ပိကာနံ သေနာယ နိဝိဋ္ဌောကာသေ ပတိဋ္ဌိတဂာမော, သုဇာတာယ ဝာ ပိတု သေနာနီ နာမ နိဂမော။ တေနုပသင္ကမိသ္သာမီတိ နာဟံ တုမ္ဟေ ဥယ္ယောဇေတ္ဝာ ပရိဝေဏာဒီနိ ကာရေတ္ဝာ ဥပဋ္ဌာကာဒီဟိ ပရိစရိယမာနော ဝိဟရိသ္သာမိ, တိဏ္ဏံ ပန ဇဋိလာနံ အဍ္ဎုဍ္ဎာနိ ပာဋိဟာရိယသဟသ္သာနိ ဒသ္သေတ္ဝာ ဓမ္မမေဝ ဒေသေတုံ ဥပသင္ကမိသ္သာမီတိ။ တေနုပသင္ကမီတိ, ‘‘အယံ သမဏော ဂောတမော မဟာယုဒ္ဓံ ဝိစာရေန္တော ဝိယ, ‘မာ ဧကေန ဒ္ဝေ အဂမိတ္ထ, ဓမ္မံ ဒေသေထာ’တိ သဋ္ဌိ ဇနေ ဥယ္ယောဇေတိ, ဣမသ္မိံ ပန ဧကသ္မိမ္ပိ ဓမ္မံ ဒေသေန္တေ မယ္ဟံ စိတ္တသ္သာဒံ နတ္ထိ, ဧဝံ ဗဟူသု ဒေသေန္တေသု ကုတော ဘဝိသ္သတိ, ပဋိဗာဟာမိ န’’န္တိ စိန္တေတ္ဝာ ဥပသင္ကမိ။ ပဉ္စမံ။
Apparajakkhajātikāti paññācakkhumhi appakilesarajasabhāvā, dukūlasāṇiyā paṭicchannā viya catuppadikagāthāpariyosāne arahattaṃ pattuṃ samatthā santīti attho. Assavanatāti assavanatāya. Parihāyantīti alābhaparihāniyā dhammato parihāyanti. Senānigamoti paṭhamakappikānaṃ senāya niviṭṭhokāse patiṭṭhitagāmo, sujātāya vā pitu senānī nāma nigamo. Tenupasaṅkamissāmīti nāhaṃ tumhe uyyojetvā pariveṇādīni kāretvā upaṭṭhākādīhi paricariyamāno viharissāmi, tiṇṇaṃ pana jaṭilānaṃ aḍḍhuḍḍhāni pāṭihāriyasahassāni dassetvā dhammameva desetuṃ upasaṅkamissāmīti. Tenupasaṅkamīti, ‘‘ayaṃ samaṇo gotamo mahāyuddhaṃ vicārento viya, ‘mā ekena dve agamittha, dhammaṃ desethā’ti saṭṭhi jane uyyojeti, imasmiṃ pana ekasmimpi dhammaṃ desente mayhaṃ cittassādaṃ natthi, evaṃ bahūsu desentesu kuto bhavissati, paṭibāhāmi na’’nti cintetvā upasaṅkami. Pañcamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဒုတိယမာရပာသသုတ္တံ • 5. Dutiyamārapāsasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဒုတိယမာရပာသသုတ္တဝဏ္ဏနာ • 5. Dutiyamārapāsasuttavaṇṇanā
