| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༥. དུཏིཡམཱརཔཱསསུཏྟཝཎྞནཱ
5. Dutiyamārapāsasuttavaṇṇanā
༡༤༡. ཨནུཔུབྦགམནཙཱརིཀནྟི གཱམནིགམརཱཛདྷཱནཱིསུ ཨནུཀྐམེན གམནསངྑཱཏཾ ཙཱརིཀཾ། ཨེཝཾ ཧི གཏེསཱུཏི ཨེཝཾ ཏུམྷེསུ བཧཱུསུ ཨེཀཛ྄ཛྷཾ གཏེསུ།
141.Anupubbagamanacārikanti gāmanigamarājadhānīsu anukkamena gamanasaṅkhātaṃ cārikaṃ. Evaṃ hi gatesūti evaṃ tumhesu bahūsu ekajjhaṃ gatesu.
ཨཱདིམྷི ཀལྱཱཎཾ ཨེཏསྶཱཏི ཨཱདིཀལྱཱཎཾ, ཏཐཱ སེསེསུ། སཱསནསྶ ཨཱདི སཱིལཾ མཱུལཀཏྟཱ། ཏསྶ སམཐཱདཡོ མཛ྄ཛྷཾ སཱསནསམྤཏྟིཡཱ ཝེམཛ྄ཛྷབྷཱཝཏོ། ཕལནིབྦཱནཱནི པརིཡོསཱནཾ ཏདདྷིགམཏོ ཨུཏྟརི ཀརཎཱིཡཱབྷཱཝཏོ། སཱསནེ སམྨཱཔཊིཔཏྟི ནཱམ པཉྙཱཡ ཧོཏི, ཏསྶཱ ཙ སཱིལཾ སམཱདྷི ཙ མཱུལནྟི ཨཱཧ ‘‘སཱིལསམཱདྷཡོ ཝཱ ཨཱདཱི’’ཏི། ཡསྨཱ པཉྙཱ ཨནུབོདྷཔཊིཝེདྷཝསེན དུཝིདྷཱ, ཏསྨཱ ཏདུབྷཡཾ གཎྷནྟོ ‘‘ཝིཔསྶནཱམགྒཱ མཛ྄ཛྷ’’ནྟི ཨཱཧ། པཉྙཱནིཔྥཏྟི ཕལཀིཙྩཾ, ནིབྦཱནསཙྪིཀིརིཡཱ པན སམྨཱཔཊིཔཏྟིཡཱ པརིཡོསཱནཾ ཏཏོ པརཾ ཀཏྟབྦཱབྷཱཝཏོཏི ཨཱཧ ‘‘ཕལནིབྦཱནཱནི པརིཡོསཱན’’ནྟི། ཕལགྒཧཎེན ཧི སཨུཔཱདིསེསནིབྦཱནཾ གཡ྄ཧཏི, ཨིཏརེན ཨིཏརཾ, ཏདུབྷཡཝསེན པཊིཔཏྟིཡཱ ཨོསཱནནྟི ཨཱཧ ‘‘ཕལནིབྦཱནཱནི པརིཡོསཱན’’ནྟི། ‘‘ཏསྨཱཏིཧ ཏྭཾ, བྷིཀྑུ, ཨཱདིམེཝ ཝིསོདྷེཧི ཀུསལེསུ དྷམྨེསུ། ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷཾ, དིཊྛི ཙ ཨུཛུཀཱ’’ཏི (སཾ॰ ནི॰ ༥.༣༦༩) ཝཙནཏོ སཱིལདིཊྛུཛུཀཏཱཡ མཏྠཀབྷཱུཏཱ ཝིཔསྶནཱ, ཏདདྷིཊྛཱནཱ སཱིལསམཱདྷཱིཏི ཨིམེ ཏསྶ སཱསནསྶ མཱུལནྟི ཨཱཧ ‘‘སཱིལསམཱདྷིཝིཔསྶནཱ ཝཱ ཨཱདཱི’’ཏི། སེསཾ ཝུཏྟནཡམེཝ།
Ādimhi kalyāṇaṃ etassāti ādikalyāṇaṃ, tathā sesesu. Sāsanassa ādi sīlaṃ mūlakattā. Tassa samathādayo majjhaṃ sāsanasampattiyā vemajjhabhāvato. Phalanibbānāni pariyosānaṃ tadadhigamato uttari karaṇīyābhāvato. Sāsane sammāpaṭipatti nāma paññāya hoti, tassā ca sīlaṃ samādhi ca mūlanti āha ‘‘sīlasamādhayo vā ādī’’ti. Yasmā paññā anubodhapaṭivedhavasena duvidhā, tasmā tadubhayaṃ gaṇhanto ‘‘vipassanāmaggā majjha’’nti āha. Paññānipphatti phalakiccaṃ, nibbānasacchikiriyā pana sammāpaṭipattiyā pariyosānaṃ tato paraṃ kattabbābhāvatoti āha ‘‘phalanibbānāni pariyosāna’’nti. Phalaggahaṇena hi saupādisesanibbānaṃ gayhati, itarena itaraṃ, tadubhayavasena paṭipattiyā osānanti āha ‘‘phalanibbānāni pariyosāna’’nti. ‘‘Tasmātiha tvaṃ, bhikkhu, ādimeva visodhehi kusalesu dhammesu. Ko cādi kusalānaṃ dhammānaṃ? Sīlañca suvisuddhaṃ, diṭṭhi ca ujukā’’ti (saṃ. ni. 5.369) vacanato sīladiṭṭhujukatāya matthakabhūtā vipassanā, tadadhiṭṭhānā sīlasamādhīti ime tassa sāsanassa mūlanti āha ‘‘sīlasamādhivipassanā vā ādī’’ti. Sesaṃ vuttanayameva.
ཀིཉྩཱཔི ཨཝཡཝཝིནིམུཏྟོ སམུདཱཡོ ནཏྠི, ཡེསུ པན ཨཝཡཝེསུ སམུདཱཡརཱུཔེན ཨཔེཀྑིཏེསུ གཱཐཱཏི སམཉྙཱ, ཏཾ ཏཏོ བྷིནྣཾ ཝིཡ ཀཏྭཱ དསྶེནྟོ ‘‘ཙཏུཔྤདིཀགཱཐཱཡ ཏཱཝ པཋམཔཱདོ’’ཏིཨཱདིམཱཧ། པཉྩཔདཚཔྤདཱནཾ གཱཐཱནཾ ཨཱདིཔརིཡོསཱནགྒཧཎེན ཨིཏརེ དུཏིཡཱདཡོ ཏཡོ ཙཏྟཱརོ ཝཱ མཛ྄ཛྷནྟི ཨཝུཏྟསིདྡྷམེཝཱཏི ན ཝུཏྟཾ། ཨེཀཱནུསནྡྷིཀསུཏྟསྶཱཏི ཨིདཾ བཧུཝིབྷཱགཾ ཡཐཱནུསནྡྷིནཱ ཨེཀཱནུསནྡྷིཀཾ སུཏྟཾ སནྡྷཱཡ ཝུཏྟཾ, ཨིཏརསྶ པན ཏེཡེཝ དེསེཏབྦདྷམྨཝིབྷཱགེན ཨཱདིམཛ྄ཛྷཔརིཡོསཱནབྷཱགཱ ལབྦྷནྟི། ནིདཱནནྟི ཀཱལདེསཀཔརིསཱདི-ཨཔདིསནལཀྑཎཱདིཀོ ཨཏྠོ། ཨིདམཝོཙཱཏི ཨིཏི-སདྡོ ཨཱདིཨཏྠོ། ཏེན ཏདཝསེསནིགམནཔཱལི༹ཾ སངྒཎྷཱཏི། ཨནེཀཱནུསནྡྷཱིཀསྶ སཧ ནིདཱནེན པཋམོ ཨནུསནྡྷི ཨཱདི། སཧ ནིགམནེན པཙྪིམོ པརིཡོསཱནཾ, ཨིཏརེན མཛ྄ཛྷིམནྟིཨཱདིམཛ྄ཛྷཔརིཡོསཱནཱནི ཝེདིཏབྦཱནི།
Kiñcāpi avayavavinimutto samudāyo natthi, yesu pana avayavesu samudāyarūpena apekkhitesu gāthāti samaññā, taṃ tato bhinnaṃ viya katvā dassento ‘‘catuppadikagāthāya tāva paṭhamapādo’’tiādimāha. Pañcapadachappadānaṃ gāthānaṃ ādipariyosānaggahaṇena itare dutiyādayo tayo cattāro vā majjhanti avuttasiddhamevāti na vuttaṃ. Ekānusandhikasuttassāti idaṃ bahuvibhāgaṃ yathānusandhinā ekānusandhikaṃ suttaṃ sandhāya vuttaṃ, itarassa pana teyeva desetabbadhammavibhāgena ādimajjhapariyosānabhāgā labbhanti. Nidānanti kāladesakaparisādi-apadisanalakkhaṇādiko attho. Idamavocāti iti-saddo ādiattho. Tena tadavasesanigamanapāḷiṃ saṅgaṇhāti. Anekānusandhīkassa saha nidānena paṭhamo anusandhi ādi. Saha nigamanena pacchimo pariyosānaṃ, itarena majjhimantiādimajjhapariyosānāni veditabbāni.
སཱཏྠཀནྟི ཨཏྠསམྤཏྟིཡཱ སཱཏྠཀཾ ཀཏྭཱ། སབྱཉྫནནྟི བྱཉྫནསམྤཏྟིཡཱ སབྱཉྫནཾ། སམྤཏྟི ཙ ནཱམ པརིཔུཎྞབྱཉྫནཏཱཏི ཨཱཧ ‘‘བྱཉྫནེཧི…པེ॰… དེསེཏཱ’’ཏི། སཀལཔརིཔུཎྞནྟི སབྦསོ པརིཔུཎྞཾ སཱིལཱདིཔཉྩདྷམྨཀྑནྡྷཔཱརིཔཱུརིཡཱ། ནིརུཔཀྐིལེསཾ དིཊྛིམཱནཱདིཨུཔཀྐིལེསཱབྷཱཝཏོ། ཨཝིསེསཏོ ཏིསྶོ སིཀྑཱ སཀལེ སཱསནེ བྷཝནྟི། དྷམྨོཏི པན བྲཧྨཙརིཡཾ ཝཱ སནྡྷཱཡ ཝུཏྟཾ ‘‘ཀཏམེསཱནཾ ཁོ, བྷནྟེ, བུདྡྷཱནཾ བྷགཝནྟཱནཾ བྲཧྨཙརིཡཾ ཙིརཊྛིཏིཀཾ ཨཧོསཱི’’ཏིཨཱདཱིསུ (པཱརཱ॰ ༡༨) ཝིཡ། དུཀཱུལསཱཎིཡཱ པཊིཙྪནྣཱ ཝིཡ, ན ཏུ པཱཀཱརསེལཱདིཔཊིཙྪནྣཱ ཝིཡ། ཏེན དྷམྨནིརུཏྟིཡཱ སཀལཀིལེསཱནཾ པཧཱནཱནུབྷཱཝཾ ཝདཏི། ཨལཱབྷཔརིཧཱནིཡཱ, ན ལདྡྷཔརིཧཱནིཡཱ། ཨཌྜྷུཌྜྷཱནཱིཏི པཉྩསཏཱདྷིཀཱནི ཏཱིཎི པཱཊིཧཱརིཡསཧསྶཱནི། སཱཏནྟི སུཁཾ།
Sātthakanti atthasampattiyā sātthakaṃ katvā. Sabyañjananti byañjanasampattiyā sabyañjanaṃ. Sampatti ca nāma paripuṇṇabyañjanatāti āha ‘‘byañjanehi…pe… desetā’’ti. Sakalaparipuṇṇanti sabbaso paripuṇṇaṃ sīlādipañcadhammakkhandhapāripūriyā. Nirupakkilesaṃ diṭṭhimānādiupakkilesābhāvato. Avisesato tisso sikkhā sakale sāsane bhavanti. Dhammoti pana brahmacariyaṃ vā sandhāya vuttaṃ ‘‘katamesānaṃ kho, bhante, buddhānaṃ bhagavantānaṃ brahmacariyaṃ ciraṭṭhitikaṃ ahosī’’tiādīsu (pārā. 18) viya. Dukūlasāṇiyā paṭicchannā viya, na tu pākāraselādipaṭicchannā viya. Tena dhammaniruttiyā sakalakilesānaṃ pahānānubhāvaṃ vadati. Alābhaparihāniyā, na laddhaparihāniyā. Aḍḍhuḍḍhānīti pañcasatādhikāni tīṇi pāṭihāriyasahassāni. Sātanti sukhaṃ.
དུཏིཡམཱརཔཱསསུཏྟཝཎྞནཱ ནིཊྛིཏཱ།
Dutiyamārapāsasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༥. དུཏིཡམཱརཔཱསསུཏྟཾ • 5. Dutiyamārapāsasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. དུཏིཡམཱརཔཱསསུཏྟཝཎྞནཱ • 5. Dutiyamārapāsasuttavaṇṇanā
