| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. து³தியமித்தாமச்சஸுத்தங்
7. Dutiyamittāmaccasuttaṃ
1013. ‘‘யே தே, பி⁴க்க²வே, அனுகம்பெய்யாத², யே ச ஸோதப்³ப³ங் மஞ்ஞெய்யுங் – மித்தா வா அமச்சா வா ஞாதீ வா ஸாலோஹிதா வா – தே, பி⁴க்க²வே, சதூஸு ஸோதாபத்தியங்கே³ஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³. கதமேஸு சதூஸு? பு³த்³தே⁴ அவேச்சப்பஸாதே³ ஸமாத³பேதப்³பா³, நிவேஸேதப்³பா³, பதிட்டா²பேதப்³பா³ – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வா’’தி.
1013. ‘‘Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave, catūsu sotāpattiyaṅgesu samādapetabbā, nivesetabbā, patiṭṭhāpetabbā. Katamesu catūsu? Buddhe aveccappasāde samādapetabbā, nivesetabbā, patiṭṭhāpetabbā – itipi so bhagavā…pe… satthā devamanussānaṃ buddho bhagavā’’ti.
‘‘ஸியா, பி⁴க்க²வே, சதுன்னங் மஹாபூ⁴தானங் அஞ்ஞத²த்தங் – பத²வீதா⁴துயா, ஆபோதா⁴துயா, தேஜோதா⁴துயா, வாயோதா⁴துயா – ந த்வேவ பு³த்³தே⁴ அவேச்சப்பஸாதே³ன ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தங். தத்ரித³ங் அஞ்ஞத²த்தங் – ஸோ வத பு³த்³தே⁴ அவேச்சப்பஸாதே³ன ஸமன்னாக³தோ அரியஸாவகோ நிரயங் வா திரச்சா²னயோனிங் வா பெத்திவிஸயங் வா உபபஜ்ஜிஸ்ஸதீ’’தி – நேதங் டா²னங் விஜ்ஜதி. ‘‘த⁴ம்மே…பே॰… ஸங்கே⁴…பே॰… அரியகந்தேஸு ஸீலேஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³ அக²ண்டே³ஸு…பே॰… ஸமாதி⁴ஸங்வத்தனிகேஸு. ஸியா, பி⁴க்க²வே, சதுன்னங் மஹாபூ⁴தானங் அஞ்ஞத²த்தங் – பத²வீதா⁴துயா, ஆபோதா⁴துயா, தேஜோதா⁴துயா, வாயோதா⁴துயா – ந த்வேவ அரியகந்தேஹி ஸீலேஹி ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தங். தத்ரித³ங் அஞ்ஞத²த்தங் – ஸோ வத அரியகந்தேஹி ஸீலேஹி ஸமன்னாக³தோ அரியஸாவகோ நிரயங் வா திரச்சா²னயோனிங் வா பெத்திவிஸயங் வா உபபஜ்ஜிஸ்ஸதீதி – நேதங் டா²னங் விஜ்ஜதி. யே தே, பி⁴க்க²வே, அனுகம்பெய்யாத², யே ச ஸோதப்³ப³ங் மஞ்ஞெய்யுங் – மித்தா வா அமச்சா வா ஞாதீ வா ஸாலோஹிதா வா – தே, பி⁴க்க²வே , இமேஸு சதூஸு ஸோதாபத்தியங்கே³ஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³’’தி. ஸத்தமங்.
‘‘Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva buddhe aveccappasādena samannāgatassa ariyasāvakassa siyā aññathattaṃ. Tatridaṃ aññathattaṃ – so vata buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatī’’ti – netaṃ ṭhānaṃ vijjati. ‘‘Dhamme…pe… saṅghe…pe… ariyakantesu sīlesu samādapetabbā, nivesetabbā, patiṭṭhāpetabbā akhaṇḍesu…pe… samādhisaṃvattanikesu. Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva ariyakantehi sīlehi samannāgatassa ariyasāvakassa siyā aññathattaṃ. Tatridaṃ aññathattaṃ – so vata ariyakantehi sīlehi samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti – netaṃ ṭhānaṃ vijjati. Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave , imesu catūsu sotāpattiyaṅgesu samādapetabbā, nivesetabbā, patiṭṭhāpetabbā’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. து³தியமித்தாமச்சஸுத்தவண்ணனா • 7. Dutiyamittāmaccasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. து³தியமித்தாமச்சஸுத்தவண்ணனா • 7. Dutiyamittāmaccasuttavaṇṇanā
