| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. দুতিযমিত্তামচ্চসুত্তং
7. Dutiyamittāmaccasuttaṃ
১০১৩. ‘‘যে তে, ভিক্খৰে, অনুকম্পেয্যাথ, যে চ সোতব্বং মঞ্ঞেয্যুং – মিত্তা ৰা অমচ্চা ৰা ঞাতী ৰা সালোহিতা ৰা – তে, ভিক্খৰে, চতূসু সোতাপত্তিযঙ্গেসু সমাদপেতব্বা, নিৰেসেতব্বা, পতিট্ঠাপেতব্বা। কতমেসু চতূসু? বুদ্ধে অৰেচ্চপ্পসাদে সমাদপেতব্বা, নিৰেসেতব্বা, পতিট্ঠাপেতব্বা – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰা’’তি।
1013. ‘‘Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave, catūsu sotāpattiyaṅgesu samādapetabbā, nivesetabbā, patiṭṭhāpetabbā. Katamesu catūsu? Buddhe aveccappasāde samādapetabbā, nivesetabbā, patiṭṭhāpetabbā – itipi so bhagavā…pe… satthā devamanussānaṃ buddho bhagavā’’ti.
‘‘সিযা, ভিক্খৰে, চতুন্নং মহাভূতানং অঞ্ঞথত্তং – পথৰীধাতুযা, আপোধাতুযা, তেজোধাতুযা, ৰাযোধাতুযা – ন ত্ৰেৰ বুদ্ধে অৰেচ্চপ্পসাদেন সমন্নাগতস্স অরিযসাৰকস্স সিযা অঞ্ঞথত্তং। তত্রিদং অঞ্ঞথত্তং – সো ৰত বুদ্ধে অৰেচ্চপ্পসাদেন সমন্নাগতো অরিযসাৰকো নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জিস্সতী’’তি – নেতং ঠানং ৰিজ্জতি। ‘‘ধম্মে…পে॰… সঙ্ঘে…পে॰… অরিযকন্তেসু সীলেসু সমাদপেতব্বা, নিৰেসেতব্বা, পতিট্ঠাপেতব্বা অখণ্ডেসু…পে॰… সমাধিসংৰত্তনিকেসু। সিযা, ভিক্খৰে, চতুন্নং মহাভূতানং অঞ্ঞথত্তং – পথৰীধাতুযা, আপোধাতুযা, তেজোধাতুযা, ৰাযোধাতুযা – ন ত্ৰেৰ অরিযকন্তেহি সীলেহি সমন্নাগতস্স অরিযসাৰকস্স সিযা অঞ্ঞথত্তং। তত্রিদং অঞ্ঞথত্তং – সো ৰত অরিযকন্তেহি সীলেহি সমন্নাগতো অরিযসাৰকো নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জিস্সতীতি – নেতং ঠানং ৰিজ্জতি। যে তে, ভিক্খৰে, অনুকম্পেয্যাথ, যে চ সোতব্বং মঞ্ঞেয্যুং – মিত্তা ৰা অমচ্চা ৰা ঞাতী ৰা সালোহিতা ৰা – তে, ভিক্খৰে , ইমেসু চতূসু সোতাপত্তিযঙ্গেসু সমাদপেতব্বা, নিৰেসেতব্বা, পতিট্ঠাপেতব্বা’’তি। সত্তমং।
‘‘Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva buddhe aveccappasādena samannāgatassa ariyasāvakassa siyā aññathattaṃ. Tatridaṃ aññathattaṃ – so vata buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatī’’ti – netaṃ ṭhānaṃ vijjati. ‘‘Dhamme…pe… saṅghe…pe… ariyakantesu sīlesu samādapetabbā, nivesetabbā, patiṭṭhāpetabbā akhaṇḍesu…pe… samādhisaṃvattanikesu. Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva ariyakantehi sīlehi samannāgatassa ariyasāvakassa siyā aññathattaṃ. Tatridaṃ aññathattaṃ – so vata ariyakantehi sīlehi samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti – netaṃ ṭhānaṃ vijjati. Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave , imesu catūsu sotāpattiyaṅgesu samādapetabbā, nivesetabbā, patiṭṭhāpetabbā’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. দুতিযমিত্তামচ্চসুত্তৰণ্ণনা • 7. Dutiyamittāmaccasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. দুতিযমিত্তামচ্চসুত্তৰণ্ণনা • 7. Dutiyamittāmaccasuttavaṇṇanā
