| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. ဒုတိယမိတ္တာမစ္စသုတ္တံ
7. Dutiyamittāmaccasuttaṃ
၁၀၁၃. ‘‘ယေ တေ, ဘိက္ခဝေ, အနုကမ္ပေယ္ယာထ, ယေ စ သောတဗ္ဗံ မညေယ္ယုံ – မိတ္တာ ဝာ အမစ္စာ ဝာ ဉာတီ ဝာ သာလောဟိတာ ဝာ – တေ, ဘိက္ခဝေ, စတူသု သောတာပတ္တိယင္ဂေသု သမာဒပေတဗ္ဗာ, နိဝေသေတဗ္ဗာ, ပတိဋ္ဌာပေတဗ္ဗာ။ ကတမေသု စတူသု? ဗုဒ္ဓေ အဝေစ္စပ္ပသာဒေ သမာဒပေတဗ္ဗာ, နိဝေသေတဗ္ဗာ, ပတိဋ္ဌာပေတဗ္ဗာ – ဣတိပိ သော ဘဂဝာ။ပေ.။ သတ္ထာ ဒေဝမနုသ္သာနံ ဗုဒ္ဓော ဘဂဝာ’’တိ။
1013. ‘‘Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave, catūsu sotāpattiyaṅgesu samādapetabbā, nivesetabbā, patiṭṭhāpetabbā. Katamesu catūsu? Buddhe aveccappasāde samādapetabbā, nivesetabbā, patiṭṭhāpetabbā – itipi so bhagavā…pe… satthā devamanussānaṃ buddho bhagavā’’ti.
‘‘သိယာ, ဘိက္ခဝေ, စတုန္နံ မဟာဘူတာနံ အညထတ္တံ – ပထဝီဓာတုယာ, အာပောဓာတုယာ, တေဇောဓာတုယာ, ဝာယောဓာတုယာ – န တ္ဝေဝ ဗုဒ္ဓေ အဝေစ္စပ္ပသာဒေန သမန္နာဂတသ္သ အရိယသာဝကသ္သ သိယာ အညထတ္တံ။ တတ္ရိဒံ အညထတ္တံ – သော ဝတ ဗုဒ္ဓေ အဝေစ္စပ္ပသာဒေန သမန္နာဂတော အရိယသာဝကော နိရယံ ဝာ တိရစ္ဆာနယောနိံ ဝာ ပေတ္တိဝိသယံ ဝာ ဥပပဇ္ဇိသ္သတီ’’တိ – နေတံ ဌာနံ ဝိဇ္ဇတိ။ ‘‘ဓမ္မေ။ပေ.။ သင္ဃေ။ပေ.။ အရိယကန္တေသု သီလေသု သမာဒပေတဗ္ဗာ, နိဝေသေတဗ္ဗာ, ပတိဋ္ဌာပေတဗ္ဗာ အခဏ္ဍေသု။ပေ.။ သမာဓိသံဝတ္တနိကေသု။ သိယာ, ဘိက္ခဝေ, စတုန္နံ မဟာဘူတာနံ အညထတ္တံ – ပထဝီဓာတုယာ, အာပောဓာတုယာ, တေဇောဓာတုယာ, ဝာယောဓာတုယာ – န တ္ဝေဝ အရိယကန္တေဟိ သီလေဟိ သမန္နာဂတသ္သ အရိယသာဝကသ္သ သိယာ အညထတ္တံ။ တတ္ရိဒံ အညထတ္တံ – သော ဝတ အရိယကန္တေဟိ သီလေဟိ သမန္နာဂတော အရိယသာဝကော နိရယံ ဝာ တိရစ္ဆာနယောနိံ ဝာ ပေတ္တိဝိသယံ ဝာ ဥပပဇ္ဇိသ္သတီတိ – နေတံ ဌာနံ ဝိဇ္ဇတိ။ ယေ တေ, ဘိက္ခဝေ, အနုကမ္ပေယ္ယာထ, ယေ စ သောတဗ္ဗံ မညေယ္ယုံ – မိတ္တာ ဝာ အမစ္စာ ဝာ ဉာတီ ဝာ သာလောဟိတာ ဝာ – တေ, ဘိက္ခဝေ , ဣမေသု စတူသု သောတာပတ္တိယင္ဂေသု သမာဒပေတဗ္ဗာ, နိဝေသေတဗ္ဗာ, ပတိဋ္ဌာပေတဗ္ဗာ’’တိ။ သတ္တမံ။
‘‘Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva buddhe aveccappasādena samannāgatassa ariyasāvakassa siyā aññathattaṃ. Tatridaṃ aññathattaṃ – so vata buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatī’’ti – netaṃ ṭhānaṃ vijjati. ‘‘Dhamme…pe… saṅghe…pe… ariyakantesu sīlesu samādapetabbā, nivesetabbā, patiṭṭhāpetabbā akhaṇḍesu…pe… samādhisaṃvattanikesu. Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva ariyakantehi sīlehi samannāgatassa ariyasāvakassa siyā aññathattaṃ. Tatridaṃ aññathattaṃ – so vata ariyakantehi sīlehi samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti – netaṃ ṭhānaṃ vijjati. Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave , imesu catūsu sotāpattiyaṅgesu samādapetabbā, nivesetabbā, patiṭṭhāpetabbā’’ti. Sattamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဒုတိယမိတ္တာမစ္စသုတ္တဝဏ္ဏနာ • 7. Dutiyamittāmaccasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဒုတိယမိတ္တာမစ္စသုတ္တဝဏ္ဏနာ • 7. Dutiyamittāmaccasuttavaṇṇanā
