| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. දුතියමිත්‌තාමච්‌චසුත්‌තං
7. Dutiyamittāmaccasuttaṃ
1013. ‘‘යෙ තෙ, භික්‌ඛවෙ, අනුකම්‌පෙය්‍යාථ, යෙ ච සොතබ්‌බං මඤ්‌ඤෙය්‍යුං – මිත්‌තා වා අමච්‌චා වා ඤාතී වා සාලොහිතා වා – තෙ, භික්‌ඛවෙ, චතූසු සොතාපත්‌තියඞ්‌ගෙසු සමාදපෙතබ්‌බා, නිවෙසෙතබ්‌බා, පතිට්‌ඨාපෙතබ්‌බා. කතමෙසු චතූසු? බුද්‌ධෙ අවෙච්‌චප්‌පසාදෙ සමාදපෙතබ්‌බා, නිවෙසෙතබ්‌බා, පතිට්‌ඨාපෙතබ්‌බා – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවා’’ති.
1013. ‘‘Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave, catūsu sotāpattiyaṅgesu samādapetabbā, nivesetabbā, patiṭṭhāpetabbā. Katamesu catūsu? Buddhe aveccappasāde samādapetabbā, nivesetabbā, patiṭṭhāpetabbā – itipi so bhagavā…pe… satthā devamanussānaṃ buddho bhagavā’’ti.
‘‘සියා, භික්‌ඛවෙ, චතුන්‌නං මහාභූතානං අඤ්‌ඤථත්‌තං – පථවීධාතුයා, ආපොධාතුයා, තෙජොධාතුයා, වායොධාතුයා – න ත්‌වෙව බුද්‌ධෙ අවෙච්‌චප්‌පසාදෙන සමන්‌නාගතස්‌ස අරියසාවකස්‌ස සියා අඤ්‌ඤථත්‌තං. තත්‍රිදං අඤ්‌ඤථත්‌තං – සො වත බුද්‌ධෙ අවෙච්‌චප්‌පසාදෙන සමන්‌නාගතො අරියසාවකො නිරයං වා තිරච්‌ඡානයොනිං වා පෙත්‌තිවිසයං වා උපපජ්‌ජිස්‌සතී’’ති – නෙතං ඨානං විජ්‌ජති. ‘‘ධම්‌මෙ…පෙ.… සඞ්‌ඝෙ…පෙ.… අරියකන්‌තෙසු සීලෙසු සමාදපෙතබ්‌බා, නිවෙසෙතබ්‌බා, පතිට්‌ඨාපෙතබ්‌බා අඛණ්‌ඩෙසු…පෙ.… සමාධිසංවත්‌තනිකෙසු. සියා, භික්‌ඛවෙ, චතුන්‌නං මහාභූතානං අඤ්‌ඤථත්‌තං – පථවීධාතුයා, ආපොධාතුයා, තෙජොධාතුයා, වායොධාතුයා – න ත්‌වෙව අරියකන්‌තෙහි සීලෙහි සමන්‌නාගතස්‌ස අරියසාවකස්‌ස සියා අඤ්‌ඤථත්‌තං. තත්‍රිදං අඤ්‌ඤථත්‌තං – සො වත අරියකන්‌තෙහි සීලෙහි සමන්‌නාගතො අරියසාවකො නිරයං වා තිරච්‌ඡානයොනිං වා පෙත්‌තිවිසයං වා උපපජ්‌ජිස්‌සතීති – නෙතං ඨානං විජ්‌ජති. යෙ තෙ, භික්‌ඛවෙ, අනුකම්‌පෙය්‍යාථ, යෙ ච සොතබ්‌බං මඤ්‌ඤෙය්‍යුං – මිත්‌තා වා අමච්‌චා වා ඤාතී වා සාලොහිතා වා – තෙ, භික්‌ඛවෙ , ඉමෙසු චතූසු සොතාපත්‌තියඞ්‌ගෙසු සමාදපෙතබ්‌බා, නිවෙසෙතබ්‌බා, පතිට්‌ඨාපෙතබ්‌බා’’ති. සත්‌තමං.
‘‘Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva buddhe aveccappasādena samannāgatassa ariyasāvakassa siyā aññathattaṃ. Tatridaṃ aññathattaṃ – so vata buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatī’’ti – netaṃ ṭhānaṃ vijjati. ‘‘Dhamme…pe… saṅghe…pe… ariyakantesu sīlesu samādapetabbā, nivesetabbā, patiṭṭhāpetabbā akhaṇḍesu…pe… samādhisaṃvattanikesu. Siyā, bhikkhave, catunnaṃ mahābhūtānaṃ aññathattaṃ – pathavīdhātuyā, āpodhātuyā, tejodhātuyā, vāyodhātuyā – na tveva ariyakantehi sīlehi samannāgatassa ariyasāvakassa siyā aññathattaṃ. Tatridaṃ aññathattaṃ – so vata ariyakantehi sīlehi samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti – netaṃ ṭhānaṃ vijjati. Ye te, bhikkhave, anukampeyyātha, ye ca sotabbaṃ maññeyyuṃ – mittā vā amaccā vā ñātī vā sālohitā vā – te, bhikkhave , imesu catūsu sotāpattiyaṅgesu samādapetabbā, nivesetabbā, patiṭṭhāpetabbā’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. දුතියමිත්‌තාමච්‌චසුත්‌තවණ්‌ණනා • 7. Dutiyamittāmaccasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. දුතියමිත්‌තාමච්‌චසුත්‌තවණ්‌ණනා • 7. Dutiyamittāmaccasuttavaṇṇanā
