| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4-6. து³தியனானாகரணஸுத்தாதி³வண்ணனா
4-6. Dutiyanānākaraṇasuttādivaṇṇanā
124-6. சதுத்தே² தே த⁴ம்மேதி தே ‘‘ரூபக³த’’ந்திஆதி³னா நயேன வுத்தே ரூபாத³யோ த⁴ம்மே. அனிச்சதோதி இமினா நிச்சப்படிக்கே²பதோ தேஸங் அனிச்சதமாஹ, ததோ ஏவ ச உத³யவயவந்ததோ விபரிணாமதோ தாவகாலிகதோ ச தே அனிச்சாதி ஜோதிதங் ஹோதி. யஞ்ஹி நிப்³ப³த்தங் ஹோதி, தங் உத³யவயபரிச்சி²ன்னங் . ஜராய மரணேன ச ததே³வ விபரீதங், இத்தரக்க²ணமேவ ச ஹோதீதி. து³க்க²தோதி இமினா ஸுக²ப்படிக்கே²பதோ தேஸங் து³க்க²தமாஹ. ததோ ஏவ ச அபி⁴ண்ஹப்படிபீளனதோ து³க்க²வத்து²தோ ச தே து³க்கா²தி ஜோதிதங் ஹோதி. உத³யவயவந்ததாய ஹி தே அபி⁴ண்ஹப்படிபீளனதோ நிரந்தரது³க்க²தாய து³க்க²ஸ்ஸேவ ச அதி⁴ட்டா²னபூ⁴தா. பச்சயயாபனீயதாய ரோக³மூலதாய ச ரோக³தோ. து³க்க²தாஸூலயோக³தோ கிலேஸாஸுசிபக்³க⁴ரணதோ உப்பாத³ஜராப⁴ங்கே³ஹி உத்³து⁴மாதபரிபக்கபபி⁴ன்னதோ ச க³ண்ட³தோ. பீளாஜனநதோ, அந்தோதுத³னதோ, து³ன்னீஹரணதோ ச ஸல்லதோ. அவட்³டி⁴ஆவஹனதோ அக⁴வத்து²தோ ச அக⁴தோ. அஸேரிபா⁴வஜனநதோ ஆபா³த⁴பத³ட்டா²னதாய ச ஆபா³த⁴தோ. அவஸவத்தனதோ அவிதெ⁴ய்யதாய ச பரதோ. ப்³யாதி⁴ஜராமரணேஹி பலுஜ்ஜனீயதாய பலோகதோ. ஸாமினிவாஸிகாரகவேத³கஅதி⁴ட்டா²யகவிரஹதோ ஸுஞ்ஞதோ. அத்தப்படிக்கே²பட்டே²ன அனத்ததோ. ரூபாதி³த⁴ம்மா ஹி ந எத்த² அத்தா அத்தீ²தி அனத்தா. ஏவங் ஸயம்பி அத்தா ந ஹொந்தீதி அனத்தா. தேன அப்³யாபாரதோ நிரீஹதோ துச்ச²தோ அனத்தாதி தீ³பிதங் ஹோதி. லக்க²ணத்தயமேவ ஸுகா²வபோ³த⁴னத்த²ங் ஏகாத³ஸஹி பதே³ஹி விப⁴ஜித்வா க³ஹிதந்தி த³ஸ்ஸேதுங் ‘‘தத்தா²’’திஆதி³ வுத்தங். பஞ்சமச²ட்டா²னி உத்தானத்தா²னேவ.
124-6. Catutthe te dhammeti te ‘‘rūpagata’’ntiādinā nayena vutte rūpādayo dhamme. Aniccatoti iminā niccappaṭikkhepato tesaṃ aniccatamāha, tato eva ca udayavayavantato vipariṇāmato tāvakālikato ca te aniccāti jotitaṃ hoti. Yañhi nibbattaṃ hoti, taṃ udayavayaparicchinnaṃ . Jarāya maraṇena ca tadeva viparītaṃ, ittarakkhaṇameva ca hotīti. Dukkhatoti iminā sukhappaṭikkhepato tesaṃ dukkhatamāha. Tato eva ca abhiṇhappaṭipīḷanato dukkhavatthuto ca te dukkhāti jotitaṃ hoti. Udayavayavantatāya hi te abhiṇhappaṭipīḷanato nirantaradukkhatāya dukkhasseva ca adhiṭṭhānabhūtā. Paccayayāpanīyatāya rogamūlatāya ca rogato. Dukkhatāsūlayogato kilesāsucipaggharaṇato uppādajarābhaṅgehi uddhumātaparipakkapabhinnato ca gaṇḍato. Pīḷājananato, antotudanato, dunnīharaṇato ca sallato. Avaḍḍhiāvahanato aghavatthuto ca aghato. Aseribhāvajananato ābādhapadaṭṭhānatāya ca ābādhato. Avasavattanato avidheyyatāya ca parato. Byādhijarāmaraṇehi palujjanīyatāya palokato. Sāminivāsikārakavedakaadhiṭṭhāyakavirahato suññato. Attappaṭikkhepaṭṭhena anattato. Rūpādidhammā hi na ettha attā atthīti anattā. Evaṃ sayampi attā na hontīti anattā. Tena abyāpārato nirīhato tucchato anattāti dīpitaṃ hoti. Lakkhaṇattayameva sukhāvabodhanatthaṃ ekādasahi padehi vibhajitvā gahitanti dassetuṃ ‘‘tatthā’’tiādi vuttaṃ. Pañcamachaṭṭhāni uttānatthāneva.
து³தியனானாகரணஸுத்தாதி³வண்ணனா நிட்டி²தா.
Dutiyanānākaraṇasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
4. து³தியனானாகரணஸுத்தங் • 4. Dutiyanānākaraṇasuttaṃ
5. பட²மமெத்தாஸுத்தங் • 5. Paṭhamamettāsuttaṃ
6. து³தியமெத்தாஸுத்தங் • 6. Dutiyamettāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
4. து³தியனானாகரணஸுத்தவண்ணனா • 4. Dutiyanānākaraṇasuttavaṇṇanā
5-6. மெத்தாஸுத்தத்³வயவண்ணனா • 5-6. Mettāsuttadvayavaṇṇanā
