| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. து³தியஞாணவத்து²ஸுத்தங்
4. Dutiyañāṇavatthusuttaṃ
34. ஸாவத்தி²யங் விஹரதி…பே॰… ‘‘ஸத்தஸத்தரி வோ, பி⁴க்க²வே, ஞாணவத்தூ²னி தே³ஸெஸ்ஸாமி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
34. Sāvatthiyaṃ viharati…pe… ‘‘sattasattari vo, bhikkhave, ñāṇavatthūni desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘கதமானி , பி⁴க்க²வே, ஸத்தஸத்தரி ஞாணவத்தூ²னி? ஜாதிபச்சயா ஜராமரணந்தி ஞாணங் ; அஸதி ஜாதியா நத்தி² ஜராமரணந்தி ஞாணங்; அதீதம்பி அத்³தா⁴னங் ஜாதிபச்சயா ஜராமரணந்தி ஞாணங், அஸதி ஜாதியா நத்தி² ஜராமரணந்தி ஞாணங்; அனாக³தம்பி அத்³தா⁴னங் ஜாதிபச்சயா ஜராமரணந்தி ஞாணங், அஸதி ஜாதியா நத்தி² ஜராமரணந்தி ஞாணங்; யம்பிஸ்ஸ தங் த⁴ம்மட்டி²திஞாணங் தம்பி க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி ஞாணங்.
‘‘Katamāni , bhikkhave, sattasattari ñāṇavatthūni? Jātipaccayā jarāmaraṇanti ñāṇaṃ ; asati jātiyā natthi jarāmaraṇanti ñāṇaṃ; atītampi addhānaṃ jātipaccayā jarāmaraṇanti ñāṇaṃ, asati jātiyā natthi jarāmaraṇanti ñāṇaṃ; anāgatampi addhānaṃ jātipaccayā jarāmaraṇanti ñāṇaṃ, asati jātiyā natthi jarāmaraṇanti ñāṇaṃ; yampissa taṃ dhammaṭṭhitiñāṇaṃ tampi khayadhammaṃ vayadhammaṃ virāgadhammaṃ nirodhadhammanti ñāṇaṃ.
‘‘ப⁴வபச்சயா ஜாதீதி ஞாணங்…பே॰… உபாதா³னபச்சயா ப⁴வோதி ஞாணங்… தண்ஹாபச்சயா உபாதா³னந்தி ஞாணங்… வேத³னாபச்சயா தண்ஹாதி ஞாணங்… ப²ஸ்ஸபச்சயா வேத³னாதி ஞாணங்… ஸளாயதனபச்சயா ப²ஸ்ஸோதி ஞாணங்… நாமரூபபச்சயா ஸளாயதனந்தி ஞாணங்… விஞ்ஞாணபச்சயா நாமரூபந்தி ஞாணங்… ஸங்கா²ரபச்சயா விஞ்ஞாணந்தி ஞாணங்; அவிஜ்ஜாபச்சயா ஸங்கா²ராதி ஞாணங், அஸதி அவிஜ்ஜாய நத்தி² ஸங்கா²ராதி ஞாணங்; அதீதம்பி அத்³தா⁴னங் அவிஜ்ஜாபச்சயா ஸங்கா²ராதி ஞாணங், அஸதி அவிஜ்ஜாய நத்தி² ஸங்கா²ராதி ஞாணங்; அனாக³தம்பி அத்³தா⁴னங் அவிஜ்ஜாபச்சயா ஸங்கா²ராதி ஞாணங், அஸதி அவிஜ்ஜாய நத்தி² ஸங்கா²ராதி ஞாணங்; யம்பிஸ்ஸ தங் த⁴ம்மட்டி²திஞாணங் தம்பி க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி ஞாணங். இமானி வுச்சந்தி, பி⁴க்க²வே, ஸத்தஸத்தரி ஞாணவத்தூ²னீ’’தி. சதுத்த²ங்.
‘‘Bhavapaccayā jātīti ñāṇaṃ…pe… upādānapaccayā bhavoti ñāṇaṃ… taṇhāpaccayā upādānanti ñāṇaṃ… vedanāpaccayā taṇhāti ñāṇaṃ… phassapaccayā vedanāti ñāṇaṃ… saḷāyatanapaccayā phassoti ñāṇaṃ… nāmarūpapaccayā saḷāyatananti ñāṇaṃ… viññāṇapaccayā nāmarūpanti ñāṇaṃ… saṅkhārapaccayā viññāṇanti ñāṇaṃ; avijjāpaccayā saṅkhārāti ñāṇaṃ, asati avijjāya natthi saṅkhārāti ñāṇaṃ; atītampi addhānaṃ avijjāpaccayā saṅkhārāti ñāṇaṃ, asati avijjāya natthi saṅkhārāti ñāṇaṃ; anāgatampi addhānaṃ avijjāpaccayā saṅkhārāti ñāṇaṃ, asati avijjāya natthi saṅkhārāti ñāṇaṃ; yampissa taṃ dhammaṭṭhitiñāṇaṃ tampi khayadhammaṃ vayadhammaṃ virāgadhammaṃ nirodhadhammanti ñāṇaṃ. Imāni vuccanti, bhikkhave, sattasattari ñāṇavatthūnī’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. து³தியஞாணவத்து²ஸுத்தவண்ணனா • 4. Dutiyañāṇavatthusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. து³தியஞாணவத்து²ஸுத்தவண்ணனா • 4. Dutiyañāṇavatthusuttavaṇṇanā
