| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযনন্দিক্খযসুত্তং
10. Dutiyanandikkhayasuttaṃ
৫২. সাৰত্থিনিদানং । ‘‘রূপং , ভিক্খৰে, যোনিসো মনসি করোথ, রূপানিচ্চতঞ্চ যথাভূতং সমনুপস্সথ। রূপং, ভিক্খৰে, ভিক্খু যোনিসো মনসি করোন্তো, রূপানিচ্চতঞ্চ যথাভূতং সমনুপস্সন্তো রূপস্মিং নিব্বিন্দতি। নন্দিক্খযা রাগক্খযো, রাগক্খযা নন্দিক্খযো। নন্দিরাগক্খযা চিত্তং ৰিমুত্তং সুৰিমুত্তন্তি ৰুচ্চতি। ৰেদনং, ভিক্খৰে, যোনিসো মনসি করোথ, ৰেদনানিচ্চতঞ্চ যথাভূতং সমনুপস্সথ। ৰেদনং, ভিক্খৰে, ভিক্খু যোনিসো মনসি করোন্তো, ৰেদনানিচ্চতঞ্চ যথাভূতং সমনুপস্সন্তো ৰেদনায নিব্বিন্দতি। নন্দিক্খযা রাগক্খযো, রাগক্খযা নন্দিক্খযো। নন্দিরাগক্খযা চিত্তং ৰিমুত্তং সুৰিমুত্তন্তি ৰুচ্চতি। সঞ্ঞং ভিক্খৰে… সঙ্খারে, ভিক্খৰে, যোনিসো মনসি করোথ, সঙ্খারানিচ্চতঞ্চ যথাভূতং সমনুপস্সথ। সঙ্খারে, ভিক্খৰে , ভিক্খু যোনিসো মনসি করোন্তো, সঙ্খারানিচ্চতং যথাভূতং সমনুপস্সন্তো সঙ্খারেসু নিব্বিন্দতি। নন্দিক্খযা রাগক্খযো, রাগক্খযা নন্দিক্খযো। নন্দিরাগক্খযা চিত্তং ৰিমুত্তং সুৰিমুত্তন্তি ৰুচ্চতি। ৰিঞ্ঞাণং, ভিক্খৰে, যোনিসো মনসি করোথ, ৰিঞ্ঞাণানিচ্চতঞ্চ যথাভূতং সমনুপস্সথ। ৰিঞ্ঞাণং, ভিক্খৰে, ভিক্খু যোনিসো মনসি করোন্তো, ৰিঞ্ঞাণানিচ্চতঞ্চ যথাভূতং সমনুপস্সন্তো ৰিঞ্ঞাণস্মিং নিব্বিন্দতি। নন্দিক্খযা রাগক্খযো, রাগক্খযা নন্দিক্খযো। নন্দিরাগক্খযা চিত্তং ৰিমুত্তং সুৰিমুত্তন্তি ৰুচ্চতী’’তি। দসমং।
52. Sāvatthinidānaṃ . ‘‘Rūpaṃ , bhikkhave, yoniso manasi karotha, rūpāniccatañca yathābhūtaṃ samanupassatha. Rūpaṃ, bhikkhave, bhikkhu yoniso manasi karonto, rūpāniccatañca yathābhūtaṃ samanupassanto rūpasmiṃ nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Vedanaṃ, bhikkhave, yoniso manasi karotha, vedanāniccatañca yathābhūtaṃ samanupassatha. Vedanaṃ, bhikkhave, bhikkhu yoniso manasi karonto, vedanāniccatañca yathābhūtaṃ samanupassanto vedanāya nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Saññaṃ bhikkhave… saṅkhāre, bhikkhave, yoniso manasi karotha, saṅkhārāniccatañca yathābhūtaṃ samanupassatha. Saṅkhāre, bhikkhave , bhikkhu yoniso manasi karonto, saṅkhārāniccataṃ yathābhūtaṃ samanupassanto saṅkhāresu nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Viññāṇaṃ, bhikkhave, yoniso manasi karotha, viññāṇāniccatañca yathābhūtaṃ samanupassatha. Viññāṇaṃ, bhikkhave, bhikkhu yoniso manasi karonto, viññāṇāniccatañca yathābhūtaṃ samanupassanto viññāṇasmiṃ nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccatī’’ti. Dasamaṃ.
অত্তদীপৰগ্গো পঞ্চমো।
Attadīpavaggo pañcamo.
তস্সুদ্দানং –
Tassuddānaṃ –
অত্তদীপা পটিপদা, দ্ৰে চ হোন্তি অনিচ্চতা।
Attadīpā paṭipadā, dve ca honti aniccatā;
সমনুপস্সনা খন্ধা, দ্ৰে সোণা দ্ৰে নন্দিক্খযেন চাতি॥
Samanupassanā khandhā, dve soṇā dve nandikkhayena cāti.
মূলপণ্ণাসকো সমত্তো।
Mūlapaṇṇāsako samatto.
তস্স মূলপণ্ণাসকস্স ৰগ্গুদ্দানং –
Tassa mūlapaṇṇāsakassa vagguddānaṃ –
নকুলপিতা অনিচ্চো চ, ভারো নতুম্হাকেন চ।
Nakulapitā anicco ca, bhāro natumhākena ca;
অত্তদীপেন পঞ্ঞাসো, পঠমো তেন পৰুচ্চতীতি॥
Attadīpena paññāso, paṭhamo tena pavuccatīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯-১০. নন্দিক্খযসুত্তাদিৰণ্ণনা • 9-10. Nandikkhayasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯-১০. নন্দিক্খযসুত্তাদিৰণ্ণনা • 9-10. Nandikkhayasuttādivaṇṇanā
